ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཨན་ཧུའེ་རུ་རྟོག་ཞིབ་ཐེངས་གཉིས་གནང་ནས་འཕེལ་རྒྱས་ཀྱི་འདུ་ཤེས་གསར་པ་ནན་བཤད་གནང་བ་དང་འཕེལ་རྒྱས་ཀྱི་རྣམ་པ་གསར་པ་བཏོད་དེ་རྒྱལ་ཁབ་ཀྱི་འཐབ་ཇུས་གལ་ཆེན་ལ་སྐུལ་འདེད་བཏང་ནས། ཅང་ཧོའེ་ཡི་ས་གཞི་ཆེ་མོར་ཁོང་གིས་རི་ཀླུང་མང་པོ་བརྒལ་ནས་དབུལ་པོའི་གནས་ཚུལ་འདྲི་རྩད་དང་། “རྒྱལ་ཁབ་ཀྱི་དོན་ཆེན”དོན་གཉེར་གྱི་ཞབས་རྗེས་བཞག་ཡོད། ཨན་ཧུའེ་ཡིས་སྤྱི་ཁྱབ་ཧྲུའུ་ཅིའི་མངགས་བཅོལ་བློ་ལ་བརྟན་པོར་བཅངས་ནས་དེང་རབས་ཅན་གྱི་མཛེས་སྡུག་ལྡན་པའི་ཨན་ཧུའེ་འཛུགས་སྐྲུན་གྱི་ལེའུ་གསར་པ་ཧུར་ཐག་བརྩམས་ཡོད།

“གཞི་གཅིག་ཅན་དང་སྤུས་ཚད་མཐོ་བའི་གནད་ཚིག་གཉིས་ལ་དམ་འཛིན་ནན་པོ་བྱེད་དགོས”

2020ལོའི་ཟླ་8པར་ཨན་ཧུའེ་ཧོ་ཧྥེ་རུ་འབྲི་ཆུའི་ཟུར་གསུམ་གླིང་གཞི་གཅིག་ཅན་གྱི་འཕེལ་རྒྱས་ལ་སྐུལ་འདེད་ཏན་ཏིག་གཏོང་བའི་བཞུགས་མོལ་ཚོགས་འདུ་གཙོ་སྐྱོང་གནང་སྐབས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“ཨན་ཧུའེ་ཡི་ངོས་ནས་བརྗོད་ན། ས་རྒྱུ་དང་བཞའ་ཚན་ལེགས་པའི་ཁར་སྤུས་ཀ་ལེགས་པའི་ས་བོན་ཡོད་པས་ལོ་ཏོག་སྐྱེ་འཚར་ཡག་པོ་ཡོང་ཐུབ”ཅེས་གསུངས་པ་མ་ཟད། ཁོང་གིས་ཨན་ཧུའེ་ཡིས“གཞི་གཅིག་ཅན་དང་སྤུས་ཚད་མཐོ་བའི་གནད་ཚིག་གཉིས་ལ་དམ་འཛིན་ནན་པོ”བྱེད་དགོས་ཞེས་ནན་བཤད་གནང་བ་རེད།

སྤྱི་ཁྱབ་ཧྲུའུ་ཅིའི་མངགས་བཅོལ་བློ་ལ་བརྟན་པོར་བཅངས་ནས་ཀྲུང་གོ་པའོ་ཝུའུ་མཱ་ཀང་ཚོགས་པས་འབྲི་ཆུའི་ཟུར་གསུམ་གླིང་གཞི་གཅིག་ཅན་གྱི་གོ་སྐབས་དམ་འཛིན་བྱས་པར་བརྟེན། 2021ལོར་གཉེར་སྐྱོང་ཡོང་འབབ་སྒོར་དུང་ཕྱུར་ཆིག་སྟོང་ལས་བརྒལ་བ་དང་ཁེ་སྤོགས་སྒོར་དུང་ཕྱུར་བརྒྱ་ལས་བརྒལ་བའི་ལོ་རྒྱུས་ཀྱི་ཟིན་ཐོ་བཏོད་ཡོད། འདི་ལོ། མཱ་ཀང་ཚོགས་པས་རང་བརྟེན་ཞིབ་བཟོ་བྱས་པའི་ཆུ་ཚོད་རེའི་མྱུར་ཚད་སྤྱི་ལེ་350ཟིན་པའི་མྱུར་བགྲོད་ལྕགས་ལམ་གྱི་འཁོར་ལོ་བསྐྱར་དར་རྟགས་ཅན་གྱི་ཤུགས་འགྲེམས་མེ་འཁོར་ལ་སྒྲིག་སྦྱོར་བྱས་པས། ཀྲུང་གོའི་མྱུར་བགྲོད་ལྕགས་ལམ་དུ་རང་རྒྱལ་གྱིས་ཐོན་སྐྱེད་བྱས་པའི་མྱུར་བགྲོད་ལྕགས་ལམ་གྱི་འཁོར་ལོ་སྤྱོད་ཐུབ་པ་བྱུང་ཡོད།

འབྲི་ཆུའི་ཟུར་གསུམ་གླིང་གཞི་གཅིག་ཅན་གྱི་འཕེལ་རྒྱས་ཁྲོད་རང་ཉིད་ཀྱི་སྟོབས་ཤུགས་རྒྱུན་ཆད་མེད་པར་ཆེ་རུ་ཕྱིན་པ་མ་ཟད། འབྲི་ཆུའི་ཟུར་གསུམ་གླིང་གཞི་གཅིག་ཅན་གྱི་འཕེལ་རྒྱས་ཆེད་རང་ཉིད་ཀྱི་ལེགས་སྐྱེས་ཀྱང་ཕུལ་ཡོད། 2021ལོར་ཧྲང་ཧའེ་དང་། ཅང་སུའུ། ཀྲེ་ཅང་བཅས་ཀྱིས་ཨན་ཧུའེ་རུ་མ་དངུལ་སྒོར་དུང་ཕྱུར་ཡན་བཏང་སྟེ་སྐྲུན་བཞིན་པའི་རྣམ་གྲངས་4167ཡོད་ཅིང་། དངོས་སུ་དམིགས་སར་འབྱོར་བའི་མ་དངུལ་སྒོར་དུང་ཕྱུར་9000ལས་བརྒལ་བ་དེ་ལོ་གོང་མའི་དུས་མཚུངས་ལས་22.6%འཕར་ནས་ཞིང་ཆེན་དེ་ཡོངས་ཀྱི་མ་དངུལ་གྱི་ཕྱེད་ཀ་ཙམ་བཟུང་ཡོད་པ་རེད།

གསར་གཏོད་ནི་སྤྱི་ཁྱབ་ཧྲུའུ་ཅིས་ཨན་ཧུའེ་རུ་ཐེངས་གཉིས་ཕེབས་སྐབས་ཡང་ཡང་གསུངས་པའི་གནད་ཚིག་ཡིན་ལ། སྤུས་ཚད་མཐོ་བའི་འཕེལ་རྒྱས་མངོན་འགྱུར་བྱེད་པའི་སྒུལ་ཤུགས་དང་པོའང་རེད།

2016ལོའི་ཟླ་4པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་ཀྲུང་གོ་ཚན་རྩལ་སློབ་ཆེན་དང་ཀྲུང་གོ་ཚན་རིག་སློབ་ཆེན་གྱི་སྔོན་ཐོན་ལག་རྩལ་ཞིབ་འཇུག་ཁང་དུ་ཕེབས་པ་དང་། 2020ལོའི་ཟླ་8པར་ཨན་ཧུའེ་གསར་གཏོད་ཁང་དུ་ཕེབས་ཡོད། རྟོག་ཞིབ་ཐེངས་གཉིས་གནང་རིང་ཚན་རྩལ་གྱི་གྲུབ་འབྲས་ལ་རྟོག་ཞིབ་ཞིབ་ཕྲ་དང་གསར་གཏོད་འཕེལ་རྒྱས་སྐོར་བཀའ་འདྲི་གནང་ཞིང་། སྤྱི་ཁྱབ་ཧྲུའུ་ཅིས“འཛམ་གླིང་གི་རྩེར་སོན་ལག་རྩལ་དང་ཡང་ཡང་བསྡུར་ནས་ཁ་ཕྱོགས་འཚོལ་ཞིབ་དང་འབྱུང་འགྱུར་བཀོད་སྒྲིག་ལ་ཤུགས་སྣོན་བརྒྱབ་སྟེ་འགག་རྩའི་ལྟེ་བའི་ལག་རྩལ་འགག་སྒྲོལ་བྱེད་ཤུགས་ཆེ་རུ་གཏོང་དགོས”ཞེས་ནན་བཤད་གནང་བ་རེད།

ད་ཆ་ཨན་ཧུའེ་ས་ཁོངས་ཀྱི་གསར་གཏོད་ནུས་པ་རྒྱལ་ཁབ་ཀྱི་མདུན་གྲལ་དུ་སླེབས་ཤིང་། ནུས་རིམ་གྱི་འགྱུར་ལྡོག་དང་། གནས་བབ་ཀྱི་འགྱུར་ལྡོག གསར་གཏོད་ཀྱི་འགྱུར་ལྡོག་བཅས་སྔར་བྱུང་མྱོང་མེད་པའི་ཆུ་ཚད་དུ་སླེབས་ཡོད་པ་རེད།

“བྱ་སྤྱོད་དངོས་ཀྱི་ཐོག་ནས་མི་དམངས་ལ་ཁས་བླངས་པའི་དམ་བཅའ་སྒྲུབ་དགོས”

2016ལོར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཨན་ཧུའེ་རུ་རྟོག་ཞིབ་གནང་བའི་ཉིན་དང་པོར། རི་བོ་ཏ་པེ་ཧྲན་གྱི་དབུས་སུ་གནས་པའི་ཅིན་ཀྲའེ་རྫོང་ཧྭ་ཧྲི་ཤང་ཏ་ཝན་གྲོང་ཚོའི་དུད་ཚང་དབུལ་པོའི་ཁྱིམ་དུ་ཕེབས་ནས་གྲོང་གསེབ་ཀྱི་དབུལ་སྒྲོལ་དང་ལྷག་པར་དུ་གསར་བརྗེའི་རྟེན་གཞིའི་ཁུལ་རྙིང་པའི་དབུལ་སྐྱོར་གནས་ཚུལ་ངོ་མ་མཁྱེན་རྟོགས་གནང་ཞིང་། ཕྱོགས་ཡོངས་ནས་འབྱོར་འབྲིང་སྤྱི་ཚོགས་སྐྲུན་སྐབས་མི་གཅིག་ཀྱང་ལུས་མི་རུང་ཞེས་སྤྱི་ཁྱབ་ཧྲུའུ་ཅིས་ཚང་མར“ནུས་ཤུགས་ཡོད་རྒུས་དབུལ་སྒྲོལ་འགག་སྒྲོལ་གྱི་ལས་དོན་ཡག་པོ་བསྒྲུབས་ཏེ་བྱ་སྤྱོད་དངོས་ཀྱི་ཐོག་ནས་མི་དམངས་ལ་ཁས་བླངས་པའི་དམ་བཅའ་སྒྲུབ་དགོས”ཞེས་གསུངས་པ་རེད།

གྲོང་མི་ཁྲེན་ཙེ་ཧྲེན་གྱིས་ཁོང་ཁྱིམ་གྱི་སྒོ་ར་ཆུང་ཆུང་དེའི་ནང་སྤྱི་ཁྱབ་ཧྲུའུ་ཅི་ཞི་ཅིན་ཕིང་ཁོང་གི་འགྲམ་དུ་བཞུགས་ནས། གྲོང་ཚོའི་དབུལ་སྐྱོར་ལས་དོན་ལ་གཙོ་གནད་བཀོད་སྒྲིག་གནང་བའི་གནས་ཚུལ་བློ་ལ་གསལ་པོ་ངེས་ཀྱི་ཡོད། “ཐོན་ལས་དང་། སློབ་གསོ། ཐ་སྐྱོང་བཅས་ཀྱི་སྲིད་ཇུས་ཚང་མ་སྤྱི་ཁྱབ་ཧྲུའུ་ཅིས་ཞིབ་ཚགས་པོས་མངགས་བཅོལ་གནང་བ་མ་ཟད། ‘ངེས་པར་དུ་བློ་གཅིག་སེམས་གཅིག་ངང་དམ་འཛིན་བྱེད་དགོས་པའི’བླང་བྱའང་བཏོན་གནང་སོང” ཁྲེན་ཙེ་ཧྲེན་གྱིས་ད་ཆ་ཁྱད་ལྡན་འདེབས་འཛུགས་གསོ་ཚགས་འཕེལ་རྒྱས་གཏོང་བའི་ཁར་གྲོང་ཚོའི་སྤྱི་ཕན་རང་བཞིན་གྱི་ལས་གནས་གཅིག་ལྕོགས་འཁུར་བ་དང་སྲིད་ཇུས་བཟང་པོའི་འོག་ད་ཆ་སྡོད་ཁང་གསར་པར་སྤོས་ཡོད། ལོ་གཉིས་པར་རང་འགུལ་ངང་དབུལ་ཞྭ་འབུད་རྒྱུའི་རེ་ཞུ་ཕུལ་བ་ཡིན་ཞེས་བརྗོད།

སྔོན་མའི་རི་ཁུག་དབུལ་པོས་ད་ཆ་ཇའི་བཟོ་གྲྭ་དང་། ཁྱིམ་ཚང་མགྲོན་ཁང་། ཡུལ་སྐོར་སྣེ་ལེན་ལྟེ་གནས་བཅས་བཙུགས་ཏེ“རི་སྟེང་དུ་ཇ་འདེབས་པ་དང་། ཁྱིམ་དུ་མགྲོན་པོར་སྣེ་ལེན་ཞུ་བ། གསར་བརྗེའི་གནས་རྙིང་དང་སྔོ་ལྗང་ཟུང་འབྲེལ”བཅས་ཀྱི་ཐོན་ལས་ལམ་བུ་གསར་པ་བཏོད་ཡོད། ལོ་དེ་དག་ནང་ཏ་ཝན་གྲོང་ཚོར་5Gདྲ་རྒྱ་ཤར་གཏོང་ཐུབ་པ་དང་ཨན་ཧུའེ“ཐཱན་མེད་གྲོང་གསེབ”དང་པོར་གྱུར་བ་མ་ཟད། “ཀྲུང་གོའི་མཛེས་སྡུག་ལྡན་པའི་སྤྲོ་གསེང་གྲོང་གསེབ”ལ་བདམས་ཏེ་ལོར་ཡུལ་སྐོར་བ་མི་ཐེངས་ཁྲི་35ལ་སྣེ་ལེན་ཞུས་ཡོད་པ་རེད།

2020ལོའི་ཟླ་8པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་སླར་ཡང་ཨན་ཧུའེ་རུ་ཕེབས་ཤིང་། ཁྲའོ་ཧུའུ་མཚེའུ་འགྲམ་གྱི་འབྲི་ཆུ་སྒྲོལ་བའི་གཡུལ་འགྱེད་དྲན་གསོ་ཁང་དུ་སྤྱི་ཁྱབ་ཧྲུའུ་ཅིས“དུས་དང་རྣམ་པ་ཀུན་ཏུ་ང་ཚོས་ཐོག་མའི་བསམ་འདུན་མ་བརྗེད་པར་འགན་འཁྲི་བློ་ལ་བརྟན་པོར་བཅངས་ནས་མི་དམངས་ཞེས་པའི་རྩ་བ་དེ་མ་བརྗེད་པར་ནམ་ཡང་བློ་དཀར་སེམས་དཀར་གྱིས་མི་དམངས་ལ་ཞབས་འདེཌ་མཁན་ཞིག་བྱེད་དགོས”ཞེས་གསུངས་པ་རེད།

ལོ་དེར་ཨན་ཧུའེ་ཞིང་ཆེན་ཡོངས་ཀྱི་ཡིག་ཚགས་དང་གཱ་བཟོས་པའི་མི་འབོར་དབུལ་པོ་ཁྲི་484ཚང་མ་དབུལ་སྒྲོལ་ཐུབ་ནས་ཅང་ཧོའེ་ཡི་ས་གཞི་ཆེ་མོའི་ཐོག“མི་གཅིག་ཀྱང་མ་ལུས་པའི”ཁས་ལེན་མངོན་འགྱུར་བྱུང་ཡོད། སྤྱི་ཁྱབ་ཧྲུའུ་ཅིའི་མངགས་བཅོལ་བློ་ལ་བརྟན་པོར་བཅངས་ནས་ཨན་ཧུའེ་ཡིས་དབུལ་ལོག་སྔོན་འགོག་གི་འགུལ་རྣམ་ལ་ལྟ་ཞིབ་དང་རོགས་སྐྱོར་ལམ་སྲོལ་འཐུས་སྒོ་ཚང་དུ་བཏང་བ་དང་དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་རྒྱུ་དེ་གྲོང་གསེབ་དར་རྒྱས་དང་འབྲེལ་མཐུད་ནུས་ལྡན་བྱས་ཏེ་དབུལ་སྒྲོལ་ས་ཁུལ་དང་དབུལ་སྒྲོལ་མི་འབོར་གྱི་འཕེལ་རྒྱས་ནུས་པ་ཕྱོགས་ཡོངས་ནས་ཆེ་རུ་བཏང་བ་རེད།

“རང་བྱུང་ཁམས་ལ་བརྩི་འཇོག་དང་རང་བྱུང་ཁམས་ཀྱི་ཆོས་ཉིད་ལ་བསྟུན་དགོས”

2020ལོའི་ཟླ་བརྒྱད་པར་ཨན་ཧུའེ་རུ་རྟོག་ཞིབ་གནང་སྐབས་སྤྱི་ཁྱབ་ཧྲུའུ་ཅི་ཞི་ཅིན་ཕིང་མོང་ཝ་ཆུ་ལོག་གསོག་ཁུལ་ཚའོ་ཅི་གྲོང་རྡལ་ལི་མིན་གྲོང་ཚོར་ཕེབས་ཤིང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“ཡུལ་མི་རྣམས་རིམ་བཞིན་གནས་སྤོ་བྱེད་པར་ཁྲིད་སྟོན་དང་སྐུལ་ལྕག་བྱས་ཏེ་ཆུ་ལོག་གསོག་ཁུལ་དུ་མི་འབོར་མང་དུ་མི་འགྲོ་བའི་འགན་ལེན་བྱེད་དགོས” “རང་བྱུང་ཁམས་ལ་བརྩི་འཇོག་དང་རང་བྱུང་ཁམས་ཀྱི་ཆོས་ཉིད་ལ་བསྟུན་ནས་རང་བྱུང་གནོད་འཚེར་ཁ་གཏད་ཧུར་ཐག་བཅག་སྟེ། རང་བྱུང་ཁམས་དང་འཆམ་མཐུན་མཉམ་གནས་ཐུབ་པ་བྱེད་དགོས” “སྤྱི་ཚོགས་རིང་ལུགས་དེང་རབས་ཅན་ཕྱོགས་ཡོངས་ནས་འཛུགས་སྐྲུན་བྱེད་དགོས་ལ། རང་བྱུང་གནོད་འཚེ་འགོག་པའི་ནུས་པའང་དེང་རབས་ཅན་དུ་འགྱུར་བ་བྱེད་དགོས”ཞེས་གསུངས་པ་རེད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་ལ་བརྩི་སྲུང་ཞུས་ཏེ་ཨན་ཧུའེ་ཡིས་ཧོའེ་ཧོ་ཆུ་བོའི་ཆུ་ལོག་གསོག་ཁུལ་གྱི་ཡུལ་མི་གནས་སྤོས་བྱས་ནས་ཆུ་ལོག་གསོག་ཁུལ་གྱི་མི་འབོར་ཁྲི་11ལྷག་ཙམ་བདེ་འཇགས་ས་ཁུལ་དུ་སྤོས་ཡོད། ཧོའེ་ཧོ་ཆུ་བོའི་རྒྱུད་ཀྱི་ཞིང་ལས་ཐོན་ལས་གྲུབ་ཆ་ལེགས་སྒྲིག་བྱས་ནས་ཆུ་ལོག་གསོག་ཁུལ་དང་འཚམ་པའི་ཞིང་ལས་འཕེལ་རྒྱས་བཏང་ཞིང་། 2021ལོར་མོང་ཝ་ཆུ་ལོག་གསོག་ཁུལ་དུ་ཆན་ཧྲི་རྩི་ཤིང་འདེབས་འཛུགས་རྒྱ་ཁྱོན་མུའུ་ཁྲི་6ལས་བརྒལ་བ་དང་ཕུའུ་ནན་རྫོང་དུ་རྒྱ་ལྕང་འདེབས་འཛུགས་བྱེད་ཚད་མུའུ་ཁྲི་10ལས་བརྒལ་ཡོད་ལ། ལྕུག་ཕྲན་ལས་སྣོན་སོགས་ཁྱད་ལྡན་ཕྱུག་འགྱུར་ཐོན་ལས་ལ་སྣེ་ཁྲིད་བྱས་ཡོད་པ་རེད།

མཱ་ཨན་ཧྲན་གྲོང་ཁྱེར་ཞུའེ་ཅ་ཝ་སྐྱེ་ཁམས་གླིང་དུ་སྤྱི་ཁྱབ་ཧྲུའུ་ཅིས“འབྲི་ཆུར་ལོ་བཅུ་ཉ་འཛིན་མི་ཆོག་པའི་འཆར་གཞི་ལག་བསྟར་བྱས་ནས་འབྲེལ་ཡོད་ལས་དོན་ཁག་ཡག་པོ་བསྒྲུབས་ཏེ། རྒྱ་ཆེའི་ཉ་པ་རྣམས་མཚོ་ངོགས་སུ་སྤོ་འདོད་པ་དང་མཚོ་ངོགས་སུ་སྤོས་རྗེས་གཞིས་ཆགས་ཐུབ་པ་དང་ཕྱུག་པོ་ཆགས་ཐུབ་པ་བྱེད་དགོས”ཞེས་ནན་བཤད་གནང་བ་རེད།

“སྤྱི་ཁྱབ་ཧྲུའུ་ཅིས་ང་ཚོར་བདེ་སྐྱིད་ཀྱི་ལམ་བུ་ཞིག་བསྟན་གནང་ཡོད”ཅེས་མཚོ་ངོགས་སུ་སྤོས་པའི་ཉ་པ་ཁྲེན་ལན་ཤང་གིས་བརྗོད། ཁོང་གིས་2021ལོར་གྲོང་མི་གཞན་དང་མཉམ་དུ་མཚོ་ངོགས་སུ་ཁྱིམ་ལས་ཀུང་སི་བཙུགས་པས་ཡོང་འབབ་བརྟན་པོ་ཡོད་ལ། ད་དུང་ཁེ་སྤོགས་ཀྱང་བགོ་གི་ཡོད། 2021ལོར་ཨན་ཧུའེ་ཡི་ཉ་པ་ཁྲི་གཉིས་ལྷག་ཙམ་ལས་ཞུགས་གཞན་སྒྱུར་ཐུབ་པ་རེད།

ད་ཆ་ཨན་ཧུའེ་རུ་སྐྱེ་ཁམས་ཀྱི་ལེགས་ཆ་མངོན་གསལ་དོད་པ་དང་སྤུས་ཚད་མཐོ་བའི་འཕེལ་རྒྱས་ཀྱི་རྣམ་པ་བཟང་པོ་མངོན་བཞིན་ཡོད།

2021ལོར་ཨན་ཧུའེ་ཡི་དཔལ་འབྱོར་བསྡོམས་འབོར་སྒོར་དུང་ཕྱུར་ཁྲི་4ལས་བརྒལ་ནས་སྐས་རིམ་གསར་པ་ཞིག་ཏུ་སླེབས་ཡོད། ཨན་ཧུའེ་ཡི་བུ་ཕྲུག་ཚོས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་བྱེད་པའི་རྒྱང་སྐྱོད་ཀྱི་ལམ་བུ་གསར་པར་དེ་བས་ངོ་མཚར་ཅན་གྱི་བྱས་རྗེས་འཇོག་ཐུབ་ངེས་རེད།

(ཤིན་ཧྭ་གསར་འགྱུར་ཁང་ཧོ་ཧྥེ་ནས་6ཚེས་5ཉིན་འབྱོར་བའི་གློག་འཕྲིན)