ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་སྤྱི་ཁྱབ་ཧྲུའུ་ཅི་ཞི་ཅིན་ཕིང་ཀྲེ་ཅང་དུ་ཐེངས་མང་ཕེབས་ནས་མཛུབ་སྟོན་གལ་ཆེན་རབ་དང་རིམ་པ་གནང་སྟེ་ཀྲེ་ཅང་གི་འཕེལ་རྒྱས་ལ་མདུན་སྐྱོད་ཀྱི་ཁ་ཕྱོགས་གསལ་སྟོན་དང་། རྩ་བའི་གཞི་འཛིན་ས་མཁོ་འདོན། སྒུལ་ཤུགས་ཆེན་པོ་སྣོན་པ་བཅས་གནང་ཡོད། སྤྱི་ཁྱབ་ཧྲུའུ་ཅིའི་མངགས་བཅོལ་ཟབ་མོ་བློ་ལ་བརྟན་པོར་བཅངས་ནས་ཀྲེ་ཅང་གིས་འབད་འབུངས་ཡར་བརྩོན་དང་། འགག་སྒྲོལ་ལམ་བུ་འཚོལ་ཞིབ། ཞུམ་མེད་མདུན་སྐྱོད་བཅས་བྱས་ཡོད།

“ལྗང་མདོག་དེ་ཀྲེ་ཅང་འཕེལ་རྒྱས་ཀྱི་ཡིད་དབང་འཕྲོག་ཤོས་སུ་འགྱུར་བ་བྱེད་དགོས”

དབྱར་འགོའི་ཧུའུ་ཀྲོའུ་གྲོང་ཁྱེར་ཨན་ཅི་རྫོང་ཡུས་གྲོང་ཚོ་ནམ་མཁའ་སྔོ་ཞིང་ཆུ་མོ་དྭངས་བ་དང་སྔོ་ལྗང་སྨྱུག་མས་རི་ཀླུང་བརྒྱན། གྲོང་མི་རྣམས་ཞིང་པའི་སྤྲོ་སྐྱིད་ཁང་གི་ཚོང་ལ་བྲེལ་བཞིན་འདུག་ལ། གཏེར་རིའི་ཤུལ་དུ་བརྒྱབ་པའི་སྤྱི་གླིང་ནང་ཡུལ་སྐོར་བས་ཁེངས་ནས་འདུག

སྔོན་མ་ཡུས་གྲོང་ཚོས་སྤུས་ལེགས་རྡོ་ཡམ་ཐོན་ཁུངས་ལ་བརྟེན་ནས་ཡོང་འབབ་གསོག་པར་བརྟེན། ཁོར་ཡུག་དང་སྔོ་ལྗང་ལ་གཏོར་སྐྱོན་ཕོག་ནས་ནམ་མཁར་ཐལ་རྡུལ་གྱིས་ཁེངས་པ་དང་ཆུ་ཡང་ཉག་ཉོག་ཏུ་གྱུར་ཡོད། སེམས་ཐག་གཙང་བཅད་ཀྱིས་དེ་དག་འགོག་ཆེད། ཡུས་གྲོང་ཚོས་ཨར་འདམ་བཟོ་གྲྭ་དང་གཏེར་རི་ཚང་མ་སྒོ་བརྒྱབ་པ་རེད།

2005ལོའི་ཟླ་8པར་སྐབས་དེ་དུས་ཀྲེ་ཅང་ཞིང་ཨུད་ཀྱི་ཧྲུའུ་ཅི་ཡིན་པའི་ཞི་ཅིན་ཕིང་གིས་ཡུས་གྲོང་ཚོར་རྟོག་ཞིབ་གནང་སྐབས། ཡུས་གྲོང་ཚོའི་བྱེད་ཐབས་དེ་ནི“ཐབས་བཟང”ཞིག་རེད་ཅེས་གདེང་འཇོག་གནང་བ་དང་འབྲེལ“རི་སྔོན་ཆུ་དྭངས་གསེར་རི་དངུལ་རི་ལས་ལྷག་པའི”འདུ་ཤེས་ཐོག་མར་བཏོན་གནང་བ་རེད། དེ་ནས་བཟུང་ཡུས་གྲོང་ཚོས། འདུ་ཤེས་དེ་བློ་བརྟན་འགྱུར་མེད་ངང་ལག་བསྟར་བྱས་ཤིང་། “ཉེ་བའི་ལོ་17རིང་ང་ཚོས་རྒྱུན་འཁྱོངས་ལྷོད་མེད་ངང་གཏེར་ཡུལ་དུ་ལྗོན་ཤིང་བཏབ་པ་མ་ཟད། ཐོན་ལས་གསུམ་པ་འཕེལ་རྒྱས་ཤུགས་ཆེན་བཏང་བར་བརྟེན་ཡུལ་སྐོར་དང་། རྨོ་བསྡུ་བྱེད་ཆོག་པའི་གྲོང་གསེབ་ཀྱི་སྐྱེ་ཁམས་དཔལ་འབྱོར་གསར་པ་ཞིག་གྲུབ་ཡོད”ཅེས་ཡུས་གྲོང་ཚོའི་ཏང་ཀྲི་པུའི་ཧྲུའུ་ཅི་དབང་ཡུས་ཁྲེང་གིས་བརྗོད།

“མཛེས་སྡུག་ལྡན་པའི་གྲོང་གསེབ་བསྐྲུན་རྒྱུ་དེ་ཡུས་གྲོང་ཚོར་དོན་དངོས་སུ་གྱུར་འདུག”ཅེས་2020ལོའི་ཟླ་3པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ལོ་15སོང་རྗེས་སླར་ཡང་ཡུས་གྲོང་ཚོར་རྟོག་ཞིབ་གནང་སྐབས་དེ་ལྟར་གསུངས་པ་རེད།

དཔལ་འབྱོར་འཕར་ཚད་རྒྱལ་ཡོངས་ཀྱི་མདུན་གྲལ་དུ་སླེབས་མོད། འོན་ཀྱང་རགས་ལས་རྣམ་པའི་འཕེལ་རྒྱས་ཀྱིས་ཀྲེ་ཅང་འཕེལ་རྒྱས་ལ་འགོག་རྐྱེན་བཟོས་ཡོད། འགག་རྩའི་དུས་དེར“རི་སྔོན་ཆུ་དྭངས་གསེར་རི་དངུལ་རི་ལས་ལྷག་པའི”འདུ་ཤེས་ཀྱིས་ཀྲེ་ཅང་གི་འཕེལ་རྒྱས་ལ་ལམ་བུ་གསར་པ་བཏོད་པ་རེད།

2020ལོའི་ཟླ་4པར་ཀྲེ་ཅང་ཞིང་ཨུད་དང་ཞིང་ཆེན་སྲིད་གཞུང་གི་ལས་དོན་སྙན་སེང་གསན་རྗེས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“ཀྲེ་ཅང་གི་སྐྱེ་ཁམས་ཤེས་དཔལ་འཛུགས་སྐྱོང་སྐས་རིམ་གསར་པ་ཞིག་ཏུ་སླེབས་པར་སྐུལ་འདེད་གཏོང་དགོས”“ལྗང་མདོག་དེ་ཀྲེ་ཅང་འཕེལ་རྒྱས་ཀྱི་ཡིད་དབང་འཕྲོག་ཤོས་སུ་འགྱུར་བ་བྱེད་དགོས”པའི་བླང་བྱ་ཁ་གསལ་བཏོན་གནང་བ་རེད།

ཉེ་བའི་ལོ་ཤས་རིང་ཀྲེ་ཅང་གིས་སྐྱེ་ཁམས་ཤེས་དཔལ་དཔེ་སྟོན་འཛུགས་གཏོད་བྱ་སྤྱོད་ལག་བསྟར་བྱས་པར་ཕན་འབྲས་མངོན་གསལ་དོད་པོ་ཐོན་ཡོད། 2018ལོར“གྲོང་སྟོང་དཔེ་སྟོན་དང་གྲོང་ཁྲི་བཅོས་སྐྱོང”གི་འདུ་འགོད་ལ་མཉམ་འབྲེལ་རྒྱལ་ཚོགས་ཀྱི“སའི་གོ་ལའི་སྲུང་དམག་བྱ་དགའ”ཐོབ་པ་དང་། 2019ལོར་རྒྱལ་ཁབ་ཀྱི་སྐྱེ་ཁམས་ཞིང་ཆེན་འཛུགས་སྐྲུན་གྱི་ཚོད་ལྟའི་ལས་དོན་བདེ་བླག་ངང་ཞིབ་བཤེར་རྩིས་ལེན་ཐུབ་པ། 2012ལོ་ནས་2021ལོ་བར་ཞིང་ཆེན་དེ་ཡོངས་ཀྱི་སྐྱེ་ཁམས་ཁོར་ཡུག་ལ་སྤྱི་དམངས་བློ་ཡིད་ཚིམ་ཚད་ལོ་10བསྟུད་མར་མཐོ་རུ་ཕྱིན་ཡོད་པ་རེད།

“སྤུས་ཚད་མཐོ་བའི་འཕེལ་རྒྱས་ཀྱི་མྱུར་ཚད་མགྱོགས་སུ་གཏོང་དགོས”

ཟླ་6པར་ཉིང་པོ་ཀྲོའུ་ཧྲན་གྲུ་ཁའི་ཁྲོན་ཧྲན་གྲུ་ཁའི་ཁུལ་དུ། ཏུན་ཁྲི་ཤོང་བའི་གྲུ་གཟིངས་ཆེན་པོ་ནས་དངོས་ཟོག་འབེབས་བཞིན་འདུག 2021ལོ་བར་ཀྲོའུ་ཧྲན་གྲུ་ཁས་དངོས་ཟོག་འདོན་འཇུག་བྱེད་ཚད་ལོ་13བསྟུད་མར་གོ་ལ་ཧྲིལ་པོའི་ཨང་དང་པོར་སླེབས་ཡོད།

2020ལོའི་ཟླ་3པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲེ་ཅང་དུ་རིམས་ནད་སྔོན་འགོག་དང་ཚོད་འཛིན་དང་ལས་འགོ་བསྐྱར་འཛུགས་དང་ཐོན་སྐྱེད་སླར་གསོར་བརྟག་ཞིབ་གནང་སྐབས་ཉིང་པོ་ཀྲོའུ་ཧྲན་གྲུ་ཁར་ཕེབས། སྙིང་སྟོབས་རབ་འཕེལ་གྱི་གྲུ་ཁའི་ལས་བཟོའི་མདུན་དུ་སྤྱི་ཁྱབ་ཧྲུའུ་ཅིས་ཁོང་ཚོར“གྲུ་ཁ་ནི་དཔལ་འབྱོར་འཕེལ་རྒྱས་ལ་འདེགས་སྐྱོར་བྱེད་པའི་རྨང་གཞིའི་རང་བཞིན་དང་ལྟེ་བའི་རང་བཞིན་གྱི་སྒྲིག་བཀོད་ཅིག་རེད། ཁྱེད་ཚོ་ནི་ཉམས་སད་ཐེག་པའི་འཕྲལ་སྒྲུབ་སྟོབས་ཤུགས་ཤིག་ཡིན”ཞེས་བསྔགས་བརྗོད་གནང་བ་རེད།

“སྤྱི་ཁྱབ་ཧྲུའུ་ཅིའི་བཀའ་མོལ་གྱིས་ང་ཚོར་སྐུལ་ལྕག་ཆེན་པོ་ཐེབས་བྱུང་། ལོ་གཉིས་ལྷག་ཙམ་རིང་ང་ཚོས་རིམས་ནད་སྔོན་འགོག་དང་ཚོད་འཛིན་དང་བདེ་འཇགས་ཐོན་སྐྱེད་ལ་དམ་འཛིན་ནན་པོ་བྱས་ནས་ཟོག་འགྲེམས་མཁོ་སྤྲོད་འཁོར་འབྲེལ་བརྟན་པོའི་ངང་ཤར་གཏོང་ཐུབ་པའི་འགན་ལེན་བྱས་ཡོད”ཅེས་ཉིང་པོ་ཀྲོའུ་ཧྲན་གྲུ་ཁའི་བཀོད་གཏོང་བཀོད་འདོམས་ལྟེ་གནས་ཀྱི་ཀྲུའུ་རེན་ལུའོ་ཁོ་ཅེས་བརྗོད། བསྡོམས་རྩིས་བྱས་པར་གཞིགས་ན། འདི་ལོའི་ཟླ་དང་པོ་ནས་བཞི་པའི་བར་ཀྲོའུ་ཧྲན་གྲུ་ཁས་དངོས་ཟོག་འདོན་འཇུག་བྱེད་ཚད་ཏུན་དུང་ཕྱུར་4.1ཟིན་པ་དེ་དུས་མཚུངས་ལས་4%འཕར་བ་དང་། ཚད་ལྡན་དོས་སྒམ་འདོན་འཇུག་བྱེད་ཚད་ཁྲི་1094.5ཟིན་པ་དེ་དུས་མཚུངས་ལས་5.2%འཕར་ཡོད་པ་རེད།

ཉིང་པོ་ཀྲོའུ་ཧྲན་གྲུ་ཁར་སྤུས་འབོར་གཉིས་ལྡན་བྱུང་བ་དེ་ནི་ཀྲེ་ཅང་གིས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་བསྡུས་རིས་ཤིག་རེད།

ཉེ་བའི་ལོ་ཤས་རིང་། ཀྲེ་ཅང་གིས“དྲ་སྦྲེལ+”དང་། ཚེ་སྲོག་བདེ་ཐང་། རྒྱུ་ཆ་གསར་པ་བཅས་ཚན་རིག་གསར་གཏོད་ཆེན་པོ་གསུམ་གྱི་མཐོ་ས་བསྐྲུན་རྒྱུར་དམིགས་ནས་ཀྲི་ཅང་ཚོད་ལྟ་ཁང་དང་། མཚོ་ཁའི་ཚོད་ལྟ་ཁང་། ལེའང་ཀྲུའུ་ཚོད་ལྟ་ཁང་། ཤིས་ཧུའུ་མཚེའུ་ཚོད་ལྟ་ཁང་སོགས་ལས་སྟེགས་གལ་ཆེན་བསྐྲུན་རྒྱུར་མགྱོགས་མྱུར་སྐུལ་འདེད་གཏོང་བ་དང་། གྲངས་འཛིན་དཔལ་འབྱོར་གྱི་འགག་རྩའི་སྲོག་ཤིང་དང་། “འཕྲལ་མཁོ་སྔོན་སྒྲུབ”དང་ལག་རྩལ་གསར་ཤོས་བཅས་ཁག་གཅིག་མཉམ་དུ་འགག་སྒྲོལ་ཐུབ་པ་མ་ཟད། ལག་རྩལ་གསར་གཏོད་གལ་ཆེན་མང་པོ་ཞིག་གསར་གཏོད་འཕེལ་རྒྱས་ཀྱི་སྒུལ་ཤུགས་སུ་གྱུར་ཡོད།

2020ལོའི་ཟླ་3པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲེ་ཅང་དུ་རྟོག་ཞིབ་གནང་སྐབས། རྒྱལ་ཁབ་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་ལ་སྐུལ་འདེད་གཏོང་བར་ངེས་པར་དུ་གྲོང་ཁྱེར་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དམ་འཛིན་ཡག་པོ་བྱེད་དགོས་ཞེས་གསུངས་པ་རེད།

2020ལོའི་ཟླ་4པར་ཀྲེ་ཅང་ཞིང་ཨུད་དང་ཞིང་ཆེན་སྲིད་གཞུང་གི་ལས་དོན་སྙན་སེང་གསན་རྗེས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲེ་ཅང་ལ་སྤུས་ཚད་མཐོ་བའི་འཕེལ་རྒྱས་ཀྱི་མྱུར་ཚད་མགྱོགས་སུ་གཏོང་དགོས་པའི་བླང་བྱ་བཏོན་གནང་བ་རེད། སྤྱི་ཁྱབ་ཧྲུའུ་ཅིའི་མངགས་བཅོལ་བློ་ལ་བརྟན་པོར་བཅངས་ནས་ཀྲེ་ཅང་གིས་འགན་འཁུར་དངོས་སྒྲུབ་བྱས་ཏེ་རྒྱང་སྐྱོད་ཀྱི་ལམ་བུ་གསར་པར་གཟེངས་སུ་ཐོན་པའི་གྲུབ་འབྲས་ཧུར་ཐག་བཏོད་པ་རེད།

“གྲོང་ཁྱེར་དང་གྲོང་གསེབ་འཕེལ་རྒྱས་གཞི་གཅིག་ཅན་གྱི་ཆུ་ཚད་མཐོ་རུ་གཏོང་དགོས”

ཀྲོའུ་ཧྲན་ཏིང་ཧའེ་ཆུས་ཀྱི་གྲོང་ཚོ་གསར་པའི་ཆུ་འགྲམ་ནས་ཀྱག་ཀྱོག་གི་སྲང་ལམ་ཞིག་བརྒྱུད་ནས་བསྐྱོད་ཚེ་གྲོང་མི་ཡོན་ཆི་ཀྲུང་གི་ཁྱིམ་དུ་སླེབས་ཀྱི་ཡོད།

2015ལོའི་ཟླ་5པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲེ་ཅང་དུ་རྟོག་ཞིབ་གནང་སྐབས། ཡོན་ཆི་ཀྲུང་གི་ཁྱིམ་དུ་སྤྱི་ཁྱབ་ཧྲུའུ་ཅིས་ཁོང་གི་ནང་མི་དང་གྲོང་མིའི་འཐུས་མི་དང་ལྷན་དུ་བཞུགས་ཏེ་གླེང་མོལ་གནང་ཞིང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གྲོང་ཁྱེར་དང་གྲོང་གསེབ་འཕེལ་རྒྱས་གཞི་གཅིག་ཅན་གྱི་ཆུ་ཚད་མཐོ་རུ་གཏོང་བར་གྲོང་གསེབ་ཀྱི་སྤྱི་ཚོགས་ཐོན་སྐྱེད་ནུས་ཤུགས་བཅིངས་འགྲོལ་དང་འཕེལ་རྒྱས་གཏོང་བ་དང་། རྒྱ་ཆེའི་ཞིང་པ་མང་ཚོགས་ཀྱི་འཚོ་བའི་ཆུ་ཚད་མཐོ་རུ་གཏོང་རྒྱུ་དེ་རྩ་བའི་སྲིད་ཇུས་ཀྱི་ཁ་ཕྱོགས་སུ་བརྩི་དགོས་ཞེས་གསུངས་པ་རེད།

“སྤྱི་ཁྱབ་ཧྲུའུ་ཅིའི་བཀའ་མོལ་གྱིས་གྲོང་མི་ཚོའི་སེམས་ཤུགས་ཆེ་རུ་ཕྱིན་ཡོད། ལོ་དེ་དག་ནང་གྲོང་ཚོའི་དུད་ཚང་མང་པོ་ཞིག་གིས་ཁྱིམ་ཚང་མགྲོན་ཁང་དང་ཞིང་ཁྱིམ་སྤྲོ་སྐྱིད་ཁང་གཉེར་བས་འཚོ་བ་ཉིན་རེ་ལས་མ་འདས་པར་ཡག་ཏུ་ཕྱིན་ཡོད། ད་ཆ་ད་དུང་སྤྱི་ཚོགས་འགན་སྲུང་གི་རྒན་གསོའི་དངུལ་ཡང་ལེན་རྒྱུ་ཡོད”ཅེས་ཡོན་ཆི་ཀྲུང་གིས་བརྗོད།

ཉེ་བའི་ལོ་ཤས་རིང་། ཡོན་ཆི་ཀྲུང་སྡོད་སའི་ཀྲོའུ་ཧྲན་དུ་ཀྲེ་ཅང་གིས་བྱེད་ཐབས་རབ་དང་རིམ་པ་བཏོན་ནས་དེ་གའི་མི་སེར་རྣམས་ཕྱུག་པོ་ཆགས་པར་བྱས་པ་སྟེ། ཞིང་ཆེན་གྱིས་གྲོང་ཁྱེར་གྱི་ཆེད་ལས་ནད་སྐྱོང་པ་ཧའེ་ཏའོ་རུ་གདན་དྲངས་ནས་ཧའེ་ཏའོ་ཡི་རྒན་གསོ་དང་དམངས་འཚོའི་དཀའ་གནད་བསལ་བ་མ་ཟད། ས་ཁུལ་དབར་གྱི་ཧེ་བག་ཆུང་དུ་བཏང་ཡོད། གསོ་ཚགས་མཚོ་ཁོངས་སུ་དབང་གསུམ་ལོགས་དབྱེ་སྒྱུར་བཅོས་ལག་བསྟར་བྱས་ཏེ། མཚོ་ཁོངས་འགན་གཙང་གི་བོགས་དངུལ་ཁག་གཅིག་གྲོང་གསེབ་མཉམ་སྡེབ་ཀྱི་མ་རྩར་བྱས་ཏེ་གྲོང་ཁྱེར་དང་གྲོང་གསེབ་ཀྱི་ཧེ་བག་ཆུང་དུ་བཏང་ཡོད། ཉ་ལས་འཕེལ་རྒྱས་བཏང་ནས་ཡོང་འབབ་དམའ་བའི་ཉ་པའི་ཐོན་སྐྱེད་གཞན་སྒྱུར་དང་ལས་ཞུགས་ཀྱི་བར་མཐོངས་གསར་པ་བཏོད་དེ་ཡོང་འབབ་ཀྱི་ཧེ་བག་ཆུང་དུ་བཏང་ཡོད།

ཡོན་ཆི་ཀྲུང་དང་ཡུལ་མི་ཚོའི་འཚོ་བའི་འགྱུར་ལྡོག་ནི་ཀྲེ་ཅང་གིས་གྲོང་ཁྱེར་དང་གྲོང་གསེབ་འཕེལ་རྒྱས་གཞི་གཅིག་ཅན་ལ་མགྱོགས་མྱུར་སྐུལ་འདེད་བཏང་བ་དང་། གྲོང་ཁྱེར་གྱིས་གྲོང་གསེབ་ལ་སྣེ་ཁྲིད་དང་གྲོང་ཁྱེར་དང་གྲོང་གསེབ་མཉམ་འདྲེས་མཐའ་འཁྱོངས་བྱས་པའི་གྲུབ་འབྲས་ཤིག་རེད།

2021ལོའི་ཟླ་6ཚེས་10ཉིན《ཀྲེ་ཅང་གི་སྤུས་ཚད་མཐོ་བའི་འཕེལ་རྒྱས་ལ་རྒྱབ་སྐྱོར་བྱས་ནས་ཐུན་མོང་ཕྱུག་འགྱུར་གྱི་དཔེ་སྟོན་ཁུལ་བསྐྲུན་རྒྱུའི་སྐོར་གྱི་ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་བསམ་འཆར》ཁྱབ་བསྒྲགས་བྱས་ཤིང་། དེ་དང་ཆབས་ཅིག་ཀྲེ་ཅང་གིས《རི་ཁུལ་གྱི་རྫོང་26གི་མཆོང་སྐྱོད་ལྟ་བུའི་སྤུས་ཚད་མཐོ་བའི་འཕེལ་རྒྱས་ལ་རྒྱབ་སྐྱོར་བྱ་རྒྱུའི་བསམ་འཆར》བཏོན་ནས། རི་ཁུལ་གྱི་རྫོང་26ལ་སྔོན་ཐོན་བཟོ་སྐྲུན་ལས་རིགས་ཀྱིས་གཙོ་བོ་བྱེད་པའི“ཐོན་ལས་རྟེན་གཞི”དང་ཞིང་ཆེན་གྱི་ས་ཁུལ་གཞན་དག་གིས་རི་ཁུལ་གྱི་རྫོང་26ལ“ཚན་རྩལ་གསར་གཏོད་གླིང”དང“ཐོན་ལས་མཉམ་ལས་ཁང”སོགས་གཉེར་རྒྱུར་སྐུལ་ལྕག་བྱས་པ་མ་ཟད། རང་རྟེན་འཕེལ་རྒྱས་ཀྱི་ལམ་སྲོལ་རབ་དང་རིམ་པ་བཙུགས་ཡོད་པ་རེད།

2021ལོར་གྲོང་གསེབ་ཀྱི་གྲོང་མིའི་ཡོང་འབབ་འཕར་ཚད་གྲོང་ཁྱེར་དང་གྲོང་རྡལ་གྱི་གྲོང་མིའི་ཡོང་འབབ་ལས་མགྱོགས་པ་དང་། རི་ཁུལ་གྱི་རྫོང་26གི་ཞིང་པའི་ཡོང་འབབ་འཕར་ཚད་ཞིང་ཆེན་ཡོངས་ཀྱི་ཞིང་པའི་ཡོང་འབབ་ལས་མགྱོགས་པ། ཡོང་འབབ་དམའ་བའི་ཞིང་དུད་ཀྱི་ཡོང་འབབ་འཕར་ཚད་ཞིང་ཆེན་ཡོངས་ཀྱི་ཞིང་པའི་ཡོང་འབབ་ལས་མགྱོགས་པ། གྲོང་ཁྱེར་དང་གྲོང་གསེབ་ཀྱི་གྲོང་མིའི་ཡོང་འབབ་ཧེ་བག་1.94:1བར་ཆུང་དུ་ཕྱིན་པ་བཅས་ཀྲེ་ཅང་གི་གྲོང་ཁྱེར་དང་གྲོང་གསེབ་ས་ཁོངས་མཐུན་སྦྱོར་འཕེལ་རྒྱས་ཀྱི་རྣམ་པ་བཟང་པོ་གྲུབ་ཡོད།

(ཤིན་ཧྭ་གསར་འགྱུར་ཁང་ཧང་ཀྲོའུ་ནས་འབྱོར་བའི་གློག་འཕྲིན)