གནའ་སྔ་མོ་ནས་བཟུང་ལྕི་བ་སྒྲུག་པ་དང་ལྕི་བ་སྐེམ་པ་ནི་བོད་བྱང་ཐང་གི་འབྲོག་པའི་འཚོ་བའི་གོམས་གཤིས་ཤིག་རེད། སྲོལ་རྒྱུན་གྱི་ལྕི་བ་གཏལ་ལེབ་ལ་ཚན་རིག་གི་ལས་སྣོན་བྱས་མེད་པས། མེར་བུད་དུས་དུ་བ་ཆེ་བ་དང་གོ་ཐལ་མང་བའི་ཁར་འབར་མགྱོགས་པས་བེད་སྤྱོད་ཀྱི་ཕན་འབྲས་ཆུང་། སྤྱི་ཚོགས་འཕེལ་རྒྱས་འགྲོ་བ་དང་ཆབས་ཅིག་མི་རྣམས་ཀྱིས་བུད་རྫས་ལེན་པའི་ཐབས་ལམ་ཡངས་སུ་ཕྱིན་ནས་ལྕི་བ་དེ་ཉིད་རིམ་བཞིན་གྲོང་ཁྱེར་དང་གྲོང་རྡལ་གྱི་གྲོང་མིའི་འཚོ་བ་དང་གྱེས་ནས་འགྲོ་ཡི་ཡོད། འོན་ཀྱང་ནག་ཆུ་གྲོང་ཁྱེར་ལྷ་རི་རྫོང་སྨི་ཏི་ཁ་ཤང་གི་འབྲོག་པ་ཚོས་ལྕི་བ་བུད་པའི་སྤྲོ་སེམས་འཕེལ་བཞིན་ཡོད་པ་ལས་ཆུང་དུ་སོང་མེད།

གྲོང་གསེབ་དར་རྒྱས་གཏོང་བའི་སྐུལ་ཁྲིད་འོག རྒྱལ་ཁབ་ཀྱི་དབུལ་སྐྱོར་སྲིད་ཇུས་མ་དངུལ་གྱི་ཤར་རླུང་ལ་བརྟེན་ནས། སྨི་ཏི་ཁ་ཤང་གི་ལས་བྱེད་པས་དམངས་ཀྱི་བློ་གྲོས་གཅིག་ཏུ་བསྡུས་ཏེ་མི་ཚོས་མཐོང་མི་བྱེད་པའི“ལྕི་བའི་དཔལ་འབྱོར”འཕེལ་རྒྱས་བཏང་བ་རེད།

2017ལོའི་ཟླ་3པར། སྨི་ཏི་ཁ་ཤང་ཏང་ཨུད་ཚན་ཁག་གི་སྣེ་ཁྲིད་དང་བོད་སྐྱོར་ཞིང་ཆེན་དང་གྲོང་ཁྱེར་གྱི་ཤུགས་ཆེའི་རྒྱབ་སྐྱོར་འོག སྨི་ཏི་ཁ་ཤང་གི་ལྕི་བའི་བུད་རྫས་ལས་སྣོན་མཉམ་ལས་ཁང་བསྐྲུན་ནས་ཐོན་སྐྱེད་བྱེད་འགོ་ཚུགས་པ་རེད། མཉམ་ལས་ཁང་ནི་སྨི་ཏི་ཁ་ཤང་མཚོ་གདོང་གྲོང་ཚོའི་འབྲོག་པས་གཉེར་སྐྱོང་བྱེད་ཅིང་། རླངས་འཁོར་རེར(རླངས་འཁོར་རེར་ལྕི་བ་ཏུན་2.2)སྒོར་600བྱས་ནས་ཉེ་འགྲམ་གྱི་འབྲོག་པའི་ས་ནས་ལྕི་བ་ཉོས་ཏེ་ཐོན་སྐྱེད་བྱས་པའི་ལྕི་རིལ་བུད་རྫས་གསར་པ་ཏུན་རེར་སྒོར་1300བྱས་ནས་འཚོང་གི་ཡོད་པ་རེད།

སྲོལ་རྒྱུན་གྱི་ལྕི་བ་གཏལ་ལེབ་དང་མི་འདྲ་བར། ལས་སྣོན་བྱས་ནས་ཐོན་སྐྱེད་བྱས་པའི་ལྕི་རིལ་ལ་ཚན་རྩལ་གྱི་ཁྱད་ཆོས་ལྡན་པ་སྟེ། ཚ་གནོན་ལག་རྩལ་སྤྱད་པ་བརྒྱུད་སྲོལ་རྒྱུན་གྱི་ལྕི་བ་གཏལ་ལེབ་དེ་བུད་རྫས་གསར་པར་གྱུར་ནས་ཚ་དྲོད་ཆེ་བ་དང་། འབར་སླ་བ། འབར་ཡུན་རིང་བ་སོགས་ཀྱི་ཁྱད་ཆོས་ལྡན་པས་འབར་ནུས་ཧ་ཅང་ལེགས་སུ་ཕྱིན་ཡོད་པ་རེད།

མཉམ་ལས་ཁང་གི་འགན་འཁུར་བ་དོན་གྲུབ་ཀྱིས“མཉམ་ལས་ཁང་བཙུགས་ནས་ལོ་ཕྱེད་ཙམ་ཡང་སོང་མེད་རུང་བྲིན་ཚོང་བྱེད་ཚད་ཏུན་3000ཟིན་ཡོད” “མིག་སྔའི་བར། མཉམ་ལས་ཁང་གི་ལྕི་བ་ལས་སྣོན་གྱི་ཡོང་འབབ་བསྡོམས་སྒོར་ཁྲི་56ལྷག་ཙམ་ཟིན་པ་དང་ཁེ་བཟང་སྒོར་ཁྲི་22ལྷག་ཙམ་ཟིན་ཡོད”ཅེས་བཤད་པ་རེད། ད་ཆ་ས་གནས་དེ་གའི་འབྲོག་པའི་མིག་ནང་ལྕི་བ་ནི་འཚོ་བའི་རྒྱུ་ཆ་ཁོ་ན་ཙམ་མིན་པར་འཚོ་བ་ཡག་པོ་གཏོད་པའི་ཐོན་སྐྱེད་རྒྱུ་ཆ་དང་འབབ་འཕར་ཕྱུག་འགྱུར་གྱི“གསེར་རྡོག”ལྟ་བུ་ཡིན་པ་རེད།

“ཉིན་གཅིག་ཕྱུགས་ཚང་གི་ལྕི་བ་དངུལ་དུ་འགྱུར་ཡོང་བསམས་བསམས་མ་བྱུང” ལྕི་བའི་འབུད་རྫས་ལས་སྣོན་མཉམ་ལས་ཁང་བཙུགས་རྗེས་འབྲོག་པ་མིག་རྒྱལ་མཉམ་ལས་ཁང་གི་ལས་མིར་གྱུར་ཅིང་། དེ་ནས་ཁོ་པར་ཉིན་ལྟར་དངུལ་སྨར་ཡོང་འབབ་སྒོར་100ཡོད་པ་རེད།

ཁྲོམ་རའི་དགོས་མཁོ་སྔར་བས་སྐོང་ཆེད། མཉམ་ལས་ཁང་གིས་ཐོན་སྐྱེད་གཞི་ཁྱོན་ཆེ་རུ་གཏོང་བ་དང་། ལས་སྣོན་སྒྲིག་ཆས་བཀོད་སྒྲིག་བྱེད་པ། ཐོན་སྐྱེད་ཡོ་བྱད་འཐུས་སྒོ་ཚང་དུ་གཏོང་བ་བཅས་བྱས་པ་མ་ཟད། ད་དུང་ཆེད་མངགས་ཚོང་རྟགས་བཀོད་པའི་ཁུག་མ་དང་ཤོག་སྒམ་ཐོན་སྐྱེད་བྱས་ནས་ལས་སྣོན་དང་། ཐོན་སྐྱེད། ཕྱིར་ཚོང་། དོ་དམ་བཅས་གཅིག་གྱུར་བྱས་ཏེ་སྤུས་རྟགས་ཀྱི་ཕན་འབྲས་ཐོན་པར་བྱས་ཡོད། “སླད་ཕྱིན་ང་ཚོས‘ལྕི་བའི་དཔལ་འབྱོར’མུ་མཐུད་ཡག་པོ་གཉེར་ནས་འབྲོག་པ་མང་ཚོགས་ཀྱི་ཡོང་འབབ་མང་དུ་གཏོང་བ་དང་ང་ཚོའི་ཁོར་ཡུག་དེ་བས་མཛེས་སྡུག་ལྡན་པ་ཞིག་ཡོང་བར་བྱེད་ཀྱི་ཡིན”ཞེས་དོན་གྲུབ་ཀྱིས་བཤད།