2017ལོ་དང་2018ལོར། ཁོང་ལ་ལོ་གཉིས་བསྟུད་མར་བོད་ལྗོངས་ཧྭ་ཐའེ་ལུང་གཏེར་ལས་གསར་སྤེལ་ཚད་ཡོད་ཀུང་སིའི“གཞོན་ནུའི་ལས་གནས་ཀྱི་འཇོན་ཐང་ཅན་ཆེ་གྲས་བཅུའི”མཚན་སྙན་ཐོབ་པ་དང་། 2018ལོར་གུང་གཞོན་སྡེ་ཚོགས་རྒྱལ་ཡོངས་འཐུས་མི་ཚོགས་ཆེན་ཐེངས་བཅོ་བརྒྱད་པར་ཞུགས་པ། 2019ལོར་བོད་ལྗོངས་ཧྭ་ཐའེ་ལུང་གཏེར་ལས་གསར་སྤེལ་ཚད་ཡོད་ཀུང་སིའི“ཕུལ་བྱུང་སྡེ་ཚོགས་ལས་བྱེད་པའི”མཚན་སྙན་དང་། 2020ལོར་སྔ་རྗེས་སུ་བོད་ལྗོངས་ཧྭ་ཐའེ་ལུང་གཏེར་ལས་གསར་སྤེལ་ཚད་ཡོད་ཀུང་སིའི“མི་རིགས་མཐུན་སྒྲིལ་གྱི་ཕུལ་བྱུང་གུང་གཞོན་སྡེ་ཚོགས་གཞོན་ནུ”དང“ཕུལ་བྱུང་གུང་ཁྲན་ཏང་ཡོན”གྱི་མཚན་སྙན། 2021ལོར་བོད་རང་སྐྱོང་ལྗོངས་ཀྱི“དུས་རབས་གསར་པའི་བོད་ཀྱི་ལས་བཟོའི་ལས་རིགས་ཀུན་སྤྱོད་མིག་དཔེ”ཡི་གཟི་བརྗིད་མཚན་སྙན་བཅས་ཐོབ་ཡོད། ཁོང་གི་མིང་ལ་བསྟན་འཛིན་བཟང་པོ་ཟེར་བ་དང“90ནང་སྐྱེས”ཀྱི་གཞོན་ནུ་ཞིག་རེད།

ལོ་27ལ་སླེབས་པའི་བསྟན་འཛིན་བཟང་པོ་ནི་གཞིས་རྩེ་གྲོང་ཁྱེར་རྒྱལ་རྩེ་རྫོང་ལྕང་ར་ཤང་རིན་ཆེན་གླིང་གྲོང་ཚོ་ནས་རེད། 2016ལོར་ཁོང་བོད་ལྗོངས་སློབ་ཆེན་ཐོན་ཁུངས་རྩད་ཞིབ་ཆེད་ལས་ནས་ཐོན་པ་དང་སློབ་གྲྭ་ནས་ལས་མི་བསྡུ་སྐབས་བོད་ལྗོངས་ཧྭ་ཐའེ་ལུང་གཏེར་ལས་གསར་སྤེལ་ཚད་ཡོད་ཀུང་སིར་ཚུད། ཁོང་ས་གཤིས་ལས་དོན་ལ་ཧ་ཅང་དགའ་པོ་ཡོད་ལ། བརྩོན་འགྲུས་ཆེ་བ་དང་ཁེངས་སྐྱུང་གིས་ས་གཤིས་ལས་དོན་པ་རྒན་རབས་ཚོར་སློབ་སྦྱོང་བྱས་པས། མགྱོགས་མྱུར་འཚར་ལོངས་བྱུང་སྟེ། ཀྲུང་གོ་གསེར་ཚོགས་པ་བོད་ལྗོངས་ཧྭ་ཐའེ་ལུང་གཏེར་ལས་གསར་སྤེལ་ཚད་ཡོད་ཀུང་སིའི་ས་གཤིས་ལས་རོགས་བཟོ་བཀོད་པར་གྱུར།

ས་གཤིས་ལས་དོན་པ་ཞིག་གི་ངོས་ནས། བསྟན་འཛིན་བཟང་པོས་དཀའ་སྤྱད་སྙིང་རུས་དང་། དམ་པ་དོན་གཉེར། ལས་ཀའི་རྣམ་འགྱུར་ཡག་པ། ཁྲལ་སེལ་སླ་བཅོས་མི་བྱེད་པ་བཅས་ཀྱི་ལས་ཀའི་སྤྱོད་ཚུལ་ནི་ལས་རོགས་ཚོས་མིག་མཐོང་ལག་ཟིན་རེད། ས་གཤིས་ཚོགས་ཆུང་གི་ཙུའུ་ཀྲང་དབུན་ཆན་གྱིས་བསྟན་འཛིན་བཟང་པོར་རང་ཉིད་ཀྱི་ཕྲུ་གྲུ་ཇི་བཞིན་རྒྱུན་དུ་ལྟ་སྐྱོང་བྱེད་ཅིང་། ཁོང་གིས“ང་གཉིས་2017ལོ་ནས་བཟུང་ས་གཤིས་ཚོགས་ཆུང་དུ་མཉམ་དུ་ལས་ཀ་བྱས་པ་ཡིན། བསྟན་འཛིན་བཟང་པོ་ནི་ཆེད་ལས་ཀྱི་རྨང་གཞི་ཡག་པ་དང་བརྩོན་འགྲུས་ཆེ་བའི་ཕྲུ་གུ་ཞིག་རེད། འཚོ་བའི་ནང་ཁོང་མི་གཞན་དང་འཆམ་པོ་ཡོད་པ་དང་ལས་རོགས་ཚོར་དཀའ་ངལ་འཕྲད་སྐབས་རང་འགུལ་གྱིས་རོགས་པ་བྱེད་ཀྱི་ཡོད”ཅེས་བཤད།

བསྟན་འཛིན་བཟང་པོའི་ལས་ཀ་གཙོ་བོ་ནི་གདོད་མའི་ས་གཤིས་རྩོམ་སྒྲིག་དང་། གཏེར་ཁ་རྩད་ཞིབ། ས་གཤིས་ཀྱི་མ་དཔེ་ལེན་པ་སོགས་རྨང་གཞིའི་ལས་དོན་དང་དེ་བཞིན་རྨང་གཞིའི་ས་གཤིས་ཀྱི་དཔྱད་གཞིའི་ཡིག་རིགས་ལ་ཕྱོགས་སྡོམ་དབྱེ་ཞིབ་དང་ཀུང་སིས་གཏེར་ཁ་སྔོག་འདོན་དང་འཆར་གཞི་བཟོ་བ་དང་ལག་བསྟར་བྱེད་པར་དེ་བས་ཞིབ་ཅིང་ཕྲ་བའི་ཐོན་ཁུངས་གསོག་ཚད་ཀྱི་གཞི་འཛིན་ས་མཁོ་འདོན་དང་འཆར་གཞི་བདེ་བླག་ངང་ལག་བསྟར་བྱེད་རྒྱུ་དེ་རེད།

ས་གཤིས་ཚོགས་ཆུང་དུ་སླེབས་པ་ནས་བཟུང་། བསྟན་འཛིན་བཟང་པོས་ལས་དོན་ཁག་ཧུར་ཐག་བསྒྲུབས་པ་མ་ཟད། སྦྱོང་བརྡར་གྱི་གོ་སྐབས་ཚང་མར་དམ་འཛིན་གྱིས་རྟག་ཏུ་ཆེད་ལས་ཤེས་བྱ་སྦྱངས་ནས་རང་ངོས་ཀྱི་བྱང་ཚད་མཐོ་རུ་ཧུར་ཐག་གཏོང་གི་ཡོད། ཁོང་གིས་ད་དུང་ལས་ཞོར་གྱི་ཁོམ་པ་སྤྱད་ནས་འགོ་ཁྲིད་དང་ལས་གྲོགས་ཀྱི་ས་ནས་གཏེར་རིའི་ས་གཤིས་དང་གཏེར་ཁ་སྔོག་འདོན་གྱི་ཤེས་བྱ་སྦྱོང་བ་དང་ཆབས་ཅིག ས་གཤིས་དང་གཏེར་ཁ་སྔོག་འདོན་ཟུང་འབྲེལ་བྱས་ཏེ། རང་ཉིད་མགྱོགས་མྱུར་འཚར་ལོངས་ཡོང་བ་དང་ཕུལ་བྱུང་གི་ས་གཤིས་ལག་རྩལ་མི་སྣར་འགྱུར་བར་བྱེད་ཀྱི་ཡོད། ཁོང་གི་སྙིང་རུས་ལ་ཀུང་སིའི་འགོ་ཁྲིད་དང་ལས་གྲོགས་ཚོའི་གདེང་འཇོག་ཐོབ་ཡོད།

2019ལོའི་ཟླ་6པར། བསྟན་འཛིན་བཟང་པོ་གདན་ཞུས་ལྟར་བོད་རང་སྐྱོང་ལྗོངས་ཀྱིས་སྤེལ་བའི་ལས་ཞུགས་ལས་གཏོད་ཀྱི་མཛུབ་ཁྲིད་ཞབས་ཞུ་སློབ་གྲྭར་སྤེལ་བའི་བྱེད་སྒོར་ཞུགས་ཤིང་། ཁོང་གིས་རང་རིད་ཀྱི་ཉམས་མྱོང་དང་ལས་ཞུགས་ལས་གཏོད་ལས་དོན་གྱི་ཉམས་མྱོང་དང་ཟུང་འབྲེལ་བྱས་ཏེ་ལས་འདེམས་དང་། ལས་གཏོད་ལོ་རྒྱུས། འབད་འཐབ་བཅས་ཀྱི་བརྒྱུད་རིམ་ནང་འཕྲད་པའི་དཀའ་ངལ་སོགས་སློབ་མ་ཚོ་དང་སྤེལ་རེས་གཏིང་ཟབ་བྱས་པ་རེད།

“གཞུང་ལས་པར་རྒྱུགས་སྤྲོད་པའམ་ཡང་ན་གདན་ཞུ་བྱས་པ་བརྒྱུད་ཁེ་ལས་སུ་ལས་ཞུགས་བྱེད་པ་གང་ཞིག་ཡིན་རུང་ཚང་མ་མི་སྒེར་གྱི་འཚར་ལོངས་བྱེད་རིང་གདམ་ག་ཞིག་རེད། སློབ་མ་ཚོ་དང་སྤེལ་རེས་བྱས་པ་བརྒྱུད་སློབ་མ་ཚོར་ཕན་པ་ཐོབ་ན་སྙམ་གྱི་འདུག་ལ། སློབ་ཆེན་གྱི་སློབ་སྦྱོང་དུས་ཚོད་ཆུད་ཟོས་སུ་མི་གཏོང་བར་ཆེད་ལས་ཤེས་བྱ་ཡག་པོ་སྦྱོང་བ་དང་ཆབས་ཅིག ལས་རིགས་འཆར་འགོད་ཡག་པོ་བྱེད་དགོས་པ་དང་འབྲེལ་དེའི་ཆེད་དུ་འབད་བརྩོན་བྱེད་དགོས”ཞེས་བཤད། བསྟན་འཛིན་བཟང་པོས་འདི་ལྟར་ཤོད་པ་དང་འདི་ལྟར་ཡང་བྱེད་ཀྱི་ཡོད།

འབྱུང་འགྱུར་སྐོར་གླེང་སྐབས། བསྟན་འཛིན་བཟང་པོས“ལང་ཚོ་ཆུད་ཟོས་སུ་མི་གཏོང་བར་སླད་ཕྱིན་གྱི་ལས་ཀར་ངས་མུ་མཐུད་ཐོན་སྐྱེད་ཀྱི་འཐབ་ཕྱོགས་དང་པོར་གཞི་ཚུགས་ནས་ལས་འགན་ཁག་ཡག་པོ་སྒྲུབ་ཀྱི་ཡིན”ཞེས་བཤད།