ཟླ་3ཚེས་25ཉིན་ནས་ཟླ་4ཚེས་25ཉིན་བར། ཀྲུང་དབྱང་གི་སྐྱེ་ཁམས་ཁོར་ཡུག་སྲུང་སྐྱོང་ལྟ་བཤེར་ཚོགས་ཆུང་བཞི་པ་བོད་དུ་བཅའ་སྡོད་བྱེད་རིང་། མང་ཚོགས་ཀྱིས་གྲོང་ཁྱེར་ཤར་ཕྱོགས་བདེ་སྡོད་གླིང་སྒོ་འགྲམ་ལམ་དུམ་གྱི་ཁོར་ཡུག་གནད་དོན་གཅིག་སྡུད་ཐོག་ཐེར་འདོན་ཐེངས་མང་བྱས་ནས་འགྲོ་ལམ་ཉམས་གསོ་དང་ཉེ་འཁོར་གྱི་ཁོར་ཡུག་བཅོས་སྒྲིག་བྱ་རྒྱུའི་རེ་བ་བཏོན་པ་རེད། ཐེར་འདོན་བདག་སྤྲོད་དང་། གྱོད་གཞི་སྒྲུབ་གཉེར། ས་གནས་ས་ཐོག་ཏུ་ཞིབ་བསྡུར་བཅས་བྱེད་པ་ནས་བཅོས་སྒྲིག་བྱེད་ཐབས་ཁ་གསལ་བཟོ་བའི་བར་མང་ཚོགས་ཀྱིས་སེམས་ཁྲལ་བྱེད་པའི་གནད་དོན་དེ་མི་སེམས་དྲོ་བར་བྱེད་པའི་གནད་དོན་ལ་འགྱུར་བར་བྱས་ཏེ་ལས་དོན་སྤེལ་འགོ་ཚུགས་ཡོད།

གསར་འགོད་པས་བཅར་འདྲི་བྱེད་སྐབས། མང་ཚོགས་ཀྱིས་ཐེར་འདོན་བྱས་པ་དང་འབྲེལ་བ་ཡོད་པའི་གྲོང་ཁྱེར་ཤར་ཕྱོགས་བདེ་སྡོད་གླིང་སྒོ་འགྲམ་ལམ་དུམ་དེ་སྤྱི་ལེ་གཅིག་ཙམ་ཡོད་པའི་རྒྱབ་ངོས་སྲང་ལམ་གྱི་རྡོ་གཅལ་ལམ་ཞིག་ཡིན་པ་མཐོང་བྱུང་། གྲོང་མི་ཚོས་འགྲོ་ལམ་རྙིང་པར་གྱུར་པ་དང་ཉམས་གསོ་ཡག་པོ་མ་བྱུང་བར་བརྟེན་ཆར་དུས་སླེབས་རིམ་བཞིན་ལམ་ངོས་འདམ་རྫབ་ཀྱིས་ཁེངས་པ་དང་ལྷགས་པ་རྒྱག་པའི་དུས་ཚིགས་སུ་ཐལ་རྡུལ་གྱིས་ཁེངས་ཀྱི་ཡོད།

དུས་མཚུངས་གཞུང་ལམ་གྱི་ལྷོ་ངོས་ནི་གྲོང་ཁྱེར་གྱི་གྲབས་གསོག་ས་སྤྱོད་ཀྱི་སྨི་ངོས་གྲུ་5000ལྷག་ཙམ་གྱི“ས་རྒོད”ཡིན་པ་དང་ས་ཕག་གིས་གྱང་སྐོར་ནས་བཞག་ཡོད་པས་གྲོང་ཁྱེར་གྱི་རྣམ་པར་ཤུགས་རྐྱེན་བཟོ་བ་མ་ཟད། ད་དུང་དུས་ཡུན་རིང་པོའི་ནང་གད་སྙིགས་གཤོ་ཡུལ་དུ་གྱུར་ནས་ཉེ་འཁོར་གྱི་དུད་ཚང་800ལྷག་ཙམ་ལ་དཀའ་ངལ་མང་པོ་བཟོས་ལུགས་བརྗོད་པ་རེད།

འོ་བརྒྱལ་ཐང་སྡེ་ཁུལ་གྱི་ཀྲུའུ་རེན་པ་སངས་ཀྱིས“མ་གཞི་སྡེ་ཁུལ་གྱིས་གནད་དོན་ཁོང་དུ་ཆུད་དེ་རྒྱུན་དུ་ཆུ་གཏོར་ནས་ཐལ་རྡུལ་མེད་པར་བཟོ་བ་དང་གད་སྙིགས་གཙང་ཕྱགས་སོགས་བྱེད་ཀྱི་ཡོད་མོད། འོན་ཀྱང་ཁོར་ཡུག་བཅོས་སྐྱོང་གི་རྐྱེན་ངན་དེ་སྔར་བཞིན་སེལ་ཐུབ་མེད”ཅེས་བཤད།

ཟླ་3ཚེས་27ཉིན་ལམ་དུམ་དེ་ཐེར་འདོན་ཐེངས་དང་པོ་བྱས་རྗེས། ཀྲུང་དབྱང་ལྟ་བཤེར་ཚོགས་ཆུང་གི་སྒྲུབ་སྤྲོད་བླང་བྱ་ལྟར། ལྷ་ས་གྲོང་ཁྱེར་གྱིས་ཕྱོགས་ཡོངས་དང་། བརྒྱུད་རིམ་ལྡན་པ། བཅོས་སྒྲིག་མཐར་ཕྱིན་བཅས་ཀྱི་ལས་ཀའི་རྩ་དོན་མཐའ་འཁྱོངས་བྱས་ནས་ལྟ་སྐུལ་བྱེད་ཀྱིན་དག་ཐེར་དང་འཕྲལ་སྒྲུབ་འཕྲལ་བཅོས་ཀྱིས་འཕྲལ་མར་སྡོད་ཁང་འཛུགས་སྐྲུན་དང་ཁོར་ཡུག་སྲུང་སྐྱོང་སོགས་ཀྱི་སྡེ་ཚན་བཀོད་སྒྲིག་བྱས་ཏེ་གད་སྙིགས་གཙང་ཕྱགས་དང་སྒྲིག་འགལ་ངང་འཁོར་རིགས་འཇོག་པ་བཅོས་སྒྲིག་སོགས་ཀྱི་དུས་འགོའི་དག་ཐེར་ལས་དོན་སྤེལ་ནས་དེའི་རིང་ཁྱོན་གད་སྙིགས་ཏུན་24གཙང་ཕྱགས་བྱས་པ་མ་ཟད། ད་དུང་ས་ཕག་གིས་སྐོར་བའི་གྱང་གི“ས་རྒོད”སྨི་ངོས་གྲུ་ལྔ་སྟོང་ལ་རྡུལ་འགོག་དྲ་བ་གཡོགས་ནས་གྲོང་མིའི་འཚོ་བའི་ཁོར་ཡུག་ལེགས་སུ་ནུས་ལྡན་བཏང་བ་རེད།

ལྟ་སྐུལ་བྱེད་ཀྱིན་དག་ཐེར་དང་འཕྲལ་སྒྲུབ་འཕྲལ་བཅོས་བྱེད་པ་དང་ཆབས་ཅིག་ལྷ་ས་གྲོང་ཁྱེར་གྱིས་ལམ་དུམ་འགྲམ་གྱི“ས་རྒོད”དེ་དེ་སྔའི་ཚོང་ལས་ཐད་སྤྱོད་རྒྱུའི་ས་ཆ་ནས་སྤྱི་པའི་སྔོ་ལྗང་དུ་བསྒྱུར་ཏེ་རྒྱ་ཁྱོན་སྨི་ངོས་གྲུ་7584ཟིན་པའི་གྲོང་ཁྱེར་གྱི་སྤྱི་གླིང་ཞིག་བསྐྲུན་རྒྱུ་དང་འབྲེལ་ལེ་ལག་ཚང་བའི་རྒྱ་ཁྱོན་སྨི་ངོས་གྲུ་4040ཟིན་པའི་ས་འོག་རླངས་འཁོར་འཇོག་ས་ཞིག་བསྐྲུན་ནས། མཐའ་འཁོར་གྱི་ཁོར་ཡུག་ལེགས་སུ་བཏང་སྟེ་གནད་དོན་དག་ཐེར་ཐུབ་པའི་འགན་ལེན་བྱེད་རྒྱུ་རེད།

ད་ཆ་གྲོང་མི་ཚོར“ལྗང་མདོག་ཕན་བདེ”དེ་མི་རིང་བར་མངོན་འགྱུར་ཡོང་རྒྱུ་རེད། “ཁོངས་གཏོགས་ཁུལ་གྱི་མང་ཚོགས་ཚོས་དག་ཐེར་ལ་བློ་ཡིད་ཚིམ་ཚད་དཔྱད་བསྡུར་བྱེད་སྐབས‘བློ་ཡིད་ཚིམ་པོ’དང‘བློ་ཡིད་ཧ་ཅང་ཚིམ་པོ’ཡོད་ལུགས་བརྗོད་པ་དེ་ཐོག་ནས་ཀྲུང་དབྱང་གི་སྐྱེ་ཁམས་ཁོར་ཡུག་ལྟ་བཤེར་བྱེད་ཤུགས་དང་དྲོ་སྐྱིད་མཚོན་པ་མ་ཟད། ད་དུང་མཛེས་སྡུག་ལྡན་པའི་སྐྱེ་ཁམས་ཁོར་ཡུག་ཁྲོད་གཞི་རིམ་མང་ཚོགས་ཚོའི་ཐོབ་སྣང་དང་སྐྱིད་སྣང་དེ་བས་ཆེ་རུ་ཕྱིན་པ་མཚོན་ཐུབ”ཅེས་འོ་བརྒྱལ་ཐང་སྡེ་ཁུལ་ཏང་ཀྲི་པུའི་ཧྲུའུ་ཅི་དང་པོ་ཝུའུ་ཏུང་ཆའོ་ཡིས་བརྗོད།