ཉེ་བའི་ལོ་ཤས་རིང་། ཁྲུང་ཁྲུང་སྐེ་ནག་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་གྱི་གཙོ་གནད་ས་ཁོངས་མལ་གྲོ་གུང་དཀར་རྫོང་ཐང་སྐྱ་ཤང་གིས་སྐྱེ་ཁམས་སྲུང་སྐྱོང་ལས་དོན་ཐོག་མཐའ་བར་གསུམ་དུ་ལས་དོན་ཁག་གི་ཨང་དང་པོར་བཞག་ཅིང་། མིག་སྔའི་བར་ཤང་དེའི་སྤྱི་ཕན་སྐྱེ་ཁམས་ནགས་ས་བདག་སྐྱོང་གི་རྒྱ་ཁྱོན་མུའུ་ཁྲི་15.79ཟིན་ནས། ཤང་ཡོངས་ཀྱི་སྔོ་འགྱུར་ཁྱབ་ཁྱོན་ལོ་རེ་བཞིན་ཆེ་རུ་འགྲོ་བཞིན་ཡོད་པ་རེད།

“སྔོན་ཆད་ང་ཚོའི་འདི་གར་ལྗོན་ཤིང་ཉུང་ལ་བྱེ་རླུང་ཧ་ཅང་ཆེན་པོ་ལྡང་བ་དང་། རླུང་བུ་ལྡང་ཚེ་གང་སར་བྱེ་མས་ཁེངས་ཀྱི་ཡོད། ད་ཆ་སྒོ་དོན་མ་ཐག་ལྗོན་ཤིང་ཡོད་པས། སྔོ་ཐིང་ཐིང་གི་རྣམ་པ་མཐོང་སྐབས་སེམས་པའང་ཧ་ཅང་སྐྱིད་ལ། བྱེ་རླུང་ཉུང་བ་དང་ཁོར་ཡུག་མཛེས་སུ་ཕྱིན་འདུག”ཅེས་ཐང་སྐྱ་ཤང་བསླབ་སྟོན་གྲོང་ཚོའི་གྲོང་མི་སྟོབས་རྒྱལ་གྱིས་གསར་འགོད་པར་བཤད།

ཐང་སྐྱ་ཤང་དུ་ཤིང་འཛུགས་ནགས་བཟོ་བྱས་པ་བརྒྱུད་འགྱུར་ལྡོག་ཕྱིན་པ་ནི་མལ་གྲོ་གུང་དཀར་རྫོང་གིས་རྒྱལ་ཁབ་ས་ཆ་སྔོ་འགྱུར་བྱ་སྤྱོད་ཧུར་ཐག་སྤེལ་བའི་མཚོན་ཚུལ་ཞིག་རེད།

ཉེ་བའི་ལོ་ཤས་རིང་། མལ་གྲོ་གུང་དཀར་རྫོང་གིས་སྐྱེ་ཁམས་ཁོར་ཡུག་སྲུང་སྐྱོང་གི་ལས་དོན་ལ་ཚད་མཐོའི་མཐོང་ཆེན་བྱས་ཏེ། ཁོར་ཡུག་ལ་བརྟེན་ནས་རྫོང་འཛུགས་སྐྱོང་དང་རྣམ་གྲངས་གཞི་རྟེན་དུ་མཐའ་འཁྱོངས་བྱས་ཏེ། ལྷ་སའི་ཉེ་འཁོར་གྱི་འགོག་སྲུང་ནགས་ཚལ་མ་ལག་འཛུགས་སྐྲུན་འདུ་འགོད་དང་། “གཙང་པོ་གཉིས་དང་ཆུ་བོ་བཞི”རྒྱུག་ཁུལ་གྱི་ནགས་བཟོའི་འདུ་འགོད། ལྷ་ཉིང་རིམ་མཐོའི་གཞུང་ལམ་རྒྱུད་ཀྱི་མི་ཐབས་ལ་བརྟེན་པའི་ནགས་བཟོའི་འདུ་འགོད་སོགས་གཙོ་གནད་སྐྱེ་ཁམས་འདུ་འགོད་འཛུགས་སྐྲུན་ལ་སྐུལ་འདེད་ཧུར་ཐག་བཏང་ཡོད། 2018ལོ་ནས་བཟུང་། མལ་གྲོ་གུང་དཀར་རྫོང་གིས་ཁྱོན་བསྡོམས་སྡོང་ཕྲུག་སྣ་ཚོགས་ཁྲི་53ལྷག་ཙམ་བཙུགས་ཡོད།

2022ལོར་མལ་གྲོ་གུང་དཀར་རྫོང་གིས་ལྗོན་ཤིང་སྡོང་རྐང་ཁྲི་10ལྷག་ཙམ་བཙུགས་ནས་མི་དམངས་མང་ཚོགས་ཀྱི་མཛེས་སྡུག་ལྡན་པའི་སྐྱེ་ཁམས་ཁོར་ཡུག་གི་དགོས་མཁོ་སྐོང་གང་ཐུབ་བྱས་ཏེ། སྐྱེ་ཁམས་ཤེས་དཔལ་འཛུགས་སྐྱོང་གི་རྣམ་པ་གསར་པ་ནུས་ཤུགས་ཡོད་རྒུས་གཏོད་རྩིས་ཡོད་པ་རེད།

མལ་གྲོ་གུང་དཀར་རྫོང་གིས་གོ་རིམ་ལྡན་པའི་ངང་ཤིང་འཛུགས་ནགས་བཟོའི་ལས་དོན་ལ་སྐུལ་འདེད་བཏང་བ་དང་དུས་མཚུངས། ཤང(གྲོང་རྡལ)གི་བཙོག་ཆུ་གཙང་གསིང་བཟོ་གྲྭ་འཛུགས་སྐྲུན་དང་། གད་སྙིགས་རིགས་དབྱེ། “གསང་སྤྱོད་གསར་བརྗེ”སོགས་ཀྱི་ལས་དོན་ཧུར་ཐག་སྤེལ་བ་རེད།

ལྷ་ས་སྐྱིད་ཆུའི་སྟོད་རྒྱུད་ཀྱི་ཁོར་ཡུག་སྲུང་སྐྱོང་བྱེད་ཤུགས་ཆེ་རུ་གཏོང་ཆེད། 2019ལོ་ནས་བཟུང་། མལ་གྲོ་གུང་དཀར་རྫོང་གིས་ཐང་སྐྱ་ཤང་དང་། ཉི་མ་ལྕང་རྭ་ཤང་། རྩ་ཞོལ་ཤང་། རྨམ་པ་ཤང་། རུ་ཐོག་ཤང་། བཀྲིས་སྒང་ཤང་བཅས་སུ་བཙོག་ཆུ་གཙང་གསིང་བཟོ་གྲྭ་11གསར་དུ་བསྐྲུན་པ་དེ་དག་གིས་ཉིན་རེའི་བཙོག་ཆུ་གཙང་གསིང་བྱེད་ཁྱོན་ཏུན་4000ལྷག་ཙམ་ཟིན་ནས། ལྗོངས་ཡོངས་ཀྱི་རྫོང་དང་ཤང་གི་བཙོག་ཆུ་གཙང་གསིང་བཟོ་གྲྭ་ཡོངས་སུ་ཁྱབ་པའི་དཔེ་སྟོན་རྫོང་དང་པོར་གྱུར་ཡོད།

བཙོག་ཆུ་གཙང་གསིང་བཟོ་གྲྭའི་ལག་རྩལ་འཁོར་རྒྱུག་སྲུང་སྐྱོང་མི་སྣས་གསར་འགོད་པར། “མིག་སྔར་བཙོག་ཆུ་གཙང་གསིང་བཟོ་གྲྭ་11གིས་གཙང་གསིང་བྱས་པའི་བཙོག་ཆུ་དང་ཆུ་སྤུས་ཚང་མ་རྒྱལ་ཁབ་ཀྱི་རིམ་པ་དང་པོའི་Aརིགས་ཀྱི་ཚད་གཞིར་སླེབས་ནས། ཤང(གྲོང་རྡལ)ཁག་གི་གྲོང་མིར་གཙང་ཞིང་གྲལ་སྟར་སྒྲིག་པའི་ཁོར་ཡུག་ཅིག་བཏོད་ཡོད་ལ། མང་ཚོགས་ཀྱི་འཚོ་བའི་ཆུ་ཚད་ཀྱང་ལེགས་སུ་བཏང་ཡོད”ཅེས་བཤད།

2021ལོར་མལ་གྲོ་གུང་དཀར་རྫོང་གིས་ཤང་7དང་གྲོང་རྡལ་1གི་སྐྱེ་ཁམས་ཤེས་དཔལ་འཛུགས་སྐྱོང་དཔེ་སྟོན་ཤང(གྲོང་རྡལ)འཛུགས་སྐྲུན་འཆར་འགོད་ལེགས་སྒྲུབ་བྱས་པ་དང་། གྲོང་ཚོ་41གི་གྲོང་མིའི་འཛུགས་སྐྲུན་ལག་བསྟར་ཇུས་གཞི་དང་དེ་བཞིན་རྫོང་དང་། ཤང་། གྲོང་ཚོ་བཅས་ཀྱི་ལས་དོན་སྙན་སྒྲོན་ཁྱོན་ཡོངས་ལ་ཁྱབ་པའི་སྒྲིག་ཁོངས་ལས་དོན་སྤེལ་བ། གད་སྙིགས་གནོན་བཙིར་རླངས་འཁོར་28དང་གད་སྙིགས་བསྡུ་རུབ་སྒམ་338བཀོད་སྒྲིག་བྱས་པས། རྫོང་ཡོངས་ཀྱི་སྲིད་འཛིན་གྲོང་ཚོའི་འཚོ་བའི་གད་སྙིགས་བསྡུ་རུབ་དང་གཙང་སེལ་ནུས་ལྡན་ཐུབ་ཡོད་པ་རེད། གཞན་ཡང་རྫོང་ཁོངས་སུ་གད་སྙིགས་རིགས་དབྱེ་བརྗེ་སྒྱུར་ས་ཚིགས་མང་པོ་བཙུགས་པས། “སྲིད་གཞུང་གིས་གཙོ་ཁྲིད་དང་། སྡེ་ཚན་གྱིས་སྣེ་ཁྲིད། ཚོད་ལྟའི་སྐུལ་ཁྲིད། དམངས་ཡོངས་ཞུགས་པ”བཅས་ཀྱི་འཚོ་བའི་གད་སྙིགས་རིགས་དབྱེ་གཙང་སེལ་གྱི་འཁོར་སྐྱོད་རྣམ་པ་ཞིག་རགས་ཙམ་ཆགས་ཡོད་པ་རེད།

ད་ཆ་མལ་གྲོ་གུང་དཀར་རྫོང་གིས་ལག་བསྟར་བྱེད་ཐུབ་ངེས་ཀྱི་ཁོར་ཡུག་སྲུང་སྐྱོང་གི་བྱ་ཐབས་རབ་དང་རིམ་པ་ལག་བསྟར་བྱས་པས། མི་དང་རང་བྱུང་ཁམས་ཞི་མཐུན་མཉམ་གནས་དང་རི་སྔོན་ཆུ་དྭངས་རྒྱུན་མཐུད་ཐུབ་པའི་མཛེས་སྡུག་ལྡན་པའི་གྲོང་གསེབ་ཀྱི་འཆར་གཞི་ཞིག་བཀོད་པ་མ་ཟད། ད་དུང“གནམ་དེ་བས་སྔོ་བ་དང་། ཆུ་དེ་བས་དྭངས་པ། ས་དེ་བས་གཙང་བ། གྲོང་ཚོ་དེ་བས་མཛེས་པ”བཅས་ཀྱི་འཚོ་བའི་ཁོར་ཡུག་བཟང་པོ་བཏོད་པས། མི་རིགས་ཁག་གི་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་སྔར་བས་ཆེ་རུ་ཕྱིན་ཡོད་པ་རེད།