དམངས་ཡོངས་ཀྱི་རྒྱལ་ཁབ་བདེ་འཇགས་སློབ་གསོའི་ཉིན་མོ་ཐེངས་བདུན་པ་འཆར་ཉེའི་མཚམས་སུ། རང་ལྗོངས་ཀྱི་ས་གནས་ཁག་དང་སྡེ་ཚན་ཁག་གིས་རྣམ་པ་སྣ་ཚོགས་དང་བརྗོད་དོན་མངོན་གསལ་དོད་པའི་དམངས་ཡོངས་ཀྱི་རྒྱལ་ཁབ་བདེ་འཇགས་སློབ་གསོའི་ཉིན་མོའི་དྲིལ་བསྒྲགས་བྱེད་སྒོ་སྤེལ་ནས། མང་ཚོགས་ཚོའི་རྒྱལ་ཁབ་ཀྱི་བདེ་འཇགས་སྲུང་སྐྱོང་བྱེད་པའི་འདུ་ཤེས་སྔར་བས་ཟབ་ཏུ་གཏོང་བ་དང་། རྒྱལ་ཁབ་ཀྱི་བདེ་འཇགས་སྲུང་སྐྱོང་བྱེད་པ་ནི་མི་ཚང་མའི་འགན་འཁྲི་ཡིན་པའི་འདུ་ཤེས་མི་སེམས་སུ་གཏིང་ཟབ་ཟུག་པར་སྐུལ་འདེད་བཏང་ཡོད་པ་རེད། 

ཉིན་ཤས་གོང་། ལྷ་ས་རྒྱལ་མཚམས་འཛུལ་གྲོལ་མཐའ་སྲུང་ཞིབ་བཤེར་ས་ཚིགས་ཀྱིས་དམངས་སྤྱོད་མཁའ་འགྲུལ་བོད་ལྗོངས་ཁུལ་ཅུས་སྤྱི་བདེ་ཅུས་དང་མཉམ་དུ་སྒྲོག་འགྲེལ་ཡན་ལག་རུ་ཁག་ཆུང་གྲས་བཙུགས་ཏེ། གོང་དཀར་རྒྱལ་སྤྱིའི་གནམ་ཐང་T3གནམ་ཐང་བབས་ཚུགས་ཀྱི་གནམ་གྲུ་སྒུག་སའི་ཚོམས་ཆེན་དང་། དེ་གར་ཡོད་པའི་ཁེ་ལས་སོགས་སུ་བསྐྱོད་དེ་ཆེད་དོན་སྒྲོག་འགྲེལ་བྱེད་སྒོ་སྤེལ་ཞིང་། བྱེད་སྒོ་སྤེལ་རིང་། སྒྲོག་འགྲེལ་ཡན་ལག་རུ་ཆུང་གིས་རྒྱལ་ཁབ་ཀྱི་ཆབ་སྲིད་བདེ་འཇགས་དང་། སྤྱི་ཚོགས་བདེ་འཇགས། དྲ་རྒྱའི་བདེ་འཇགས། རྒྱལ་མཚམས་འཛུལ་གྲོལ་བདེ་འཇགས་སོགས་ཀྱི་ནང་དོན་ལ་དམིགས་ཏེ་སྒྲོག་འགྲེལ་བྱས་པ་མ་ཟད། དེ་གའི་མང་ཚོགས་ཀྱིས་བཏོན་པའི་དྲི་བར་ལན་བཏབ་པ་རེད། ད་ཐེངས་ཀྱི་བྱེད་སྒོའི་ནང་ཁྱོན་དྲིལ་བསྒྲགས་དཔྱད་ཡིག་300ལྷག་ཙམ་སྤྲད་པ་དང་། བརྡ་སྦྱོར་10ལྷག་ཙམ་སྦྱར་བ། ཁ་རས་སོགས་རིམས་འགོག་དངོས་ཟོག་100ལྷག་ཙམ་སྤྲད་པ། མང་ཚོགས་མི་ཐེངས་500ལྷག་ཙམ་ལ་སློབ་གསོ་བརྒྱབ་པ། མི་ཐེངས་40ལྷག་ཙམ་གྱི་བློ་འདྲི་དང་ལེན་བྱས་ཡོད་པ་རེད། 

ཉིང་ཁྲི་མཐའ་མཚམས་དོ་དམ་ཉིང་ལག་རུ་ཁག་སྐྱེམས་སྟོང་མཐའ་མཚམས་མངགས་གཏོང་ཁང་གི་མི་དམངས་ཉེན་རྟོག་པས་སློབ་ཆུང་སློབ་མར་རྒྱལ་ཁབ་བདེ་འཇགས་ཀྱི་ཤེས་བྱ་སྒྲོག་འགྲེལ་བྱེད་བཞིན་པ།

ཉེ་ཆར། ཉིང་ཁྲི་མཐའ་མཚམས་དོ་དམ་ཉིང་ལག་རུ་ཁག་གི་མི་དམངས་ཉེན་རྟོག་པས་ཁོངས་གཏོགས་ཁུལ་གྱི་སློབ་ཆུང་དུ་བསྐྱོད་ནས། སྒྲོག་འགྲེལ་གྱི་བཅའ་ཁྲིམས་ལག་དེབ་སྤྲོད་པ་དང་། བརྙན་ཐུང་དང་པར་རིས་སྟོན་པ་སོགས་ཀྱི་བྱེད་ཐབས་བརྒྱུད། དམངས་ཡོངས་ཀྱི་རྒྱལ་ཁབ་བདེ་འཇགས་སློབ་གསོའི་ཉིན་མོའི་བརྗོད་དོན་གཙོ་བོའི་བྱེད་སྒོ་སྤེལ་བ་རེད། སྐྱེམས་སྟོང་མཐའ་མཚམས་མངགས་གཏོང་ཁང་དང་། ཚ་བ་རོང་མཐའ་མཚམས་མངགས་གཏོང་ཁང་། དམ་མཐའ་མཚམས་མངགས་གཏོང་ཁང་བཅས་ཀྱི་མི་དམངས་ཉེན་རྟོག་པས་གོ་བདེ་ཤེས་སླའི་སྐད་ཆའི་ཐོག་ནས་སློབ་ཆུང་སློབ་མ་ཚོར་རྒྱལ་ཁབ་བདེ་འཇགས་ཀྱི་གཞི་རྩའི་ནང་དོན་དང་རྒྱལ་ཁབ་བདེ་འཇགས་སྲུང་བའི་འོས་འགན་སོགས་གསལ་འགྲེལ་བྱས་པ་མ་ཟད། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྤྱི་དམངས་ཤིག་ཡིན་པའི་སློབ་ཆུང་སློབ་མ་ཚོར་རང་རེའི་རྒྱལ་ཁབ་ཀྱི་བདེ་འཇགས་སྲུང་སྐྱོང་བྱེད་པའི་འོས་འགན་དང་འགན་འཁྲི་ཡོད་ལུགས་སློབ་སྟོན་ཡང་བྱས་པ་རེད།

ཉིན་ཤས་བསྟུད་མར། གཞིས་རྩེ་མཐའ་མཚམས་དོ་དམ་ཉིང་ལག་རུ་ཁག་གིས“སྤྱི་ཡོངས་ཀྱི་རྒྱལ་ཁབ་བདེ་འཇགས་ལྟ་བ་བརྟན་པོར་འཛུགས་པ་དང་། དུས་རབས་གསར་པའི་རྒྱལ་ཁབ་བདེ་འཇགས་ཀྱི་གྲུབ་འབྲས་ཚོར་བ་བྱས་ནས། ཏང་གི་ཚོགས་ཆེན་ཉི་ཤུ་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་ཆེད་རྣམ་པ་བཟང་པོ་ཞིག་གཏོད་དགོས”ཞེས་པ་བརྗོད་དོན་གཙོ་བོར་བྱས་པའི་དམངས་ཡོངས་ཀྱི་རྒྱལ་ཁབ་བདེ་འཇགས་སློབ་གསོའི་ཉིན་མོའི་དྲིལ་བསྒྲགས་བྱེད་སྒོ་སྤེལ་ཞིང་། བྱེད་སྒོའི་ཁྲོད་རིམས་ནད་ཐོན་རིང་གི་ལས་ཀའི་དོན་དངོས་དང་མཐའ་མཚམས་ས་ཁོངས་ཀྱི་ས་རྒྱ་ཆེ་ཞིང་མི་འབོར་ཉུང་བ་སོགས་ཀྱི་ཁྱད་ཆོས་ལ་གཞིགས་ནས། བཅའ་ཁྲིམས་དྲིལ་བསྒྲགས་ཞབས་ཞུའི་ཡན་ལག་རུ་ཆུང་བཙུགས་ཏེ། ས་ཆ་མང་པོར་བསྐྱོད་པ་དང་དྲ་ཐོག་དང་དྲ་ཕྱི་ཟུང་འབྲེལ་གྱི་བྱེད་ཐབས་བརྒྱུད། བཅའ་ཁྲིམས་དང་ཁྲིམས་སྲོལ་དང་། རྒྱལ་ཁབ་བདེ་འཇགས་ཀྱི་འདུ་ཤེས་སློབ་གྲྭ་དང་། ཞིང་དུད་སོགས་སུ་སྤེལ་བར་སྐུལ་འདེད་བཏང་ཡོད་པ་རེད། ད་ཐེངས་ཀྱི་དྲིལ་བསྒྲགས་བྱེད་སྒོའི་ནང་ཞུགས་མཁན་མི་དམངས་ཉེན་རྟོག་པས“རྒྱལ་ཁབ་བདེ་འཇགས་དང་སྤྱི་ཚོགས་བརྟན་ལྷིང་ལ་སྲུང་སྐྱོང་བྱ་རྒྱུ་ནི་སྤྱི་དམངས་ཚང་མའི་འཁུར་དགོས་ངེས་ཀྱི་འོས་འགན་ཡིན་ཞིང་། སྤྱི་ཡོངས་ཀྱི་རྒྱལ་ཁབ་བདེ་འཇགས་ལྟ་བ་ངེས་པར་དུ་མཐའ་འཁྱོངས་བྱེད་པ་དང་། སྲོལ་རྒྱུན་གྱི་བདེ་འཇགས་དང་སྲོལ་རྒྱུན་མིན་པའི་བདེ་འཇགས་ལ་སྤྱི་འདོམས་བྱེད་པ། དམ་འཛིན་ལྷོད་མེད་བཅས་བྱས་ནས་རྒྱལ་ཁབ་བདེ་འཇགས་ཀྱི་འདུ་ཤེས་དངོས་འབྲེལ་འཛུགས་ཐུབ་པ་བྱེད་དགོས”ཞེས་བཤད།