ཤིན་ཧྭ་གསར་འགྱུར་ཁང་པེ་ཅིང་ནས་ཟླ་4ཚེས་6ཉིན་གློག་འཕྲིན་འབྱོར་པ་གཞིར་བཟུང་། རེས་སྐོར་གཉིས་པའི་ཀྲུང་དབྱང་སྐྱེ་ཁམས་ཁོར་ཡུག་སྲུང་སྐྱོང་ལྟ་བཤེར་ཁག་དྲུག་པའི་ལས་དོན་སྤེལ་བཞིན་ཡོད་ཅིང་། ལྟ་བཤེར་ཚོགས་ཆུང་གིས་ཚེས་6ཉིན་བོད་ལྗོངས་ཆབ་མདོ་གྲོང་ཁྱེར་གྱི་ཨར་འདམ་རྣམ་གྲངས་ཞིབ་མཆན་འགོད་སྐབས་ལས་ཆེ་བ་བསྐྲུན་ནས་སྐྱེ་ཁམས་གཏོར་སྐྱོན་གྱི་གནད་དོན་མངོན་གསལ་དོད་པའི་དཔེ་མཚོན་གྱོད་དཔེ་བརྡ་ཁྱབ་བཏང་ནས་ཉེན་བརྡ་གཏོང་བ་དང་། གནད་དོན་དག་ཐེར་ལ་སྐུལ་འདེད་ཏན་ཏིག་བཏང་བ་རེད།

ལྟ་བཤེར་ཚོགས་ཆུང་གིས་བསྟན་དོན། བོད་ལྗོངས་ཆབ་མདོ་གྲོང་ཁྱེར་གྱི་ཨར་འདམ་རྣམ་གྲངས་དེ་ཞིབ་མཆན་འགོད་སྐབས་ལས་ཆེ་བ་བསྐྲུན་ནས་སྐྱེ་ཁམས་གཏོར་སྐྱོན་གྱི་གནད་དོན་མངོན་གསལ་དོད་པོ་ཡོད། རང་སྐྱོང་ལྗོངས་ཀྱི་འབྲེལ་ཡོད་སྡེ་ཚན་གྱིས་ཆབ་མདོ་གྲོང་ཁྱེར་གྱི་ཨར་འདམ་རྒྱུ་ཆའི་རྣམ་གྲངས་བཞིའི་ཐོན་ནུས་བསྡོམས་ལོ་རེར་ཏུན་ཁྲི་255ཟིན་པར་ཆོག་མཆན་སྤྲད་ཡོད་མོད། འོན་ཀྱང་དངོས་སུ་བསྐྲུན་པའི་ཐོན་ནུས་དེ་ཆོག་མཆན་ཐོབ་པའི་ཐོན་ནུས་ལས་41.2%བརྒལ་ཡོད་པ་རེད། རྒྱལ་ཁབ་འབྲེལ་ཡོད་སྡེ་ཚན་གྱི་བླང་བྱར་གཞིགས་ན། “རྣམ་གྲངས་ཞིབ་མཆན་འགོད་སྐབས་ལས་ཆེ་བ་བསྐྲུན་པའི”བྱེད་སྤྱོད་ཡོད་པ་ཤེས་ཚེ། དག་ཐེར་བྱེད་དགོས་པའི་བཀའ་གཏོང་དགོས་པ་མ་ཟད། དག་ཐེར་གནད་འཁེལ་མ་བྱུང་གོང་རང་དགར་ཐོན་སྐྱེད་བྱེད་མི་ཆོག འོན་ཀྱང་ས་གནས་དེ་གའི་འབྲེལ་ཡོད་སྡེ་ཚན་གྱིས་ལྟ་འདོམས་ཡག་པོ་མ་བྱས་པར་རྣམ་གྲངས་དེ་དག་སྒྲིག་འགལ་ངང་ཐོན་སྐྱེད་བྱེད་རིགས་སྣང་མེད་དུ་གཏོང་གི་ཡོད་པ་རེད།