ཉིན་ཤས་གོང་བོད་ལྗོངས་ནག་ཆུ་གྲོང་ཁྱེར་ལྷ་རི་རྫོང་སྙེའུ་ཤང་དུ་གཉའ་གཅོག་མཛད་སྒོ་འཚོག་བཞིན་པ།

ཁམ་བུའི་མེ་ཏོག་རབ་ཏུ་བཞད། ཞིང་ཁ་གྲུ་བཞི་ཡིད་དུ་འོང་། “བོད་བྱང་ཐང་གི་སྦས་ལུང”ཞེས་སུ་གྲགས་པའི་བོད་ལྗོངས་ནག་ཆུ་གྲོང་ཁྱེར་ལྷ་རི་རྫོང་སྙེའུ་ཤང་དུ། རྩི་ཤིང་དང་མེ་ཏོག་གིས་རབ་ཏུ་བརྒྱན་པའི་མཛེས་ལྗོངས་ཁྲོད་མི་རྣམས་ཀྱིས་དཔྱིད་རྨོད་ལས་ལ་གཞོལ་འགོ་ཚུགས།

བཀྲ་ཤིས་སྒང་གྲོང་ཚོའི་ཡུལ་མི་པད་མ་ཚེ་དབང་ད་ལོ་ལོ་31ལ་སླེབས་ཀྱི་ཡོད། ཁོ་པས་བྱང་ཆ་ལྡན་པའི་ངང་འདྲུད་འཐེན་འཕྲུལ་འཁོར་བཏང་སྟེ་འཕྲུལ་འཁོར་གྱི་ལྡིར་སྒྲའི་ཁྲོད་ས་སློག་རྒྱག་བཞིན་མཆིས། ཅང་མ་འགོར་བར་རང་ཁྱིམ་གྱི་ས་ཞིང་ས་སློག་བརྒྱབ་ཟིན། པད་མ་ཚེ་དབང་གིས་འདྲུད་འཐེན་འཕྲུལ་འཁོར་གཏོང་མཚམས་བཞག་སྟེ་གྲོང་ཚོའི་གཉའ་གཅོག་མཛད་སྒོར་ཞུགས་རྒྱུའི་གྲ་སྒྲིག་བྱས།

“ངའི་ཁྱིམ་ལ་ས་ཞིང་མུའུ་20ཡོད་ཅིང་ཕྱེད་ཀར་གྲོ་དང་ཕྱེད་ཀར་ནས་འདེབས་ཀྱི་ཡོད། ད་ཆ་ཞིང་ཁ་འདེབས་དུས་ཧ་ཅང་སྟབས་བདེ་པོ་འདུག སྔོན་ཆད་ཉིན་མང་པོ་འགོར་རུང་ད་ཆ་འདྲུད་འཐེན་འཕྲུལ་འཁོར་སྤྱད་ན་ཉིན་གཅིག་ལ་ཞིང་ལས་ཚང་མ་ཚར་གྱི་འདུག”ཆུང་དུས་ནང་མི་དང་མཉམ་དུ་ཞིང་ལས་བྱེད་སྐབས་ཀྱི་དཀའ་ངལ་པད་མ་ཚེ་དབང་གིས་གསལ་པོར་དྲན་གྱི་ཡོད།

“ད་ལྟའི་འཚོ་བ་དངོས་གནས་སྐྱིད་པོ་རེད། ལོ་ལྟར་དབྱར་རྩྭ་དགུན་འབུ་དང་བེ་ཤ་ནས་ཡོང་འབབ་སྒོར་ཁྲི་བརྒྱད་དགུ་ལྷག་ཙམ་ཡོང་གི་འདུག ངས་ཟོག་འཁོར་ཆེ་གྲས་ཤིག་ཉོས་ནས་ཨར་པོ་རྒྱག་སར་དངོས་ཟོག་དབོར་འདྲེན་བྱེད་པར་སྐྱོད་ཀྱི་ཡོད། ན་ནིང་ཡོང་འབབ་སྒོར་ཁྲི་5བྱུང་། ཞིང་ཁ་འདེབས་པའི་ཁ་གསབ་དང་རྩྭ་རའི་ཁ་གསབ་ལེན་རྒྱུ་ཡོད་པ་མ་ཟད། ད་དུང་ཕྲུ་གུ་ཚོ་སློབ་གྲྭར་འགྲོ་བར་སློབ་ཡོན་སྤྲོད་དགོས་ཀྱི་མེད་པས་འཚོ་བར་སེམས་ཁྲལ་སྤུ་ཙམ་ཡང་མི་འདུག དེ་དག་ནི་ཏང་དང་རྒྱལ་ཁབ་ཀྱི་སྲིད་ཇུས་བཟང་པོ་ལས་བྱུང་བ་ཞིག་ཡིན་པས་ཐུགས་རྗེ་ཆེ་ཞུ་རྒྱུ་ཡིན”ཞེས་པད་མ་ཚེ་དབང་གིས་དགའ་ཚོར་ཆེན་པོས་བཤད།

བཀྲ་ཤིས་སྒང་གྲོང་ཚོའི་ས་བབ་མཐོ་ཚད་སྨི་3100ལྷག་ཙམ་ཟིན་པ་དང་གྲོང་ཚོ་ཡོངས་སུ་དུད་ཚང་44དང་མི་214ཡོད། ཆར་ཆུ་དུས་སུ་འབབ་པ་དང་ལོ་ཕྱུགས་རྟག་ཏུ་ལེགས་པོ་ཡོང་བར་སྨོན་འདུན་ཞུ་བའི་གཉའ་གཅོག་མཛད་སྒོ་ནི་ས་གནས་དེ་གའི་དམངས་སྲོལ་བྱེད་སྒོ་གལ་ཆེན་ཞིག་རེད། སྐར་ལྔའི་དར་དམར་བཀལ་བ་དང་དཀར་གཙང་ཁ་བཏགས་གཡོག་པའི་འདྲུད་འཐེན་འཕྲུལ་འཁོར་མང་པོ་ག་ལེར་ཞིང་ནང་དུ་གཏོང་ཡོང་བ་མཐོང་མ་ཐག་པད་མ་ཚེ་དབང་གིས་མགྱོགས་མྱུར་གཟབ་མཆོར་སྤྲས་ཏེ་འདྲུད་འཐེན་འཕྲུལ་འཁོར་བཏང་ནས་གཉའ་གཅོག་མཛད་སྒོར་ཞུགས།

ས་རྒྱུ་གཤིན་པའི་ས་གཞི་དེ་ཁམ་བུའི་མེ་ཏོག་དང་རྒྱ་ལྕང་གིས་ཁེངས་པའི་ལུང་གཞུང་དུ་ཡོད་ཅིང་། རྒྱང་རིང་གི་གངས་རིའི་མཛེས་རྒྱན་འོག་ཡུལ་ལུང་དེའི་མཛེས་ལྗོངས་ལྟ་བས་མི་ངོམ་པའི་རི་མོ་ལྟར་སྣང་།

ཡུལ་མི་རིག་འཛིན་དབང་མོ་ནི་གཉའ་གཅོག་མཛད་སྒོའི་མི་སྣ་གཙོ་བོ་ཡིན། ཁོ་མོས་ནས་སོན་བླུགས་པའི་སོན་ཁུག་ཁྱེར་ཏེ་ཞིང་ནང་དུ་རེ་བའི་ས་བོན་གཤོ་འགོ་བཙུགས།

“དབུལ་སྒྲོལ་འགག་སྒྲོལ་བྱས་རྗེས། ད་ཆ་གྲོང་གསེབ་དར་རྒྱས་ལག་ལེན་བསྟར་བས་ལོ་དེ་དག་ནང་གྲོང་ཚོར་འགྱུར་ལྡོག་ཆེན་པོ་ཕྱིན་ཡོད”ཞིང་ནང་དུ་ཡོད་པའི་བཀྲ་ཤིས་སྒང་གྲོང་ཚོའི་གྲོང་ཚོ་ཨུ་ལྷན་གྱི་ཀྲུའུ་རེན་བསོད་ནམས་འབྲུག་རྒྱལ་གྱིས་གསར་འགོད་པར“གྲོང་ཚོར་ཨར་འདམ་ལམ་བཏིང་བས་རླངས་འཁོར་ཉོ་མཁན་མང་དུ་ཕྱིན་པ་མ་ཟད། ད་དུང་རིག་གནས་བྱེད་སྒོ་ཁང་གསར་པ་བསྐྲུན་ཡོད། ཁོམ་པ་ཡོད་དུས་གྲོང་མི་རྣམས་བྱེད་སྒོ་ཁང་དུ་གཞས་གཏོང་བ་དང་ཞབས་བྲོ་འཁྲབ་པར་ཡོང་གི་ཡོད། དུས་རབས་གསར་པའི་རྗེས་ཟིན་འདུག”ཅེས་བཤད།

བཀྲ་ཤིས་སྒང་གྲོང་ཚོར་བཅའ་སྡོད་ཧྲུའུ་ཅི་དང་པོ་ནག་ཆུ་གྲོང་ཁྱེར་ཞིང་ལས་གྲོང་གསེབ་ཅུས་རྩྭ་ཐང་ས་ཚིགས་ཀྱི་ཤེ་ཝུན་ཏུང་གྲོང་ཚོར་བཅའ་སྡོད་བྱས་ནས་ལོ་གཅིག་ཙམ་སོང་། ན་ནིང་ཁོང་གིས་ལས་ཀའི་དོན་དངོས་དང་ཟུང་འབྲེལ་གྱིས་རྩྭ་སོན་དང་ལུད་ཐབས་ཤེས་བཏང་སྟེ། གྲོང་ཚོར་མི་ཐབས་རྩྭ་འདེབས་རྣམ་གྲངས་ལག་ལེན་བསྟར་བས་གྲོང་ཚོ་ཧྲིལ་པོར་ཡོང་འབབ་སྒོར་ཁྲི་1.8བྱུང་བ་རེད། “གྲོང་གསེབ་དར་རྒྱས་གཏོང་རྒྱུ་ནི་ཞིབ་འཇུག་བྱ་གཞི་ཆེན་པོ་ཞིག་ཡིན་པས། ངས་དེའི་ཐད་བསམ་བློ་མང་པོ་བཏང་སྟེ་གྲོང་གསེབ་ཕྱུག་འགྱུར་དང་མཛེས་སྡུག་ལྡན་པ་ཞིག་ཏུ་འགྱུར་བ་བྱེད་ཀྱི་ཡིན”ཞེས་བཤད།

ཡུད་ཙམ་ཞིག་ལ་གནམ་འཐིབས་ཏེ་ཆར་པ་བབས་ནས་ཞིང་ས་དང་ནགས་ས་རིམ་གྱིས་བརླན། རིག་འཛིན་དབང་མོས་གོམ་སྟབས་མགྱོགས་སུ་བཏང་ནས་སོན་མཇུག་ཤོས་དེ་ཞིང་ནང་དུ་བཏོར་ཞིང་། གཉའ་གཅོག་མཛད་སྒོ་ཆར་ཟིམ་ཁྲོད་དུ་མཇུག་འགྲིལ།