ཉིན་ཤས་གོང་། བོད་ལ་དམངས་གཙོའི་བཅོས་སྒྱུར་བྱས་ནས་ལོ་63འཁོར་བར་དྲན་གསོ་ཞུ་བའི་རང་སྐྱོང་ལྗོངས་སྒྲོག་འགྲེལ་ཚོགས་པའི་སྒྲོག་འགྲེལ་སྙན་ཞུའི་ཚོགས་འདུ་ཉིང་ཁྲི་གྲོང་ཁྱེར་དུ་འཚོགས་ཤིང་། རང་སྐྱོང་ལྗོངས་སྒྲོག་འགྲེལ་ཚོགས་པའི་ཁོངས་མི་ལྗོངས་ཏང་ཨུད་སྲིད་ཁྲིམས་ཨུ་ལྷན་གྱི་དྲུང་ཆེ་གཞོན་པ་ཁྲེན་ཝུན་ཆང་དང་། རང་སྐྱོང་ལྗོངས་སྒྲོག་འགྲེལ་ཚོགས་པའི་ཁོངས་མི་སྣང་རྫོང་གི་གཞི་རིམ་སྒྲོག་འགྲེལ་པ་དཀར་ཏོག་གིས་ཆེད་དོན་སྒྲོག་འགྲེལ་བྱས་པ་རེད།
ཉིང་ཁྲི་གྲོང་ཁྱེར་གྱི་ཚོགས་འགྲེམས་ལྟེ་གནས་སུ་འཚོགས་པའི་སྒྲོག་འགྲེལ་སྙན་ཞུའི་ཚོགས་འདུའི་ཐོག ཁྲེན་ཝུན་ཆང་གིས《བོད་ལ་དམངས་གཙོའི་བཅོས་སྒྱུར་བྱས་ནས་ལོ་63འཁོར་བར་དྲན་གསོ་ཞུ་བའི་སྒྲོག་འགྲེལ་གནད་བསྡུས》དང་ཟུང་འབྲེལ་བྱས་ཐོག་བཀས་བཀོད་རྒྱུད་འཛིན་ཞིང་བྲན་ལམ་ལུགས་ཀྱི་དབང་སྒྱུར་འོག་གི་བོད་རྙིང་པ་རྩ་མེད་དུ་འགྲོ་ངེས་ཡིན་པ་དང་། དམངས་གཙོའི་བཅོས་སྒྱུར་ལས་བོད་ལ་སླར་ཡང་ཚེ་སྲོག་གསར་པ་ཐོབ་པ། དམངས་གཙོའི་བཅོས་སྒྱུར་བྱས་ནས་ལོ་63འཁོར་ཚུན་བོད་ལ་གནམ་ས་བླ་འོག་ཏུ་འགྱུར་བ་ལྟ་བུའི་འཕོ་འགྱུར་བྱུང་བ། སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པའི་རྒྱང་སྐྱོད་ལམ་བུ་གསར་པར་སྐྱོད་འགོ་ཚུགས་པ་སོགས་ཀྱི་ཐད་ནས་ཞིབ་ཅིང་ཕྲ་ལ་གྲངས་གཞི་ངོ་མ་དང་། དོན་དངོས་དང་མཐུན་པའི་གྱོད་དཔེ། མངོན་གསལ་དོད་པོའི་བསྡུར་བ་བཅས་བརྒྱུད་དམངས་གཙོའི་བཅོས་སྒྱུར་མ་བྱས་གོང་བོད་མི་དམངས་ཀྱི་ཉམ་ཐག་པའི་འཚོ་བ་དང་བོད་ཀྱི་སྤྱི་ཚོགས་དབུལ་ཕོངས་རྗེས་ལུས་ཡིན་པ་དང་། དམངས་གཙོའི་བཅོས་སྒྱུར་བྱས་རྗེས་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་དང་། མི་རིགས་མཐུན་སྒྲིལ། སྤྱི་ཚོགས་བརྟན་ལྷིང་། མཐའ་སྲུང་སྲ་བརྟན་བཅས་བྱུང་བའི་རྣམ་པ་བཟང་པོ་དང་དེ་བཞིན་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་བོད་ཀྱི་མི་རིགས་ཁག་གི་ལས་བྱེད་པར་དམིགས་བསལ་ཐུགས་ཁུར་གནང་ལུགས་དང་རྒྱ་ཆེའི་ལས་བྱེད་མང་ཚོགས་ཀྱིས་སེམས་མཐུན་སྟོབས་སྒྲིལ་བྱས་ནས་རྒྱང་སྐྱོད་ལམ་བུ་གསར་པར་འབད་འབུངས་མདུན་སྐྱོད་དང་དུས་རབས་གསར་པར་བྱས་རྗེས་འཇོག་པའི་བསམ་པའི་ཉམས་བཟང་མཚོན་པར་བྱས་པ་རེད།