ཟླ་3ཚེས་28ཉིན་ཕོ་བྲང་པོ་ཏ་ལའི་ཐང་ཆེན་དུ་རྒྱལ་དར་སྒྲེང་བའི་མཛད་སྒོ་འཚོགས་ནས་བོད་ཀྱི་ཞིང་བྲན་ཁྲི་ཚོ་བརྒྱར་བཅིངས་འགྲོལ་ཐོབ་པའི་དྲན་གསོའི་ཉིན་མོར་རྟེན་འབྲེལ་ཞུས་ཤིང་། འདི་ནི་སློབ་མའི་འཐུས་མིས་མཉམ་དུ་དྲན་རྟེན་པར་རྒྱག་བཞིན་པ།
ཟླ་3ཚེས་28ཉིན་གྱི་སྔ་དྲོ། ལྷ་སའི་མི་རིགས་ཁག་དང་ལས་རིགས་ཁག་གིས་ཕོ་བྲང་པོ་ཏ་ལའི་ཐང་ཆེན་དུ“རྒྱལ་དར་སྒྲེང་བ་དང་རྒྱལ་གླུ་གཏོང་བའི”མཛད་སྒོ་འཚོགས་ནས་བོད་ཀྱི་ཞིང་བྲན་ཁྲི་ཚོ་བརྒྱར་བཅིངས་འགྲོལ་ཐོབ་ནས་ལོ་63འཁོར་བར་དྲན་གསོ་གཟབ་རྒྱས་ཞུས་པ་རེད། སྔ་དྲོའི་ཆུ་ཚོད་10པར་རྒྱལ་དར་སྒྲེང་བའི་མཛད་སྒོ་ཕོ་བྲང་པོ་ཏ་ལའི་ཐང་ཆེན་དུ་དངོས་སུ་འགོ་ཚུགས་ཤིང་། རྒྱལ་དར་སྲུང་དམག་རུ་ཁག་གིས་གྲལ་སྟར་འགྲིག་པོས་དམར་མདངས་བཀྲ་བའི་སྐར་ལྔའི་དར་དམར་སྲུང་སྐྱེལ་བྱས་ནས་ཐང་ཆེན་དུ་ཡོང་བ་དང་ས་གནས་ས་ཐོག་ཏུ《བློས་བླངས་དམག་གི་མདུན་སྐྱོད་གླུ་གཞས》དཀྲོལ་སྐབས་མི་རིགས་ཁག་གི་ལས་བྱེད་པ་དང་མང་ཚོགས་དང་། བཅིངས་འགྲོལ་དམག དྲག་ཆས་ཉེན་རྟོག་དཔོན་དམག་བཅས་ཀྱིས་མཉམ་དུ་རྒྱལ་གླུ་བླངས་པ་རེད།
གཞིས་རྩེ་གྲོང་ཁྱེར་བསམ་གྲུབ་རྩེ་ཆུས་སྤྱི་གླིང་ཨང་4པའི་ནང་། མི་རིགས་ཁག་གི་མང་ཚོགས་བརྒྱ་ཕྲག་ཁ་ཤས་ཀྱིས་དགའ་སྤྲོའི་ངང་སྒོར་གཞས་འཁྲབ་ནས་ཞིང་བྲན་ཁྲི་ཚོ་བརྒྱར་བཅིངས་འགྲོལ་ཐོབ་པའི་དྲན་གསོའི་ཉིན་མོར་རྟེན་འབྲེལ་ཞུས་ཤིང་། ལོ་79ལ་སླེབས་པའི་ཨ་མ་ཉི་མ་ལྷ་མོས་དགའ་སྤྲོའི་ངང“ད་ཆ་ང་ཚོའི་འཚོ་བ་བདེ་སྐྱིད་ལྡན་པ་མ་ཟད། གཟུགས་པོའང་ཐང་པོ་ཡོད། སྨན་བཅོས་ཐད་འགན་ལེན་ཡོད་ལ་རྣམ་ཀུན་སྒོར་གཞས་འཁྲབ་ནས་བདེ་སྐྱིད་ལྡན་པའི་ཚེ་མཇུག་སྐྱེལ་བཞིན་ཡོད”ཅེས་བརྗོད་བྱུང་། གྲོ་མོ་རྫོང་ཤར་གསིང་མ་གྲོང་རྡལ་མི་རིགས་མཐུན་སྒྲིལ་ཐང་ཆེན་དུ་དམངས་ཁྲོད་སྒྱུ་རྩལ་ཚོགས་པའི་འཁྲབ་སྟོན་པ་ཚོས་མང་ཚོགས་ལ་གླུ་གཞས་དང་། གཏམ་བརྗོད་ཟློས་གར། ཞབས་བྲོ་སོགས་ངོ་མཚར་ཆེ་བའི་ལེ་ཚན་10ལྷག་ཙམ་འཁྲབ་པ་དང་། གྲོ་མོའི་ས་གནས་ཁག་གིས་དུས་རབས་གསར་པའི་ཤེས་དཔལ་ལག་ལེན་བྱེད་སྒོའི་ནང་གཏམ་བཤད་དང་། སྙན་ངག་གྱེར་འདོན། ཤེས་བྱ་འགྲན་བསྡུར་སོགས་བྱེད་ཐབས་སྣ་ཚོགས་ཀྱི་ཐོག་ནས་བོད་ཀྱི་ཞིང་བྲན་ཁྲི་ཚོ་བརྒྱར་བཅིངས་འགྲོལ་ཐོབ་ནས་ལོ་63སོང་རིང་གྲོ་མོའི་མི་རིགས་ཁག་གི་མི་དམངས་ཚོས་ཐུན་མོང་ཐོག་མཐུན་སྒྲིལ་འབད་འཐབ་དང་ཐུན་མོང་ཐོག་དར་རྒྱས་གོང་འཕེལ་ལ་ཐོབ་པའི་ལོ་རྒྱུས་རང་བཞིན་གྱི་གྲུབ་འབྲས་མངོན་པར་བྱས་པ་རེད།
དེ་ཉིན་ནག་ཆུ་དང་ཆབ་མདོ་སོགས་ཀྱིས་ཀྱང“རྒྱལ་དར་སྒྲེང་བ་དང་རྒྱལ་གླུ་ལེན་པའི”མཛད་སྒོ་དང་བོད་ཀྱི་ཞིང་བྲན་ཁྲི་ཚོ་བརྒྱར་བཅིངས་འགྲོལ་ཐོབ་ནས་ལོ་63འཁོར་བར་རྟེན་འབྲེལ་ཞུ་བའི་རིག་རྩལ་འཁྲབ་སྟོན་སོགས་ཀྱི་བྱེད་སྒོ་སྤེལ་བ་རེད།