འདི་ནི་ཕོ་བྲང་པོ་ཏ་ལའི་ཐང་ཆེན་ཡིན་པ།

འདི་ནི་གྲོང་མི་ཞིག་གིས་གཞིས་རྩེ་གྲོང་ཁྱེར་རྒྱལ་རྩེ་རྫོང་ནོར་ཁང་གྲོང་ཚོའི་དཔྱིད་འདེབས་མཛད་སྒོའི་ཐོག་ས་བོན་འདེབས་བཞིན་པ།

འདི་ནི་ཆབ་མདོ་གྲོང་ཁྱེར་སྨར་ཁམས་རྫོང་ཟུར་རྡོ་ཤོད་ཤང་རྔ་སྨད་ཤོད་གྲོང་ཚོ་ཡིན་པ།

ལོ་63གོང་གི་དཔྱིད་ཀར། ཀྲུང་གོ་གུང་ཁྲན་ཏང་གི་འགོ་ཁྲིད་འོག་ཆོས་སྲིད་ཟུང་འབྲེལ་གྱི་བཀས་བཀོད་རྒྱུད་འཛིན་ཞིང་བྲན་ལམ་ལུགས་རྩ་མེད་བཟོ་རྒྱུ་གཙོ་བོར་བྱེད་པའི་དམངས་གཙོའི་བཅོས་སྒྱུར་བོད་དུ་ཕྱོགས་ཡོངས་ནས་སྤེལ་ཏེ་བོད་འདི་ཉིད་མུན་ནག་ནས་འོད་ཟེར་དང་། རྗེས་ལུས་ནས་ཡར་ཐོན། དབུལ་ཕོངས་ནས་འབྱོར་ཕྱུག སྲིད་དབང་སྒེར་གཅོད་ནས་དམངས་གཙོ། སྒོ་རྒྱག་ནས་སྒོ་དབྱེ་བཅས་ཀྱི་ཕྱོགས་སུ་སྐྱོད་པའི་ལོ་རྒྱུས་ཀྱི་དུས་རབས་གསར་པ་ཕྱེ་བ་རེད།

ལོ་63རིང་གི་ཆར་རླུང་ཁྲོད་ཀྲུང་ཧྭ་མི་རིགས་ཁྱིམ་ཚང་ཆེ་མོའི་ནང་མི་ལུས་གསར་པ་ཐོབ་པའི་བོད་ཀྱི་མི་རིགས་ཁག་གི་བུ་ཕྲུག་ཚོས་མཐུན་སྒྲིལ་འབད་འཐབ་ཀྱི་སྙིང་སྟོབས་ལ་བརྟེན་ནས་སྤྱི་ཚོགས་ལམ་ལུགས་ཀྱི་རླབས་ཆེན་འཕོ་འགྱུར་དང་ལོ་རྒྱུས་རང་བཞིན་གྱི་དབུལ་པོ་དབུལ་ནག་མེད་པ་བཟོ་བའི་མི་ཡུལ་གྱི་ངོ་མཚར་བཏོད་ཡོད། (པར་ངོས་གསུམ་པར་གཟིགས) (པར་ངོས་དང་པོར་མཐུད)

ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་མཛུབ་ཁྲིད་འོག་བོད་ཀྱིས་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་གཏིང་ཟབ་བྱས་ནས་གངས་ལྗོངས་ས་མཐོའི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་ནུས་ཤུགས་ཡོད་རྒུས་སྐུལ་འདེད་གཏོང་བའི་རྒྱང་སྐྱོད་ལམ་བུ་གསར་པའི་ཕྱོགས་སུ་གོམ་ཞེང་ཆེན་པོས་མདུན་སྐྱོད་བྱེད་བཞིན་ཡོད།

དུས་རབས་གསར་པ། གངས་ལྗོངས་ས་མཐོར་མི་ཡུལ་གསར་པ་བརྗེས།

“ཡར་ལངས་ཞིང་བྲན་བདག་པོར་གྱུར་བ་ནས་དབུལ་སྒྲོལ་ཕྱུག་འགྱུར་གྱིས་འབྱོར་འབྲིང་ཕྱོགས་སུ་སྐྱོད་པའི་བར་ནི་ངའི་མི་ཚེ་འདིར་བརྒྱུད་མྱོང་བའི་བཀྲ་ཤིས་ཤོས་ཀྱི་བྱ་བ་ཡིན” ཆབ་མདོ་གྲོང་ཁྱེར་སྨར་ཁམས་རྫོང་ཟུར་རྡོ་ཤོད་ཤང་རྔ་སྨད་ཤོད་གྲོང་ཚོའི་ལོ་77ལ་སླེབས་པའི་གྲོང་མི་བྱང་ཆུབ་ལྷ་མོ་མི་རབས་བཞི་ཁྱིམ་ཚང་གི་བདེ་སྐྱིད་འཚོ་བར་རོལ་བཞིན་འདུག ཁོང་གི་ཐོག་སོ་གསུམ་ལྡན་གྱི་སྡོད་ཁང་ཞིང་ཁའི་འགྲམ་དུ་འདུག་ལ། ཡུལ་ལྗོངས་དེ་བས་སྐྱིད་སྣང་ལྡན།

དཔྱིད་དུས་ཀྱི་ཡར་ཀླུང་གཞུང་དུ་མི་རྣམས་དཔྱིད་རྨོད་ལ་བྲེལ་ཞིང་། ལྷོ་ཁ་གྲོང་ཁྱེར་སྣེ་གདོང་ཆུས་བཀྲ་ཤིས་མཆོད་རྟེན་སྡེ་ཁུལ་གྱི་ཞིང་ནང་དུ་མང་ཚོགས་ཚོ་ཚ་ཚ་འུར་འུར་ངང་སོ་ནམ་ལས་ཀ་བྱེད་བཞིན་འདུག བོད་རྙིང་པར་སྐུ་དྲག་གི་གཞིས་ཀའི་མངའ་ཁོངས་དེར་ད་ཆ་གྲོང་མི་དུད་ཚང་129སྡོད་ཀྱི་ཡོད།

“སྤྱི་ཚོགས་རྙིང་པར་ངས་ས་ཞིང་མུའུ་3བོགས་འདེབས་བྱས་ཀྱང་འབྲུ་རིགས་ཕལ་ཆེ་བ་ཞིང་བྲན་བདག་པོ་ལ་སྤྲོད་དགོས་པས་ང་ཚོ་ནང་མི་ལྔ་པོ་རྒྱུན་དུ་བཀྲེས་ལྟོགས་ཀྱིས་མནར་ནས་སྡོད་དགོས་ཀྱི་ཡོད”ཅེས་འདི་ལོ་ལོ་80ལ་སླེབས་པའི་གྲོང་མི་ཚེ་རིང་དབང་མོས་དེ་ལྟར་བརྗོད་བྱུང་།

བོད་ཀྱི་སྤྱི་ཚོགས་ལམ་ལུགས་བཅོས་སྒྱུར་བྱ་རྒྱུ་ནི་བོད་མི་དམངས་ཀྱི་རྩ་བའི་བསམ་འདུན་ཡིན། 1959ལོའི་ཟླ་3ཚེས་10ཉིན་ཏཱ་ལས་གཙོས་པའི་བོད་ཀྱི་མཐོ་རིམ་ལོག་སྤྱོད་རུ་ཚོགས་ཀྱིས་ཆོས་སྲིད་ཟུང་འབྲེལ་གྱི་ཞིང་བྲན་ལམ་ལུགས་ནམ་ཡང་གནས་ཆེད། མངོན་སུམ་འཛེམ་མེད་ངང་མེས་རྒྱལ་ཁ་ཕྲལ་གཏོང་རྒྱུ་དམིགས་ཡུལ་དུ་བྱེད་པའི་ཕྱོགས་ཡོངས་ཀྱི་དྲག་པོའི་ངོ་ལོག་ཟིང་འཁྲུག་བསླངས་པ་རེད། 1959ལོའི་ཟླ་3ཚེས་28ཉིན་ཀྲུང་དབྱང་སྲིད་གཞུང་གིས་བོད་ས་གནས་སྲིད་གཞུང་མེད་པ་བཟོ་རྒྱུ་དང་བོད་རང་སྐྱོང་ལྗོངས་གྲ་སྒྲིག་ཨུ་ཡོན་ལྷན་ཁང་གིས་བོད་ས་གནས་སྲིད་གཞུང་གི་འགན་དབང་འཁུར་དགོས་པའི་ཁྱབ་བསྒྲགས་གནང་བ་མ་ཟད། བོད་ཀྱི་མི་རིགས་ཁག་གི་མི་དམངས་ལ་འགོ་ཁྲིད་གནང་སྟེ་ཕྱོགས་གཅིག་ནས་ངོ་ལོག་ཟིང་འཁྲུག་ཞོད་འཇགས་གཏོང་བ་དང་། ཕྱོགས་གཞན་ཞིག་ནས་དམངས་གཙོའི་བཅོས་སྒྱུར་བྱས་པར་བརྟེན་ཞིང་བྲན་ཁྲི་ཚོ་བརྒྱར་ཡར་ལངས་བཅིངས་འགྲོལ་ཐོབ་ཡོད།

དམངས་གཙོའི་བཅོས་སྒྱུར་བྱས་རྗེས། དུས་སྐབས་མི་འདྲ་བར། རྒྱལ་ཁབ་ཀྱིས་བོད་ཀྱི་ཡུན་རིང་འཕེལ་རྒྱས་དང་མི་དམངས་ཀྱི་འཚོ་བ་ལེགས་སུ་གཏོང་རྒྱུ་དང་འབྲེལ་བ་ཡོད་པའི་རྣམ་གྲངས་གལ་ཆེན་འབོར་ཆེན་བཀོད་སྒྲིག་བྱས་ཤིང་། 2021ལོར་བོད་རང་སྐྱོང་ལྗོངས་ཀྱི་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་2000ལས་བརྒལ་ནས་དཔལ་འབྱོར་འཕར་ཚད་ལོ་མང་བསྟུད་མར་རྒྱལ་ཡོངས་ཀྱི་མདུན་གྲལ་དུ་སླེབས་ཡོད།

2020ལོའི་ཟླ་10པར་དབུལ་སྒྲོལ་འགག་སྒྲོལ་གྱི་རྒྱལ་ཁ་ཕུ་ཐག་གཅོད་པའི་སྐབས་སུ། བོད་རང་སྐྱོང་ལྗོངས་ཀྱིས་གསར་འགྱུར་ཡོངས་བསྒྲགས་ཚོགས་འདུ་འཚོགས་ནས་2019ལོའི་ལོ་མཇུག་བར་བོད་ཀྱི་རྫོང་དབུལ་པོ་74ཡི་དབུལ་ཞྭ་ཕུད་པ་དང་ཡིག་ཚགས་དང་གཱ་བཟོས་པའི་མི་འབོར་དབུལ་པོ་ཁྲི་62.8ཚང་མ་དབུལ་སྒྲོལ་ཐུབ་ནས་ལོ་རྒྱུས་རང་བཞིན་གྱི་དབུལ་པོ་དབུལ་ནག་མེད་པ་བཟོས་ལུགས་ཁྱབ་བསྒྲགས་བྱས་ཡོད།

ལོ་63གྱི་མཆོང་སྐྱོད་ལྟ་བུའི་འཕེལ་རྒྱས་ཁྲོད་གངས་ལྗོངས་ས་མཐོའི་རྣམ་པ་གསར་རྐྱང་དུ་གྱུར་ཡོད།

ལེའུ་གསར་པ། མི་རིགས་མཐུན་སྒྲིལ་གྱི་མེ་ཏོག་ས་མཐོར་བཞད།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མི་རིགས་མཐུན་སྒྲིལ་གྱི་ལས་དོན་དེ་བོད་ཀྱི་སྤྱི་ཡོངས་ལས་དོན་གྱི་དམིགས་བསལ་གནས་བབ་ཐོག་བཞག་ནས“བོད་ཀྱི་ལས་དོན་ཐད་ངེས་པར་དུ་མེས་རྒྱལ་གཅིག་གྱུར་སྲུང་སྐྱོང་དང་མི་རིགས་མཐུན་སྒྲིལ་ལ་ཤུགས་སྣོན་རྒྱག་རྒྱུ་དེ་གཞི་འཛིན་ས་དང་ཤུགས་རྒྱག་སར་བྱེད་དགོས” “བོད་ཀྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་འཕེལ་རྒྱས་ཚང་མའི་ནང་མི་རིགས་མཐུན་སྒྲིལ་ཡར་ཐོན་དོན་སྙིང་ལྡན་པ་མཐའ་འཁྱོངས་བྱེད་དགོས”ཞེས་ནན་བཤད་གནང་ཡོད།

ཏོག་གསར་རིམས་ནད་ཐོན་རྗེས། བོད་དུ་ཏོག་གསར་རིམས་ནད་ཕོག་མཁན་གཅིག་པུ་དེ་སྐྱོབ་བཅོས་བྱེད་ཆེད། མི་རིགས་མང་པོའི་བུ་ཕྲུག་ལས་གྲུབ་པའི་བོད་རང་སྐྱོང་ལྗོངས་མི་དམངས་སྨན་ཁང་གསུམ་པའི་སྨན་དོན་རུ་ཁག་ནང“སྨན་ཁང་གཅིག་དང་ནད་པ་གཅིག”གི་སྨན་པའི་བྱང་སེམས་ཀྱི་མཚར་གཏམ་གྲགས་ཡོད། ལོ་དེར་བོད་ཀྱི་ནག་ཆུར་གངས་སྐྱོན་ཚབས་ཆེན་སོགས་རང་བྱུང་གནོད་འཚེ་ཕོག་སྐབས་རྒྱལ་ཡོངས་མི་དམངས་ཀྱིས་རོགས་སྐྱོར་ལག་ཟུང་བརྐྱངས་ནས་གངས་ལྗོངས་ས་མཐོའི་མི་དམངས་དང་མཉམ་དུ་དཀའ་གནད་ལས་སྒྲོལ་བའི་རྣམ་པ་དེ་བོད་ཀྱི་མང་ཚོགས་ཚོས་དེ་བས་བརྗེད་མི་སྲིད།

ད་ཆ་བོད་དུ་མི་རིགས་ཁག་གི་མང་ཚོགས་ཁྱིམ་ཚང་གཅིག་ལྟར་བརྩེ་ཞིང་། བོད་ལྗོངས་ལྷ་ས་གྲོང་ཁྱེར་གྱི་གྲོང་ཁུལ་རྙིང་པར་ཡོད་པའི་ཝ་པ་གླིང་སྡེ་ཁུལ་དུ་སྐྱོད་པའམ་ཡང་ན་ཇ་ཁང་དང་། སྐྲ་བཞར་ཁང་། ཤ་ཚོང་ཁང་། སྨན་ཚོང་ཁང་སོགས་སུ་སྐྱོད་སྐབས། མི་རིགས་ཁག་གི་མང་ཚོགས་དེ་གར་གཞིས་ཆགས་ནས་ཚོང་རྒྱག་པ་དང་། ཕན་ཚུན་རོགས་རམ། ཕན་ཚུན་སློབ་སྦྱོང་བཅས་ཀྱི་དགའ་བའི་རྣམ་པ་མཐོང་བྱུང་།

“ལོ་20ལྷག་ཙམ་རིང་ངས་དེ་གར་ཚོང་ཁང་4བོགས་མར་བླངས་པ་དང་བོད་རིགས་དགེ་ཕྲུག་3གསོ་སྐྱོང་བྱས་ཡོད། སྒོ་རའི་ནང་གི་བོད་རིགས་གྲོང་པ་ཁྱིམ་མཚེས་སེམས་རྩ་འཁོལ་བ་དང་ང་ཚོར་ལྟ་རྟོག་གང་ཡག་བྱེད་ཀྱི་ཡོད”ལོ་50ལ་སླེབས་པའི་སྡེ་ཁུལ་གྱི་གྲོང་མི་ཧྥང་ཐེན་ཡོན་གྱིས། 2001ལོར་གཉེན་ཉེ་དང་གྲོགས་པོ་ཚོའི་ཁ་ལ་ཉན་ནས་ལྷ་སར་སྐྲ་བཞར་ཁང་བཙུགས་པ་དང་བུ་ཧྥང་ཅེ་ཡང་བོད་དུ་ལས་ཀ་བྱེད་བཞིན་པའི་གནས་ཚུལ་ངོ་སྤྲོད་བྱས་བྱུང་།

བོད་དུ་མི་རྣམས་ཀྱིས་རང་ཉིད་ཀྱི་མིག་འབྲས་ལ་གཅེས་པ་ལྟར་མི་རིགས་མཐུན་སྒྲིལ་ལ་གཅེས་སྤྲས་བྱེད་ཀྱི་ཡོད། 2020ལོའི་ཟླ་5ཚེས་1ཉིན། 《བོད་རང་སྐྱོང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་དཔེ་བཟང་ཁུལ་འཛུགས་གཏོད་སྲོལ་ཡིག》དངོས་སུ་ལག་བསྟར་བྱས་པས་བོད་འདི་ཉིད་རྒྱལ་ཡོངས་ནས་ས་གནས་ཁྲིམས་འཛུགས་ཀྱི་རྣམ་པའི་ཐོག་ནས་དཔེ་བཟང་ཁུལ་འཛུགས་གཏོད་བྱེད་མཁན་ཞིང་ཆེན་དང་པོར་གྱུར་ཡོད། 2021ལོའི་ཟླ་11པར་བོད་རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པའི་ཐོག་བོད་ཀྱིས་བྱེད་ཐབས་སྣ་མང་མཉམ་དུ་སྤྱད་ནས་ས་ཁུལ་དང་གྲོང་ཁྱེར་ཚང་མ་རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་དཔེ་བཟང་ས་གནས་དང་གྲོང་ཁྱེར་དུ་གྱུར་པ་དང་། རྫོང(ཆུས)ཚང་མ་རང་སྐྱོང་ལྗོངས་རིམ་པའི་མི་རིགས་མཐུན་སྒྲིལ་ཡར་ཐོན་དཔེ་བཟང་རྫོང(ཆུས)དུ་བསྐྲུན་པ། ཆུས་དང་། ས་གནས། རྫོང་བཅས་རིམ་པ་དེ་གའི་མི་རིགས་མཐུན་སྒྲིལ་ཡར་ཐོན་དཔེ་བཟང་ཚན་པར་འཛུགས་གཏོད་བྱས་པ་བཅས་ཀྱི་བསྡུར་གྲངས་80%ཡན་ཟིན་ཡོད།

འདི་ལོ་ལོ་46ལ་སླེབས་པའི་ཧྲན་ཅིན་ཤང་ནི་ཀན་སུའུ་ཀ་ཆུ་ནས་ཡིན་པ་དང་། 2004ལོར་ལས་གྲྭའི་རུ་ཁག་དང་མཉམ་དུ་བོད་དུ་ཡོང་ཞིང་། བོད་ལྗོངས་ཉིང་ཁྲི་གྲོང་ཁྱེར་ཀོང་པོ་རྒྱ་མདའ་རྫོང་སྤྱི་མདའ་གྲོང་རྡལ་ཐའེ་ཀྲའོ་གྲོང་ཚོར་ཟམ་པ་སྐྲུན་སྐབས། བོད་རིགས་བུ་མོ་འཆི་མེད་དང་དགའ་རོགས་བསྒྲིགས་ཏེ་ཆང་ས་བརྒྱབ་ནས་ཐའེ་ཀྲའོ་གྲོང་ཚོའི་ཡུལ་མིར་གྱུར། “ཡུལ་མི་ཚོས་ང་ལ་ལྟ་རྟོག་གང་ཡག་བྱེད་པ་མ་ཟད། ཐེམ་ཐོའང་བསྒྱུར་བྱུང” ཧྲན་ཅིན་ཤང་གི་ངོས་ནས་བརྗོད་ན་ཐའེ་ཀྲའོ་གྲོང་ཚོའི་ཡུལ་མི་ཚང་མ་སེམས་བཟང་ཤ་སྟག་ཡིན་པ་དང་། གྲོང་མི་ཚོས་ཀྱང་ཧུར་བསྲིས་ཁྱིམ་སྐྱོང་བྱེད་མཁན་མག་པ་དེར་ཧ་ཅང་དགའ་པོ་བྱེད་ཀྱི་ཡོད།

“གཅིག་ལ་གཅིག་འབྲེལ་དང་ཕན་ཚུན་མཉམ་འདྲེས་ཐུབ་པས། སུ་ཡང་ཕན་ཚུན་ཁ་འབྲལ་ཐབས་མེད། རྨང་གཞི་དེའི་ཐོག་མི་རིགས་ཁག་ཐུན་མོང་དར་རྒྱས་དང་གྲུབ་འབྲས་མཉམ་སྤྱོད་ཐུབ་པར་བྱེད་དགོས” བོད་རང་སྐྱོང་ལྗོངས་ཏང་གི་སློབ་གྲྭའི་དགེ་རྒན་ཆེ་མོ་བ་དབན་ཅིན་ཕུང་གིས་ལོ་མང་རིང་གི་ལག་ལེན་ལས་མི་རིགས་མཐུན་སྒྲིལ་ནི་བོད་དར་རྒྱས་གོང་འཕེལ་གྱི་རྨང་གཞི་བརྟན་པོ་ཞིག་ཡིན་པ་ར་འཕྲོད་ཡང་ཡང་བྱུང་ཡོད་ཅེས་བརྗོད་བྱུང་།

བཀོད་པ་གསར་པ། གྲུབ་ཆ་ལེགས་སྒྲིག་བྱས་ནས་སྤུས་ཚད་མཐོ་བའི་འཕེལ་རྒྱས་ལ་སྐུལ་ལྕག་བྱས།

ཉེ་བའི་ལོ་ཤས་རིང་། བོད་ཀྱིས་རྒྱལ་ཁབ་ཀྱི་ནུས་རྒྱུ་གཙང་མ་འབྲེལ་མཐུད་རྟེན་གཞི་འཛུགས་སྐྲུན་བྱེད་པའི་གོ་སྐབས་དང་བསྟུན་ནས། ནུས་རྒྱུ་གཙང་མའི་ཐོན་ལས་བཏོད་ཡོད། 2020ལོ་བར་ནུས་རྒྱུ་གཙང་མས་སྒྲིག་སྦྱོར་བྱས་པའི་འཕྲུལ་འཁོར་ནས་བོད་ལྗོངས་སུ་གློག་གཏོང་ཚད་89.09%ཟིན་ནས་འབྱུང་འཕྲོད་འཕེལ་རྒྱས་ཀྱི་རྣམ་པ་ཞིག་གྲུབ་ཡོད།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ཏང་ཀྲུང་དབྱང་གི་ཐུགས་ཁུར་དང་རྒྱབ་སྐྱོར་འོག་དམངས་འཚོར་ཕན་འདོགས་པ་དང་རྒྱལ་དམངས་དཔལ་འབྱོར་གྱི་རྨང་གཞིར་འདེགས་སྐྱོར་བྱེད་པའི་འདུ་འགོད་གལ་ཆེན་ཁག་གཅིག་ཆར་རྗེས་ཀྱི་མྱུ་གུ་བཞིན་གངས་ལྗོངས་ས་མཐོར་ཁྱབ་ཡོད། རྨང་གཞི་དེའི་ཐོག་རིག་གནས་ཡུལ་སྐོར་དང་། དེང་རབས་ཞབས་འདེགས། ས་མཐོའི་སྐྱེ་དངོས། བོད་ལུགས་གསོ་རིག་དང་བོད་སྨན། མཐོ་གསར་གྲངས་འཛིན་སོགས་ཐོན་ལས་རིམ་བཞིན་འཕེལ་རྒྱས་དང་སྟོབས་ཆེར་ཕྱིན་ནས་འཐབ་ཇུས་རང་བཞིན་གྱི་གསར་དར་ཐོན་ལས་ཕྱོགས་སུ་གོམ་སྟབས་སྤོས་ཡོད།

སྤུས་ཚད་མཐོ་བའི་འཕེལ་རྒྱས་ཀྱི་གྲུབ་འབྲས་མང་ཚོགས་ཀྱི་བློ་ཡིད་ཚིམ་མིན་ལ་རག་ལས་ཡོད།

“ན་སོ་རྒས་རུང་མཉམ་སྡེབ་ཀྱིས་ང་ཚོར་ད་དུང་འགན་བཅོལ་དངུལ་སྤྲོད་ཀྱི་ཡོད་པས། ང་ཚོ་དུས་རབས་འདིར་འཚོ་བ་སྐྱེལ་བར་སྤོབས་པ་ཆེན་པོ་སྐྱེ་གི་འདུག”ཅེས་ད་ཆའི་འཚོ་བ་གསར་པའི་སྐོར་གླེང་སྐབས། བོད་ལྗོངས་ལྷོ་ཁ་གྲོང་ཁྱེར་སྣེ་གདོང་ཆུས་རྩེད་ཐང་ཁྲོམ་གཞུང་བཙན་ཐང་སྡེ་ཁུལ་གྱི་བགྲེས་སོང་རྡོ་རྗེས་མཐེ་བོང་བསྒྲེངས་ནས་བསྔགས་བརྗོད་བྱས།

ཤེས་རྟོགས་བྱུང་བར་གཞིགས་ན། བཙན་ཐང་སྡེ་ཁུལ་གྱིས་ཐོན་ལས་རྣམ་གྲངས་ཚོགས་ཆུང་11བསྡུ་སྒྲིལ་བྱས་ནས་མ་རྐང་དཔལ་འབྱོར་མཉམ་ལས་ཁང་བཙུགས་པར་ཁྱོན་དུད་ཚང་77དང་མི་གྲངས་250ཡོད་པ་དང་། ལོ་རེར་མི་རེར་ཆ་སྙོམས་སྒོར་7000ལྷག་ཙམ་བགོ་འགྲེམས་བྱས་ཡོད། སྡེ་ཁུལ་ཏང་སྤྱི་ཁྱབ་ཀྲི་པུའི་ཧྲུའུ་ཅི་སྤེན་པ་ཚེ་རིང་གིས“སྡེ་ཁུལ་གྱིས་ད་དུང་གྲོང་མིའི་སྨན་བཅོས་དང་། རྒན་གསོའི་འགན་བཅོལ་དངུལ་འཇལ་བ། སློབ་མར་རོགས་དངུལ་སྤྲོད་པ་སོགས་དམངས་ཕན་བྱེད་ཐབས་13བཏོན་ནས་འཕེལ་རྒྱས་ཀྱི་གྲུབ་འབྲས་ཚང་མས་མཉམ་སྤྱོད་ཐུབ་པར་བྱས་ཡོད”ཅེས་བརྗོད་བྱུང་།

ད་ཆ་བོད་དུ་སློབ་ཞུགས་གོང་གི་སློབ་གསོ་དང་། རྨང་གཞིའི་སློབ་གསོ། ལས་རིགས་སློབ་གསོ། མཐོ་རིམ་སློབ་གསོ། རྒྱུན་མཐུད་སློབ་གསོ། དམིགས་བསལ་སློབ་གསོ་བཅས་ཚུད་པའི་དེང་རབས་ཀྱི་སློབ་གསོའི་མ་ལག་བཙུགས་པས། ངལ་རྩོལ་ནུས་ཤུགས་གསར་པས་སློབ་གསོ་དང་ལེན་བྱེད་པའི་ལོ་ཚད་ལོ་13.1བར་མཐོ་རུ་ཕྱིན་ཡོད། མི་རིགས་ཁག་གི་མང་ཚོགས་ཀྱི་འཚོ་བའི་ཆུ་ཚད་རྒྱུན་ཆད་མེད་པར་མཐོ་རུ་ཕྱིན་པ་དང་། སྨན་བཅོས་ཆ་རྐྱེན་རྒྱུན་ཆད་མེད་པར་ལེགས་སུ་ཕྱིན་པ། སྤྱི་ཚོགས་འགན་སྲུང་མ་ལག་རྒྱུན་ཆད་མེད་པར་འཐུས་སྒོ་ཚང་དུ་ཕྱིན་པ། མི་རེའི་ཆ་སྙོམས་ཀྱི་སྔོན་དཔག་ཚེ་ཚད་ལོ་72.19བར་མཐོ་རུ་ཕྱིན་ཡོད།

སྤྱི་ཚོགས་ཀྱི་འཕེལ་རྒྱས་དང་འཚམ་པའི་སྐྱེ་ཁམས་ཤེས་དཔལ་འཛུགས་སྐྱོང་ལ་སྐུལ་འདེད་བཏང་ཞིང་། སྔོ་ལྗང་འཕེལ་རྒྱས་ཀྱི་འདུ་ཤེས་ཀྱི་མཛུབ་ཁྲིད་འོག་བོད་ཀྱིས་ནུས་རྒྱུ་ཟད་གྲོན་ཆེ་བ་དང་། སྦགས་བཙོག་ཆེ་བ། བཙོག་འབུད་བྱེད་མང་བ་བཅས་ཀྱི་ལས་རིགས་འཕེལ་རྒྱས་ལ་ཚོད་འཛིན་ནན་པོ་བྱས་པ་དང་ཆབས་ཅིག རྒྱལ་ཁབ་ས་ཆ་སྔོ་འགྱུར་འདུ་འགོད་ལ་སྐུལ་འདེད་བཏང་ཡོད། 2021ལོར་བོད་ཀྱི་མཁའ་རླུང་ཁོར་ཡུག་སྤུས་ཚད་ཆ་སྙོམས་ལེགས་པའི་ཉིན་གྲངས་ཀྱི་བསྡུར་གྲངས་98.8%ཟིན་པ་དང་། གཙང་པོ་དང་། ཆུ་བོ། མཚོ་བཅས་ཆུ་སྤུས་ཚད་ལེགས་པོ་རྒྱུན་འཁྱོངས་ཐུབ་པ། ས་རྒྱུའི་ཁོར་ཡུག་སྤུས་ཚད་སྤྱིའི་ཆ་ནས་བརྟན་པ་བཅས་བོད་ཀྱི་སྐྱེ་ཁམས་ཁོར་ཡུག་སྤུས་ཚད་ལེགས་པོའི་རྣམ་པ་མུ་མཐུད་རྒྱུན་འཁྱོངས་ཐུབ་ཡོད།

བོད་རང་སྐྱོང་ལྗོངས་འཕེལ་སྒྱུར་ཨུ་ལྷན་གྱི་ཀྲུའུ་རེན་བསོད་ནམས་ཉི་མས“ལོ་ལྔ་ཚན་བཅུ་བཞི་པའི”རིང་། མ་དངུལ་སྒོར་དུང་ཕྱུར་6015བཏང་ནས་དམངས་འཚོ་འགན་ལེན་དང་ལེགས་གཏོང་དང་། རྨང་གཞིའི་སྒྲིག་བཀོད་འཛུགས་སྐྲུན། སྐྱེ་ཁམས་ཁོར་ཡུག་སྲུང་སྐྱོང་། ཁྱད་ལྡན་ལེགས་ཆའི་ཐོན་ལས་འཕེལ་རྒྱས་སོགས་ཁྱབ་ཁོངས་ལ་གཙོ་གནད་རྒྱབ་སྐྱོར་བྱས་ཏེ། བོད་ཀྱི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་སྔར་བས་རམ་འདེགས་བྱེད་ཀྱི་ཡིན་ཞེས་བརྗོད་བྱུང་།

ལོ་63གྱི་ཆར་རླུང་ཁྲོད་བོད་ལྗོངས་འོད་སྟོང་འཕྲོ་བའི་འཕེལ་རྒྱས་ཀྱི་ལམ་བུར་བསྐྱོད་ཅིང་། ད་ཆ་ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་འགྲོ་ལམ་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་རྒྱང་ལམ་གསར་པར་བོད་ཀྱིས་ལོ་རྒྱུས་གསར་པ་དང་འབྱུང་འགྱུར་གསར་པ་གཏོད་ཐུབ་ངེས་རེད།

(ཤིན་ཧྭ་གསར་འགྱུར་ཁང་ལྷ་ས་ནས་ཟླ་3ཚེས་27ཉིན་འབྱོར་བའི་གློག་འཕྲིན)