(2021ལོའི་ཟླ་7ཚེས་21ཉིན་ནས་ཚེས་23ཉིན་བར། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞི་ཅིན་ཕིང་བོད་དུ་ཕེབས་ཏེ་བོད་ཞི་བས་བཅིངས་འགྲོལ་བཏང་ནས་ལོ་ངོ་70འཁོར་བར་རྟེན་འབྲེལ་ཞུས་གནང་བ་མ་ཟད། བོད་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ལ་འཚམས་འདྲི་གནང་ཞིང་། གོང་གི་པར་འདི་ནི་2021ལོའི་ཟླ་7ཚེས་22ཉིན་གྱི་ཕྱི་དྲོ་ཞི་ཅིན་ཕིང་གིས་ཕོ་བྲང་པོ་ཏ་ལའི་ཐང་ཆེན་དུ་རྟོག་ཞིབ་གནང་སྐབས་ཡུལ་སྐོར་བ་དང་མང་ཚོགས་ལ་ཕྱག་གཡུག་གཡུག་གནང་བཞིན་པ)

“ན་ནིང་སྤྱི་ཁྱབ་ཧྲུའུ་ཅི་ཞི་ཅིན་ཕིང་ང་ཚོའི་གྲོང་ཚོར་ཕེབས་ནས་གྲོང་ཚོའི་ཁམ་བུའི་མེ་ཏོག་གི་གནས་ཚུལ་བཀའ་འདྲི་གནང་སྟེ། ང་ཚོར་གྲོང་གསེབ་དར་རྒྱས་ཀྱི་ལས་དོན་ལ་དམ་འཛིན་ཡག་པོ་བྱེད་དགོས་པའི་སྐུལ་ལྕག་གནང་བྱུང”བརྩེ་སེམས་ཀྱིས་རབ་ཏུ་ཕྱུག་པའི་དོན་དེར་དྲན་གསོ་བྱེད་སྐབས་ཉིང་ཁྲི་གྲོང་ཁྱེར་བྲག་ཡིབ་ཆུས་ཀ་ལ་གྲོང་ཚོའི་ཏང་ཀྲི་པུའི་ཧྲུའུ་ཅི་སྤེན་པར་ནམ་ཡང་བརྗེད་པར་དཀའ་བའི་ཚོར་བ་ཟབ་མོ་སྐྱེ་བཞིན་མཆིས། “ཏང་གི་འོད་ཟེར་ནམ་ཡང་གངས་ལྗོངས་ས་མཐོའི་རི་ཀླུང་ཀུན་ལ་འཕྲོས་ནས་མི་རིགས་ཁག་གི་ལས་བྱེད་པ་དང་མང་ཚོགས་ཀྱི་སེམས་ལ་དྲོ་སྐྱིད་སྦྱིན་ཡོད”

དུས་ཡུན་རིང་པོར་དྲོ་སྐྱིད་ལྡན་པའི་དྲན་འཆར་དེ་ས་མཐོའི་བུ་ཕྲུག་ཚོའི་སེམས་ནང་ངེས་བཞིན་ཡོད་ལ། མི་དམངས་དང་ལོ་རྒྱུས་ཀྱིས་ཀྱང་གཏན་ནས་བརྗེད་མི་སྲིད། ལོ་63གོང་གི་དཔྱིད་ཀར་རླབས་ཆེན་གྱི་ཀྲུང་གོ་གུང་ཁྲན་ཏང་གི་འགོ་ཁྲིད་འོག བོད་དུ་ཟིལ་རླབས་དགུང་འཕྱུར་གྱི་དམངས་གཙོའི་བཅོས་སྒྱུར་བྱས་ནས་ཆོས་སྲིད་ཟུང་འབྲེལ་གྱི་བཀས་བཀོད་རྒྱུད་འཛིན་ཞིང་བྲན་ལམ་ལུགས་རྦད་དེ་རྩ་མེད་བཏང་བར་བརྟེན། ཞིང་བྲན་ཁྲི་ཚོ་བརྒྱར་ཡར་ལངས་བཅིངས་འགྲོལ་ཐོབ་པ་དང་རང་ཁྱིམ་རང་བདག་གི་དབང་ཆ་ཐེངས་དང་པོ་ཐོབ་སྟེ། རྒྱལ་ཁབ་དང་། བོད་ལྗོངས། རང་ཉིད་བཅས་ཀྱི་ལས་དབང་གི་བདག་པོར་གྱུར་ཡོད།

དམངས་གཙོའི་བཅོས་སྒྱུར་བྱས་ཚུན། ཀྲུང་གོ་གུང་ཁྲན་ཏང་གིས་བོད་ཀྱི་མི་རིགས་ཁག་གི་མི་དམངས་ལ་མཐུན་སྒྲིལ་སྣེ་ཁྲིད་གནང་སྟེ། གནམ་འཐབ་ས་འཛིང་དང་གནམ་སྒྱུར་ས་བརྗེས་བྱས་ནས་གནམ་འགུལ་ས་གཡོའི་ལོ་རྒྱུས་ཀྱི་བྱ་གཞག་རླབས་པོ་ཆེ་བཏོད་པ་དང་། འབད་འཐབ་དང་། མཆོང་སྐྱོད། འཕོ་འགྱུར་བཅས་ལ་བརྟེན་ནས་མེས་རྒྱལ་གྱི་ལྷོ་ནུབ་མཐའ་མཚམས་སུ་ནམ་ཡང་མི་ནུབ་པའི་བྱས་རྗེས་རྡོ་རིང་བཙུགས་ཡོད། དེ་ནི་ཀྲུང་གོའི་ལོ་རྒྱུས་ཀྱི་འཕོ་འགྱུར་ཆེ་མོའི་གསོན་ཉམས་དོད་པའི་བསྡུས་རིས་ཤིག་རེད།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་ལོ་རྒྱུས་ཀྱི་རྒྱུག་མཐུད་དབྱུག་པ་དང་དུ་བླངས་ནས་བོད་ཀྱི་ལས་དོན་དེ་སྔར་བྱུང་མྱོང་མེད་པའི་མཐོ་ཚད་གསར་པར་མཐོར་འདེགས་གནང་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་སྐུ་ངོ་མས་བོད་ཀྱི་ལས་དོན་ལ་ཁ་སྒྱུར་ཕྱོགས་སྟོན་དང་འཐབ་འགོད་ཇུས་འདོན་གནང་བ་དང་། གསུང་བཤད་གལ་ཆེན་དང་མཛུབ་སྟོན་གལ་ཆེན་ཐེངས་མང་གནང་བ། ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་གཉིས་འཚོགས་ནས། དུས་རབས་གསར་པའི་ཏང་གི་བོད་སྐྱོང་མཛད་ཇུས་བཏོན་གནང་སྟེ་བྱ་སྤྱོད་ཀྱི་རྩ་འཛིན་གཏན་འཁེལ་དང་བརྗིད་ཆེའི་འཐབ་ཇུས་འཆར་འགོད་གནང་ཡོད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཆེད་མངགས་བོད་ཀྱི་ལས་དོན་སྐོར་གྱི་སྙན་སེང་ཐེངས་མང་གསན་གནང་བ་དང་། སྐུ་ངོ་མས་ཀྲུང་དབྱང་གིས་བོད་ལ་རྒྱབ་སྐྱོར་བྱ་རྒྱུའི་གཙོ་གནད་འཛུགས་སྐྲུན་རྣམ་གྲངས་འབོར་ཆེན་གཏན་འཁེལ་གནང་བ། ལྗོངས་ཡོངས་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ལ་ཕན་འདོགས་པའི་དམིགས་བསལ་གཟིགས་སྐྱོང་སྲིད་ཇུས་རབ་དང་རིམ་པ་གཏན་འཁེལ་གནང་བ། རང་ལྗོངས་ལ“ལོ་ལྔ་ཚན་བཅུ་གསུམ་པའི”འཆར་འགོད་མ་འཇོག་གི་སྤྱིའི་འཆར་གཞི་ཁ་གསལ་བཏིང་གནང་ཁར། ཁྲོན་བོད་ལྕགས་ལམ་དང་། ལྷ་གཞིས་རིམ་མཐོའི་གཞུང་ལམ། བོད་རང་སྐྱོང་ལྗོངས་སྨན་ཁང་། བོད་ལུགས་གསོ་རིག་སློབ་ཆེན་ཁུལ་གསར། བོད་ལྗོངས་ལག་ཤེས་སློབ་གླིང་སོགས་རྣམ་གྲངས་གལ་ཆེན་འབོར་ཆེན་གསར་སྐྲུན་གནང་ཡོད།

བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་དམིགས་བསལ་ཐུགས་ཁུར་དང་བྱམས་སྐྱོང་འོག བོད་ལ་སྔར་བྱུང་མྱོང་མེད་པ་དང་ཐོབ་པར་དཀའ་བའི་འཕེལ་རྒྱས་ཀྱི་གོ་སྐབས་འཕྲད་ནས་བྱ་གཞག་ཁག་ལ་ཕྱོགས་ཡོངས་ནས་ཡར་རྒྱས་དང་ལོ་རྒྱུས་རང་བཞིན་གྱི་གྲུབ་འབྲས་ཐོབ་ཡོད།

དཔྱད་གཞིའི་ཡིག་ཆ་ལས་མངོན་པར། 2021ལོར་རང་ལྗོངས་ཀྱི་སྤྱི་ཚོགས་ཀྱི་དུས་བབ་བརྟན་ལྷིང་དང་ལེགས་པའི་ཕྱོགས་སུ་རྒྱུན་འཁྱོངས་ཐུབ་ནས་མང་ཚོགས་ཀྱི་བདེ་འཇགས་ཚོར་སྣང་དང་བློ་ཡིད་ཚིམ་ཚད་རྒྱལ་ཡོངས་ཀྱི་མདུན་གྲལ་དུ་སླེབས་ཡོད། གྲོང་ཁྱེར་དང་གྲོང་གསེབ་ཀྱི་གྲོང་མིའི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་གྲངས་གནས་གཉིས་འཕར་རྒྱུ་རྒྱུན་འཁྱོངས་བྱུང་བ་དང་། ཁྲོན་བོད་ལྕགས་ལམ་བསྐྲུན་འགོ་ཚུགས་པ། “བསྐྱར་དར་རྟགས་ཅན”གྱི་ཤུགས་འགྲེམས་མེ་འཁོར་གངས་ལྗོངས་ས་མཐོར་ཤར་གཏོང་ཐུབ་ཡོད། དབུལ་སྒྲོལ་གྱི་གྲུབ་འབྲས་རྒྱུན་ཆད་མེད་པར་སྲ་བརྟན་བྱུང་བ་དང་། རིམས་ནད་སྔོན་འགོག་དང་ཚོད་འཛིན་ནུས་ལྡན་བྱུང་བ། སློབ་གསོ་དང་། སྨན་བཅོས། ལས་ཞུགས། སྤྱི་ཚོགས་འགན་སྲུང་སོགས་དམངས་འཚོའི་བྱ་གཞག་ལ་ཕྱོགས་ཡོངས་ནས་ཡར་རྒྱས་བྱུང་ཡོད། རང་སྐྱོང་ལྗོངས་ཀྱི་སྐྱེ་ཁམས་ཤེས་དཔལ་མཐོ་ས་འཛུགས་སྐྱོང་སྲོལ་ཡིག་ལག་བསྟར་བྱས་པར་བརྟེན། སྐྱེ་ཁམས་ཤེས་དཔལ་འཛུགས་སྐྱོང་དཔེ་སྟོན་ཁུལ་འཛུགས་གཏོད་ལས་དོན་ལ་སྐུལ་འདེད་གཏིང་ཟབ་ཐེབས་པ་མ་ཟད། བོད་ཀྱི་ནམ་མཁའ་དེ་བས་སྔོ་བ་དང་། རི་ཀླུང་དེ་བས་སྔོ་ལྗང་། ཆུ་མོ་དེ་བས་དྭངས་བ། མཁའ་རླུང་དེ་བས་གཙང་བ་བཅས་བྱུང་ཡོད། མཐའ་བརྟན་དང་། མཐའ་དར། དམངས་ཕྱུག་བཅས་ཀྱི་བྱ་སྤྱོད་ལ་སྐུལ་འདེད་གཏིང་ཟབ་ཐེབས་པ་དང་། མཐའ་མཚམས་འབྱོར་འབྲིང་གྲོང་ཚོ་ཕྱོགས་ཡོངས་ནས་བསྐྲུན་པ། ཐོན་སྐྱེད་དང་འཚོ་བའི་ཆ་རྐྱེན་རྒྱུན་ཆད་མེད་པར་ལེགས་སུ་ཕྱིན་པ། མཐའ་མཚམས་གྲ་རྒྱས་འཕེལ་རྒྱས་དང་། མཐའ་མཚམས་མི་དམངས་མཐུན་སྒྲིལ་བདེ་སྐྱིད། མཐའ་སྲུང་བདེ་འཇགས་བརྟན་ལྷིང་བཅས་བྱུང་ཡོད།

རྒྱུགས་འབུལ་ལམ་བུ་གསར་པའི་ཐོག་དུས་རབས་གསར་པར་བྱས་རྗེས་འཇོག་མཁན་གྱི་ཕུགས་བསམ་དོན་གཉེར་བ་ཞིག་བྱེད། ད་ཆ་བོད་དུ་མི་རིགས་ཁག་གི་ལས་བྱེད་པ་དང་མང་ཚོགས་ཚོས་བློ་བརྟན་འགྱུར་མེད་ངང“གཏན་འཁེལ་གཉིས”སྲུང་སྐྱོང་དང་། “སྲུང་སྐྱོང་གཉིས”ཐུབ་པ་བྱེད་རྒྱུ་དེ་ཞིབ་ཕྲའི་ལས་དོན་དང་བྱ་སྤྱོད་དངོས་ཀྱི་ཐོག་དོན་འཁྱོལ་བྱས་ཏེ་རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་ཁུལ་དང་། ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ཀྱི་སྔོན་སྐྱོད་ཁུལ། རྒྱལ་ཁབ་སྐྱེ་ཁམས་ཤེས་དཔལ་གྱི་མཐོ་ས། རྒྱལ་ཁབ་ཀྱི་མཐའ་བརྟན་དང་། མཐའ་དར། དམངས་ཕྱུག་བཅས་ཀྱི་བྱ་སྤྱོད་དཔེ་སྟོན་ཁུལ་བཅས་འཛུགས་གཏོད་ལ་ཤུགས་སྣོན་བརྒྱབ་ནས། ཏང་ཀྲུང་དབྱང་གི་ཐབས་ཇུས་བཀོད་སྒྲིག་བོད་དུ་ལག་བསྟར་དོན་འཁྱོལ་བྱས་ཏེ། གཡུར་ཟའི་གྲུབ་འབྲས་ཐོག་ནས་ཏང་གི་ཚོགས་ཆེན་ཉི་ཤུ་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་བཞིན་ཡོད།