“ད་ཆ་ཆེད་མངགས་སྨན་ཁང་ཆེ་གྲས་གཞན་ལ་འགྲོ་དགོས་མེད། ང་ཚོའི་འདི་ག་ནས་སྐྱེ་དངོས་རྫས་འགྱུར་ཆ་ཚང་དང་། རིམས་འགོག་མ་ལག་ཁག འབྲས་སྐྲན་སོགས་ལ་བརྟག་དཔྱད་བྱེད་ཐུབ་ཀྱི་ཡོད”ཅེས་ཉིང་ཁྲི་གྲོང་ཁྱེར་རྫ་ཡུལ་རྫོང་མི་དམངས་སྨན་ཁང་གི་ཡོན་ཀྲང་གཞོན་པ་སྤེན་པ་ཚེ་རིང་གིས་བརྗོད།

ལོ་63རིང་། བོད་ཀྱི་སྨན་བཅོས་འཕྲོད་བསྟེན་བྱ་གཞག་གི་ཆུ་ཚད་ཟམ་མི་ཆད་པར་མཐོ་རུ་ཕྱིན་ནས་མི་རེའི་ཆ་སྙོམས་སྔོན་དཔག་ཚེ་ཚད་ལོ་72.19ཟིན་ཞིང་། འདི་ནི་1959ལོའི་གོང་གི་བོད་རྙིང་པའི་སྤྱི་ཚོགས་ཀྱི་དམའ་རིམ་དུ་གནས་པའི་ཞིང་བྲན་ཚོས་བསམ་ཚོད་དཀའ་བ་ཞིག་རེད། སྐབས་དེ་དུས་བོད་ཀྱི་མི་རེའི་ཆ་སྙོམས་སྔོན་དཔག་ཚེ་ཚད་ལོ་35.5ཡིན་ཞིང་། ཞིང་བྲན་ལ་ནད་བརྟག་སྨན་བཅོས་བྱེད་པ་སོགས་ཀྱི་གཞི་རྩའི་མི་ལུས་དབང་ཆ་ཡང་འགན་ལེན་ཐུབ་ཀྱི་མེད་པ་རེད།

ལོ་63རིང་། སྨན་བཅོས་འཕྲོད་བསྟེན་ཕུད།

དམངས་འཚོའི་བདེ་རྩ་དང་འབྲེལ་བའི་བྱ་གཞག་མཐའ་དག་བྱ་འཕུར་བ་ལྟར་འཕེལ་རྒྱས་ཕྱིན་ཡོད་པ་རེད།

2022ལོའི་ཟླ་1ཚེས་4ཉིན། ཀྲུའུ་ཞི་ཡན་ཅིན་ཧའེ་ཡིས་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་སྐབས་བཅུ་གཅིག་པའི་ཚོགས་འདུ་ཐེངས་ལྔ་པའི་ཐོག་སྲིད་གཞུང་གི་ལས་དོན་སྙན་སྒྲོན་གནང་ནས་2021ལོའི་སློབ་གསོའི་བྱ་གཞག་འཕེལ་རྒྱས་ཀྱི་གྲུབ་འབྲས་སྒྲོག་སྦྱངས་གནང་སྐབས། “མཐོ་སློབ་སློབ་ཐོན་སློབ་མ་ལས་ཞུགས་ཐུབ་ཚད་99%ཟིན་ཡོད། རྫོང་ཁོངས་ཀྱི་འོས་འགན་སློབ་གསོ་གཞི་རྩའི་ཆ་ནས་དོ་སྙོམས་བྱུང་སྟེ་རྒྱལ་ཁབ་ཀྱི་ཞིབ་བཤེར་རྩིས་ལེན་ཐུབ་པ་དང་། བོད་ལྗོངས་ལག་ཤེས་སློབ་གླིང་བསྐྲུན་ནས་སློབ་འགོ་ཚུགས་པ་སོཌ་ཀྱི་བྱ་བ་མང་པོ་བསྒྲུབས་ཡོད”ཅེས་བཏོན་གནང་བ་རེད།

མུ་འབྲེལ་གྱི་གྲངས་གཞི་ཆེན་པོ་དེས་མི་རྣམས་ལ་སྣང་བ་དེ་ཙམ་ཡོང་མི་སྲིད། འོན་ཀྱང་མང་ཚོགས་ཀྱི་སྐྱིད་སྣང་དང་ཐོབ་སྣང་ནི་མིག་མཐོང་ལག་ཟིན་རེད།

འདི་ལོ་ལོ་42ལ་སླེབས་པའི་རྣམ་གླིང་རྫོང་སློབ་གསོ་ཅུས་སློབ་ཞུགས་གོང་གི་སློབ་གསོའི་འགན་འཁུར་བ་ཉི་ཆོས་ཀྱིས། “དེ་སྔོན་ངའི་ཕ་མ་གཉིས་ཀྱིས‘སློབ་ཞུགས་གོང་གི་སློབ་གསོ’ཞེས་པའི་ཐ་སྙད་གཏན་ནས་གོ་མྱོང་མེད་ལ། སྐབས་དེ་དུས་བུ་བཅོལ་ཁང་ཡང་མང་པོ་དེ་འདྲ་མེད། ཞིང་འབྲོག་མང་ཚོགས་མང་ཆེ་བས་སློབ་ཞུགས་གོང་གི་སློབ་ཡོན་ཡང་སྤྲོད་དཀའ་བར་གྱུར། དེས་ན་བོད་རྙིང་པའི་སྤྱི་ཚོགས་ཀྱི་དམའ་རིམ་ལ་གནས་པའི་ཞིང་བྲན་ལའང་དེ་བས་སྨོས་ཅི་དགོས། ད་ཆའི་ཕྲུ་གུར་ཆ་བཞག་ན། ཁོང་ཚོར་བོད་འཕེལ་རྒྱས་ཀྱི་ཕན་པ་དང་། གྲོང་ཁྱེར་དང་གྲོང་རྡལ་གྱི་སློབ་ཞུགས་གོང་གི་ལོ་གསུམ་གྱི་སློབ་ཡོན་མི་དགོས་པའི་སློབ་གསོའི་སྲིད་ཇུས་ལོངས་སྤྱོད་ཐུབ་པས། ང་རང་ཡང་ཁོང་ཚོར་ཡིད་སྨོན་ཆེན་པོ་སྐྱེ་གི་འདུག དངོས་གནས་བདེ་སྐྱིད་ལྡན་པ་ཞིག་རེད”ཅེས་བརྗོད།

བདེ་སྐྱིད་ནི་ཕྱོགས་གང་ས་ཅི་ཐད་ནས་མངོན་ཞིང་། བོད་རྙིང་པར་དེང་རབས་ཀྱི་དོན་སྙིང་ལྡན་པའི་སློབ་གྲྭ་གཅིག་ཀྱང་མེད་པ་དང་། ད་ཆ་བོད་ལ་རིམ་པ་ཁག་དང་རིགས་ཁག་གི་སློབ་གྲྭ་3100ལྷག་ཙམ་ཡོད། བོད་རྙིང་པར་གཞུང་ལམ་གཅིག་ཀྱང་མེད་པ་དང་། ད་ཆ་ལྷ་ས་ལྟེ་བར་བྱས་པའི་འགྲིམ་འགྲུལ་སྐྱེལ་འདྲེན་དྲ་རྒྱ་ཕྱོགས་བཞི་མཚམས་བརྒྱད་ལ་ཁྱབ་པ་དང་ཤར་གཏོང་ཐུབ་ཡོད། བོད་རྙིང་པར་90%ཡན་གྱི་མི་གོས་ཀྱིས་ལུས་མི་དྲོད་པ་དང་ཟས་ཀྱིས་གྲོད་པ་མི་རྒྱགས་པའི་འཚོ་བ་སྐྱེལ་བ་དང་། ད་ཆ་བོད་ཀྱི་མི་རིགས་ཁག་གི་མང་ཚོགས་ཀྱི་འཚོ་བ་ཕྱོགས་ཡོངས་འབྱོར་འབྲིང་གི་ཕྱོགས་སུ་སྐྱོད་བཞིན་ཡོད།

1959ལོའི་ཟླ་3ཚེས་28ཉིན། ལོ་ངོ་སྟོང་རིང་སྲུང་འཛིན་བྱས་པའི་བཀས་བཀོད་རྒྱུད་འཛིན་ཞིང་བྲན་ལམ་ལུགས་ཐོར་ཞིག་ཏུ་སོང་ནས། བོད་ཀྱི་ཞིང་བྲན་ཁྲི་ཚོ་བརྒྱ་རྒྱལ་ཡོངས་མི་རིགས་ཁག་གི་མང་ཚོགས་དང་འདྲ་བར་རྒྱལ་ཁབ་དང་སྤྱི་ཚོགས་ཀྱི་བདག་པོར་དངོས་འབྲེལ་གྱུར་ཞིང་། ཀྲུང་གོ་གུང་ཁྲན་ཏང་གི་འགོ་ཁྲིད་འོག བོད་ཀྱི་དཔལ་འབྱོར་དང་སྤྱི་ཚོགས་ལ་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་ནས། མི་རིགས་ཁག་གི་མང་ཚོགས་ཚོས་མཐུན་སྒྲིལ་རྡོག་རྩ་གཅིག་སྒྲིལ་དང་སེམས་ནུས་གཅིག་སྒྲིལ་གྱིས་སྤྱི་ཚོགས་རིང་ལུགས་ཀྱི་བོད་ལྗོངས་གསར་པ་མཉམ་དུ་སྐྲུན་པའི་ལམ་ཆེན་ཐོག་གོམ་ཞེང་ཆེན་པོས་མདུན་དུ་སྐྱོད་བཞིན་ཡོད།