“སྤྱོད་ཚུལ་ལེགས་སུ་གཏོང་བ་དང་དོན་འཁྱོལ་ལ་དམ་འཛིན་ནན་པོ་བྱེད་པར་ཞིབ་ཕྲའི་བྱ་བ་ནས་དམ་འཛིན་བྱེད་དགོས”“རྒྱུན་འཁྱོངས་བྱེད་རྒྱུ་དོན་དམ་པ་ཡིན་པས་རྒྱུན་སྲིང་ལྷོད་མེད་བྱེད་དགོས”ཞེས་པ་སོགས་རྒྱལ་ཡོངས་ཀྱི་ཚོགས་འདུ་གཉིས་ཐོག་རང་ལྗོངས་ཀྱི་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་སྲིད་གྲོས་ཀྱི་ཨུ་ཡོན་ཚོས་སྤྱོད་ཚུལ་ལེགས་སུ་གཏོང་བ་དང་དོན་འཁྱོལ་ལ་དམ་འཛིན་ནན་པོ་བྱེད་པར་ཐབས་འདོན་ཇུས་འབུལ་གནང་ཡོད།
རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་སྒོར་སྒོར་གྱིས་གསར་འགོད་པའི་བཅར་འདྲི་དང་ལེན་གནང་སྐབས། ཧྲུའུ་ཅི་ཝང་ཅུན་ཀྲེང་གིས་པན་ཀྲང་གནང་བའི་རང་སྐྱོང་ལྗོངས་ཏང་ཨུད་ཀྱི་འགོ་ཁྲིད་ཚན་ཁག་སྐབས་གསར་པས་སྤྱོད་ཚུལ་འཛུགས་སྐྱོང་མངོན་གསལ་དོད་པའི་གནས་བབ་ཐོག་བཞག་ནས་ལྗོངས་ཡོངས་ཀྱི་རྒྱ་ཆེའི་ཏང་ཡོན་ལས་བྱེད་པའི་ཁྲོད“ཞིབ་བཤེར་བཞི”ནང་དོན་གཙོ་བོར་བྱས་པའི་སྤྱོད་ཚུལ་ལེགས་སུ་གཏོང་བ་དང་དོན་འཁྱོལ་ལ་དམ་འཛིན་ནན་པོ་བྱེད་པའི་ལས་དོན་ཡག་པོ་བསྒྲུབས་ཏེ་སྐབས་གསར་པའི་རང་སྐྱོང་ལྗོངས་ཏང་ཨུད་ཚན་ཁག་གི་ཉམས་འགྱུར་གསར་པ་དང་བསམ་ཕྱོགས་གསར་པ་མངོན་པར་བྱས་ཡོད་ཅེས་གསུངས་པ་རེད།
“ལྷ་ས་གྲོང་ཁྱེར་གྱིས་འཕྲལ་མར་སྐུལ་སློང་བཀོད་སྒྲིག་ཚོགས་འདུ་འཚོགས་ནས་དུས་ཐོག་ཏུ་ལས་ཀའི་ཆེད་དོན་ཚན་ཁག་བཙུགས་ཏེ་ལས་ཀའི་ཇུས་གཞི་བཟོས་ནས་དོན་འཁྱོལ་ལ་དམ་འཛིན་དང་། སྤྱོད་ཚུལ་ལེགས་སུ་གཏོང་བ། བྱ་བ་དངོས་སྒྲུབ་པ་བཅས་ཀྱི་གསལ་ཐོ་གསུམ་བཟོས་ཡོད”གསལ་ཐོ་འདིའི་ནང་གནད་དོན་ཕྱོགས་སྟོན་དུ་འཛིན་པ་དང་དམིགས་ཚད་ཕྱོགས་སྟོན་དུ་འཛིན་རྒྱུ་མཐའ་འཁྱོངས་བྱས་ཏེ་ལས་བྱེད་པའི་དཔུང་ཁག་ཁྲོད་གནས་པའི་མངོན་གསལ་དོད་པའི་གནད་དོན་གཅིག་སྡུད་ཐོག་འདོན་པ་དང་། མང་ཚོགས་ཀྱིས་སེམས་ཁུར་བྱེད་པའི“འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག”བཅས་ཀྱི་གནད་དོན་གསེད་བཀྲོལ་དང“བཞི་བཤེར་བཞི་འདྲི”ཡི་གསལ་ཐོ་འགོད་པ། བརྟན་ལྷིང་སྲུང་སྐྱོང་གི་ལས་འགན་གལ་ཆེན་དོན་འཁྱོལ་ལ་དམ་འཛིན་དང་། སྣེ་ཁྲིད་འཐབ་ཇུས་གལ་ཆེན་དོན་འཁྱོལ་ལ་དམ་འཛིན། དམིགས་ཚད་ལས་འགན་གལ་ཆེན་དོན་འཁྱོལ་ལ་དམ་འཛིན་སོགས“སྤྱོད་ཚུལ་ལེགས་སུ་གཏོང་བ་དང་དོན་འཁྱོལ་ལ་དམ་འཛིན”བྱེད་པའི་ཆེད་དོན་བྱ་སྤྱོད་ཁག་12ལག་ལེན་བསྟར་བ་རེད།
རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་ཚེ་རིང་གཡང་འཛོམས་ཀྱིས། གཞི་རིམ་སྨན་པ་ཞིག་ཡིན་པའི་ངོས་ནས་སྤྱོད་ཚུལ་ལེགས་སུ་གཏོང་རྒྱུ་དེ་ལས་གནས་བརྟན་སྲུང་ཐོག་ནས་མངོན་པར་བྱེད་དགོས་པའི་ངོས་འཛིན་གནང་གི་ཡོད། ལོ་མང་རིང་། ཚེ་རིང་གཡང་འཛོམས་ཀྱིས་རང་རྟོགས་ངང་སྨན་ཁང་དང་ཚན་ཁག་གི་སྒྲིག་སྲོལ་ལམ་ལུགས་ཁག་ལ་བརྩི་སྲུང་ཞུ་བ་དང་ལས་གཅེས་ལས་བརྩོན་གྱིས་ལས་ཀ་བྱེད་རིང་སྔ་ལོག་དང་ཕྱི་འབྱོར་བྱེད་མྱོང་མེད་པ་དང་། ནད་པར་ཞབས་འདེགས་ཞུ་རྒྱུ་ལྟེ་བར་འཛིན་རྒྱུ་མཐའ་འཁྱོངས་བྱས་ནས་ནད་ཐོག་སྨན་བཅོས་ཀྱི་ལས་དོན་དང་འགོ་ཁྲིད་ཀྱིས་བཀོད་སྒྲིག་བྱས་པའི་སྐབས་འཕྲལ་ལས་འགན་ཁག་དུས་ཐོག་ཏུ་སྤུས་ཚད་མཐོ་པོས་ལེགས་སྒྲུབ་བྱེད་པ་མ་ཟད། འཕྲལ་སེལ་སླ་བཅོས་སྤུ་ཙམ་ཡང་མེད་པར་ནད་པ་ཚང་མར་ཞབས་འདེགས་ཞུས་ཏེ་བརྟག་དཔྱད་དང་སྨན་བཅོས་ཐད་ནོར་འཛོལ་མི་ཐོན་པ་གང་ཐུབ་གནང་གི་ཡོད། “ནད་པ་ཚོའི་ངོས་ནས་བརྗོད་ན་སྨན་པས་དུས་ཐོག་ཏུ་སྒོ་བསྟེན་སྨན་བཅོས་དང་། ངང་རྒྱུད་རིང་པོས་ནད་གཞི་ལྟ་བ། ནད་པར་སྨན་བཅོས་བྱེད་པ་བཅས་ནི་ནད་པར་འགན་འཁུར་བ་ཞིག་དང་སྤྱོད་ཚུལ་ལེགས་སུ་གཏོང་བ་དང་དོན་འཁྱོལ་ལ་དམ་འཛིན་ཡག་ཤོས་བྱས་པ་ཞིག་ལ་བརྩི་གི་ཡོད”
ཚེ་རིང་གཡང་འཛོམས་ཀྱིས་གསུངས་པ་ལྟར་དོན་འཁྱོལ་ནི་མང་ཚོགས་ཀྱི་ཁེ་ཕན་དང་འབྲེལ་བ་ཡོད་ཕྱིན“དོན་ཆུང”ཡིན་ཡང་དཀའ་སྤྱད་འབད་བརྩོན་དང་སྙིང་རུས་ཆེན་པོས་སྒྲུབ་རྒྱུ་དེ་ཡིན། རྒྱལ་ཡོངས་སྲིད་གྲོས་ཀྱི་ཨུ་ཡོན་ཆབ་མདོ་གྲོང་ཁྱེར་གྱི་ཧྲི་ཀྲང་ཁྲེན་ཅུན་གྱིས་ཀྱང་ཉེ་འགྲམ་གྱི་དོན་དངོས་ཐོག་ནས་གསར་འགོད་པར་རྒྱས་བཤད་གནང་བ་རེད།
དཔལ་འབར་རྫོང་གིས་ལས་བྱེད་པ་ལས་ཀ་ཚུགས་གྲོལ་དང་། གཞུང་ལས་ཁང་གི་ཁོར་ཡུག་ལེགས་བཅོས། ལས་ཀ་གྲོལ་རྗེས་གློག་བཀག་པ་སོགས་ཀྱི་བྱ་བ་ཆུང་ཙག་ནས་འགོ་བཙུགས་ཏེ་མི་ཐེངས་84ལ་ལྟ་སྐུལ་ཞིབ་བཤེར་བྱས་པ་དང་། རྫོང་ཐད་གཏོགས་ལས་ཁུངས་43དུ་སྐྱོད་དེ་ལས་བྱེད་པ་དང་ལས་བཟོ་མི་ཐེངས་1045ཡི་ལས་ཀ་ཚུགས་གྲོལ་ལ་ལྟ་སྐུལ་ཞིབ་བཤེར་བྱས་ཡོད། སྟེང་ཆེན་རྫོང་གིས་མང་ཚོགས་ཉེ་འགྲམ་གྱི་དོན་ཆུང་ཏང་ཨུད་དང་སྲིད་གཞུང་གི་དོན་ཆེན་ལ་བརྩིས་ནས་དམ་འཛིན་མཐའ་འཁྱོངས་བྱས་ཏེ་ཟླ་བ་གཅིག་ལྷག་ཙམ་རིང་རྒྱུན་མཐུད་ངང་འབད་འཐབ་བྱས་པ་བརྒྱུད། པ་ལྡན་དང་། རུ་གསུམ། སྡེ་པ། ཝ་པ་བཅས་གྲོང་ཚོ་བཞིར་གློག་བརྟན་པོ་གཏོང་ཐུབ་པ་བྱུང་བ་རེད།