2021ལོའི་ལོ་མཇུག་ཏུ་ལྗོངས་ཡོངས་ཀྱི་མཐའ་མཚམས་འབྱོར་འབྲིང་གྲོང་ཚོ་624ཚང་མ་བསྐྲུན་ཟིན་ཞིང་། སྲིད་འཛིན་གྲོང་ཚོ་ཁག་ལ་གློག་དང་དྲ་བ་ཤར་གཏོང་ཐུབ་པ་དང་། རང་འབབ་ཆུ་ཀ་ལ་ཁྲིད་ཐུབ་པ། གཞི་རྩའི་ཆ་ནས་མཁྲེགས་ལམ་ཤར་གཏོང་ཐུབ་པ། མང་ཚོགས་ཀྱི་ཟས་གོས་སྡོད་གསུམ་དང་འགྲོ་སྐྱོད་བཅས་ཀྱི་ཆ་རྐྱེན་ལེགས་སུ་ཤུགས་ཆེན་ཕྱིན་པ། སྤྱི་ཚོགས་དར་རྒྱས་བརྟན་ལྷིང་དང་མི་རིགས་མཐུན་སྒྲིལ་ཡར་ཐོན་བྱུང་བ་བཅས་དབྱར་མཚོ་རྒྱས་པ་ལྟར་གྱི་རྣམ་པ་མངོན་ཡོད། དེ་དག་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གི་དམིགས་བསལ་ཐུགས་ཁུར་དང་གཟིགས་སྐྱོང་དང་ཏང་དང་སྲིད་གཞུང་གི་སྲིད་ཇུས་བཟང་པོ་ལས་བྱུང་བ་ཞིག་རེད།

ཏང་གི་སྲིད་ཇུས་བཟང་པོ་ལོངས་སྤྱོད་ཐུབ་པ་དང་བདེ་སྐྱིད་ཀྱི་འཚོ་བ་ཡག་པོ་སྐྱེལ་ཐུབ་པས་མཐའ་མཚམས་མང་ཚོགས་ཀྱི་མཐའ་བརྟན་མཐའ་སྲུང་གི་ཆོད་སེམས་དེ་བས་བརྟན་དུ་དང་ངར་ཤུགས་དེ་བས་ཆེ་རུ་སོང་ཡོད།

སེམས་ཤུགས་གཅིག་ཏུ་བསྒྲིལ་ནས་མཛེས་སྡུག་ལྡན་པའི་གྲོང་གསེབ་སྐྲུན་པ།

“ང་ཚོ་ཏང་གི་དམངས་ཕན་སྲིད་ཇུས་ལ་བརྟེན་ནས་ཕྱུག་པོ་ཆགས་པས་ཕ་ཚ་བུ་རྒྱུད་ཀྱིས་མཐའ་མཚམས་ཡག་པོ་སྲུང་དགོས”ཞེས་ལྷོ་ཁ་གྲོང་ཁྱེར་ལྷོ་བྲག་རྫོང་ལ་རྒྱབ་ཤང་རྒྱལ་ནོར་བུ་གྲོང་ཚོའི་བགྲེས་སོང་བསོད་ནམས་ཆོས་འཕེལ་གྱིས་བཤད། ཉེ་བའི་ལོ་ཤས་རིང་མཐའ་མཚམས་མང་ཚོགས་ཀྱི་སྲིད་ཇུས་རང་བཞིན་གྱི་ཁ་གསབ་ཐེངས་མང་འཕར་བས་འཚོ་བའི་ཆ་རྐྱེན་ལེགས་སུ་ཤུགས་ཆེན་ཕྱིན་ཡོད།

“གློག་ཡག་པོ་ཡོད་པས་གློག་ཆས་ཚང་མ་བེད་སྤྱོད་གཏོང་ཐུབ་ཀྱི་ཡོད། ད་ཆ་འཚོ་བ་ཧ་ཅང་སྟབས་བདེ་པོ་འདུག”ཅེས་གཞིས་རྩེ་གྲོང་ཁྱེར་གཏིང་སྐྱེས་རྫོང་འདྲེན་ཐང་གྲོང་རྡལ་གྱི་གྲོང་མི་སྐྱིད་པས་དགའ་སྤྲོའི་ངང་བཤད། 2020ལོར་འདྲེན་ཐང་གྲོང་རྡལ་དུ་གློག་དྲ་སྦྲེལ་མཐུད་ཐུབ་ནས་གློག་ཆད་པ་དང་གློག་གནོན་ཡང་བརྟན་པོ་མེད་པའི་གནད་དོན་རྦད་དེ་ཐག་གཅོད་ཐུབ་པ་རེད།

“ང་ཚོ་མི་སེར་གྱི་ངོས་ནས་བརྗོད་ན་འཕེལ་རྒྱས་ཡོད་ཚད་ཀྱི་གལ་འགངས་ཆེ་ཤོས་ནི་ལམ་བུ་རེད” འདི་ནི་མེ་ཏོག་རྫོང་བྱ་ར་ས་གྲོང་ཚོའི་གྲོང་མི་བཀྲ་ཤིས་ཚེ་རིང་གི་སེམས་ནང་གི་སྐད་ཆ་ཞིག་རེད། 2013ལོར་མེ་ཏོག་རྫོང་དུ་གཞུང་ལམ་ཤར་གཏོང་ཐུབ་པ་དང་2021ལོའི་ཟླ་5པར་གཞུང་ལམ་གཉིས་པ་ཕད་ནས་མེ་ཏོག་བར་གྱི་གཞུང་ལམ་ཤར་གཏོང་ཐུབ་པ་རེད།

མི་སེར་གྱི་སྐད་ཆ་རེ་རེ་ལས་ཏང་དང་རྒྱལ་ཁབ་ཀྱི་སྲིད་ཇུས་བཟང་པོ་མཚོན།

ཡུལ་སྨད་དུ་གྲོང་མིའི་སྡོད་ཁང་གསར་རྐྱང་གིས་དེ་སྔོན་གྱི་གོག་ཧྲུལ་གྱི་ཁང་པ་རྙིང་པ་དག་གི་ཚབ་བྱེད་པ་དང་། ཁོད་སྙོམས་པའི་ལམ་ངོས་ཀྱིས་དེ་སྔའི་འདམ་རྫབ་ལམ་གྱི་ཚབ་བྱེད་པ། “ནད་ཆུང་ཤང་ནང་དུ་བཅོས”ཐུབ་པའི་དམིགས་ཚད་གཞི་རྩའི་ཆ་ནས་མངོན་འགྱུར་ཐུབ་པས་བདེ་སྐྱིད་ལྡན་པའི་འཚོ་བར་འགན་ལེན་ཐུབ་པ་སོགས་ལོ་ཤས་རིང་གི་འཛུགས་སྐྲུན་ལས་དེ་སྔའི“མི་གསུམ་ཤང”དེ་ད་ཆ་དུད་ཚང་67དང་མི་200ལྷག་ཙམ་ཡོད་པའི་ཁོངས་གཏོགས་སྲིད་འཛིན་གྲོང་ཚོ་གཉིས་དང་མི་རེའི་ལོ་རེའི་ཆ་སྙོམས་ཡོང་འབབ་སྒོར་ཁྲི་4ཙམ་ཟིན་པའི་འབྱོར་འབྲིང་ཤང་ཞིག་ཏུ་གྱུར་ཡོད།

“ས་ཁོངས་ཁྱད་ཆོས་ཀྱི་ཞིང་ཞོར་ཐོན་རྫས”ཕྱུག་འགྱུར་གྱི་གསེར་གྱི་ལྡེ་མིག་ལྟ་བུར་གྱུར་པ།

མཐའ་མཚམས་ས་ཁུལ་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་འགག་རྩ་ནི་མཐའ་མཚམས་འཕེལ་རྒྱས་ཀྱི་སེམས་ཤུགས་ཆེ་རུ་གཏོང་རྒྱུ་དེ་རེད།

“མཐའ་མཚམས་ས་ཁུལ་གྱི་འབྱོར་འབྲིང་གྲོང་ཚོ་འཛུགས་སྐྲུན་བྱས་པ་བརྒྱུད་མཐའ་མཚམས་ཀྱི་ཁྱད་ལྡན་ལེགས་ཆ་ཆེ་བའི་ཐོན་ལས་འཕེལ་རྒྱས་ཟམ་མི་ཆད་པར་ཆེ་རུ་ཕྱིན་ཡོད” རྒྱལ་ཡོངས་སྲིད་གྲོས་ཀྱི་ཨུ་ཡོན་རང་སྐྱོང་ལྗོངས་འཕེལ་སྒྱུར་ཨུ་ལྷན་གྱི་ཀྲུའུ་རེན་བསོད་ནམས་ཉི་མས་གཙོ་གནད་ཁྱབ་ཁོངས་དང་། ཁ་ཕྱོགས་གལ་ཆེན། རྣམ་གྲངས་གལ་ཆེན་བཅས་ཚད་བརྒལ་ཡོང་གཞིར་མཐའ་འཁྱོངས་ཀྱིས། མཐའ་མཚམས་ས་ཁུལ་འཕེལ་རྒྱས་གཏོང་བའི་སྲིད་ཇུས་ཀྱི་མ་ལག་འཐུས་སྒོ་ཚང་དུ་བཏང་སྟེ་མཐའ་བརྟན་ལ་ནུས་པ་ལྡན་པ་དང་། མཐའ་དར་ལ་འདེགས་སྐྱོར་ཡོད་པ། དམངས་ཕྱུག་ལ་ཐབས་ལམ་ཡོད་པ་བཅས་ཀྱི་འཕེལ་རྒྱས་ཀྱི་རྣམ་པ་ཞིག་ཆགས་པར་བྱས་ནས་དེང་རབས་མཐའ་སྲུང་བརྟན་པོ་སྟོབས་ཆེན་ཞིག་གཏོད་ཡོད་ཅེས་གསུངས་པ་རེད།

ལྷོ་ཁ་གྲོང་ཁྱེར་ལྷུན་རྩེ་རྫོང་གསང་སྔགས་ཆོས་གླིང་ཤང་ནས་རྫོང་གྲོང་བར་སྤྱི་ལེ་110ཡོད་ཅིང་། དེ་ནི་ཞིང་ལས་མཐའ་མཚམས་ཤང་གི་ཁོངས་སུ་གཏོགས་ཀྱི་ཡོད། ཉེ་བའི་ལོ་ཤས་རིང་། ས་གནས་དེ་གའི་ཅུང་ཕུན་སུམ་ཚོགས་པའི་ནགས་གསེབ་ཐོན་ཁུངས་ལ་བརྟེན་ནས་ཁྱད་ལྡན་ཐོན་ལས་འཕེལ་རྒྱས་བཏང་སྟེ་མང་ཚོགས་དབུལ་པོ་དབུལ་སྒྲོལ་ཕྱུག་འགྱུར་ཡོང་རྒྱུར་སྐུལ་ཁྲིད་བྱས་ནས“གྲོང་ཚོ་ཨུ་ལྷན་དང་། མཉམ་ལས་ཁང་། མི་སེར”བཅས་ཟུང་དུ་འབྲེལ་བའི་བྱེད་སྟངས་གཞིར་བཟུང་། མ་དངུལ་བཏོན་ཏེ་ནས་ནག་རྩམ་པ་ལས་སྣོན་བཟོ་གྲྭ་དང་བོད་ཕག་གསོ་ཚགས་རྟེན་གཞི་སོགས་བཙུགས་ནས་ཐོན་རྫས་ལྷ་ས་དང་ཧྲང་ཧའེ་སོགས་སུ་འཚོང་གི་ཡོད་པ་རེད།

ཉིང་ཁྲི་གྲོང་ཁྱེར་རྫ་ཡུལ་རྫོང་རྫ་ཡུལ་རོང་སྨད་གྲོང་རྡལ་ས་མ་གྲོང་ཚོར་མཐའ་བརྟན་མཐའ་དར་དང་དམངས་ཕྱུག་སྲིད་ཇུས་རབ་དང་རིམ་པའི་རོགས་སྐྱོར་འོག ཡུལ་བབ་དང་བསྟུན་ཏེ་སེ་འབྲུ་འདེབས་འཛུགས་སོགས་ཁྱད་ལྡན་ཐོན་ལས་འཕེལ་རྒྱས་བཏང་བས་འབབ་འཕར་ཀྱི་ཕན་འབྲས་མངོན་གསལ་དོད་པོ་ཐོན་ཡོད་པ་རེད།

གཞིས་རྩེ་གྲོང་ཁྱེར་གྲོ་མོ་རྫོང་ལ“ཧི་མ་ལ་ཡའི་གཟི་ཚ་སྡེ་དགུ་ཆུང་ངུ”ཞེས་པའི་མཚན་སྙན་ལྡན་པ་དང་། ས་བབ་སྨི་4360ཟིན་པའི་གྲོ་མོ་རྫོང་གི་ཕག་རི་རྩྭ་ཐང་ནི་བོད་ཀྱི་རྩྭ་ཐང་ཡག་ཤོས་ཀྱི་གྲས་ཡིན་པ་དང་། ས་གནས་དེ་གའི་ཞིང་འབྲོག་པས་རྩྭ་ཐང་གི་ལེགས་ཆ་གང་ལེགས་སྤྱད་ནས་འབྲི་གཡག་དང་བོད་བྱ་སོགས་ཀྱི་ཐོན་ལས་འཕེལ་རྒྱས་ཧུར་ཐག་བཏང་སྟེ་ཕྱུག་འགྱུར་ལམ་བུའི་ཐོག་བསྐྱོད་ཡོད།

ད་ཆ་སྤུ་ཧྲེང་རྫོང་གི་རྩམ་པ་དང་། རྫ་ཡུལ་གྱི་སྤྲེལ་ཁམ། སྒར་གྱི་སྔོ་ཚལ། གྲོ་མོའི་ཉ་སོགས་ཀྱི“ས་ཁོངས་ཀྱི་ཁྱད་ཆོས”ལྡན་པའི་ཞིང་ཞོར་ཐོན་རྫས་སྔར་བས་མང་བ་ཁྲོམ་རར་བཙོངས་པས་ཡུལ་དེའི་མང་ཚོགས་ཀྱི་འབབ་འཕར་ཕྱུག་འགྱུར་གྱི་སྒོ་མོ་འབྱེད་པའི“གསེར་གྱི་ལྡེ་མིག”ལྟ་བུར་གྱུར་ཡོད།

མཐའ་སྲུང་སེམས་ཤུཌ་ཉིན་བཞིན་ཆེ་རུ་ཕྱིན་པ།

འཚོ་བའི་ཆ་རྐྱེན་ལེགས་སུ་ཤུགས་ཆེན་ཕྱིན་པ་དེས། མཐའ་མཚམས་མང་ཚོགས་ཚོས་བླ་ན་མེད་པའི་རྒྱལ་ཁབ་ཀྱི་ས་ཆ་སྲུང་མཁན་དང་བདེ་སྐྱིད་ལྡན་པའི་ཁྱིམ་གཞིས་སྐྲུན་མཁན་ཞིག་བྱེད་པའི་ཡིད་ཆེས་ཆེ་རུ་དང་ཆོད་སེམས་བརྟན་དུ་ཕྱིན་ཡོད་པ་རེད།

གཏིང་སྐྱེས་རྫོང་འདྲེན་ཐང་གྲོང་རྡལ་གྱི་ས་སྐྱེས་རྡོ་སྐྱེས་ཀྱི་ཤར་པ་བ་སྤེན་པས་ཁོང་གི་མཐའ་མཚམས་སྐོར་གཡེང་སྐོར་གྱི་གཏམ་རྒྱུད་བརྗོད་སྐབས། ཕ་ཡུལ་ལ་དགའ་ཞེན་ཆེན་པོ་ཡོད་པ་མཚོན་གྱི་འདུག སྤེན་པ་དང་འདྲ་བར་འདྲེན་ཐང་གྲོང་རྡལ་གྱི་ཏང་ཡོན་འཕྲལ་རྒོལ་རུ་ཁག་གིས་དཀའ་ངལ་ཁྱད་བསད་བྱས་ནས་སྐོར་གཡེང་གི་ལམ་བུ་རེ་རེར་བསྐྱོད་པ་ནི་མི་དམངས་བདེ་འཇགས་ཀྱི་འགོག་སྲུང་འཛིང་རགས་ཤིག་གཏོད་ཆེད་དུ་རེད།

ས་བབ་སྨི་4500ཟིན་པའི་གཏིང་སྐྱེས་རྫོང་རི་འོག་གྲོང་རྡལ་དུ་ཏང་ཡོན་71གིས་རི་འོག་གྲོང་རྡལ་ཏང་ཨུད་ཀྱི་ཧྲུའུ་ཅིའི་གཞུང་དོན་ཁང་དུ་བསྐྱོད་དེ་མཛུབ་ཐེལ་བརྒྱབ་པའི“དམག་འཐབ་ལ་ཞུགས་ཆོག་པའི་ཞུ་ཡིག”གཉིས་ཕུལ་ནས་གསར་དུ་བཙུགས་པའི་རིམས་ནད་སྔོན་འགོག་དང་ཚོད་འཛིན་གྱི་བཅའ་སྡོད་ས་ཚིགས་སུ་རང་འགུལ་ངང་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ལ་ཞུགས་རྒྱུའི་རེ་བ་ཞུས་པ་རེད། ཁོ་ཚོས་བྱ་སྤྱོད་དངོས་ལ་བརྟེན་ནས་མཐའ་སྲུང་མཐའ་བརྟན་གྱི་སྙིང་སྟོབས་དང“ཏང་གི་འོད་ཟེར་མཐའ་མཚམས་ཕྱོགས་སུ་འཕྲོ། མཐའ་མཚམས་མི་དམངས་ཀྱི་བློ་ཁ་ཏང་ལ་ཕྱོགས”ཞེས་པའི་ཏང་གཅེས་རྒྱལ་གཅེས་ཀྱི་བརྩེ་སེམས་ཟབ་མོ་གང་ལེགས་མཚོན་པར་བྱས་ཡོད།

ཉིང་ཁྲི་གྲོང་ཁྱེར་མེ་ཏོག་རྫོང་འབྲས་སྤུངས་ཤང་དགྱེ་གླིང་གྲོང་ཚོའི་མང་ཚོགས་དང་བཅའ་སྡོད་དཔུང་སྡེའི་དབར་ལོ་ངོ་བཅུ་ཕྲག་ཁ་ཤས་རིང་ནང་མི་ལྟར་བརྩེ་བ་ཟབ་པས། བཅའ་སྡོད་དཔུང་སྡེའི་དཔོན་དམག་གིས་མཐའ་སྲུང་ལས་འགན་སྒྲུབ་སྐབས། དགྱེ་གླིང་གྲོང་ཚོའི་མང་ཚོགས་ཚོས་རང་འགུལ་ངང་དཔོན་དམག་ཚོར་མཁོ་སྤྲོད་སྐྱེལ་འདྲེན་བྱེད་རོགས་བྱེད་ཀྱི་ཡོད། གྲོང་ཚོར་དཀའ་ངལ་གང་ཞིག་འཕྲད་རུང་དཔུང་སྡེས་ཐབས་བརྒྱ་ཇུས་སྟོང་ངང་ཐག་གཅོད་བྱེད་རོགས་བྱས་ཏེ་བླ་ན་མེད་པའི་རྒྱལ་ཁབ་ཀྱི་ས་ཆ་ཐུན་མོང་ཐོག་སྲུང་བ་དང་མཛེས་སྡུག་ལྡན་པའི་ཁྱིམ་གཞིས་མཉམ་དུ་སྐྲུན་པའི་ལེའུ་གསར་པ་ཞིག་བརྩམས་ཡོད་པ་རེད།

ཏང་དང་སྲིད་གཞུང་ལ་བཅངས་པའི་བཀའ་དྲིན་དེ་མཐའ་སྲུང་མཐའ་བརྟན་གྱི་སེམས་ཤུགས་སུ་འགྱུར་བ་བྱས་ནས་བདེ་སྐྱིད་དང་མཛེས་སྡུག་ལྡན་པའི་འཚོ་བར་གཅེས་སྤྲས་ལྷག་པར་བྱ་རྒྱུ་དེ་དུས་རབས་གསར་པར་མཐའ་སྲུང་མཐའ་བརྟན་གྱི་རང་རྟོགས་ཀྱི་བྱ་སྤྱོད་ཅིག་ཏུ་འགྱུར་བ་བྱས་ཡོད། ད་ཆའི་བོད་འདི་ཉིད་མཐའ་མཚམས་བརྟན་ལྷིང་ཡོད་པ་དང་། མཐའ་མཚམས་མཛེས་སྡུག་ལྡན་པ། མང་ཚོགས་བདེ་ཞིང་སྐྱིད་པ་བཅས་ཡོད་པ་རེད།