ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་7ཉིན་གློག་འཕྲིན་འབྱོར་གསལ། ཚེས་7ཉིན་གྱི་ཕྱི་དྲོ། རྒྱལ་ཡོངས་སྲིད་གྲོས་སྐབས་བཅུ་གསུམ་པའི་ཚོགས་འདུ་ཐེངས་ལྔ་པས་བརྙན་ལམ་ཚོགས་འདུ་འཚོགས་པ་དང་། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ་རྒྱལ་ཡོངས་སྲིད་གྲོས་ཀྱི་ཀྲུའུ་ཞི་དབང་དབྱང་ཚོགས་འདུར་ཞུགས་པ། ཨུ་ཡོན་12ཀྱིས་ཚོགས་ཆེན་ཐོག་གཏམ་བཤད་གནང་བ། ཚོགས་འདུས་རྒྱལ་ཡོངས་ཀྱི་སྲིད་གྲོས་ལས་ཁུངས་སུ་ཚོགས་ར་གཙོ་བོ་དང་ཨུ་ཡོན་བཞུགས་གནས་སུ་ཡན་ལག་ཚོགས་ར་བཙུགས་ཡོད།

ཀྲུང་གུང་ཀྲུང་དབྱང་ཧྲུའུ་ཅི་ཁྲུའི་ཧྲུའུ་ཅི་ཀྲུང་དབྱང་འཐབ་ཕྱོགས་གཅིག་གྱུར་པུའི་པུའུ་ཀྲང་ཡིའུ་ཆོན་ཚོགས་འདུར་ཞུགས་ནས་གཏམ་བཤད་གསན་པ་རེད། རྒྱལ་སྲིད་སྤྱི་ཁྱབ་ཁང་གི་འབྲེལ་ཡོད་སྡེ་ཚན་དང་ཚན་པའི་འགན་འཁུར་བློ་མཐུན་གདན་ཞུས་ལྟར་དྲ་ཐོག་ནས་ཚོགས་འདུར་ཞུགས་པ་རེད།

ཨུ་ཡོན་ལི་ཏའོ་ཁུའེ་ཡིས་གཏམ་བཤད་གནང་སྐབས་གསུངས་དོན། མིག་སྔ་དང་སླད་ཕྱིན་དུས་སྐབས་ཤིག་རིང་རང་རྒྱལ་གྱི་འཕེལ་རྒྱས་དེ་སྔར་བཞིན་འཐབ་ཇུས་ཀྱི་གོ་སྐབས་གལ་ཆེན་གྱི་དུས་སྐབས་སུ་གནས་རྒྱུ་རེད། རྒྱལ་ཡོངས་ཀྱི་གཅིག་གྱུར་ཁྲོམ་ར་ཆེན་པོ་བཙུགས་ཏེ། ཁྲོམ་རའི་དཔལ་འབྱོར་གྱི་ནང་ངོས་འཕེལ་རྒྱས་ཆེན་པོ་སྔར་བས་འདོན་སྤེལ་བྱེད་པ་དང་། མི་ཤུགས་ཐོན་ཁུངས་སྲུང་སྐྱོང་དང་བེད་སྤྱོད་ཡག་པོ་བྱེད་པ། དཔལ་འབྱོར་ཡུན་རིང་འཕེལ་རྒྱས་ཀྱི་རྨང་གཞིའི་རང་བཞིན་གྱི་སྒུལ་ཤུགས་བརྟན་དུ་གཏོང་བ། ཚན་རྩལ་གསར་གཏོད་ལ་སྐུལ་འདེད་གཏོང་བ། རང་འགུལ་ངང་ཕྱི་ཕྱོགས་སུ་སྒོ་མོ་འབྱེད་པ། འཕེལ་རྒྱས་ཀྱི་འཐབ་ཇུས་གོ་སྐབས་དམ་འཛིན་བཅས་བྱས་ནས་ཀྲུང་གོའི་དཔལ་འབྱོར་འཕེལ་རྒྱས་ཀྱི་ངོ་མཚར་གསར་པ་སླར་ཡང་གཏོད་དགོས།

ཨུ་ཡོན་ཁྲེན་ཆུན་གྱིས་ཀྲུང་གོ་དམངས་གཙོ་མནའ་མཐུན་ཚོགས་པ་ཀྲུང་དབྱང་གི་ཚབ་ཞུས་ནས་གཏམ་བཤད་གནང་སྐབས་གསུངས་དོན། རང་རྒྱལ་གྱི་གྲོང་ཁྱེར་འཕེལ་རྒྱས་དེ་འཕར་སྣོན་རྒྱ་སྐྱེད་ནས་ནང་ངོས་འཕེལ་རྒྱས་ཀྱི་སྤུས་ཚད་མཐོར་གཏོང་ཕྱོགས་སུ་བསྒྱུར་ཡོད་པས། མི་ལྟེ་བར་འཛིན་པའི་རིན་ཐང་སྟོན་ཕྱོགས་མཐའ་འཁྱོངས་བྱས་ཏེ། སྤྱི་པའི་ཞབས་ཞུའི་སྤུས་ཚད་ཡག་ཏུ་གཏོང་བ་དང་དམངས་འཚོའི་ཁྱབ་ཁོངས་ཀྱི་ཞན་ཆ་སེལ་དགོས་པ་དང་། གྲོང་ཁྱེར་རྙིང་པ་མཐུན་སྦྱོར་གསར་སྒྱུར་ཡོང་རྒྱུར་སྐུལ་འདེད་བཏང་ནས་ལོ་རྒྱུས་རིག་གནས་སྲུང་སྐྱོབ་དང་རྒྱུན་འཛིན་བྱེད་དགོས། བྱེད་པོ་སྣ་ཚོགས་ཀྱིས་མཉམ་ལས་བྱས་ནས་མཉམ་སྐྲུན་མཉམ་སྤྱོད་ཀྱི་རྣམ་པ་ཆགས་རྒྱུར་སྐུལ་འདེད་གཏོང་དགོས། གྲོང་ཁྱེར་གྱི་སྤུས་ཀར་དོ་དམ་བྱེད་ཤུགས་ཆེ་རུ་གཏོང་བ་དང་གྲོང་ཁྱེར་གྱི་གཟུགས་པོར་བརྟག་དཔྱད་ཧུར་ཐག་བྱས་ནས་གྲོང་ཁྱེར་གསར་སྒྱུར་ལ་ཚན་རིག་དང་མཐུན་ཞིང་གོ་རིམ་ལྡན་པའི་སྒོ་ནས་སྐུལ་འདེད་གཏོང་དགོས།

ཨུ་ཡོན་ཀྲང་ཨེན་ཏིས་ཀྲི་ཀུང་ཏང་ཀྲུང་དབྱང་གི་ཚབ་ཞུས་ནས་གཏམ་བཤད་གནང་སྐབས་གསུངས་དོན། འཕེལ་རྒྱས་ཀྱི་རྣམ་པ་གསར་པ་གཏོད་པར་འཁོར་རྒྱུག་གཉིས་ཀྱི་ཚིགས་ཚེག་ནུས་པ་འདོན་སྤེལ་བྱས་ནས་རྒྱལ་ནང་གི་ཁྲོམ་ར་རྒྱ་སྟོབས་ཆེ་རུ་གཏོང་བ་དང་། ནུས་ལྡན་ངང་ནང་མཁོ་རྒྱ་ཆེར་ཤུགས་ཆེན་གཏོང་བ། གསར་གཏོད་སྦྲེལ་ཐག་དང་ཐོན་ལས་སྦྲེལ་ཐག་མཉམ་མཐུད་ལ་སྐུལ་འདེད་གཏོང་བ། ཐཱན་གཉིས་འཐབ་ཇུས་བརྟན་པོའི་ངང་ལག་བསྟར་བྱེད་པ། མི་སྣ་འགྲོ་འོང་དང་སྤེལ་རེས་ལ་སྐུལ་སྤེལ་གཏོང་བ་བཅས་བྱས་ནས་དཔལ་འབྱོར་སྤུས་ཚད་མཐོ་པོའི་སྒོ་ནས་འཕེལ་རྒྱས་འགྲོ་རྒྱུར་སྐུལ་འདེད་གཏོང་དགོས།

ཨུ་ཡོན་ཚའེ་ཝེ་ཡིས་ཞིང་བཟོ་ཏང་ཀྲུང་དབྱང་གི་ཚབ་ཞུས་ནས་གཏམ་བཤད་གནང་སྐབས་གསུངས་དོན། མིག་སྔར་སྲིད་གཞུང་དང་ཁྲོམ་རས“ཕྱོགས་གཉིས་ཀས་ཤུགས་རྒྱག་པའི”ལས་དོན་སྤེལ་ཏེ། སྨན་རྫས་དང་སྨན་བཅོས་ཡོ་བྱད་ཐོན་ལས་ཀྱི་སྒྱུར་བཅོས་དང་འཕེལ་རྒྱས་ལ་སྐུལ་འདེད་མགྱོགས་པོ་གཏོང་བ་དང་། ཐོན་ལས་ཀྱི་སྦྲེལ་ཐག་དང་མཁོ་སྤྲོད་འཁོར་འབྲེལ་ཆ་ཚང་པོ་རྒྱུན་འཁྱོངས་བྱེད་པ། གསར་གཏོད་བྱེད་ནུས་དང་། ལས་རིགས་ཀྱི་ལྟ་འདོམས་ཆུ་ཚད། ཐོན་ལས་གཅིག་སྡུད་བྱེད་ཚད་བཅས་ཆེ་རུ་གཏོང་བ། ཀྲུང་ལུགས་གསོ་རིག་སྨན་རྫས་ཐོན་ལས་དང་ཕྱི་ལུགས་གསོ་རིག་སྨན་རྫས་གཉིས་གལ་ཆེ་མཉམ་འཛིན་གྱིས་འཕེལ་རྒྱས་དང་ཟུང་འབྲེལ་དམ་ཚགས་ལ་སྐུལ་འདེད་གཏོང་བ། རྒྱལ་སྤྱིའི་མཉམ་ལས་ཐད་གཉིས་ཕན་གཉིས་ཁེར་སྐུལ་སྤེལ་གཏོང་བ་བཅས་བྱས་ནས། མི་དམངས་ཀྱི་བདེ་ཐང་འགན་སྲུང་བྱེད་རིང་གི་སྨན་རྫས་དང་སྨན་བཅོས་ཡོ་བྱད་ཐོན་ལས་ཀྱི་ནུས་པ་དེ་བས་ཆེན་པོ་ཐོན་པར་བྱེད་དགོས།

ཨུ་ཡོན་ཀའོ་ཧུང་ཅུན་གྱིས་ཏང་ཤོག་གང་ལའང་མི་གཏོགས་པའི་མི་སྣའི་རིགས་ཁོངས་ཀྱི་ཚབ་ཞུས་ནས་གཏམ་བཤད་གནང་སྐབས་གསུངས་དོན། ཚན་རྩལ་རྒྱལ་ཁབ་སྟོབས་ཆེན་དང་དེང་རབས་ཅན་གྱི་རྒྱལ་ཁབ་སྐྲུན་པར། ངེས་པར་དུ་ཚན་རིག་ཁྱབ་གདལ་གྱི་ཞན་ཆ་བསལ་ནས“ཚན་རིག་ཁྱབ་གདལ་གྱི་གཤོག་ཟུང”བརྟན་དུ་གཏོང་དགོས། ཚན་རིག་ཁྱབ་གདལ་བཅའ་ཁྲིམས་དང་དེའི་རྟ་སྒ་ཆ་སྒྲིག་གི་ལག་བསྟར་སྲིད་ཇུས་ལ་མགྱོགས་མྱུར་བཟོ་བཅོས་རྒྱག་པ་དང་། “ཚན་རིག་ཁྱབ་གདལ་གྱི་འཐབ་ཇུས་ཆེན་པོ”རྒྱལ་ཁབ་ཀྱི་འཐབ་ཇུས་སུ་གཏན་འཁེལ་བྱེད་པ། ཆུ་ཚད་མཐོ་བའི་ཚན་རིག་མཁས་ཅན་ཚོགས་པ་དང་ཚན་རྩལ་ཐོན་ཁུངས་ཕུན་སུམ་ཚོགས་པོ་གང་ལེགས་སྤྱོད་དེ་ཆུ་ཚད་མཐོ་བའི་ཚན་རིག་བྱང་ཚད་མཐོར་གཏོང་གི་བྱ་སྤྱོད་སྤེལ་དགོས།

ཨུ་ཡོན་ཡོན་ཝུན་གྱིས་གཏམ་བཤད་གནང་སྐབས་གསུངས་དོན། སྤྱི་ཚོགས་ཡོངས་སུ་དགེ་མཚན་ལྡན་པའི་རྒན་རྒོན་ལྟ་བ་ཧུར་ཐག་བཙུགས་ནས། རྒས་དུས་ལས་རྒྱུ་ཡོད་པར་སྤྱི་ཚོགས་ཀྱི་རྣམ་པ་ཡག་པོ་གཏོད་དགོས་པ་དང་། རྒན་རྒོན་སྤྱི་ཚོགས་ལ་ཞུགས་པར་ཧ་ལམ་ཤུགས་རྐྱེན་ཐེབས་སྲིད་པའི་འགོག་རྐྱེན་སེལ་དགོས། རྒན་རྒོན་དང་བླངས་ཞབས་ཞུར་ཞུགས་པར་རྒྱབ་སྐྱོར་བྱེད་པ་དང་འབྲེལ་སྐུལ་ལྕག་ཀྱང་བཏང་ནས་རྒན་རྒོན་གྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་ཆེ་རུ་གཏོང་དགོས།

ཨུ་ཡོན་ཆན་ཧྥུང་གིས་དགུ་གསུམ་ཤེས་རིག་སློབ་ཚོགས་ཀྲུང་དབྱང་གི་ཚབ་ཞུས་ནས་གཏམ་བཤད་གནང་སྐབས་གསུངས་དོན། ང་ཚོས་ཤེས་ལྡན་པ་དང་ལྷག་དོན་དུ་ན་གཞོན་ཚན་རྩལ་ཤེས་ལྡན་པ་སྐོམ་པ་ཆུ་འདོད་ལྟར་གྱི་རེ་བ་བྱེད་ཚད་ལོ་རྒྱུས་ཀྱི་དུས་སྐབས་གང་ཞིག་ལས་ཀྱང་ཆེ་བ་ཡོད། དེས་ན་བསླབ་པ་རྒན་གཞོན་དང་ལོ་ན་ཆེ་ཆུང་ལ་ལྟ་བ་ཡོངས་སུ་དོར་ཏེ། ན་གཞོན་ཤེས་ལྡན་པ་དེ་བས་མང་བར་ཚན་ཞིབ་ཀྱི་ལས་འགན་ལྗིད་པོ་འཁུར་དུ་འཇུག་དགོས་པ་དང་། ན་གཞོན་ཤེས་ལྡན་པ་དེ་བས་མང་བར་ཚན་རྩལ་གྱི་ཐོན་ཁུངས་སྤུས་ལེགས་བཀོད་སྒྲིག་བྱེད་དགོས། ནུས་ཤུགས་ཡོད་རྒུས་ཕུལ་བྱུང་གི་ན་གཞོན་ཚན་རྩལ་ཤེས་ལྡན་པ་འཁོར་རྒྱུག་བྱེད་པའི་ཚད་བཀག་བཏོར་ནས་འཚར་ལོངས་ཀྱི་ལམ་བུ་ཇེ་ཡངས་སུ་གཏོང་དགོས། ན་གཞོན་ཤེས་ལྡན་པའི་ཐོབ་ཐང་འགན་སྲུང་གི་སྲིད་ཇུས་སྔར་བས་སྒྱུར་བཅོས་དང་འཐུས་སྒོ་ཚང་དུ་བཏང་ནས་ཤེས་ལྡན་པ་ཤེས་རྟོགས་དང་། ཤེས་ལྡན་པར་གཅེས་སྐྱོང་། ཤེས་ལྡན་པར་བརྩི་བཀུར། ཤེས་ལྡན་པ་བེད་སྤྱོད་བཅས་ཀྱི་ཁོར་ཡུག་ཡག་པོ་ཞིག་སྐྲུན་དགོས།

ཨུ་ཡོན་ཕུའུ་ཀྲེན་པང་གིས་གུང་གཞོན་སྡེ་ཚོགས་རིགས་ཁོངས་ཀྱི་ཚབ་ཞུས་ནས་གཏམ་བཤད་གནང་སྐབས་གསུངས་དོན། ནུས་ཤུགས་དེ་བས་ཆེ་བ་བཏོན་ནས་བུ་བཙར་ལྕག་སྐུལ་དང་ལེགས་བཙའ་ལེགས་གསོར་སྐུལ་འདེད་གཏོང་དགོས་པ་དང་། བུ་བཙར་ལྕག་སྐུལ་བྱེད་པའི་བཅའ་ཁྲིམས་དང་སྲིད་ཇུས་ཀྱི་སྟོན་ཕྱོགས་གཏན་འཁེལ་བྱེད་དགོས། ཕྱོགས་ཡོངས་དང་གོ་རིམ་ཡོངས་ནས་བུ་བཙར་ལྕག་སྐུལ་བྱེད་པའི་རྟ་སྒ་ཆ་སྒྲིག་གི་སྲིད་ཇུས་ཧུར་ཐག་བཟོ་དགོས། སྐྱེད་མའི་ཁེ་དབང་དང་བུད་མེད་ཀྱི་ལས་ཞུགས་ཁེ་དབང་འགན་སྲུང་ཤུགས་ཆེན་བྱེད་དགོས། མི་འབོར་དོ་སྙོམས་དང་རྒྱུན་མཐུད་འཕེལ་རྒྱས་ལ་སྐུལ་འདེད་གཏོང་དགོས།

ཨུ་ཡོན་ཧྲེན་པིན་གྱིས་ཆོས་ལུགས་རིགས་ཁོངས་ཀྱི་ཚབ་ཞུས་ནས་གཏམ་བཤད་གནང་སྐབས་གསུངས་དོན། འདུལ་ཁྲིམས་དག་ཐེར་བྱས་ཚེ་གཞི་ནས་དད་སེམས་གཙང་མ་དང་ཡང་དག་ཅིག་ཆགས་ཐུབ་པ་དང་། ཆོས་སྲོལ་ལ་དག་ཐེར་ནན་པོ་བྱས་ཚེ་གཞི་ནས་གཟུགས་བརྙན་ཡག་པོ་གཏོད་ཐུབ། དེས་ན་རང་གིས་རང་ལ་སློབ་གསོ་གཏོང་ཤུགས་ཆེ་རུ་བཏང་སྟེ་རང་ངོས་དྭངས་གཙང་ཡོང་བར་བྱེད་དགོས་པ་དང་། རང་གིས་རང་ལ་དོ་དམ་བྱེད་ཤུགས་ཆེ་རུ་བཏང་སྟེ་ཁྲིམས་ལྟར་ཆོས་ལུགས་གཉེར་སྐྱོང་ལ་སྐུལ་འདེད་གཏོང་དགོས། རང་གིས་རང་ལ་གཅུན་འདོམས་བྱེད་ཤུགས་ཆེ་རུ་གཏོང་བ་དང་། རང་འགུལ་ངང་བྱས་རྗེས་འཇོག་པ། རང་རྒྱལ་གྱི་ཆོས་ལུགས་ཀྲུང་གོ་ཅན་ལ་སྐུལ་འདེད་གཏིང་ཟབ་གཏོང་བ། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་སྤྱི་ཚོགས་དང་དེ་བས་འཚམ་མཐུན་ཡག་པོ་ཡོང་བ་བཅས་བྱས་ཏེ། རང་རྒྱལ་ཆོས་ལུགས་ཀྱི་སྐྱོན་བྲལ་རྒྱུན་འཛིན་ལ་སྐུལ་འདེད་གཏོང་དགོས།

ཨུ་ཡོན་ལེའོ་ཙེ་ཡུན་གྱིས་གཏམ་བཤད་གནང་སྐབས་གསུངས་དོན། ཧོང་ཆིན་དང་། ཀོང་ཏུང། ཨའོ་མོན་གསུམ་གྱི་མཉམ་ལས་གཏིང་ཟབ་ཁུལ་བསྐྲུན་པ་དེས་ཨའོ་མོན་གྱིས“རྒྱལ་ཁབ་གཅིག་ལ་ལམ་ལུགས་གཉིས”བརྟན་པོའི་ངང་ལག་ལེན་བསྟར་བར་བར་མཐོངས་གསར་པ་བཏོད་ཡོད་ལ་སྒུལ་ནུས་གསར་པའང་བསྣན་ཡོད། “ཨའོ་མོན་གྱི་དཔལ་འབྱོར་སྣ་མང་འཕེལ་རྒྱས་འོས་འཚམ་གཏོང་བར་སྐུལ་འདེད་གཏོང་བའི”གཙོ་རྐང་ལ་དམིགས་ནས་རྣམ་པ་གསར་པ་བཏོད་དེ། མ་དངུལ་བཏང་ནས་ལས་རིགས་དར་རྒྱས་གཏོང་བ་དང་སྤྱི་ཚོགས་ཀྱི་ཐོན་ཁུངས་ཕྱོགས་བསྡུས་ལ་སྐུལ་འདེད་གཏོང་དགོས། སྔོན་ཐོན་གྱི་དོ་དམ་འདུ་ཤེས་དཔྱད་གཞིར་བཟུང་སྟེ་སྤུས་ཚད་མཐོ་བའི་དམངས་འཚོའི་ཞབས་ཞུར་བརྟེན་ནས་རྒྱལ་ཁབ་ཕྱི་ནང་གི་ཕུལ་བྱུང་ཤེས་ལྡན་པ་རྒྱ་ཁྱབ་ངང་བསྡུ་དགོས། ལེགས་ཆ་ཡག་པོ་བཏོན་ཏེ། “རྒྱལ་ཁབ་གཅིག་ལ་ལམ་ལུགས་གཉིས”ཀྱི་ལག་ལེན་འཚོལ་ཞིབ་བྱེད་པའི་ལེའུ་གསར་པ་རྩོམ་དགོས།

ཨུ་ཡོན་ཀའོ་ཧྥུང་གིས་ཀྲུང་གོ་དམངས་གཙོ་རྒྱལ་འཛུགས་ཚོགས་པ་ཀྲུང་དབྱང་གི་ཚབ་ཞུས་ཏེ་གཏམ་བཤད་གནང་སྐབས་གསུངས་དོན། རང་མོས་ཚོང་དོན་ཚོད་ལྟ་ཁུལ་གྱིས་རང་མོས་ཚོང་དོན་ལ་སྐུལ་འདེད་གཏོང་བ་དང་ཕྱི་ཕྱོགས་སུ་སྒོ་མོ་འབྱེད་རྒྱ་ཆེ་རུ་གཏོང་བ་སོགས་ཀྱི་ཐད་གཞན་གྱིས་ཚབ་བྱེད་ཐབས་བྲལ་བའི་ནུས་པ་གལ་ཆེན་བཏོན་དང་འདོན་བཞིན་ཡོད། རྩེ་རིམ་ཇུས་འགོད་ལ་ཤུགས་སྣོན་རྒྱག་པ་དང་ཁུལ་ཁོངས་ཀྱི་ལེགས་ཆ་འདོན་པ་ཟུང་འབྲེལ་བྱས་ཏེ། རྒྱལ་ཁབ་ལ་ཞབས་འདེགས་ཞུ་བའི་འཐབ་ཇུས་ནུས་པ་ཆེ་རུ་གཏོང་དགོས་པ་དང་། རང་མོས་ཚོང་དོན་ཚོད་ལྟ་ཁུལ་གྱི་ལམ་ལུགས་གསར་གཏོད་ཀྱི་སྣེ་འདྲེན་ནུས་པ་བཏོན་ནས། རྒྱལ་ཡོངས་ཀྱི་གཅིག་གྱུར་ཁྲོམ་རའི་ལམ་ལུགས་འཛུགས་སྐྱོང་ལ་སྐུལ་འདེད་གཏོང་དགོས། རང་མོས་ཚོང་དོན་ཚོད་ལྟ་ཁུལ་གྱི་སྒྲིག་སྲོལ་ལམ་སྲོལ་སྒྱུར་བཅོས་དང་གསར་གཏོད་ཟབ་ཏུ་བཏང་སྟེ། ལམ་ལུགས་ཅན་གྱི་སྒོ་དབྱེར་སྐུལ་འདེད་དང་རང་མོས་ཚོང་དོན་ཚོད་ལྟ་ཁུལ་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས།

ཨུ་ཡོན་ཀྲང་མིན་གྱིས་གཏམ་བཤད་གནང་སྐབས་གསུངས་དོན། གུང་ཁྲན་ཏང་མེད་ན་ཀྲུང་གོ་གསར་པ་མེད་ལ་པུའུ་ལང་རིགས་ཀྱི་ད་ཆ་ཡང་མེད། གུང་ཁྲན་ཏང་གི་རྗེས་སུ་འབྲངས་ནས་ཀྲུང་ཧྭ་མི་རིགས་ཀྱི་ཐུན་མོང་ཁྱིམ་གཞིས་སྐྲུན་པ་ནི་བདེ་སྐྱིད་འཚོ་བ་མངོན་འགྱུར་ཡོང་བའི་གདམ་ག་ཡང་དག་ཉག་གཅིག་རེད། མི་རིགས་མཐུན་སྒྲིལ་གྱི་དམ་ཚིག་བརྟན་སྲུང་གིས་ཀྲུང་ཧྭ་མི་རིགས་ཁྱིམ་ཚང་ཆེན་པོར་སེ་འབྲུའི་རྡོག་ལྟར་གོང་བུ་གཅིག་ཏུ་བསྒྲིལ་ཏེ། ཡིད་ཆེས་ཀྱིས་ཁེངས་བཞིན་དུ་ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་དེ་བས་མཛེས་སྡུག་ལྡན་པའི་འབྱུང་འགྱུར་ཕྱོགས་སུ་མཉམ་དུ་སྐྱོད་དགོས།