ཤིན་ཧྭ་གསར་འགྱུར་ཁང་ཀོང་ཀྲོའུ་ནས་གློག་འཕྲིན་འབྱོར་གསལ། 2021ལོའི་ཟླ་7པར། རྒྱལ་ཁབ་ཀྲུང་ལུགས་གསོ་རིག་སྨན་རྫས་དོ་དམ་ཅུས་ཀྱི་སྲིད་གྲོས་ཀྱི་གྲོས་གཞིའི་ཡིག་ལན་ཞིག་རྒྱལ་ཡོངས་སྲིད་གྲོས་ཀྱི་ཨུ་ཡོན་ཀོང་ཏུང་ཞིང་ཆེན་ཀྲུང་ལུགས་གསོ་རིག་སྨན་ཁང་གི་ཡོན་ཀྲང་གཞོན་པ་ལུའུ་ཁྲོན་ཅན་གྱི་ལག་ཏུ་འབྱོར།
“ངའི་གྲོས་གཞིའི་ནང་གི་གྲོས་འགོ་འགའ་ཞིག་ལ་ཡིག་ལན་ནང་སྒྲུབ་གཉེར་གྱི་ཐབས་ཇུས་ཡག་པོ་འདུག”ཅེས་ལུའུ་ཁྲོན་ཅན་གྱིས་གསུངས་པ་དང་། འགན་འཁྲི་འཁུར་ཚུན། ལས་རིགས་འཐབ་ཕྱོགས་དང་པོ་ནས་བྱུང་བའི་ཁོང་གི་གྲོས་འགོ་མང་པོ་དང་ལེན་བྱས་པས། ཀྲུང་ལུགས་གསོ་རིག་སྨན་རྫས་འཕེལ་རྒྱས་ཀྱི་མདུན་ལམ་ཐད་ཁོང་ལ་ཡིད་ཆེས་ཀྱིས་ཁེངས།
ལུའུ་ཁྲོན་ཅན་ནི་ཀྲུང་ལུགས་གསོ་རིག་པགས་ནད་ཚན་ཁག་གི་རིགས་གཅིག་མཁས་ཅན་ཞིག་ཡིན་ཞིང་། སྨན་པ་བྱས་ནས་ལོ་30ལྷག་ཙམ་སོང་ཚུན། ཁོང་གིས་དུས་ཡུན་རིང་པོར་ནད་ཐོག་འཐབ་ཕྱོགས་དང་པོར་ཕྱག་ལས་གནང་ནས་ནད་པར་ཞབས་འདེགས་ཧུར་ཐག་ཞུས་པ་དང་དུས་མཚུངས། ཀྲུང་ལུགས་གསོ་རིག་སྨན་རྫས་བྱ་གཞག་རྒྱུན་ཆད་མེད་པར་འཕེལ་རྒྱས་ཕྱིན་པའི་དཔང་པོའང་གནང་ཡོད། 2018ལོར་ཁོང་རྒྱལ་ཡོངས་སྲིད་གྲོས་ཀྱི་ཨུ་ཡོན་ལ་གྱུར་ནས་སྲིད་དོན་ཇུས་འབུལ་གྱི་འགན་འཁྲི་ཁུར་བ་རེད།
2021ལོའི་ཟླ་1ཚེས་22ཉིན། རྒྱལ་སྲིད་སྤྱི་ཁྱབ་ཁང་གཞུང་དོན་ཐིང་གིས《ཀྲུང་ལུགས་གསོ་རིག་སྨན་རྫས་ཀྱི་ཁྱད་ལྡན་འཕེལ་རྒྱས་མགྱོགས་སུ་གཏོང་རྒྱུའི་སྐོར་གྱི་སྲིད་ཇུས་ཀྱི་བྱ་ཐབས་འགའ་ཞིག》བཀྲམ་ཞིང་། ཡིག་ཆའི་ནང་ཀྲུང་ལུགས་གསོ་རིག་སྨན་རྫས་ལ་སྔར་བཞིན་སྤུས་ཚད་མཐོ་བའི་འཕེལ་རྒྱས་ལ་མཁོ་སྤྲོད་མི་འདང་བ་དང་། ཤེས་ལྡན་མི་སྣའི་བསྡོམས་འབོར་མི་འདང་བ། གསར་གཏོད་མ་ལག་འཐུས་སྒོ་ཚང་པོ་མེད་པ། འཕེལ་རྒྱས་ཀྱི་ཁྱད་ཆོས་མངོན་གསལ་དོད་པོ་མེད་པ་སོགས་ཀྱི་གནད་དོན་ངེས་ཅན་ཡོད་པར་དམིགས་ཏེ་བྱ་ཐབས་ཁག་28བཏོན་ཡོད་པ་དང་། ཀྲུང་ལུགས་གསོ་རིག་སྨན་རྫས་ཀྱི་ཁྱད་ཆོས་དང་དགེ་མཚན་ཆེ་རིགས་འདོན་སྤེལ་བྱས་ནས་ཀྲུང་ལུགས་གསོ་རིག་སྨན་རྫས་དང་ཕྱི་ལུགས་གསོ་རིག་སྨན་རྫས་ཕན་ཚུན་གསབ་སྣོན་དང་མཐུན་སྦྱོར་འཕེལ་རྒྱས་འགྲོ་བར་སྐུལ་འདེད་བཏང་ཡོད་པ་རེད།
ལུའུ་ཁྲོན་ཅན་གྱིས་ཚོར་སྣང་སྐྱེན་པོའི་ངང་སྲིད་ཇུས་དེར་དོ་སྣང་བྱུང་ཞིང་། འབྲེལ་ཡོད་བྱ་ཐབས་ཀྱིས་དུས་ཡུན་རིང་པོའི་ནང་ཀྲུང་ལུགས་གསོ་རིག་འཕེལ་རྒྱས་ལ་ཚོད་འཛིན་བཟོ་བའི་འཇུར་མིག་གི་གནད་དོན་ཐག་གཅོད་ཐུབ་བཟོ་ཡོད་པས་གོ་སྐབས་འདི་དམ་འཛིན་བྱས་ནས་ཀྲུང་ལུགས་གསོ་རིག་སྨན་རྫས་མཆོང་སྐྱོད་ལྟ་བུའི་འཕེལ་རྒྱས་ལ་སྐུལ་འདེད་གཏོང་དགོས་པའི་མྱོང་ཚོར་བྱུང་བ་རེད།
“དེ་དང་དུས་མཚུངས་ང་ཚོས་ཀྱང་བྱ་ཐབས་འདི་དག་དོན་འཁྱོལ་བྱེད་པར་དཀའ་ངལ་ཡོད་པ་ཤེས་དགོས”ཞེས་ཁོང་གིས་བརྗོད་པ་དང་། ཁོང་གིས“བྱ་ཐབས་ཁག་28ལག་བསྟར་དོན་འཁྱོལ་བྱེད་རྒྱུ་གོ་སྐབས་སུ་བཟུང་ནས་ཀྲུང་ལུགས་གསོ་རིག་སྨན་རྫས་མཆོང་སྐྱོད་ལྟ་བུའི་འཕེལ་རྒྱས་འགྲོ་བར་རམ་འདེགས་བྱེད་དགོས་པའི”གྲོས་འགོ་བཏོན་ནས། འགན་ནུས་སྡེ་ཚན་ཁག་གིས་གཡས་གཡོན་མཉམ་འགུལ་བྱས་ནས་ལག་བསྟར་ཇུས་གཞི་གང་མགྱོགས་འདོན་དགོས་པ་དང་དུས་མཚུངས། ཀྲུང་ལུགས་གསོ་རིག་སྨན་རྫས་ཀྱི་རིག་གཞུང་དང་ཞིབ་འཇུག་གི་རང་ངོས་ཆོས་ཉིད་གཞིར་བཟུང་། ཤེས་ལྡན་མི་སྣ་དང་ཚན་རྩལ་གྱི་གྲུབ་འབྲས་སོགས་ལ་དཔྱད་ཞིབ་དང་གདེང་འཇོག་བྱེད་དགོས་པའི་གྲོས་འགོ་བཏོན་གནང་བ་རེད།
ཟླ་བ་གཅིག་ལྷག་ཙམ་སོང་རྗེས་ཁོང་པེ་ཅིང་དུ་2021ལོའི་རྒྱལ་ཡོངས་ཀྱི་ཚོགས་འདུ་གཉིས་ལ་ཞུགས་པར་ཕེབས་ནས་རྒྱལ་ཡོངས་སྲིད་གྲོས་སྐབས་བཅུ་གསུམ་པའི་ཚོགས་འདུ་ཐེངས་བཞི་པར་གྲོས་གཞི་དེ་ཕུལ་བ་རེད། གྲོས་གཞི་དེ་རྒྱལ་ཡོངས་སྲིད་གྲོས་ཀྱི་2021ལོ་འཁོར་གྱི་གྲོས་གཞི་ཡག་ཤོས་ཀྱི་གྲས་སུ་ཚུད་པ་དང་སྦྲགས། “ཀྲུང་ལུགས་གསོ་རིག་སྨན་རྫས་ཀྱི་ཐོན་ཁུངས་སྔོག་འདོན་དང་སྲུང་སྐྱོང་བྱེད་ཤུགས་ཆེ་རུ་གཏོང་བའི”གཙོ་གནད་སྒྲུབ་སྐུལ་གྲོས་གཞིའི་གྲུབ་ཆ་གལ་ཆེན་གྱི་གྲས་སུ་བཅུག་པ་རེད།
ཀྲུང་ལུགས་གསོ་རིག་སྨན་རྫས་ཀྱི་ནད་ཐོག་དང་ཚན་ཞིབ་ལས་དོན་ལོ་མང་སྤེལ་རིང་རང་རྒྱལ་གྱི་ཀྲུང་ལུགས་གསོ་རིག་སྨན་རྫས་གསར་པར་དཔྱད་བཤེར་ཞིབ་མཆན་འགོད་པའི་ལམ་ལུགས་ལ་སྔར་བཞིན་དཀའ་གནད་ཡོད་པ་ལུའུ་ཁྲོན་ཅན་གྱིས་ཚོར་ཞིང་། ལས་རིགས་ཀྱི་འཇུར་མིག་གནད་དོན་དང་གྲོས་བསྡུར་ཐག་གཅོད་ཀྱི་བྱ་ཐབས་སྟངས་འཛིན་ཡང་དག་བྱ་ཆེད། ལུའུ་ཁྲོན་ཅན་གྱིས་སྨན་ཁང་དང་ཁེ་ལས་མང་པོར་འཚམས་འདྲིར་བསྐྱོད་དེ་འཐབ་ཕྱོགས་དང་པོའི་རེ་བ་ཤེས་རྟོགས་བྱས་ཏེ། ལོ་4བསྟུད་མར་ཀྲུང་ལུགས་སྨན་རྫས་གསར་པའི་དཔྱད་བཤེར་ཞིབ་མཆན་འགོད་པའི་ལམ་ལུགས་སྒྱུར་བཅོས་ལ་ཐབས་དང་ཇུས་ཧུར་ཐག་བཏོན་ནས“ཀྲུང་ལུགས་སྨན་རྫས་ཀྱི་ཁྱད་ཆོས་དང་འཚམ་པའི་ཐོ་འགོད་དོ་དམ་ལམ་ལུགས་དང་ལག་རྩལ་གདེང་འཇོག་མ་ལག་འཐུས་སྒོ་ཚང་དུ་གཏོང་བ”སོགས་ཀྱི་གྲོས་གཞི་བཏོན་ནས་འབྲེལ་ཡོད་ལས་དོན་སྤེལ་ལེགས་སུ་དང་འཐུས་སྒོ་ཚང་དུ་གཏོང་རྒྱུར་སྐུལ་འདེད་བཏང་གནང་བ་རེད།
དེ་དང་ཆབས་ཅིག པགས་ནད་ཚན་ཁག་གི་སྨན་པ་ཞིག་ཡིན་པའི་ངོས་ནས་ལུའུ་ཁྲོན་ཅན་གྱིས་ནད་པ་ཚོགས་སྤྱིའི་དམངས་འཚོའི་ཐད་ཀྱི་དཀའ་ངལ་ལ་མྱོང་ཚོར་ཟབ་མོ་བྱུང་ཞིང་། ཁོང་གིས་དམིགས་བསལ་པགས་ནད་དང་ཤ་བཀྲ་སོགས་ཀྱི་གཅོང་ནད་པགས་ནད་ཕོག་པའི་ནད་པ་མང་པོར་སྨན་བཅོས་འགྲོ་གྲོན་གྱི་ཁུར་པོ་ལྕི་བ་སོགས་ཀྱི་དཀའ་ངལ་ཡོད་པས། རྒྱལ་ཁབ་དང་སྤྱི་ཚོཌ་ཀྱིས་དོ་ཁུར་བྱེད་དགོས་ཀྱི་ཡོད་པ་མཐོང་ཞིང་། དེ་ཡང་ཁོང་གིས་ཉེ་བའི་ལོ་ཤས་རིང་སྐུལ་འདེད་ཤུགས་ཆེན་གཏོང་བའི་ལས་ཀའི་གྲས་ཤིག་རེད།
ཁོང་གི་རྒྱུན་མཐུད་འབོད་སྐུལ་འོག་གཅོང་ནད་པགས་ནད་བཅོས་པའི་སྨན་རྫས་དེ་བས་མང་བ་རྒྱལ་ཁབ་ཀྱི་སྨན་བཅོས་འགན་བཅོལ་སྨན་རྫས་ཀྱི་མིང་གཞུང་ནང་ཚུད་པ་དང་། ལྷག་པར་དུ་ནད་པར་དགོས་མཁོ་ཆེ་བའི་དམིགས་བསལ་སྨན་རྫས་གསར་པ་རྒྱུན་ཆད་མེད་པར་མང་དུ་གཏོང་བཞིན་ཡོད། ལུའུ་ཁྲོན་ཅན་གྱིས་དམིགས་བསལ་པགས་ནད་སོགས་ཀྱི་གཅོང་ནད་པགས་ནད་ཕོག་པའི་ནད་པའི་སྨན་བཅོས་གནས་ཚུལ་ལེགས་སུ་ཤུགས་ཆེན་ཕྱིན་ནས་ནད་པའི་སྨན་བཅོས་མ་གནས་དམའ་རུ་ཕྱིན་པས། ནད་པའི་འཚོ་བའི་སྤུས་ཚད་ལེགས་སུ་ཤུགས་ཆེན་ཕྱིན་ཡོད་ཅེས་གསུངས་པ་རེད།
མིག་སྔར་གཡོད་ཀང་ཨའོ་ཁུག་ཆེན་ཁུལ་འཛུགས་སྐྲུན་ལ་རྒྱུན་མཐུད་སྐུལ་འདེད་གཏོང་བཞིན་ཡོད་པས། ཀོང་ཏུང་ལྷོ་རྒྱུད་དུ་གཞིས་ཆགས་པའི་ལུའུ་ཁྲོན་ཅན་ལ་གཡོད་ཀང་ཨའོ་གསུམ་གྱི་ཀྲུང་ལུགས་གསོ་རིག་སྨན་རྫས་མཉམ་ལས་ལ་ཐོབ་དཀའ་བའི་གོ་སྐབས་བྱུང་བའི་མྱོང་ཚོར་ཟབ་མོ་བྱུང་ཡོད།
འདི་ལོ་ལུའུ་ཁྲོན་ཅན་གྱིས་ཧེང་ཆིན་གཡོད་ཨའོ་མཉམ་ལས་གཏིང་ཟབ་ཁུལ་གྱི་ཀྲུང་ལུགས་གསོ་རིག་སྨན་རྫས་ཐོན་ལས་འཕེལ་རྒྱས་ཀྱི་མཐོ་ས་བསྐྲུན་རྒྱུའི་སྐོར་གྱི་གྲོས་གཞི་ཞིག་གྲ་སྒྲིག་གནང་ཞིང་། ཁོང་གིས་ཀྲུང་ལུགས་གསོ་རིག་ཐོན་ལས་ཅན་དང་། དེང་རབས་ཅན། རྒྱལ་སྤྱི་ཅན་བཅས་ཀྱི་འཕེལ་རྒྱས་ཁྲོད་ཀོང་ཏུང་ལ་ལེགས་ཆ་ལྡན་ཡོད་པ་དང་། གཡོད་ཨའོ་ཡི་ཀྲུང་ལུགས་གསོ་རིག་སྨན་རྫས་ཐོན་ལས་འཕེལ་རྒྱས་ལ་ཐུན་མོང་མ་ཡིན་པའི་མཉམ་ལས་ཀྱི་རྨང་གཞི་ལྡན་ཡོད། ཁུག་ཆེན་ཁུལ་གྱི་ཀྲུང་ལུགས་གསོ་རིག་སྨན་རྫས་མཉམ་ལས་ཐད་གོ་སྐབས་དམ་འཛིན་དང་སྲིད་ཇུས་བེད་སྤྱོད་ཡག་པོ་བྱས་ཏེ་དུས་བབ་དང་བསྟུན་ནས་འཕེལ་རྒྱས་མགྱོགས་སུ་གཏོང་དགོས་ཞེས་གསུངས་པ་རེད།