ལྷ་ས་གྲོང་ཁྱེར་ཁྲེང་ཀོན་ཆུས་ཝ་པ་གླིང་སྡེ་ཁུལ་གྱི་མི་རིགས་མཐུན་སྒྲིལ་སྒོ་ར་ཆེན་པོའི་ནང་སྡོད་མཁན་དབྱི་སི་མ་དབྱི་དང་ཨ་སྨི་ནེ་རྒན་རྒོན་གཉིས་ལ་བུ་ཕྲུག་མེད་ཀྱང་བོད་རིགས་དང་ཧུའེ་རིགས་གཉེན་སྒྲིག་ལས་གྲུབ་པའི་ཁྱིམ་ཚང་དེ་ནི་གྲོང་པ་ཁྱིམ་མཚེས་ཀྱིས་ཡིད་སྨོན་བྱེད་པའི་དཔེ་མཚོན་ཁྱིམ་ཚང་ཞིག་རེད།
འདི་ལོའི་བོད་ཆུ་སྟག་ལོའི་ལོ་གསར་རྒྱལ་ཡོངས་ཀྱི་ཚོགས་འདུ་གཉིས་དང་ཏག་ཏག་འཁེལ་བས་མི་རིགས་མཐུན་སྒྲིལ་གྱི་སྒོ་ར་ཆེ་མོའི་ནང་ལོ་གསར་གྱི་རྣམ་པ་ཧ་ཅང་འཁྲུག་ཆ་དོད། ཏང་ཡོན་རྒན་གྲས་ཤིག་ཡིན་པའི་དབྱི་སི་མ་དབྱི་ནི་ཝ་པ་གླིང་སྡེ་ཁུལ་གྱིས་བདམས་པའི“གཉིས་ལྡན་དུད་སྦྲེལ”གྱི་དུད་སྦྲེལ་སྤྱི་མི་162ཀྱི་གྲས་ཤིག་རེད།
ཀྲུང་ཧྭ་མི་རིགས་ཁྱིམ་ཚང་གཅིག ཀྲུང་གོའི་ཕུགས་འདུན་མཉམ་དུ་གཏོད། དེ་ནི་དུས་རབས་གསར་པའི་རང་རྒྱལ་གྱི་མི་རིགས་མཐུན་སྒྲིལ་ཡར་ཐོན་བྱ་གཞག་གི་གསོན་ཉམས་དོད་པའི་མཚོན་ཚུལ་ཞིག་ཡིན་ལ། དུས་རབས་གསར་པའི་མི་རིགས་ལས་དོན་གསར་གཏོད་ལ་སྐུལ་འདེད་གཏོང་བའི་ཁྱད་ཆོས་མངོན་གསལ་དོད་པ་ཞིག་ཀྱང་རེད། ཉེ་བའི་ལོ་ཤས་རིང་རང་ལྗོངས་ཀྱིས་ཏང་གི་མི་རིགས་སྲིད་ཇུས་ཁྱོན་ཡོངས་ནས་ལག་བསྟར་བྱས་ཏེ་མི་རིགས་ཁག་གིས་ཐུན་མོང་ཐོག་མཐུན་སྒྲིལ་འབད་འཐབ་དང་ཐུན་མོང་ཐོག་དར་རྒྱས་གོང་འཕེལ་གཏོང་བའི་བརྗོད་བྱ་གཙོ་བོ་སྟངས་འཛིན་ནན་པོ་བྱས་ནས“ཁ་འབྲལ་ཐབས་མེད་པ་གསུམ”གྱི་བསམ་བློ་བརྟན་པོ་བཙུགས་ཏེ་མི་རིགས་ཁག་དབར་ཕན་ཚུན་རྒྱུས་མངའ་དང་། ཕན་ཚུན་བརྩི་འཇོག ཕན་ཚུན་བསྟུན་མཁས། ཕན་ཚུན་མྱོང་རོལ། ཕན་ཚུན་སློབ་སྦྱོང་། ཕན་ཚུན་རོགས་རམ་བཅས་བྱས་ཏེ་སེ་འབྲུའི་རྡོག་ལྟར་གོང་བུ་གཅིག་ཏུ་བསྒྲིལ་ཡོད་པ་རེད།
གཞིས་རྩེ་གྲོང་ཁྱེར་སྲིད་གྲོས་ཏང་ཙུའི་ཧྲུའུ་ཅི་གཞོན་པ་ཀྲུའུ་ཞི་གཞོན་པ་བསོད་ནམས་གྲགས་པས“‘སྣ་མང་གཞི་གཅིག’གི་ཀྲུང་ཧྭའི་མི་རིགས་རིག་གནས་ལ་ངོས་འཛིན་གཅིག་མཐུན་ཡོང་བར་སྐུལ་འདེད་ཧུར་ཐག་བཏང་སྟེ་མི་རིགས་མཐུན་སྒྲིལ་གྱི་མཐུན་ཆ་ཆེ་ཤོས་དང་ཀུན་སེམས་གཅིག་མཐུན་ཆེ་ཤོས་གཏོད་དགོས་ཞེས་གསུངས་པ་རེད།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་དབྱང་གི་མི་རིགས་ལས་དོན་ཚོགས་འདུའི་ཐོག“ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་བརྟན་པོ་འཛུགས་རྒྱུ་ནི་དུས་རབས་གསར་པའི་ཏང་གི་མི་རིགས་ལས་དོན་གྱི‘རྩ་བ’ཡིན་པས་ལས་དོན་ཚང་མ་དེར་དམིགས་དགོས”ཞེས་ནན་བཤད་གནང་བ་རེད།
འདི་ལོའི་རང་སྐྱོང་ལྗོངས་ཀྱི་ཚོགས་འདུ་གཉིས་རིང་རང་སྐྱོང་ལྗོངས་སྲིད་གྲོས་ཀྱི་ཨུ་ཡོན་དང་། རང་སྐྱོང་ལྗོངས་སྲིད་གྲོས་ཀྱི་རིག་གནས་དང་ལོ་རྒྱུས་སློབ་སྦྱོང་ཨུ་ལྷན་གྱི་ཀྲུའུ་རེན་གཞོན་པ། ཆབ་མདོ་གྲོང་ཁྱེར་སྲིད་གྲོས་ཀྱི་ཀྲུའུ་ཞི་གཞོན་པ་བཅས་ཡིན་པའི་ཐུབ་དགའ་ཡིས་ཆབ་མདོའི་ལོ་རྒྱུས་ཐོག་ཐོན་པའི་མི་རིགས་ཁག་དབར་ཕན་ཚུན་འགྲོ་འོང་དང་། སྤེལ་རེས། མཉམ་འདྲེས་བཅས་ཇི་བཞིན་མཚོན་པའི་གཏམ་རྒྱུད་འགའ་གསུངས་པ་མ་ཟད་སླད་ཕྱིན་སྐོར་ལའང་སོ་སོའི་བསམ་ཚུལ་གསུངས་ཡོད།
རང་སྐྱོང་ལྗོངས་ཡིག་གཟུགས་མཁས་ཅན་མཐུན་ཚོགས་ཀྱི་ཀྲུའུ་ཞི་གཞོན་པ་ལྷ་ས་གྲོང་ཁྱེར་རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས་རྩོམ་སྒྲིག་པུའི་ཀྲུའུ་རེན་རྣམ་རྒྱལ་དབང་གྲགས་ཀྱིས “ལོ་མང་རིང་གི་བོད་ཡིག་ཡིག་གཟུགས་ཀྱི་ལག་ལེན་ལས་མི་རིགས་ཁག་མཐུན་སྒྲིལ་མཉམ་འདྲེས་དང་སྣ་མང་གཅིག་བསྡུས་བྱུང་བ་ནི་མི་རིཌ་ཁག་གི་རིག་གནས་ཐད་ཕན་ཚུན་བསྡུ་ལེན་གསོག་འཇོག་དང་། དཔལ་འབྱོར་ཐད་གཅིག་ལ་གཅིག་བརྟེན། བརྩེ་སེམས་ཐད་ཕན་ཚུན་སྙིང་ཉེ་བ་བཅས་ལས་བྱུང་ལ་ཀྲུང་ཧྭ་མི་རིགས་ཀྱིས་མཐུན་སྒྲིལ་དང་གཅིག་གྱུར་དོན་གཉེར་བྱེད་པའི་ནང་གནས་སྒུལ་ཤུགས་ལས་ཀྱང་བྱུང་བ་ང་ལ་མྱོང་ཚོར་ཟབ་མོ་བྱུང་། འདི་ནི་ཀྲུང་ཧྭའི་ཤེས་དཔལ་ལ་ལོ་རྒྱུས་ཡུན་རིང་ལྡན་ནས་རྩ་བ་ཟབ་ཅིང་ལོ་འདབ་སྟུག་པོ་རྒྱས་པའི་རྒྱུ་རྐྱེན་ཡང་རེད”ཅེས་གསུངས་པ་རེད།
2021ལོའི་ཟླ་7པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་སྐུ་ངོ་མ་བོད་དུ་གཟིགས་ཞིབ་དང་མཛུབ་ཁྲིད་གནང་བར་ཕེབས་ནས་ལྗོངས་ཡོངས་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ལ་ཏང་ཀྲུང་དབྱང་གི་བྱམས་བརྩེའི་ཐུགས་ཁུར་གནང་བ་དང“མཛེས་སྡུག་ལྡན་པའི་བོད་ལྗོངས་འཛུགས་སྐྲུན་དང་བསྐྱར་དར་རླབས་པོ་ཆེའི་ཕུགས་འདུན་ཐུན་མོང་ཐོག་མངོན་འགྱུར་ཡོང་བ་བྱེད་དགོས”པའི་བཀའ་མངགས་གནང་བ་རེད། དེར་བརྟེན་ལྷ་ས་གྲོང་ཁྱེར་མི་རིགས་ལས་དོན་ཨུ་ལྷན་གྱི་ཀྲུའུ་རེན་གཞོན་པ་ཚེ་རིང་ལྷ་མོས་སླད་ཕྱིན་ང་ཚོས་མི་རིགས་ལས་དོན་ལ་ཤུགས་སྣོན་དང་ལེགས་གཏོང་བྱ་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་པ་གལ་ཆེན་ལག་བསྟར་དོན་འཁྱོལ་ནན་ཏན་བྱེད་པ་དང་རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པའི་དགོངས་དོན་དང་ཧྲུའུ་ཅི་ཝང་ཅུན་ཀྲེང་གི་གསུང་བཤད་ཀྱི་བླང་བྱ་ལྟར་གྲོང་ཁྱེར་གྱི་མི་རིགས་ལས་དོན་གསར་གཏོད་ལྡན་པའི་ངང་སྤེལ་ཏེ་མི་རིགས་ཁག་མཉམ་སྡོད་མཉམ་སྦྱོང་དང་། མཉམ་སྐྲུན་མཉམ་སྤྱོད། མཉམ་ལས་བདེ་སྐྱིད་བཅས་ལྡན་པའི་སྡེ་ཁུལ་གྱི་ཁོར་ཡུག་ཧུར་ཐག་བཏོད་དེ་བྱ་སྤྱོད་དངོས་ཀྱི་ཐོག་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བཀའ་མངགས་དོན་འཁྱོལ་ཡག་པོ་བྱས་ཏེ་ཏང་ཀྲུང་དབྱང་དང་ལྗོངས་ཏང་ཨུད་ཀྱི་ཐུགས་ཁུར་གནང་ལུགས་ཆུད་ཟོས་སུ་གཏན་ནས་གཏོང་གི་མིན་ཞེས་གསུངས་པ་རེད།