ཉེ་བའི་ལོ་ཤས་རིང་། གཞིས་རྩེ་གྲོང་ཁྱེར་གཏིང་སྐྱེས་རྫོང་གིས་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་དོན་འཁྱོལ་གཏིང་ཟབ་བྱས་ནས། རྒྱ་ཆེའི་མཐའ་མཚམས་མང་ཚོགས་ལ་མཐུན་སྒྲིལ་དང་སྣེ་ཁྲིད་ཀྱིས་སྐལ་བཟང་མེ་ཏོག་ལྟར་གངས་ལྗོངས་མཐའ་མཚམས་སུ་གཞི་ཚུགས་ཏེ་བླ་ན་མེད་པའི་རྒྱལ་ཁབ་ཀྱི་ས་ཆ་ཡག་པོ་སྲུང་བ་དང་བདེ་སྐྱིད་ལྡན་པའི་ཁྱིམ་གཞིས་ཡག་པོ་སྐྲུན་པ་དང་། མཐའ་བརྟན་དང་། མཐའ་དར། དམངས་ཕྱུག་བཅས་ཀྱི་བྱ་སྤྱོད་ལ་སྐུལ་འདེད་ཤུགས་ཆེན་བཏང་ནས་མཐའ་མཚམས་སྲ་བརྟན་དང་མཐའ་མཚམས་བདེ་འཇགས་ཀྱི་ཟངས་གྱང་ལྕགས་རྩིག་བསྐྲུན་ཡོད།

འཚོ་བ་དེ་བས་བདེ་སྐྱིད་ལྡན་པ། 

གཞིས་རྩེ་གྲོང་ཁྱེར་གཏིང་སྐྱེས་རྫོང་གི་ལྷོ་ནུབ་རྒྱུད་དུ་གནས་པའི་འདྲེན་ཐང་གྲོང་རྡལ་ནི་རི་བོ་ཧི་མ་ལ་ཡའི་དབུས་རྒྱུད་ཀྱི་ལྷོ་ངོས་དང་ཇོ་མོ་གླང་མའི་ལྷོ་ངོས་ཀྱི་གདོད་མའི་ནགས་ཚལ་ཁུལ་དུ་ཆགས་ཡོད། དུས་ཡུན་རིང་པོ་ཞིག་གི་ནང་འདི་གར་འགྲིམ་འགྲུལ་ཤར་གཏོང་མི་ཐུབ་ལ་གློག་ཡང་བརྟན་པོ་གཏན་ནས་མེད།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། འདྲེན་ཐང་གྲོང་རྡལ་ལ་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་ཡོད།

2017ལོའི་ལོ་མཇུག་ཏུ་གཙང་ཁ་གྲོང་ཚོ་ནས་འདྲེན་ཐང་གྲོང་རྡལ་བར་གྱི་གཞུང་ལམ་བསྐྲུན་པས་རླངས་འཁོར་འདྲེན་ཐང་གྲོང་རྡལ་དུ་ཐེངས་དང་པོར་སླེབས་པ་དང་། 2020ལོར་བསྡོམས་མ་དངུལ་སྒོར་དུང་ཕྱུར་7.18བཏང་བའི་ཞིང་ཆེན་ལམ་514ལམ་ཐིག་གི་ས་ལེ་ནས་འདྲེན་ཐང་བར་གྱི་བསྐྱར་སྐྲུན་རྒྱས་སྐྲུན་ལས་གྲྭ་ལས་མཇུག་འགྲིལ་ནས་སྣུམ་ནག་ལམ་གསར་རྐྱང་ཞིག་འདྲེན་ཐང་དུ་ཤར་གཏོང་ཐུབ་པས། འདྲེན་ཐང་གྲོང་རྡལ་གྱི་མང་ཚོགས་བདེ་འཇགས་ལྡན་པའི་སྒོ་ནས་ཕྱིར་སྐྱོད་རྒྱུར་ཧ་ཅང་སྟབས་བདེ་བསྐྲུན་ཡོད།

འགྲིམ་འགྲུལ་སྟབས་བདེ་རུ་སོང་བ་དང་འདྲེན་ཐང་གྲོང་རྡལ་གྱི་གློག་སྤྱོད་གནད་དོན་ཡང་ཇེ་ལེགས་སུ་ཕྱིན་ཡོད།

སྔོན་ཆད་འདྲེན་ཐང་གྲོང་རྡལ་གྱིས་ཆུ་ཤུགས་གློག་ཁང་ཆུང་གྲས་ལ་བརྟེན་ནས་གློག་གཏོང་གི་ཡོད་པ་དང་། གློག་བརྟན་པོ་མེད་པས་ཆུ་འབྲི་བའི་དུས་སུ་དུས་ཡུན་རིང་པོ་ཞིག་གློག་ཆད་ཀྱི་ཡོད།

འདྲེན་ཐང་གྲོང་རྡལ་ནགས་ཐང་གྲོང་ཚོའི་གྲོང་མི་སྐྱིད་པས་གསར་འགོད་པར“སྔོན་ཆད་གློག་བརྟན་པོ་མེད་པས་གོས་འཁྲུད་འཕྲུལ་ཆས་ཉོས་ཀྱང་བེད་མེད་དུ་འཇོག་རྒྱུ་ལས་མ་འདས། ད་ཆ་གློག་ཤར་གཏོང་ཐུབ་ནས་ཁྱིམ་སྤྱོད་གློག་ཆས་སྣ་ཚོགས་བདེ་འཇགས་ལྡན་ལ་བློ་བདེ་པོའི་ངང་སྤྱོད་རྒྱུ་བྱུང་ཡོང་སྙམ་པ་བསམ་བློར་ཡང་རྩ་བ་ནས་འཁོར་མྱོང་མེད”ཅེས་བཤད།

གཞུང་ལམ་ཤར་གཏོང་ཐུབ་པ་དང་གློག་བརྟན་དུ་སོང་བ་མ་ཟད། ཐོན་ལས་ཀྱང་དར་ཞིང་རྒྱས་པ་སྟེ། ད་ཆ་འདྲེན་ཐང་གྲོང་རྡལ་གྱིས་གསོ་ཚགས་ལས་རིགས་དང་ཡུལ་སྐོར་ལས་རིགས་སོགས་ཁྱད་ལྡན་ལེགས་ཆའི་ཐོན་ལས་གཙོ་གནད་ཐོག་འཕེལ་རྒྱས་བཏང་ནས་ཞིང་འབྲོག་པར་འབབ་འཕར་ཡོང་བར་སྐུལ་ཁྲིད་བྱས་པས་2020ལོར་ཞིང་འབྲོག་པ་མི་རེར་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་10679.4བྱུང་ཡོད་པ་རེད།

ཕྱུག་འགྱུར་ཐབས་ལམ་ཡོད་པ།

ལོ་ལྟར་གྱི་སྟོན་ཁར་འདྲེན་ཐང་གྲོང་རྡལ་དུ་མང་ཆག་ལ་ལོ་ལེགས་བྱུང་བའི་དགའ་སྤྲོའི་རྣམ་པས་ཁེངས་བཞིན་ཡོད།

གཏིང་སྐྱེས་རྫོང་འདྲེན་ཐང་གྲོང་རྡལ་མང་ཆག་འདེབས་འཛུགས་ལས་སྣོན་ཕྱིར་ཚོང་ཞིང་པའི་ཆེད་ལས་མཉམ་ལས་ཁང་གི་དངོས་གཞིའི་ཚོང་ཁང་དུ་མང་ཆག་གི་ཨ་རག་དང་མང་ཆག་གི་རྩམ་པ་སོགས་ཁྱད་ལྡན་ཐོན་རྫས་བྲིན་ཁ་རྒྱུག་པོ་ཡོད་པ་རེད།

“ང་ཚོའི་མཉམ་ལས་ཁང་ལ་2020ལོར་ཡོང་འབབ་བསྡོམས་འབོར་སྒོར་ཁྲི་65དང་ཡོང་འབབ་ཁམས་གཙང་སྒོར་ཁྲི་11བྱུང་སོང་། ང་ཚོས་རིན་གོང་མཐོ་པོ་སྤྲད་དེ་ས་གནས་དེ་གའི་མི་སེར་གྱི་ལག་ནས་མང་ཆག་ཉོ་ཡི་ཡོད། མང་ཆག་སྐམ་པོར་རྒྱ་མ་རེར་སྒོར་7.5དང་མང་ཆག་བརྔོས་མར་རིན་གོང་ལ་རྒྱ་མ་རེར་སྒོར་11.5སྤྲོད་ཀྱི་ཡོད་པས། དེ་ནི་ཡོང་འབབ་ཉུང་ཉུང་ཞིག་གཏན་ནས་མིན། ང་ཚོས་ཡུལ་མི་སྤུན་ཟླ་ཚོ་དང་མཉམ་དུ་ཡོང་འབབ་འཕར་ཐབས་བྱེད་ཀྱི་ཡོད”ཅེས་མཉམ་ལས་ཁང་གི་འགན་འཁུར་བ་ནོར་བུས་བཤད།

མང་ཆག་གི་ཁྱད་ལྡན་ཐོན་རྫས་གསར་སྤེལ་ཕུད། གཏིང་སྐྱེས་རྫོང་ཨུད་དང་རྫོང་སྲིད་གཞུང་གི་རྒྱབ་སྐྱོར་འོག འདྲེན་ཐང་གྲོང་རྡལ་གྱིས་ད་དུང་ནགས་ཁྲོད་ཐོན་ཁུངས་གསར་སྤེལ་བེད་སྤྱོད་ཀྱི་ཐོན་རྫས་ཐུམ་སྒྲིལ་དང་། ཇའི་ཐོན་ལས་སྤུས་ལེགས་ལས་སྣོན། བིའུ་ཐང་གྲོང་ཚོའི་སུར་པན་དྲོད་ཁང་ཆེན་པོ་སོགས་ས་གནས་དེ་གའི་ཁྱད་ལྡན་ཐོན་ལས་འཕེལ་རྒྱས་རྣམ་གྲངས་ཁག་གཅིག་སྙན་སེང་ཧུར་ཐག་ཞུས་ནས་སྐྱེ་ཁམས་ཐོན་ཁུངས་ཀྱི་ལེགས་ཆ་དཔལ་འབྱོར་འཕེལ་རྒྱས་ཀྱི་ལེགས་ཆར་སྒྱུར་གང་ཐུབ་བྱས་པ་དང་དབུལ་སྒྲོལ་འགག་སྒྲོལ་གྱི་གྲུབ་འབྲས་བརྟན་དུ་བཏང་སྟེ་གྲོང་གསེབ་དར་རྒྱས་ལ་སྐུལ་འདེད་ཏན་ཏིག་བཏང་བ་རེད།

མཐའ་སྲུང་ལ་སྒུལ་ཤུགས་ལྡན་པ།

ས་བབ་མཐོ་ཚད་སྨི་4500ཡོད་པའི་རི་འོག་གྲོང་རྡལ་གྱི་ཏང་ཡོན་71གཏིང་སྐྱེས་རྫོང་རི་འོག་གྲོང་རྡལ་ཏང་ཨུད་ཀྱི་ཧྲུའུ་ཅིའི་གཞུང་ལས་ཁང་དུ་བསྐྱོད་དེ་མཛུབ་ཐེལ་བརྒྱབ་པའི“དམག་འཐབ་ལ་ཞུགས་པའི་རེ་འདུན་ཞུ་ཡིག”གཉིས་གཟབ་ནན་ངང་ཕུལ་ནས། རིམས་ནད་སྔོན་འགོག་དང་ཚོད་འཛིན་བྱ་ཡུལ་གསར་པ་གཉིས་ལ་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ལ་རང་འགུལ་ངང་ཞུགས་པའི་རེ་བ་བཏོན། མཛུབ་ཐེལ་དམར་པོ་བརྒྱབ་པའི་རེ་འདུན་ཞུ་ཡིག་དེ་གཉིས་ལས་རི་འོག་གྲོང་རྡལ་གྱི་མང་ཚོགས་ཀྱི་བློ་ཐག་ཆོད་པའི་བློ་སྟོབས་དང་དེ་བཞིན་ལེགས་སྐྱེས་འབུལ་འདོད་ཆེ་བའི་མཐའ་སྲུང་མཐའ་བརྟན་གྱི་སྙིང་སྟོབས་མངོན་ཡོད། ཁོ་ཚོས་བྱ་སྤྱོད་དངོས་ལ་བརྟེན་ནས“ཏང་གི་བཀའ་དྲིན་མཐའ་མཚམས་ཕྱོགས་སུ་ཁྱབ། མཐའ་མཚམས་མི་དམངས་སེམས་པ་ཏང་ལ་ཕྱོགས་པའི”ཏང་ལ་དགའ་ཞེན་དང་རྒྱལ་ཁབ་ལ་དགའ་ཞེན་བྱེད་པའི་བརྩེ་སེམས་མཚོན་པར་བྱས་ཡོད།

ས་བབ་མཐོ་ཚད་སྨི་2100ཟིན་པའི་འདྲེན་ཐང་གྲོང་རྡལ་དུའང་ཁོ་ཚོ་དང་འདྲ་བའི་མི་ཁག་གཅིག་ཡོད། དུག་སྦྲང་དང་གནོད་འབུ་སོགས་གང་སར་ཁྱབ་པ་དང་། ཟམ་པར་གཏོར་སྐྱོན་ཕོག་པ། འདམ་རྫབ་ཀྱིས་ཁེངས་པ་བཅས་ལ་མ་འཛེམས་པར། འདྲེན་ཐང་གྲོང་རྡལ་གྱི་ཏང་ཡོན་འཕྲལ་སྒྲུབ་རུ་ཁག་གིས་ནགས་གསེབ་ཏུ་རྐང་ཐང་མར་སྐོར་གཡེང་བྱེད་པ་དང་། རྐང་ཐང་མར་ཉིན་གསུམ་ནགས་ཁུལ་དུ་བསྐྱོད་ནས་མི་དམངས་ཀྱི་བདེ་འཇགས་འགོག་སྲུང་འཛིང་རགས་བརྟན་པོ་ཞིག་བསྐྲུན་ཡོད་པ་རེད།

སྤེན་པ་མཐའ་མཚམས་སྐོར་གཡེང་ལ་ཐེངས་མང་ཞུགས་མྱོང་ཡོད་ཅིང་། ཁོང་གིས་གསར་འགོད་པར“ང་ལ་མྱོང་ཚོར་ཟབ་ཤོས་བྱུང་བ་ནི་ཏང་དང་སྲིད་གཞུང་གི་བཀའ་དྲིན་ལས་ཕ་ཡུལ་ལ་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་བ་མིག་མཐོང་ལག་ཟིན་བྱུང་ལ་མཛེས་སྡུག་ལྡན་པའི་འཚོ་བ་ནི་ལས་སླ་པོར་བྱུང་བ་ཞིག་མིན་པ་མྱོང་ཚོར་ཟབ་མོ་བྱུང་། གཞི་རིམ་གྱི་ལས་བྱེད་པ་ཞིག་གི་ངོས་ནས་ངས་རྟག་ཏུ་ཁྱིམ་ནི་མཐའ་མཚམས་དང་རྒྱལ་ཁབ་ནི་ཀྲུང་གོ་ཡིན་པ་བློ་ལ་བརྟན་པོར་བཅངས་ནས་བླ་ན་མེད་པའི་རྒྱལ་ཁབ་ཀྱི་ས་ཆ་སྲུང་མཁན་དང་བདེ་སྐྱིད་ལྡན་པའི་ཁྱིམ་གཞིས་སྐྲུན་མཁན་ཞིག་བྱས་ཏེ་མེས་རྒྱལ་གྱི་སྲོག་ཆགས་དང་རྩི་ཤིང་དང་རི་ཆུ་སྲུང་སྐྱོང་ཡག་པོ་བྱེད་ཀྱི་ཡིན”ཞེས་བཤད།