2021ལོར་རང་སྐྱོང་ལྗོངས་ཏང་ཨུད་དང་སྲིད་གཞུང་གི་འགྱུར་མེད་སྟོབས་ལྡན་གྱི་འགོ་ཁྲིད་དང་། གྲོང་ཁྱེར་དང་ས་ཁུལ་ཁག་དང་དེ་བཞིན་སྡེ་ཚན་ཁག་གི་རྒྱབ་སྐྱོར་ཤུགས་ཆེན་འོག ལྗོངས་ཡོངས་ཀྱི་སྐྱེ་ཁམས་ཁོར་ཡུག་ཁོངས་གཏོགས་ཀྱིས་སྐྱེ་ཁམས་ཤེས་དཔལ་གྱི་མཐོ་ས་འཛུགས་སྐྲུན་ལ་དམ་པོར་དམིགས་ནས། མངགས་བཅོལ་བློ་ལ་བརྟན་པོར་ངེས་པ་དང་བཀའ་དྲིན་བསམ་བཞིན་འབད་འབུངས་བྱས་པར་བརྟེན། སྦགས་བཙོག་འགོག་བཅོས་ཀྱི་འགག་སྒྲོལ་དམག་འཐབ་ལ་ལོ་གཉིས་བསྟུད་མར“ཕུལ་བྱུང”གི་དཔྱད་ཞིབ་རག་པ་དང་། ཁོར་ཡུག་གི་སྤུས་ཚད་ལེགས་པོ་རྒྱུན་འཁྱོངས་ཐུབ་པ། སྐྱེ་ཁམས་ཤེས་དཔལ་གྱི་དཔེ་སྟོན་འཛུགས་གཏོད་རྒྱལ་ཡོངས་ཀྱི་མདུན་གྲལ་དུ་རྒྱུན་འཁྱོངས་སླེབས་པ། “ལོ་ལྔ་ཚན་བཅུ་བཞི་པའི”སྐྱེ་ཁམས་ཁོར་ཡུག་སྲུང་སྐྱོང་གི་འགོ་ཡག་པོ་འཛུགས་ཐུབ་པ་བཅས་བྱུང་ཡོད།

སྤུས་ཚད་མཐོ་བའི་འཕེལ་རྒྱས་ཀྱི་ནུས་པ་རྒྱུན་མཐུད་ཆེ་རུ་ཕྱིན་པ། 

བོད་ནི་རྒྱལ་ཁབ་ཀྱི་སྐྱེ་ཁམས་བདེ་འཇགས་སྲུང་ཡོལ་གལ་ཆེན་ཞིག་དང་ཨེ་ཤེ་ཡ་ཤར་མའི་གནམ་གཤིས་སྙོམས་སྒྲིག་ཡོ་བྱད་ཡིན་པས། སྐྱེ་ཁམས་ཤེས་དཔལ་འཛུགས་སྐྱོང་གི་གལ་ཆེའི་རང་བཞིན་སྨོས་ཅི་དགོས། སྔར་ནས་བཟུང་རང་ལྗོངས་ཀྱིས“བརྟན་པོ་དྲུག”དང“འགན་ལེན་དྲུག”ལ་སྐུལ་འདེད་ཧུར་ཐག་བཏང་ནས་མཐོ་གསར་གྲངས་འཛིན་དང་། སྐྱེ་ཁམས་ཞིང་འབྲོག ཁྱད་ལྡན་ཡུལ་སྐོར་སོགས་སྔོ་ལྗང་ཐོན་ལས་འཕེལ་རྒྱས་ལ་རྒྱབ་སྐྱོར་ཤུགས་ཆེན་བྱས་ཡོད། གནམ་གཤིས་ཀྱི་འགྱུར་ལྡོག་ལ་ཁ་གཏད་ཧུར་ཐག་གཅོག་པ་དང་གནམ་གཤིས་ཀྱི་འགྱུར་ལྡོག་ལ་ཁ་གཏད་གཅོག་པའི་རྨང་གཞིའི་ནུས་པ་འཛུགས་སྐྱོང་ལ་ཤུགས་སྣོན། ཐཱན་འདུས་དཔལ་འབྱོར་འཕེལ་རྒྱས་ཀྱི་ཞིབ་འཇུག་ཟབ་ཏུ་གཏོང་བ། སྐྱེ་ཁམས་རྒྱུ་ནོར་དཔྱད་དཔོག་སྟེ་སྐྱེ་ཁམས་མ་ལག་ཞབས་ཞུའི་རིན་ཐང་ཞིབ་རྩིས་ཞིབ་འཇུག་དང་བཀོལ་སྤྱོད་ལ་འཚོལ་ཞིབ་བཅས་བྱས་ནས། རྒྱལ་མཚམས་སྒྲོལ་བའི་སྐྱེ་ཁམས་ཁོར་ཡུག་གི་ཤུགས་རྐྱེན་ལ་ཞིབ་འཇུག་བྱེད་པའི་ལས་དོན་སྤེལ་འགོ་ཚུགས་ཡོད།

མིག་སྔར་ལྗོངས་ཡོངས་སུ་གྲོང་ཁྱེར་དང་ས་ཁུལ་རིམ་པའི“ཚད་གཞི་གསུམ་དང་གསལ་ཐོ་གཅིག”གི་གྲུབ་འབྲས་གཅིག་སྡུད་དང་མཛོད་འཇུག་ཁྱབ་བསྒྲགས་ལེགས་སྒྲུབ་བྱས་ནས། དོ་དམ་ཚོད་འཛིན་གྱི་ཚན་པ་850དབྱེ་མཚམས་བཅད་པ་དང་། ལྗོངས་ཡོངས་ཀྱི་རྒྱལ་ཁབ་ས་ཆའི་རྒྱ་ཁྱོན་88.96%ཙམ་སྔོན་ལ་སྲུང་སྐྱོང་ཚན་པར་བཅུག་པས། འགྲིམ་འགྲུལ་དང་། ཐོན་ཁུངས་གསར་སྤེལ། རྨང་གཞིའི་སྒྲིག་བཀོད་འཛུགས་སྐྲུན་སོགས་ཁྱབ་ཁོངས་སུ“ཚད་གཞི་གསུམ་དང་གསལ་ཐོ་གཅིག”ནུས་ལྡན་སྤྱོད་ཐུབ་པ་བྱུང་ཡོད། ལྷ་ཉིང་ལྕགས་ལམ་ལམ་རྒྱུད་ཀྱི་སྐྱེ་ཁམས་སླར་གསོ་དང་ཁོར་ཡུག་དོ་དམ་ལ་མུ་མཐུད་ཤུགས་སྣོན་བརྒྱབ་ནས། “བསྐྱར་དར་རྟགས་ཅན”གྱི་མེ་འཁོར་ལྗང་གུ་ཁོར་ཡུག་གཙང་ལ་སྐྱེ་ཁམས་མཛེས་ཤིང་ལྟ་ན་སྡུག་པའི་གངས་ལྗོངས་ས་མཐོར་བསྐྱོད་ཡོད། ཁྲོན་བོད་ལྕགས་ལམ་འཛུགས་སྐྲུན་གྱི་སྐྱེ་ཁམས་ཁོར་ཡུག་གི་ལྟ་འདོམས་ཞབས་ཞུར་ཤུགས་སྣོན་དང་ཡར་ཀླུང་གཙང་པོ་རྒྱུག་ཁུལ་གྱི་ཕྱོགས་བསྡུས་འཆར་འགོད་ཀྱི་ཁོར་ཡུག་དཔྱད་དཔོག་གི་ཞིབ་བཤེར་ལས་དོན་ལ་མཐུན་སྦྱོར་བྱས་ནས་ལེགས་སྒྲུབ་བྱས་ཏེ། ནུས་ཤུགས་ཡོད་རྒུས་གནམ་ཐང་གི“3+1”དང་རྒྱལ་རྩེའི་མཁའ་འགྲོའི་ཆུ་མཛོད་སོགས་རྣམ་གྲངས་གལ་ཆེན་འཛུགས་སྐྲུན་ལ་ནུས་ཤུགས་ཡོད་རྒུས་རྒྱབ་སྐྱོར་བྱས་ཡོད། ཁོར་ཡུག་དཔྱད་དཔོག་གི་འཆར་འགོད་7ལ་ཞིབ་བཤེར་བྱས་པ་དང་། ཐོ་འགོད་སྙན་སེང་ཞུས་པའི་འཛུགས་སྐྲུན་རྣམ་གྲངས་ཀྱི་ཁོར་ཡུག་དཔྱོད་དཔོག་གི་ཡིག་ཆ་7937ལ་ཞིབ་མཆན་བཀོད་ནས“མཐོ་གཉིས”རྣམ་གྲངས་དང་ཁེ་ལས་ལ་ཞིབ་མཆན་མི་འགོད་པ་དང་ནང་འདྲེན་མི་བྱེད་པ་མངོན་འགྱུར་བྱུང་ཡོད། སྦགས་བཙོག་ཕྱིར་འབུད་ཀྱི་ཆོག་འཐུས་ལག་ཁྱེར་ལམ་ལུགས་དོན་འཁྱོལ་གཏིང་ཟབ་བྱས་ནས། ཚན་པ་179ཡི་སྤུས་ཚད་ཞིབ་བཤེར་དང་ཚན་པ་83གྱི་ལག་བསྟར་གནས་ཚུལ་ལ་ས་གནས་ས་ཐོག་ཏུ་ཞིབ་དཔྱད་བྱས་ཡོད། ཉིང་ཁྲི་གྲོང་ཁྱེར་དང་ཆབ་མདོ་གྲོང་ཁྱེར་གྱིས་ཁྲོན་བོད་ལྕགས་ལམ་གྱི་ལྟ་འདོམས་ལ་ཤུགས་སྣོན་བརྒྱབ་ནས་ཁེ་ལས་ཀྱི་འབྱུང་འཕྲོད་ཨར་ལས་ལ་རོགས་སྐྱོར་དང་མཛུབ་ཁྲིད་བྱས་ཡོད།

སྐྱེ་ཁམས་ཤེས་དཔལ་གྱི་མཐོ་ས་འཛུགས་སྐྲུན་ལ་སྐུལ་འདེད་ཏན་ཏིག་བཏང་བ།

2021ལོ་ཚུན་དུ། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་སྐྱེ་ཁམས་ཁོར་ཡུག་སྲུང་སྐྱོང་གི་ལས་དོན་ལ་སྔར་རྒྱུན་བཞིན་མཐོང་ཆེན་བྱས་ཤིང་། རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པར“རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་འཛུགས་གཏོད་བྱས་ནས་སྐྱེ་ཁམས་ཤེས་དཔལ་འཛུགས་སྐྱོང་རྒྱལ་ཡོངས་ཀྱི་མདུན་གྲལ་དུ་ཧུར་ཐག་སླེབས་པར་བྱེད་པའི”འཐབ་ཇུས་བཀོད་སྒྲིག་ཁ་གསལ་བཏོན་ནས། འབྱུང་འགྱུར་ལོ་ལྔ་དང་ཐ་ན་སླད་ཕྱིན་དུས་སྐབས་ཤིག་རིང་བདེ་སྐྱིད་དང་མཛེས་སྡུག་ལྡན་པའི་བོད་ལྗོངས་འཛུགས་སྐྲུན་བྱེད་པའི་བརྗིད་ཆེའི་འཆར་གཞི་བཀོད་ཡོད།

མིག་སྔར《བོད་རང་སྐྱོང་ལྗོངས་རྒྱལ་ཁབ་སྐྱེ་ཁམས་ཤེས་དཔལ་གྱི་མཐོ་ས་འཛུགས་སྐྲུན་སྲོལ་ཡིག》དངོས་སུ་ལག་བསྟར་བྱས་པ་དང་། སྐྱེ་ཁམས་ཤེས་དཔལ་གྱི་དཔེ་སྟོན་འཛུགས་གཏོད་དོ་དམ་བྱ་ཐབས་དང་དེ་བཞིན་ལེ་ལག་ཚང་བའི་དམིགས་ཚད་མ་ལག་11དངོས་སུ་བཏོན་ནས། ལག་བསྟར་བྱས་པར་ས་གནས་ཁག་ཏུ་འཛུགས་གཏོད་ཀྱི་སྤྲོ་སེམས་རབ་ཏུ་འཕེལ་ཡོད། རྫོང་དང་ཆུས་13དང་། ཤང་དང་གྲོང་རྡལ་284 གྲོང་ཚོ་དང་གྲོང་ལྷན་3229བཅས་སུ་རང་སྐྱོང་ལྗོངས་རིམ་པའི་སྐྱེ་ཁམས་ཤེས་དཔལ་དཔེ་སྟོན་འཛུགས་གཏོད་བྱས་ཡོད། དེའི་ནང་སྟོད་ལུང་བདེ་ཆེན་ཆུས་དང་། ཆུ་ཤུར་རྫོང་། ཀོང་པོ་རྒྱ་མདའ་རྫོང་བཅས་ལ་རྒྱལ་ཁབ་སྐྱེ་ཁམས་ཤེས་དཔལ་འཛུགས་སྐྱོང་གི་དཔེ་སྟོན་ཁུལ་ཁག་ལྔ་པའི་མཚན་སྙན་ཐོབ་པ་དང་། ལྷ་ས་གྲོང་ཁྱེར་སྟག་གདོང་གྲོང་ཚོར“རི་སྔོན་ཆུ་དྭངས་གསེར་དངུལ་རི་ལས་ལྷག་པའི”ལག་ལེན་གསར་གཏོད་རྟེན་གཞིའི་མཚན་སྙན་ཐོབ་པ་རེད།

སྐྱེ་ཁམས་སྲུང་སྐྱོང་དང་ཉམས་གསོའི་ཕན་འབྲས་སྲ་བརྟན་རྒྱ་སྐྱེད་བཏང་བ།

ཉེ་བའི་ལོ་ཤས་རིང་། རང་ལྗོངས་ཀྱིས་ཆུ་བོ་གཙོ་བོ་33གྱིས་གཙོས་པའི་གཙང་པོ་དང་ཆུ་འགོའི་རྒྱུག་ཁོངས་སྲུང་སྐྱོང་ལ་ཕྱོགས་ཡོངས་ནས་ཤུགས་སྣོན་བརྒྱབ་པས། “ཨེ་ཤེ་ཡའི་ཆུ་གསོག་མཐོ་ལྕོག”གི་སྐྱེ་ཁམས་ནུས་པ་དང་ཞབས་ཞུའི་རིན་ཐང་ཧ་ཅང་ཆེ་རུ་ཕྱིན་ཡོད། རང་ལྗོངས་ཀྱི་སྐྱེ་ཁམས་བདེ་འཇགས་སྲུང་ཡོལ་སྲུང་སྐྱོབ་དང་འཛུགས་སྐྲུན་གྱི་འཆར་འགོད་ལ་རིམ་རྩིས་བྱས་ན་སྒོར་དུང་ཕྱུར་127.1བཏང་ཡོད། ལྷ་ས་གྲོང་ཁྱེར་དང་ལྷོ་ཁ་གྲོང་ཁྱེར་གྱི་རི་ཆུ་ནགས་ཞིང་མཚོ་རྩྭ་བྱེ་བཅས་ཀྱི་ཚོད་ལྟའི་འདུ་འགོད་ལ་མུ་མཐུད་སྐུལ་འདེད་བཏང་ཞིང་། རིམ་རྩིས་བྱས་ན་མ་དངུལ་སྒོར་དུང་ཕྱུར་74.74བཏང་སྟེ་ཆབ་མདོ་གྲོང་ཁྱེར་དང་གཞིས་རྩེ་གྲོང་ཁྱེར་གྱི་རྣམ་གྲངས་སྙན་སེང་འབུལ་བར་སྐུལ་འདེད་ཧུར་ཐག་བཏང་ཡོད། ཀྲུང་དབྱང་གི་ཆུའི་སྦགས་བཙོག་འགོག་བཅོས་ཀྱི་མ་དངུལ་སྒོར་དུང་ཕྱུར་7.07དོན་འཁྱོལ་བྱས་ནས་ལྷ་ས་སྐྱིད་ཆུ་དང་། མྱང་ཆུ་གཙང་པོ། གྲི་གུ་མཚོ་སོགས་ཆུའི་སྐྱེ་ཁམས་ཁོར་ཡུག་སྲུང་སྐྱོང་ཉམས་གསོའི་རྣམ་གྲངས་ལག་ལེན་བསྟར་ཡོད།

དེ་དང་ཆབས་ཅིག་རང་བྱུང་སྲུང་སྐྱོང་ཁུལ་གྱི་ལྟ་འདོམས་ལ་ཤུགས་སྣོན་བརྒྱབ་ནས་གཙང་གསུམ་ཆུ་འགོའི་རྒྱལ་ཁབ་སྤྱི་གླིང་འཛུགས་སྐྲུན་ལ་སྐུལ་འདེད་གཏོང་བར་གཞོགས་འདེགས་བྱས་ཡོད། “ཕུབ་ལྗང་གུ་2021”གི་རང་བྱུང་སྲུང་སྐྱོང་ཁུལ་གྱི་ལྟ་སྐུལ་ལ་ཤུགས་སྣོན་རྒྱག་པའི་ལས་དོན་གཏིང་ཟབ་སྤེལ་ནས་མིའི་རིགས་ཀྱི་བྱེད་སྒོ་སྤེལ་གནས་3488ལ་ཞིབ་དཔྱད་བྱས་པ་དང་། ལོ་འཁོར་གྱི་གནད་དོན“ཐོན་ཚད་འཕར་བ”དང་སྔར་ལོའི་གནད་དོན“གསོག་ཚད”མུ་མཐུད་ཉུང་དུ་ཕྱིན་ནས་དག་ཐེར་ལེགས་གྲུབ་ཐུབ་ཚད་94%ཟིན་ཡོད་པ་རེད། མཉམ་འབྲེལ་རྒྱལ་ཚོགས་ཀྱི་སྐྱེ་དངོས་སྣ་མང་རང་བཞིན་གྱི་ཚོགས་ཆེན་གྱི་འབྲེལ་ཡོད་བྱེད་སྒོ་བདེ་བླག་ངང་ལེགས་གྲུབ་བྱུང་ནས། འཛམ་གླིང་ཡོངས་ལ་བོད་ཀྱི་སྐྱེ་དངོས་སྣ་མང་རང་བཞིན་སྲུང་སྐྱོང་གི་གྲུབ་འབྲས་བསྟན་ཡོད།

སྐྱེ་ཁམས་ཁོར་ཡུག་བཟང་པོ་ནི་བོད་ཀྱི་མངོན་གསལ་དོད་ཤོས་ཀྱི་ལེགས་ཆ་ཞིག་རེད། བོད་ཀྱི་རི་སྔོན་ཆུ་དྭངས་སྲུང་སྐྱོང་ཡག་པོ་བྱེད་པ་དང་། འཛམ་གླིང་གི་དག་ཞིང་མཐའ་མ་སྲུང་སྐྱོང་ཡག་པོ་བྱེད་པ་ནི། བོད་ཀྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་ཕྱོགས་ཡོངས་ནས་དར་རྒྱས་ཡོང་བའི་ལྡོག་མེད་ཀྱི་བླང་བྱ་ཞིག་རེད།