མི་ཡི་འཚོ་རྟེན་ཟས་ཡིན་པ་དང་ཟས་ཀྱི་རྟེན་ས་ས་ཞིང་ཡིན། ཞིང་ལས་རྫོང་ཆེན་ཡིན་པའི་ལྷ་རྩེ་རྫོང་གིས་ཉེ་བའི་ལོ་ཤས་རིང་ཐོག་མཐའ་བར་གསུམ་དུ་ཚད་གཞི་མཐོ་བའི་ས་ཞིང་འཛུགས་སྐྲུན་ལ་སྐུལ་འདེད་གཏོང་རྒྱུར་དམ་འཛིན་བྱས་ནས་ཞིང་ལས་ཀྱི་རྨང་གཞིའི་སྒྲིག་བཀོད་ཀྱི་ཞན་ཆ་མགྱོགས་མྱུར་སེལ་བ་དང་། ས་ཞིང་གི་རྨང་གཞིའི་སྒྲིག་བཀོད་ཀྱི་ཆ་རྐྱེན་ལེགས་སུ་ཧུར་ཐག་གཏོང་བ། ཚད་གཞི་མཐོ་བའི་ས་ཞིང་འཛུགས་སྐྲུན་བྱས་པ་དེས་དེང་རབས་ཞིང་ལས་ལ་འདེགས་སྐྱོར་བྱེད་པའི་ནུས་པ་འདོན་སྤེལ་གང་ལེགས་བཅས་བྱས་ཏེ་མང་ཚོགས་རྒྱུན་ཆད་མེད་པར་འབབ་འཕར་ཕྱུག་འགྱུར་ཡོང་རྒྱུར་སྐུལ་འདེད་བཏང་ཡོད།

མང་ཚོགས་ཀྱི་འདུ་ཤེས་བསྒྱུར་བ་ནས་འགོ་བརྩམས་པ།

2019ལོར་ལྷ་རྩེ་རྫོང་གིས་ཆུ་ཤར་གྲོང་རྡལ་གནས་ས་གྲོང་ཚོར་ཚད་གཞི་མཐོ་བའི་ས་ཞིང་འཛུགས་སྐྲུན་བྱ་རྒྱུར་སྐུལ་འདེད་ཤུགས་ཆེན་གཏོང་རྒྱུའི་གཏན་འབེབས་བྱས་ཡོད།

“གྲོང་མིས་རྨོ་འདེབས་བྱ་རྒྱུར་སྟབས་བདེ་ཡོང་ཆེད་འཕྲུལ་འཁོར་སྤྱོད་བདེ་ཅན་གྱི་སྒྱུར་བཀོད་བྱ་རྒྱུ་ཡིན་པ་དང་། ད་དུང་གྲོང་ཚོའི་དུད་ཚང་ཁག་གི་ས་ཞིང་ཁ་ཐོར་ཡིན་པའི་སྣང་ཚུལ་སླར་ཡང་མི་ཐོན་པ་བྱ་ཆེད། གྲོང་ཚོའི་ས་ཞིང་ས་སྦོལ་དང་ལེགས་སུ་བཏང་རྗེས་བསྐྱར་དུ་བགོ་བཤའ་རྒྱག་རྒྱུ་ཡིན་པ་རེད། ས་ཞིང་བསྐྱར་དུ་བགོ་རྒྱུ་ཡིན་པའི་གནས་ཚུལ་ཐོས་མ་ཐག་མི་རྣམས་ཀྱིས་རང་ཉིད་ལ་བགོ་བཤའ་ཉུང་དྲག་པའི་སེམས་ཁྲལ་བྱེད་ཀྱི་ཡོད”ཅེས་གནས་ས་གྲོང་ཚོའི་གྲོང་ཚོ་ཨུ་ལྷན་གྱི་ཀྲུའུ་རེན་བློ་བཟང་གིས་གསར་འགོད་པར་བཤད།

“དེ་སྔ་གསལ་པོ་མ་ཤེས་པར་བརྟེན་དེའི་ནང་ཞུགས་འདོད་མ་བྱུང”གནས་ས་གྲོང་ཚོའི་གྲོང་མི་བུ་ཁྲིད་ཀྱིས་དང་ཐོག་ཚད་གཞི་མཐོ་བའི་ས་ཞིང་འཛུགས་སྐྲུན་ནང་ཞུགས་འདོད་མེད་པའི་གནས་ཚུལ་གླེང་སྐབས་ཡིད་མུག་བྱེད་ཀྱི་ཡོད།

ལས་འགན་ལྕི་ཞིང་བླང་བྱ་མཐོ། 2019ལོར་ལྷ་རྩེ་རྫོང་གི་ཚད་གཞི་མཐོ་བའི་ས་ཞིང་འཛུགས་སྐྲུན་གྱི་རྣམ་གྲངས་ལ་མུའུ་ཁྲི་3ཟིན་པ་དང་། 2020ལོར་ཚད་གཞི་མཐོ་བའི་ས་ཞིང་འཛུགས་སྐྲུན་གྱི་རྣམ་གྲངས་ལ་མུའུ་ཁྲི་1.9ཟིན་པ། 2021ལོར་ཚད་གཞི་མཐོ་བའི་ས་ཞིང་འཛུགས་སྐྲུན་རྣམ་གྲངས་ལ་མུའུ་ཁྲི་2.9ཟིན་ཡོད། གནས་ས་གྲོང་ཚོའི་གྲོང་མི་ཚོས་སེམས་ཁྲལ་ཆེན་པོ་བྱེད་ཀྱི་ཡོད་ལ་གྲོང་ཚོ་གཞན་གྱི་མང་ཚོགས་ཀྱིས་ཀྱང་བལྟས་ནས་བསྡད་ཡོད། ཇི་ལྟར་བྱས་ནས་མང་ཚོགས་ལ་ཡིད་ཆེས་ཀྱིས་ཁེངས་པ་དང་རྣམ་གྲངས་བདེ་བླག་ངང་སྤེལ་ཐུབ་པ་བྱེད་དགོས་སམ།

ལྷ་རྩེ་རྫོང་གི་འབྲེལ་ཡོད་འགོ་ཁྲིད་ཀྱིས་གནས་ཚུལ་ཤེས་རྟོགས་བྱུང་རྗེས་ཚད་མཐོའི་མཐོང་ཆེན་བྱས་ནས་ལས་དོན་མི་སྣའི་སྣེ་ཁྲིད་དེ་ཕུ་ཐུང་དང་གོས་ཐུང་བརྫེས་ཏེ་གྲོང་ཚོ་ཁག་གི་ས་གནས་ས་ཐོག་ཏུ་ཚད་གཞི་མཐོ་བའི་ས་ཞིང་འཛུགས་སྐྲུན་བྱེད་ཚུལ་ལ་ལྟ་ཞིབ་བྱས་པ་རེད།

“སྐབས་དེ་དུས་རྫོང་གིས་ད་དུང་ང་ཚོ་སྒྲིག་འཛུགས་བྱས་ནས་ཚད་གཞི་མཐོ་བའི་ས་ཞིང་འཛུགས་སྐྲུན་བྱེད་མཁན་གྲོང་ཚོར་ལྟ་སྐོར་བྱེད་པར་བཏང་བྱུང་།གྲོང་ཚོར་ཚོགས་འདུ་འཚོག་སྐབས་ང་ཚོར་སྲིད་ཇུས་དང་། རྒྱུ་རྐྱེན། ལེགས་ཆ་བཅས་རེ་རེ་བཞིན་བཤད་པས་ཚད་གཞི་མཐོ་བའི་ས་ཞིང་འཛུགས་སྐྲུན་གྱི་ཕན་པ་ཤེས་ནས་གྲོང་མི་ཚོས་གཅིག་རྗེས་གཉིས་མཐུད་ངང་མོས་མཐུན་བྱས་པ་རེད”ཅེས་བུ་ཁྲིད་ཀྱིས་བཤད།

“ད་ཆ་ངའི་ཁྱིམ་གྱི་ས་ཞིང་མུའུ་22.6ལ་ནས་དང་པད་ཁ་གང་ཞིག་བཏབ་རུང་མུའུ་རེའི་ཐོན་འབབ་སྔོན་ཆད་ལས་མང་བ་འདུག”ཅེས་བུ་ཁྲིད་ཀྱིས་དགའ་ཚོར་ཆེན་པོས་བཤད།

ཞིང་འབྲོག་པའི་འབབ་འཕར་ཐབས་ལམ་རྒྱ་སྐྱེད་བཏང་བ།

ལྷ་རྩེ་རྫོང་ཞིང་ལས་དང་གྲོང་གསེབ་ཅུས་ཀྱི་ཅུས་ཀྲང་བསོད་ནམས་ཕུན་ཚོགས་ཀྱིས་གསར་འགོད་པར“དེ་སྔ་ཆུ་དམར་ཤང་གི་ས་ཞིང་བསྟར་ཆགས་མིན་པ་ཕུད། ད་དུང་འཕྲུལ་ཆས་ཅན་གྱི་རྨོ་འདེབས་བྱེད་མི་ཐུབ་མ་ཟད། ས་ཞིང་གི་གཤིན་ཚད་ཀྱང་འདང་གི་མེད”ཅེས་བཤད།

ཚད་གཞི་མཐོ་བའི་ས་ཞིང་འཛུགས་སྐྲུན་བྱེད་པར་ས་ཞིང་ཁོད་སྙོམས་པ་དང་གཅིག་སྡུད་ཡུག་འབྲེལ་དགོས་པ་ཕུད། ད་དུང་ས་རྒྱུ་སྤུས་དག་ཏུ་གཏོང་བ་དང་། འཕྲུལ་རྨོའི་ལམ་བཟོ་བ། ཟབ་རྨོ་ཟབ་སློག ལེ་ལག་ཚང་བའི་ཆུ་ཡུར་གྱི་སྒྲིག་བཀོད་བསྐྲུན་པ་སོགས་ཀྱང་བྱེད་དགོས།

འཕྲུལ་ཆས་ཞིང་དུ་བཏང་བ་དང་། ཡངས་པའི་འཕྲུལ་རྨོའི་ལམ་སྐྲུན་འགོ་ཚུགས་པ། འཕྲེད་གཞུང་སྦྲེལ་མཐུད་ཀྱི་ཆུ་ཡུར་དུས་ཚོད་དམ་འཛིན་གྱིས་བསྐྲུན་པ། འཕྲུལ་ཆས་དང་འཚམ་པའི་ཐོན་ལས་སྒྲིག་བཀོད་མགྱོགས་མྱུར་བསྐྲུན་པ་སོགས་ཀྱི་རྣམ་གྲངས་འཛུགས་སྐྲུན་བྱེད་རིང་། རྫོང་ཡོངས་སུ་ས་གནས་དེ་གའི་ཞིང་འབྲོག་པའི་ལས་མི་སྤྱོད་ཚད་80%ཡན་ཟིན་ནས་མང་ཚོགས་ཀྱི་འབབ་འཕར་ལ་ཆ་རྐྱེན་བཟང་པོ་བཏོད་ཡོད་པ་རེད།

“འདི་ལོ་ང་ཚོའི་མཉམ་ལས་ཁང་གིས་རྒྱན་མདའ་གྲོང་ཚོ་དང་ཀུན་ཁང་གྲོང་ཚོ་ཁོ་ན་ནས་ས་ཞིང་མུའུ་700ལྷག་ཙམ་འགན་གཙང་བླངས་ཡོད”ཅེས་ལྷ་རྩེ་རྫོང་ཆུ་དམར་ཤང་དམངས་ཕན་ཞིང་འཕྲུལ་ཆེད་ལས་མཉམ་ལས་ཁང་གི་འགན་འཁུར་བ་རྣམ་རྒྱལ་གྱིས་བཤད།

“ན་ནིང་ང་ཚོའི་ཁ་ལོ་བ་ཉི་མ་རྒྱག་ལོས་ཀྱིས་རང་ཁྱིམ་གྱི་ས་ཞིང་ཚང་མ་མཉམ་ལས་ཁང་ལ་དོ་དམ་བྱེད་རྒྱུར་བཅོལ་བ་རེད། ཞིང་དལ་དུས་སུ་ཁོང་ཕྱིར་ལས་ཀར་འགྲོ་གི་ཡོད། ཞིང་བྲེལ་ཆེ་བའི་སྐབས་སུ་ཁོང་ཕ་ཡུལ་དུ་ལོག་ནས་འཕྲུལ་འཁོར་གྱིས་རྨོ་འདེབས་དང་བརྔ་བསྡུ་བྱས་པས་ལོ་གཅིག་ཁོ་ནར་ཡོང་འབབ་སྒོར་ཁྲི་2མང་དུ་ཕྱིན་ཡོད། དེའི་ནང་ད་དུང་ཁོང་ཁྱིམ་གྱི་མུའུ་བཅུ་ཕྲག་ཁ་ཤས་ཀྱི་ཐོན་འབབ་ཚུད་མེད”ཅེས་མཉམ་ལས་ཁང་གི་རྩིས་པ་བཀྲ་ཤིས་ཀྱིས་གླ་ཆ་ལེན་པའི་ཐོ་དེབ་ཁ་ཕྱེ་ནས་གསར་འགོད་པར་དེ་ལྟར་བཤད།

ཚན་རྩལ་ལ་བརྟེན་ནས་ལོ་ལེགས་འགན་ལེན་བྱས་པ།

ཚད་གཞི་མཐོ་བའི་ས་ཞིང་འཛུགས་སྐྲུན་བྱེད་རིང་། ལྷ་རྩེ་རྫོང་གིས་ད་དུང“ཚན་རྩལ་ནུས་འཕེལ”མཐའ་འཁྱོངས་བྱས་ཤིང་། རྣམ་གྲངས་འཛུགས་སྐྲུན་བྱེད་རིང་ཚན་རྩལ་ཆེད་མངགས་པ“སྒོ་རྩར་སློབ་ཁྲིད་བྱེད་པར་སྐྱོད་པ”སོགས་ཀྱི་བྱེད་ཐབས་བརྒྱུད་ཞིང་དུད་ཀྱིས་ཚན་རིག་དང་མཐུན་པའི་འདེབས་འཛུགས་ཀྱི་ཆུ་ཚད་མཐོ་རུ་ཕྱིན་པ་དང་ཞིང་ལས་ཚན་རྩལ་གྱི་རྩལ་ནུས་སྣ་ཚོགས་སློབ་སྦྱོང་དང་ཁོང་དུ་ཆུད་ཚད་མཐོ་རུ་ཕྱིན་ནས་ཞིང་ལས་ལ་དེ་བས་ལེགས་པའི་སྒོ་ནས་ཞབས་འདེགས་ཞུ་བ་དང་ཞིང་ལས་འཕེལ་རྒྱས་ཀྱི་གཏིང་ཤུགས་ཆེ་རུ་སོང་ཡོད།

“གྲོང་ཚོར་རྨོ་ཞིང་མུའུ་3000ཡས་མས་ཡོད་པའི་ནང་རིམ་པ་དང་པོའི་ས་ཞིང་མུའུ་200ལྷག་ཙམ་དང་རིམ་པ་གཉིས་པའི་ས་ཞིང་མུའུ་400ལྷག་ཙམ་ཡོད་པ་ཚང་མར‘ཧི་མ་ལ་ཡ་ཨང་22’བཏབ་ཡོད། ན་ནིང་ཐོན་འབབ་སོ་སོར་རྒྱ་མ་ཁྲི་15དང་ཁྲི་30ཡས་མས་ཟིན་ནས་ཚད་གཞི་མཐོ་བའི་ས་ཞིང་འཛུགས་སྐྲུན་མ་བྱས་གོང་དང་བསྡུར་ན་ཆ་སྙོམས་མུའུ་རེ་ནས་ཐོན་འཕར་རྒྱ་མ་100ཡས་མས་བྱུང་ཡོད། རིམ་པ་དང་པོ་དང་གཉིས་པའི་ས་ཞིང་གི་ཐོན་འབབ་ཞིང་ལས་དང་གྲོང་གསེབ་ཅུས་ཀྱིས་གཅིག་གྱུར་ཉོ་སྒྲུབ་བྱེད་ཀྱི་ཡོད་པ་དང་དེ་ནས་གྲོང་ཚོ་གཞན་ལ་མུ་མཐུད་བགོས་ནས་སོན་བཟང་དུ་འགྱུར་བར་བྱེད་ཀྱི་ཡོད”ཅེས་རྒྱན་མདའ་གྲོང་ཚོའི་ཏང་ཀྲི་པུའི་ཧྲུའུ་ཅི་མཁས་བཙུན་གྱིས་དགའ་ཚོར་ཆེན་པོས་བཤད།

“དེ་སྔ་ཞིང་སྨན་རྒྱག་པ་ནི་རྙོག་འཛིང་ཆེ་ཤོས་ཀྱི་བྱ་བ་ཞིག་རེད། མི་80ལྷག་ཙམ་གྱིས་ཉིན་4ཏག་ཏག་ལས་ཀ་བྱས་ཚེ་གཞི་ནས་གྲོང་ཚོ་ཧྲིལ་པོའི་ས་ཞིང་ལ་སྨན་རྒྱབ་ཚར་གྱི་ཡོད། གླ་པའི་གླ་ཆ་མཐོ་བ་མ་ཟད། ད་དུང་ཞིང་སྨན་ཡང་ཁོད་སྙོམས་པོ་རྒྱག་ཐུབ་ཀྱི་མེད། ད་ཆ་མི་མེད་གནམ་གྲུ་གཅིག་དང་མི་2ཀྱིས་ཉིན་གཉིས་ལ་ཐག་གཅོད་ཐུབ་པ་མ་ཟད། ཞིང་ཆུ་དང་ཞིང་སྨན་ལ་ཡང་གྲོན་ཆུང་ཐུབ་ཀྱི་ཡོད”ཅེས་མཁས་བཙུན་གྱིས་བཤད།

“གོམ་སྟབས་རྗེས་མར་ང་ཚོས་རང་སྐྱོང་ལྗོངས་དང་གཞིས་རྩེ་གྲོང་ཁྱེར་གྱི་འབྲེལ་ཡོད་བཀོད་སྒྲིག་བླང་བྱ་ནན་པོར་གཞིགས་ནས་འཛུགས་སྐྲུན་རྣམ་གྲངས་ཀྱི་དོ་དམ་སྲུང་སྐྱོང་བྱེད་ཤུགས་ཆེ་རུ་གཏོང་བ་དང་། སྟོབས་ཤུགས་ཧྲག་སྒྲིག་བྱེད་པ། དོ་དམ་སྲུང་སྐྱོང་གི་བྱེད་ཐབས་བརྟན་དུ་གཏོང་བ་བཅས་བྱས་ཏེ་ཚད་གཞི་མཐོ་བའི་ས་ཞིང་འཛུགས་སྐྲུན་དང་། དོ་དམ། སྲུང་སྐྱོང་། བདག་སྐྱོང་བཅས་ལམ་ལུགས་ཅན་དང་ཚན་རིག་ཅན་མངོན་འགྱུར་ཐུབ་པར་བྱས་ནས་རྣམ་གྲངས་ཀྱི་དཔལ་འབྱོར་དང་སྤྱི་ཚོགས་ཀྱི་ཕན་འབྲས་ཆེ་ཤོས་འགན་ལེན་བྱེད་ཀྱི་ཡིན”ཞེས་བསོད་ནམས་ཕུན་ཚོགས་ཀྱིས་བཤད།