“ས་ཁོངས་མཐུན་སྦྱོར་འཕེལ་རྒྱས་ཀྱི་འཐབ་ཇུས་དང་བྱེད་ནུས་ཁུལ་གཙོ་བོའི་འཐབ་ཇུས་ལག་ལེན་བསྟར་རྒྱུ་མཐའ་འཁྱོངས་ཀྱིས‘ལྟེ་བ་གཅིག་དང་། ཡུག་གཅིག རྒྱུད་གཉིས། ཁུལ་གསུམ’བཅས་ཀྱི་འཕེལ་རྒྱས་ཀྱི་བཀོད་པ་གསར་པ་ནུས་ཤུགས་ཡོད་རྒུས་གཏོད་དགོས” རང་སྐྱོང་ལྗོངས་ཀྱི“ལོ་ལྔ་ཚན་བཅུ་བཞི་པའི”འཆར་འགོད་ནང་གི་ནང་དོན་འདི་ནི་མི་སེམས་ལ་སྐུལ་མ་ཐེབས་པ་ཞིག་ཡོད། འདི་ལས་ལྷ་ས་དང་། ལྷོ་ཁ། ཉིང་ཁྲི། གཞིས་རྩེ་སོགས་ཚུད་པའི་ལྕགས་ལམ་ལམ་རྒྱུད་དང་ཡར་ཀླུང་གཙང་པོའི་རྒྱུད་ཀྱི་ས་ཁུལ་དུ་འབྱུང་འགྱུར་སྤུས་ཚད་མཐོ་བའི་འཕེལ་རྒྱས་ཀྱི་ཚ་རླབས་གསར་པ་ཞིག་འཕྱུར་སྲིད།
འདི་ལོའི་ཚོགས་འདུ་གཉིས་རིང་། “ལྟེ་བ་གཅིག་དང་། ཡུག་གཅིག རྒྱུད་གཉིས། ཁུལ་གསུམ”བཅས་ཀྱི་ས་ཁོངས་འཕེལ་རྒྱས་ཀྱི་བཀོད་པ་གསར་པར་ཞབས་འདེགས་དང་མཉམ་འདྲེས་བྱས་ཏེ། ལྗོངས་ཡོངས་ཀྱི་སྤུས་ཚད་མཐོ་བའི་འཕེལ་རྒྱས་ལ་རམ་འདེགས་ཇི་ལྟར་བྱེད་པ་ནི་ཚོགས་རའི་ཕྱི་ནང་གི་རྒྱ་ཆེའི་འཐུས་མི་དང་ཨུ་ཡོན་དང་། ལས་བྱེད་པ་དང་མང་ཚོགས་ཚོས་གྲོས་བསྡུར་འཁྲུག་པོ་བྱ་ཡུལ་དུ་གྱུར་ཡོད།
ལྷ་ས་གྲོང་ཁྱེར་སྟོད་ལུང་བདེ་ཆེན་ཆུས་སུ་གནས་པའི་གནས་ཆུང་ཁྲོམ་གཞུང་དུ་རྒྱལ་ཁབ་རིམ་པའི་ཕྱོགས་བསྡུས་ཟོག་འགྲེམས་ཁྲལ་སྲུང་གླིང་དང་། ལྷ་ས་གྲོང་ཁྱེར་དཔལ་འབྱོར་གསར་སྤེལ་ཁུལ་ཡོད་པ་དང་། རྒྱལ་ལམ་109དང་རྒྱལ་ལམ་318 མཚོ་བོད་ལྕགས་ལམ་བཅས་གནས་དེ་ནས་བརྒྱུད་དགོས་ཀྱི་ཡོད། དེ་ནི“ལྟེ་བ་གཅིག་དང་། ཡུག་གཅིག རྒྱུད་གཉིས། ཁུལ་གསུམ”བཅས་ཀྱི་ལྟེ་བ་གཅིག་གི་ནུབ་ངོས་དང་། ཡུག་གཅིག་གི་ལྟེ་བ། རྒྱུད་གཉིས་ཀྱི་འབྲེལ་ཚིགས་བཅས་རེད།
དམིགས་བསལ་གྱི་ས་བབ་ལེགས་ཆ་དང་དུས་རབས་ཀྱི་ལེགས་ཆར་གཞི་ཚུགས་ནས། གནས་ཆུང་ཁྲོམ་གཞུང་གིས“ཚང་དགོས་པ་གསུམ་དང་ཕན་འདོགས་པ་གཅིག”མཐའ་འཁྱོངས་ཀྱིས“དོན་ཆེན་བཞི”དམ་འཛིན་བྱ་གཞིར་བྱེད་པ་དང་དམངས་འཚོའི་ཁྱབ་ཁོངས་ཀྱི་གནད་དོན་གྱི་ཞན་ཆར་དམིགས་ཏེ། ཁོངས་གཏོགས་ཁུལ་གྱི་མི་དམངས་མང་ཚོགས་ཀྱི་འཚོ་བའི་ཆུ་ཚད་བརྟན་པོའི་ངང་མཐོ་རུ་བཏང་ནས། དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་བ་དང་། གྲོང་གསེབ་དར་རྒྱས་ཀྱི་སྐྱེ་ཁམས་སྡོད་མལ་ལ་འཚམ་པ་དང་ཤེས་དཔལ་ལྡན་པའི་གྲོང་ཁྱེར་གཏོད་པའི་བླང་བྱར་དམིགས་ཏེ། སྐྱེ་ཁམས་ཁོར་ཡུག་སྲུང་སྐྱོང་བྱེད་ཤུགས་ཆེ་རུ་བཏང་ནས་གྲོང་ཁྱེར་དང་གྲོང་གསེབ་མཐུན་སྦྱོར་དང་སྔོ་ལྗང་འཕེལ་རྒྱས་ཀྱི་སྔོན་སྐྱོད་ཁུལ་འཛུགས་གཏོད་ལ་སྐུལ་འདེད་བཏང་བ། འགྲིམ་འགྲུལ་མཛོད་ཉར་གྱི་ལེགས་ཆ་འདོན་སྤེལ་གང་ལེགས་བྱས་ཏེ། འཐབ་ཇུས་ཀྱི་དངོས་རྫས་གྲབས་གསོག་ཐད་བཀོད་སྒྲིག་བྱེད་ཤུགས་ཆེ་རུ་བཏང་ནས་ལྗོངས་ཡོངས་ཀྱི་མཐའ་སྟོབས་ལས་དོན་ལ་རང་ངོས་ཀྱི་སྟོབས་ཤུགས་སྐྱེས་སུ་ཕུལ་ཡོད།
“སླད་ཕྱིན་ང་ཚོས་འཕེལ་རྒྱས་ཀྱི་འཕེལ་ཕྱོགས་ཆེན་པོ་དང་མང་ཚོགས་ཀྱི་དགོས་མཁོ་ཁོང་དུ་བརྟན་པོ་ཆུད་པར་བྱས་ནས། ཐོན་ལས་འབབ་འཕར་གྱི་ལེའུ་མུ་མཐུད་ཡག་པོ་བརྩམས་ཏེ། ཁྲོམ་གཞུང་གི་གྲོང་མི་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་རྒྱུན་ཆད་མེད་པར་ཆེ་རུ་བཏང་ནས། ཚོང་ལས་དང་། སྡོད་མལ། ལས་རིགས་བཅས་དང་འཚམ་པའི་སྤྱི་ཚོགས་རིང་ལུགས་དེང་རབས་ཅན་གྱི་གནས་ཆུང་གསར་པ་གཏོད་ཆེད་འབད་འཐབ་ལྷོད་མེད་བྱེད་ཀྱི་ཡིན”ཞེས་སྟོད་ལུང་བདེ་ཆེན་ཆུས་གནས་ཆུང་ཁྲོམ་གཞུང་ཏང་གི་ལས་དོན་ཨུ་ལྷན་གྱི་ཧྲུའུ་ཅི་གཞོན་པ་དོན་གཅོད་ཁྲུའི་ཀྲུའུ་རེན་བསོད་ནམས་ཕུན་ཚོགས་ཀྱིས་དེ་ལྟར་བརྗོད།
རང་སྐྱོང་ལྗོངས་མི་དམངས་འཐུས་ཚོགས་ཀྱི་འཐུས་མི་ལྷོ་ཁ་གྲོང་ཁྱེར་རྒྱ་ཚ་རྫོང་ཞིང་ལས་དང་གྲོང་གསེབ་ཅུས་ཀྱི་ཅུས་ཀྲང་གཞོན་པ་ཀྲའོ་ཅི་ཧྥུང་གིས། “རྒྱ་ཚ་རྫོང་ནི་ལྷོ་ཁ་དང་ཉིང་ཁྲིའི་འབྲེལ་མཚམས་ཁུལ་དུ་གནས་པ་དང་། ས་བབ་བལྟོས་བཅས་ཀྱིས་དམའ་ཙམ་ཡོད་པས་གནམ་གཤིས་སྡོད་མལ་དང་འཚམ་པ་དང་། ཐོན་ཁུངས་ཕུན་སུམ་ཚོགས་པོ་ཡོད། ཡར་ཀླུང་གཙང་པོ་དང་། ལྷ་ཉིང་ལྕགས་ལམ། རྒྱལ་ལམ་560བཅས་བརྒྱུད་དགོས་ཀྱི་ཡོད་པས་དེར་ཐུན་མོང་མ་ཡིན་པའི་འཕེལ་རྒྱས་ཀྱི་ལེགས་ཆ་ལྡན་པ་དེ་ནི་ལྗོངས་ཡོངས་ཀྱི་འཕེལ་རྒྱས་ཀྱི་བཀོད་པ་གསར་པའི་འབྲེལ་ཚིགས་གལ་ཆེན་ཞིག་རེད། མ་འོངས་པར། ང་ཚོས་ཕུན་སུམ་ཚོགས་པའི་ཐོན་ཁུངས་ལ་གཞི་ཚུགས་ནས། ཞིང་འབྲོག་ལས་ཐོན་ལས་ཅན་གྱི་འཕེལ་རྒྱས་ལ་སྐུལ་འདེད་མགྱོགས་པོ་བཏང་སྟེ། ཚན་རྩལ་ཅན་དང་། ཚད་གཞི་ཅན། གཞི་ཁྱོན་ཅན་བཅས་ཀྱི་ལག་རྩལ་དང་བྱེད་ཐབས་ལ་བརྟེན་ནས་ཞིང་འབྲོག་ཐོན་ལས་ལ་ཟུར་སྣོན་རིན་ཐང་སྔར་བས་ཆེ་བ་ཐོན་པར་བྱས་ཏེ་རྒྱ་ཚའི་སྟར་ཁའི་ཐོན་ལས་དང་། ཤིང་ཏོག་ལན་མའེ་ཡི་ཐོན་ལས། ཀུ་ཤུའི་ཐོན་ལས། མི་རིགས་ལག་ཤེས་བཟོ་ལས། གྲོང་གསེབ་ཀྱི་སྐྱེ་ཁམས་ཡུལ་སྐོར་ལས་རིགས་སོགས་ཁྱད་ལྡན་ཐོན་ལས་ལྗོངས་ཡོངས་སུ་སྐད་གྲགས་ཆོད་པར་བྱས་ནས་དཔལ་འབྱོར་དང་སྤྱི་ཚོགས་ཀྱི་རིན་ཐང་དེ་བས་ཆེ་བ་འདོན་སྤེལ་བྱེད་ཀྱི་ཡིན”ཞེས་བརྗོད།
ཉེ་བའི་ལོ་ཤས་རིང་། མཐའ་མཚམས་ཀྱི་འཐབ་ས་དང་པོར་གནས་པའི་མཚོ་སྣ་རྫོང་ལེགས་པོ་རོང་སླད་མོན་པ་མི་རིགས་ཤང་གིས་མཛེས་སྡུག་ལྡན་པའི་རང་བྱུང་ཡུལ་ལྗོངས་དང་། དམིགས་བསལ་ཁྱད་ཆོས་ལྡན་པའི་མོན་པའི་མི་རིགས་ཀྱི་ཡུལ་སྲོལ་གོམས་གཤིས། སྤུས་ལེགས་ཀྱི་རི་མཐོའི་སྐྱེ་ལྡན་ཇའི་ཐོན་ཁུངས་བཅས་ལ་བརྟེན་ནས་སྐྱེ་ཁམས་ཡུལ་སྐོར་དང་ཇ་འདེབས་ཐོན་ལས་འཕེལ་རྒྱས་ཤུགས་ཆེན་བཏང་བ་དང་། གྲོང་གསེབ་ཀྱི་རྣམ་པ་གསར་རྐྱང་དུ་འགྱུར་བ་དང་མང་ཚོགས་ལ་ལོ་རེ་བཞིན་ཡོང་འབབ་མང་དུ་འགྲོ་རྒྱུར་སྐུལ་འདེད་བཏང་བར་བརྟེན། སྤྱི་ཚོགས་སུ་སྐད་གྲགས་ཆོད་ཚད་དང་མཚན་སྙན་གྲགས་རྒྱུན་ཆད་མེད་པར་ཆེ་རུ་སོང་སྟེ་མཐའ་མཚམས་ལམ་རྒྱུད་ཀྱི་འཕེལ་རྒྱས་ཀྱི་བཀྲག་མདངས་འཚེར་ས་ཞིག་ཏུ་གྱུར་ཡོད།