ཟླ་1ཚེས་4ཉིན། རང་སྐྱོང་ལྗོངས་མི་དམངས་འཐུས་ཚོགས་སྐབས་བཅུ་གཅིག་པའི་ཚོགས་འདུ་ཐེངས་ལྔ་པ་དུས་ཐོག་ཏུ་འཚོགས་ཤིང་། ས་མཐོའི་དཔལ་འབྱོར་སྤུས་ལེགས་འཕེལ་རྒྱས་འགྲོ་རྒྱུར་སྐུལ་འདེད་ཇི་ལྟར་གཏོང་བའི་ཐད་རང་སྐྱོང་ལྗོངས་མི་དམངས་འཐུས་ཚོགས་ཀྱི་འཐུས་མི་དང་ཟུར་ཞུགས་མི་སྣས་གྲོས་བསྡུར་འཁྲུག་པོ་གནང་བ་རེད།

རང་སྐྱོང་ལྗོངས་མི་དམངས་འཐུས་ཚོགས་ཀྱི་འཐུས་མི་ལྷོ་ཁ་གྲོང་ཁྱེར་རྒྱ་ཚ་རྫོང་ཞིང་ལས་གྲོང་གསེབ་ཅུས་ཏང་ཙུའུ་ཡི་ཁོངས་མི་ཅུས་ཀྲང་གཞོན་པ་ཀྲའོ་ཅི་ཕེང་གིས་སྲིད་གཞུང་གི་ལས་དོན་སྙན་སྒྲོན་ཉན་རྗེས་རང་ཉིད་ལ་སྐུལ་ལྕག་ཆེན་པོ་ཐེབས་བྱུང་ལ་ཕན་པ་ཡང་མི་དམན་པ་ཐོབ་བྱུང་ཞེས་གསུངས་པ་དང་། ཁོང་གིས“གཞི་རིམ་གྱི་ཞིང་ལས་གྲོང་གསེབ་ཁོངས་གཏོགས་ཀྱི་ལས་བྱེད་པ་ཞིག་གི་ངོས་ནས་སླད་ཕྱིན་གྱི་ལས་དོན་ཁྲོད་ང་ཚོས་ཞིང་ལས་དང་གྲོང་གསེབ་ལས་དོན་གྱི་དོན་དངོས་དང་ཟུང་འབྲེལ་དམ་ཟབ་བྱས་ཏེ། སྤུས་ལེགས་སྟར་ཁའི་ཐོན་ལས་སྔར་བས་རྒྱ་སྟོབས་ཆེ་རུ་བཏང་ནས་ད་ཡོད་ཀྱི་སྟར་ཁའི་སྡོང་རྐང་ཁྲི་50ཡི་རྨང་གཞིའི་ཐོག་སྟར་ཁའི་འདེབས་ཁྱོན་མུ་མཐུད་ཆེ་རུ་གཏོང་རྒྱུ་ཡིན། འབྲི་གཡག་དང་མཛོ་སོགས་ཕྱུགས་རིགས་གཞི་ཁྱོན་ཅན་དང་ཚད་ལྡན་ཅན་གྱི་གསོ་ཚགས་ལ་སྐུལ་འདེད་ཤུགས་ཆེན་བཏང་ནས། འབྲི་གཡག་དོ་མཉམ་ངང་བཤས་གཏོང་རྒྱུར་དམ་འཛིན་དང་། འབྲི་གཡག་གི་གོང་ཆུང་རྒྱུད་འདྲེས་བྱེད་ཤུགས་ཆེ་རུ་གཏོང་བ། ཕྱུགས་ལས་འཕེལ་རྒྱས་འགྲོ་རྒྱུར་རམ་འདེགས་བཅས་བྱས་ཏེ། ཞིང་ཁུངས་ཆེད་ལས་ལག་རྩལ་མི་སྣའི་བྱང་ཚད་སྔར་བས་མཐོ་རུ་བཏང་ནས། ‘ཞིང་གསུམ’ལས་དོན་ལ་ཞབས་འདེགས་ཡག་པོ་ཞུས་ཏེ་མཐུན་སྒྲིལ་དང་། ཕྱུག་འགྱུར། ཤེས་དཔལ། ཞི་མཐུན། མཛེས་སྡུག་བཅས་ལྡན་པའི་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་བྱེད་ཆེད་ནུས་ཤུགས་འདོན་གྱི་ཡིན”ཞེས་གསུངས་པ་རེད།

རང་སྐྱོང་ལྗོངས་མི་དམངས་འཐུས་ཚོགས་ལ་ཟུར་ཞུགས་གནང་མཁན་དང་། ཉིང་ཁྲི་གྲོང་ཁྱེར་སྤོ་བོ་རྫོང་ཨུད་ཀྱི་ཧྲུའུ་ཅི། རྫོང་དཔོན་བཅས་ཡིན་པའི་དབྱང་ལི་ཡིས་གོམ་སྟབས་རྗེས་མར་ང་ཚོས་སྲིད་གཞུང་གི་ལས་དོན་སྙན་སྒྲོན་གྱི་ནང་དོན་ཟབ་མོ་རྣམས་རྦད་དེ་ཁོང་དུ་ཆུད་པར་བྱས་ཏེ་ད་རེས་ཀྱི་ཚོགས་འདུ་གཉིས་ཀྱི་དགོངས་དོན་སློབ་སྦྱོང་དང་། དྲིལ་བསྒྲགས། ལག་བསྟར་བཅས་ཡག་པོ་བྱས་ནས། ཚོགས་འདུ་གཉིས་ཀྱི་དགོངས་དོན་སྤོ་བོ་རྫོང་གི་ཁྱིམ་ཚང་ཀུན་གྱིས་གསལ་པོ་ཤེས་ཐུབ་པའི་འགན་ལེན་བྱ་རྒྱུ་ཡིན། དེ་དང་ཆབས་ཅིག་རིག་ལྡན་ཡུལ་སྐོར་འཛུགས་སྐྱོང་ལ་སྐུལ་འདེད་ཧུར་ཐག་བཏང་སྟེ་ཁུལ་ཡོངས་ཡུལ་སྐོར་འཕེལ་རྒྱས་མྱུར་པོ་གཏོང་བ་དང་། མཛེས་ལྗོངས་ཁུལ་དང་མཛེས་ལྗོངས་ས་ཚིགས་ཀྱི་ལྷན་སྦྱར་སྒྲིག་བཀོད་འཛུགས་སྐྲུན་ལ་རྒྱུན་མཐུད་སྐུལ་འདེད་གཏོང་བ། རེས་སྐོར་གསར་པའི་Aརིམ་པའི་ཡུལ་སྐོར་མཛེས་ལྗོངས་ཁུལ་གཏོད་པའི་ལས་དོན་སྤེལ་མགྱོགས་སུ་གཏོང་བ་བཅས་བྱས་ཏེ། གསར་བརྗེའི་ཡུལ་སྐོར་དང་། མངོན་མིན་རིག་གནས་ཤུལ་བཞག་རྒྱུན་འཛིན། ལོ་རྒྱུས་ཀྱི་རྗེས་ཤུལ་སོགས་རྩེར་སོན་གྱི་མཛེས་ལྗོངས་ཁུལ་དང་མཛེས་ལྗོངས་ས་ཚིགས་དང་ཡུལ་སྐོར་ལམ་ཐིག་གཏོད་རྒྱུ་ཡིན། དེས་མ་ཟད། “2+3+1”གི་ཞིང་འབྲོག་ཁྱད་ལྡན་ཐོན་ལས་འཕེལ་རྒྱས་ཀྱི་བསམ་ཕྱོགས་ལ་དམ་པོར་དམིགས་ཏེ་དམིགས་བསལ་གྱི་ཐོན་ཁུངས་དང་ལེཌ་ཆར་བརྟེན་ནས་ཐོན་ཁུངས་བཀོད་སྒྲིག་བྱེད་ལེགས་སུ་གཏོང་བ་དང་། ཐོན་ལས་ཀྱི་སྤུས་ཚད་མཐོ་རུ་གཏོང་བ། ཇ་ལོ་འདེབས་འཛུགས་དང་བོད་ཕག་གསོ་ཚགས་ཀྱི་གཞི་ཁྱོན་ཟམ་མི་ཆད་པར་རྒྱ་ཆེར་གཏོང་བ། སྡོང་ཕུང་དང་། ཀོ་ཤ། ཤ་མོ་ལུག་གྲོད་མ་བཅས“མུའུ་ཆིག་སྟོང་བྱས་པ་གསུམ”འདེབས་པའི་དམིགས་ཚད་མངོན་འགྱུར་ཧུར་ཐག་བྱེད་པ། ཀོང་ཀྲོའུ་ཡི་ཁ་གཏད་རོགས་སྐྱོར་དང“7+2”འཛད་སྤྱོད་ཀྱི་བོད་སྐྱོར་ལས་སྟེགས་ཀྱི་ནུས་པ་གང་ལེགས་འདོན་པ་བཅས་བྱས་ཏེ་སྤོ་བོའི་ཁྱད་ཆོས་ལྡན་པའི་ཞིང་འབྲོག་ཐོན་ལས་ཀྱི་འཁོར་འབྲེལ་ཞིག་གཏོད་རྒྱུ་ཡིན་ཞེས་གསུངས་པ་རེད།

རང་སྐྱོང་ལྗོངས་མི་དམངས་འཐུས་ཚོགས་ཀྱི་འཐུས་མི་གཞིས་རྩེ་གྲོང་ཁྱེར་གཏིང་སྐྱེས་རྫོང་ཨུད་ཀྱི་ཧྲུའུ་ཅི་ཐའོ་མིང་ཅུན་གྱིས“སླད་ཕྱིན་ལས་དོན་སྤེལ་རིང་། གཏིང་སྐྱེས་རྫོང་གིས‘སྐྱེ་ཁམས་ལ་བརྟེན་ནས་རྫོང་འཛུགས་སྐྲུན་བྱེད་པ་དང་། ཞིང་འབྲོག་ལས་ལ་བརྟེན་ནས་རྫོང་གི་དཔལ་འབྱོར་བརྟན་པོ་ཡོང་བར་བྱེད་པ། རིག་གནས་ཡུལ་སྐོར་ལ་བརྟེན་ནས་རྫོང་སྐད་གྲགས་ཆོད་པར་བྱེད་པ། ཐོན་ལས་ལ་བརྟེན་ནས་རྫོང་འབྱོར་ཕྱུག་ལྡན་པར་བྱེད་པ། སྒོ་དབྱེར་བརྟེན་ནས་རྫོང་གསོན་ཤུགས་རྒྱས་པར་བྱེད་པ། ཁྲིམས་བཞིན་རྫོང་བཅོས་སྐྱོང་བྱེད་པ’བཅས་ཀྱི་འཐབ་ཇུས་ཆེན་པོ་དྲུག་ལག་ལེན་ཤུགས་ཆེན་བསྟར་ནས། གཏིང་སྐྱེས་ཀྱི་འཕེལ་རྒྱས་ཀྱི་བསམ་ཕྱོགས་དང་ཁ་ཕྱོགས་སྔར་བས་ཁ་གསལ་བཟོ་རྒྱུ་དང་། ‘ལོ་ལྔ་ཚན་བཅུ་བཞི་པའི’འཆར་འགོད་ཀྱི་རྣམ་གྲངས་གལ་ཆེན་ལ་དམིགས་པ་དང་རྨང་གཞིའི་སྒྲིག་བཀོད་ཀྱི་ཞན་ཆ་གང་མགྱོགས་བསལ་ཏེ། འཕེལ་རྒྱས་ཀྱི་འཇུར་མིག་གི་བཀག་རྒྱ་ལས་ཚད་བརྒལ་ཡོང་བར་བྱས་ནས་མང་ཚོགས་འབབ་འཕར་ཕྱུག་འགྱུར་ཡོང་བར་སྐུལ་འདེད་གཏོང་རྒྱུ། དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་རྒྱུ་དེ་གྲོང་གསེབ་དར་རྒྱས་དང་སྦྲེལ་མཐུད་ནུས་ལྡན་ཡོང་བར་སྐུལ་འདེད་ཧུར་ཐག་བཏང་སྟེ། ཐོན་ལས་འཕེལ་རྒྱས་དང་། ཆེད་ལས་མཉམ་ལས་རྩ་འཛུགས་ཀྱི་ཚད་གཞི་མཐོར་གཏོང་། ཡུལ་གཞན་དུ་གནས་སྤོས་དབུལ་སྐྱོར་གྱི་རྗེས་མཐུད་རོགས་སྐྱོར། ‘མཐོར་གཏོང་འདུ་འགོད་བཅུ’བརྟན་དུ་གཏོང་བ་སོགས་ལ་འབད་བརྩོན་བྱས་ནས་གྲོང་གསེབ་འཛུགས་སྐྲུན་གྱི་བྱ་སྤྱོད་ཧུར་ཐག་སྤེལ་རྒྱུ་བཅས་ཡིན”ཞེས་གསུངས་པ་རེད།