དུས་རབས་འཕེལ་རྒྱས་འགྲོ་བ་དང་ཆབས་ཅིག དྲ་ཐོག་ནས་ཉོ་སྒྲུབ་བྱ་རྒྱུ་ནི་མི་མང་པོ་ཞིག་གིས་དངོས་རྫས་ཉོ་བའི་གདམ་ག་ཨང་དང་པོར་གྱུར་བ་དང་། མྱུར་སྐྱེལ་བ་ཡང་ང་ཚོའི་སྟབས་བདེ་བའི་འཚོ་བའི་འཁོར་འབྲེལ་ཁྲོད་ཀྱི་མེད་དུ་མི་རུང་བའི་ལྷུ་ཚིགས་ཤིག་ཏུ་གྱུར་ཡོད་པ་རེད།
“དུས་རབས་འཕེལ་རྒྱས་འགྲོ་བ་དང་ཆབས་ཅིག་ལས་རིགས་དེར་ཁས་ལེན་བྱེད་མཁན་གྱི་མི་ཇེ་མང་དུ་གྱུར་པ་མ་ཟད། ལས་རིགས་དེ་དང་ཁ་འབྲལ་ཐབས་མེད་པར་བརྟེན། ང་རང་ཉིད་ཀྱི་ལས་ཀར་སྤོབས་པ་སྐྱེས་ཀྱི་འདུག”ཅེས་ལྷ་ས་སྦྲག་སྲིད་ཞབས་ཞུ་ཁུལ་ལྟེ་གནས་ཅུས་དཔལ་འབྱོར་གསར་སྤེལ་ལས་གཉེར་པུའི་མྱུར་སྐྱེལ་བ་བློ་བཟང་ཡེ་ཤེས་ཀྱིས་བཤད།
འདི་ལོ་ལོ་24ལ་སླེབས་པའི་བློ་བཟང་ཡེ་ཤེས་ནི་ལྷ་ས་གྲོང་ཁྱེར་མལ་གྲོ་གུང་དཀར་རྫོང་ནས་རེད། ལོ་3གྱི་དུས་ཡུན་ཁྲོད་ལས་ཁོང་མྱུར་སྐྱེལ་བ“རྒན་གྲས”ཤིག་ཏུ་གྱུར་ཡོད། “ལས་ཀར་ཐོག་མར་ཞུགས་སྐབས་ལས་ཀ་འདི་དཀའ་ཚེགས་ཆེན་པོ་རེད་སྙམ་བྱུང་། འོན་ཀྱང་རྗེས་སུ་རིམ་བཞིན་གོམས་ནས་དཀའ་ལས་ཡོད་པའི་སྣང་བ་མི་འདུག སྐབས་རེ་འཛད་སྤྱོད་པར་མྱུར་སྐྱེལ་བསྐུར་མ་འབྱོར་ནས་ཐུགས་རྗེ་ཆེ་ཞུ་སྐབས་ང་ལ་སེམས་འགུལ་ཚད་མེད་ཐེབས་ཀྱི་འདུག”ཅེས་བློ་བཟང་ཡེ་ཤེས་ཀྱིས་བཤད།
བློ་བཟང་ཡེ་ཤེས་ལོ་ན་ཆུང་ནའང་ལས་ཀའི་ཉམས་མྱོང་ཕུན་སུམ་ཚོགས་པོ་ཡོད་པ་དང་། “ཏིར་ཏིར་གླ་འཁོར”གཏོང་མྱོང་ཡོད་ལ་ཞབས་ཞུ་བ་བྱེད་མྱོང་ཡོད་པ་མ་ཟད་ད་དུང་ཟི་ལིང་དུ་གླ་པའང་རྒྱུག་མྱོང་ཡོད། རྗེས་སུ་ལོ་ན་བགྲེས་པའི་རྨོ་བོ་ལགས་ལ་ལྟ་རྟོག་བྱེད་དགོས་པར་བརྟེན། ཁོང་གིས་ལྷ་སར་མྱུར་སྐྱེལ་བ་ཞིག་བྱས་པ་རེད། མ་གཞི་དཀའ་ཚེགས་ཆེ་ཙམ་ཡོད་མོད། འོན་ཀྱང་ཁོང་བློ་ཡིད་ཧ་ཅང་ཚིམ་པོ་བྱེད་ཀྱི་ཡོད།
འདས་ཟིན་པའི་ལོའི་ནང་བསྐུར་མ་སྟོང་ཕྲག་ཁ་ཤས་སྐྱེལ་བར་ཕྱིན་ནས་མི་མང་པོ་ཞིག་ངོ་ཤེས་བྱུང་ལ་དངུལ་ཡང་མང་པོ་གསོག་ཐུབ་བྱུང་། དཀའ་ལས་ཆེ་ཙམ་ཡོད་མོད། འོན་ཀྱང་ལོ་ན་ཆུང་དུས་དཀའ་ལས་མང་ཙམ་རྒྱག་དགོས་སྙམ་གྱི་འདུག གོམ་སྟབས་རྗེས་མར་ངས་དངུལ་མང་ཙམ་བསགས་ཏེ་ལྷ་ས་གྲོང་ཁྱེར་དུ་ཁང་པ་ཞིག་ཉོས་ནས་རྨོ་བོ་ལགས་ཀྱི་ཚེ་མཇུག་གི་འཚོ་བ་དེ་བས་སྐྱིད་པོ་ཡོང་བ་བྱེད་ཀྱི་ཡིན”ཞེས་བློ་བཟང་ཡེ་ཤེས་ཀྱིས་འབྱུང་འགྱུར་ལ་རེ་བས་ཁེངས་བཞིན་དུ་བཤད།