2021ལོ་ལོ་གསར་པའི་ཤོག་སྦག་གི་སྒྲའི་ཁྲོད་ནས་ལོ་རྒྱུས་སུ་གྱུར་པ་དང་། མི་ཚེའི་འགྲུལ་བཞུད་དེ་2022ལོའི་ལོ་འགོ་གསར་དུ་ཕྱེ་བ་དང་བསྟུན་ནས་ལམ་བུ་གསར་པ་ཞིག་གི་ཕྱོགས་སུ་སྐྱོད་འགོ་ཚུགས།
2021ལོར་བོད་དུ་སྐར་ལྔའི་དར་དམར་དང་པོ་སྒྲེང་ཡུལ་འཇོ་མདའ་རྫོང་སྐམ་ཐོག་གྲོང་རྡལ་སྐམ་ཐོག་གྲོང་ཚོས། ལྟ་སྐོར་དང་སློབ་སྦྱོང་ལ་ཡོང་མཁན་ཁེ་ལས་དང་བྱ་གཞག་ཚན་པའི་ལས་དོན་མི་སྣ་དང་ཡུལ་སྐོར་བ་མང་པོ་ཞིག་བསུས།
ལོ་མང་རིང་འཇོ་མདའ་རྫོང་གིས་སྐམ་ཐོག་གྲོང་རྡལ་དེ“གསར་བརྗེའི་ཡུལ་སྐོར་བྱེད་ཡུལ”དུ་ནུས་ཤུགས་ཡོད་རྒུས་བཏོད་པ་དང་། དམག་སྡེ་བཅོ་བརྒྱད་པས་འབྲི་ཆུ་སྒྲོལ་སའི་གནས་རྙིང་དུ་དམག་སྡེ་བཅོ་བརྒྱད་པའི་འཇིམ་བརྐོས་ཆེ་གྲས་བསྐྲུན་པ། བཅིངས་འགྲོལ་དམག་གི་དེ་སྔའི་མཁར་རྫོང་དེ་གསར་བརྗེའི་དྲན་ཤེས་ཀྱི་འགྲེམས་སྟོན་ཁང་དུ་སྒྱུར་བཀོད་བྱས་པ་དང་དུས་མཚུངས། དམག་སྡེ་བཅོ་བརྒྱད་པའི་དམག་སྒར་གྱི་གནས་རྙིང་དུ་སྐམ་ཐོག་བཅིངས་འགྲོལ་སྐོར་གྱི་འགྲེམས་སྟོན་ཁང་དང་དེ་སྔའི་རྣམ་པ་ཇི་བཞིན་བསྐྲུན་པའི་དམག་སྒར་སོགས་འགྲེམས་ཁང་བསྐྲུན་ནས། འབྲེལ་ཡོད་ལོ་རྒྱུས་དང་། ཡིག་ཆ་ཚད་ལྡན་། བརྙན་པར་དཔྱད་ཡིག་སོགས་འགྲེམས་སྟོན་བྱས་ཏེ་སྔ་མའི་ལོ་རྒྱུས་གང་ལེགས་མཚོན་ཐབས་བྱས་ནས་ལྟ་སྐོར་བར་གསར་བརྗེའི་ལོ་རྒྱུས་སྔར་བས་ཤེས་རྟོགས་གང་ལེགས་ཐུབ་པ་བྱས་པ་རེད།
དཀོན་མཆོག་ནི་སྐམ་ཐོག་གྲོང་ཚོའི་གུང་ཁྲན་ཏང་ཡོན་ཞིག་ཡིན། ཁོང་གིས་ཁོམ་པ་སྤྱད་དེ་དམག་སྡེ་བཅོ་བརྒྱད་པས་འབྲི་ཆུ་སྒྲོལ་སའི་གནས་རྙིང་དུ་ལས་བྱེད་ལས་བཟོ་དང་ཡུལ་སྐོར་བར་གསར་བརྗེའི་ལོ་རྒྱུས་ཤོད་པ་དང་། དཀའ་ངལ་དང་ཉེན་ཁར་མི་སྐྲག་པ་དང་དཀའ་སྤྱད་བཟོད་བསྲན་གྱི་དམག་སྡེ་བཅོ་བརྒྱད་པའི་གཤིས་སྤྱོད་བཟང་པོ་དྲིལ་བསྒྲགས་བྱེད་ཀྱི་ཡོད། སྐམ་ཐོག་གྲོང་ཚོ་ནས་སྐམ་ཐོག་གྲོང་རྡལ་དུ་སྐྱོད་སྐབས་ལམ་བར་གྱི་གསར་བརྗེའི་གནའ་ཤུལ་ལ་སྲིད་གཞུང་ནས་སྲུང་སྐྱོང་ཡག་པོ་བྱས་པ་མཐོང་དུས། ཁོང་བློ་བདེ་པོ་ཡོང་གི་ཡོད་པ་མ་ཟད་སྤོབས་སེམས་ཤིག་ཀྱང་ངང་གིས་སྐྱེ་གི་ཡོད་པ་རེད། “འདི་ནི་སྔོན་གཤེགས་དཔའ་བོའི་ཁྲག་དྲོན་ལས་བྱུང་བའི་ས་ཆ་ཞིག་རེད། རང་ཉིད་ནི་སྒང་ཐོག་པ་ཞིག་ཡིན་པར་སྤོབས་པ་སྐྱེ་གི་འདུག”ཅེས་དཀོན་མཆོག་གིས་གསར་འགོད་པར་བཤད།
གསར་བརྗེའི་ཡུལ་སྐོར་གྱི་ཤར་རླུང་ལ་བརྟེན་ནས་སྐམ་ཐོག་གྲོང་ཚོའི“བོད་ཁྱིམ་སྤྲོ་ཁང་དུ་བསྐྱོད”ནས་རིག་གནས་ཉམས་ལེན་དང་ཞབས་ཞུ་རིམ་བཞིན་འཕེལ་རྒྱས་ཕྱིན་ཏེ་གྲོང་མིར་འབབ་འཕར་གྱི་ཐབས་ལམ་མང་དུ་ཕྱིན་ནས་ཐོབ་ཚོར་སྔར་བས་ཆེ་རུ་ཕྱིན་པ་དང་། འབྱུང་འགྱུར་གྱི་མཛེས་སྡུག་ལྡན་པའི་འཚོ་བར་རེ་བས་ཁེངས་ཡོད།