2021ལོར་རྒན་ཡོལ་ཞུས་པའི་ཤིས་ནུའུ་ནི་མངའ་རིས་ས་ཁུལ་སྒེར་རྩེ་རྫོང་ལུང་རི་གྲོང་ལྷན་གྱི་ཏང་ཀྲི་པུའི་དེ་སྔའི་ཧྲུའུ་ཅི་གཞོན་པ་རེད། 2002ལོར་ཤིས་ནུའུ་ཡིས་སྒེར་རྩེ་རྫོང་ལུང་རི་གྲོང་ལྷན་དུ་ལས་ཀ་བྱེད་འགོ་ཚུགས་པ་དང་སྐབས་དེ་དུས་ཤིས་ནུའུ་ཡང་འབྲོག་ཁུལ་ནས་རྫོང་གྲོང་དུ་སྤོས་མ་ཐག་རེད། “སྔོན་ཆད་འབྲོག་ཁུལ་གྱི་འཚོ་བ་ཧ་ཅང་སྐྱོ་པོ་ཡོད་ལ་གློག་དང་ཆུ་ཡང་མེད་པས་ལོ་ལྟར་ཞིང་འབྲོག་ཐོན་རྫས་ཁག་གཅིག་བཙོངས་པའི་ཡོང་འབབ་ཕྲན་བུ་ཡོད་པ་དེས་འཚོ་བ་འཕྱིད་ཐབས་བྱེད་དགོས་ཀྱི་ཡོད”ཅེས་ཤིས་ནུའུ་ཡིས་ཕྱིར་དྲན་བྱས་ནས་གསུངས།

རྫོང་གྲོང་དུ་སྤོས་རྗེས་ཤིས་ནུའུ་ཡིས་ལས་ལ་བརྩོན་པའི་ལག་ཟུང་ལ་བརྟེན་ནས་འབྱོར་ཕྱུག་གི་འཚོ་བ་སྐྱེལ་འགོ་ཚུགས། 2011ལོའི་ཟླ་8པར་ལུང་རི་གྲོང་ལྷན་གྱིས་ཞིང་འབྲོག་པའི་ལས་ཞུགས་མཉམ་སྡེབ་མཉམ་ལས་ཁང་བཙུགས་པ་དང་གཉེར་སྐྱོང་ཁྱབ་ཁོངས་གཙོ་བོ་ནི་སྡོད་ཁང་འཛུགས་སྐྲུན་དང་། སྔོ་ཚལ་འདེབས་འཛུགས། བོད་བཟོའི་ཁྱིམ་ཆས་བཟོ་བ་སོགས་ཡིན། 2015ལོར་ཧྲུའུ་ཅི་གཞོན་པ་ཤིས་ནུའུ་ཡིས་རང་འགུལ་ངང་ཨར་ལས་རུ་ཁག་གི་འགན་འཁུར། འབད་བརྩོན་བྱས་པ་བརྒྱུད་2016ལོར་ཨར་ལས་རུ་ཁག་གི་ཡོང་འབབ་ཁེ་གཙང་སྒོར་ཁྲི་170ཟིན་པ་དང་མང་ཚོགས་དབུལ་པོ་མི་རེར་ཆ་སྙོམས་ཡོང་འབབ་སྒོར་1050བྱུང་ཡོད། 2020ལོར་ཨར་ལས་རུ་ཁག་གིས་དྲོད་ཁང་ཉམས་བཟོའི་རྣམ་གྲངས་དང་། སྒེར་རྩེ་རྫོང་ཆ་ཚང་སློབ་ཆུང་གི་རྣམ་གྲངས། གད་སྙིགས་སྦ་ས་འཛུགས་སྐྲུན་རྣམ་གྲངས་སོགས་ཀྱི་འགན་ཁུར་ནས་ཡོང་འབབ་ཁེ་གཙང་སྒོར་ཁྲི་132བྱུང་བ་དང་མང་ཚོགས་དབུལ་པོ་མི་རེར་ཆ་སྙོམས་ཡོང་འབབ་སྒོར་980བྱུང་ཡོད་པ་རེད།

2018ལོར་ཤིས་ནུའུ་རང་སྐྱོང་ལྗོངས་སྲིད་གྲོས་ཀྱི་ཨུ་ཡོན་ལ་བདམས་པ་རེད། རྒྱུན་དུ་གཞི་རིམ་གྱི་འཐབ་ས་དང་པོར་ལས་ཀ་བྱེད་བཞིན་པའི་ཁོང་གིས་སེམས་ཁུར་ཆེ་ཤོས་དང་ཐག་གཅོད་བྱེད་འདོད་ཆེ་ཤོས་བྱེད་པ་ནི་མང་ཚོགས་དབུལ་པོའི་དབུལ་སྒྲོལ་གནད་དོན་དེ་རེད། 2019ལོར་རང་སྐྱོང་ལྗོངས་ཀྱི་ཚོགས་འདུ་གཉིས་ཀྱི་ཐོག་ཏུ་ཁོང་གིས་འབྲོག་ཁུལ་དུ་སྒྱུར་བཅོས་བྱེད་ཤུགས་ཆེ་རུ་བཏང་ནས་འབྲེལ་ཡོད་རྣམ་གྲངས་དེ་བས་མང་བ་ལག་བསྟར་བྱ་རྒྱུའི་གྲོས་གཞི་བཏོན་པ་དང་། 2020ལོར་དབུལ་སྒྲོལ་ལས་དོན་ནང་ཧུར་ཐག་ཞུགས་མཁན་ཞིང་འབྲོག་མང་ཚོགས་ལ་བྱ་དགའ་སྤྲོད་རྒྱུའི་གྲོས་གཞི་བཏོན་ནས་ཉེ་འགྲམ་གྱི་མང་ཚོགས་དེ་བས་མང་བ་ཕྱུག་པོ་ཆགས་རྒྱུར་སྣེ་ཁྲིད་ཐུབ་རྒྱུའི་རེ་བ་བྱེད་ཀྱི་ཡོད་པ་རེད།