ཉིན་ཤས་བསྟུད་མར། རང་ལྗོངས་ཀྱི་རྒྱ་ཆེའི་ལས་བྱེད་པ་དང་མང་ཚོགས་ཚོས《ཏང་གི་ལོ་བརྒྱའི་འབད་འཐབ་ཀྱི་གྲུབ་འབྲས་གལ་ཆེན་དང་ལོ་རྒྱུས་ཀྱི་ཉམས་མྱོང་སྐོར་གྱི་ཀྲུང་གུང་ཀྲུང་དབྱང་གི་གྲོས་ཆོད》སློབ་སྦྱོང་ནན་ཏན་བྱས་པ་དང་ཚང་འཛོམས་གྲོས་ཚོགས་ཀྱི་དགོངས་དོན་ལ་གོ་བ་གཏིང་ཟབ་བླངས་པ་རེད། ཚང་མས་དུས་རབས་གསར་པ་དང་རྒྱང་སྐྱོད་ཀྱི་ལམ་བུ་གསར་པའི་ཐོག་འདས་ཟིན་པའི་དཀའ་ངལ་དང་འོད་སྟོང་འཕྲོ་བའི་ལམ་བུ་མ་བརྗེད་པ་དང་། ད་ཆའི་འགན་འཁྲི་དང་ལས་འགན་ལ་ངོ་མི་གནོང་བ། འབྱུང་འགྱུར་གྱི་ཕུགས་འདུན་རླབས་པོ་ཆེ་ཆུད་ཟོས་སུ་མི་གཏོང་བ། ལོ་རྒྱུས་དཔྱད་གཞིར་འཛིན་པ། འབྱུང་འགྱུར་གཏོད་པ། དཀའ་སྤྱད་སྙིང་རུས་བྱེད་པ། བློ་ཁོག་ཆེན་པོས་མདུན་དུ་སྐྱོད་པ་བཅས་དང་བྱ་སྤྱོད་དངོས་ལ་བརྟེན་ནས་དེ་བས་མཛེས་སྡུག་ལྡན་པའི་ལེའུ་རྩོམ་རྒྱུ་ཡིན་ཞེས་བཤད་པ་རེད།
ལྗོངས་ཏང་ཨུད་རྩ་འཛུགས་པུའི་ལས་བྱེད་སློབ་གསོ་ཁྲུའི་ཁྲུའུ་ཀྲང་ཡན་ཏའོ་ཧྲོའེ་ཡིས། “ལས་བྱེད་སློབ་གསོའི་ལས་དོན་པ་ཞིག་ཡིན་པའི་ངོས་ནས་ང་ཚོས་ཚང་འཛོམས་གྲོས་ཚོགས་ཀྱི་དགོངས་དོན་སློབ་སྦྱོང་བྱ་རྒྱུ་དེ་མིག་སྔ་དང་སླད་ཕྱིན་དུས་སྐབས་ཤིག་རིང་གི་ཆབ་སྲིད་ཀྱི་ལས་འགན་གལ་ཆེན་ཞིག་ལ་བརྩི་བ་དང་། རིམ་ཁག་འགོ་ཁྲིད་ལས་བྱེད་པ་དང་རྒྱ་ཆེའི་ཏང་ཡོན་གྱི་སློབ་གསོ་གསོ་སྦྱོང་ལས་དོན་དོན་འཁྱོལ་ཡག་པོ་བྱེད་པ། ཚང་འཛོམས་གྲོས་ཚོགས་ཀྱི་དགོངས་དོན་མི་སེམས་སུ་ཟུག་རྒྱུར་སྐུལ་འདེད་ཏན་ཏིག་གཏོང་བ། རྒྱ་ཆེའི་ཏང་ཡོན་ལས་བྱེད་པར་བྱ་སྤྱོད་དངོས་དང་ལས་ཀའི་གྲུབ་འབྲས་ཀྱི་ཐོག་ནས‘སྲུང་སྐྱོང་གཉིས’མཚོན་ཐུབ་པ་བྱ་རྒྱུར་སྣེ་ཁྲིད་བྱས་ཏེ་བོད་ཀྱི་ཏང་ཡོན་ལས་བྱེད་པ་འཚར་ལོངས་དང་ཤེས་ལྡན་མི་སྣར་འགྱུར་ཆེད་སྟོབས་ཤུགས་ལེགས་སྐྱེས་སུ་འབུལ་རྒྱུ་ཡིན”ཞེས་བཤད་པ་རེད།
“སྨན་དོན་ལས་དོན་པ་ཞིག་ཡིན་པའི་ངོས་ནས་ང་ཚོས་ཏང་གི་སྐབས་བཅུ་དགུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དྲུག་པའི་དགོངས་དོན་སློབ་སྦྱོང་དང་ལག་བསྟར་ནན་ཏན་བྱེད་པ་དང་བློ་བརྟན་འགྱུར་མེད་ངང‘སྲུང་སྐྱོང་གཉིས’ཐུབ་པར་བྱས་ནས་སྨན་བཅོས་ཞབས་ཞུའི་ཆུ་ཚད་རྒྱུན་ཆད་མེད་པར་མཐོ་རུ་གཏོང་བ་དང་། སྨན་བཅོས་ཀྱི་ཁོར་ཡུག་སྔར་བས་ལེགས་སུ་གཏོང་བ། རིམས་ནད་སྔོན་འགོག་དང་ཚོད་འཛིན་དང་སྨན་བཅོས་འགན་ལེན་ལས་དོན་ནུས་ཤུགས་ཡོད་རྒུས་ཡག་པོ་སྒྲུབ་པ། བོད་ལུགས་གསོ་རིག་དང་བོད་སྨན་གྱི་ཕུལ་བྱུང་རིག་གནས་རྒྱུན་འཛིན་དང་། གསར་གཏོད། འཕེལ་རྒྱས་བཅས་ཀྱི་ལས་དོན་རྒྱུན་ཆད་མེད་པར་ཡག་པོ་བསྒྲུབས་ནས་བདེ་ཐང་བོད་ལྗོངས་བསྐྲུན་ཆེད་སྟོབས་ཤུགས་སྐྱེས་སུ་འབུལ་རྒྱུ་ཡིན”ཞེས་བོད་ལྗོངས་བོད་ལུགས་གསོ་རིག་སློབ་ཆེན་གྱི་ཞོར་གཏོགས་སྨན་ཁང་གི་ཡོན་ཀྲང་ཀྲུའུ་རེན་སྨན་པ་རྡོ་རྗེ་རིན་ཆེན་གྱིས་བཤད།
ངམ་རིང་རྫོང་སྨན་ཆེན་གྲོང་ཚོར་བཅའ་སྡོད་བོད་ལྗོངས་བོད་ལུགས་གསོ་རིག་སློབ་ཆེན་གྱི་ལས་དོན་རུ་ཁག་གི་རུ་དཔོན་ཀའོ་མིང་གིས། “ལས་དོན་རུ་ཁག་གི་གྲས་ཤིག་ཡིན་པའི་ངོས་ནས་ང་ཚོས་མང་ཚོགས་ཀྱི་ཁྲོད་དུ་སྐྱོད་པ་དང་མང་ཚོགས་ཀྱི་དགོས་མཁོ་ཤེས་རྟོགས་བྱས་ཏེ་ཞིང་འབྲོག་མང་ཚོགས་ཀྱི་འཚོ་བའི་ཆུ་ཚད་མཐོ་རུ་ཏན་ཏིག་བཏང་ནས་ཁོང་ཚོའི་འཚོ་བའི་ཁོར་ཡུག་ལེགས་སུ་གཏོང་བ་དང་། གྲོང་སྡོད་ས་ཚིགས་ཀྱི་ཡུལ་གཞན་དུ་གནས་སྤོས་དབུལ་སྐྱོར་གྱི་ལས་དོན་ཡག་པོ་བསྒྲུབ་རྒྱུར་རོགས་རམ་བྱས་ཏེ་སྲིད་ཇུས་སྒྲོག་འགྲེལ་ལ་ཤུགས་སྣོན་བརྒྱབ་ནས་ཞིང་འབྲོག་མང་ཚོགས་ཀྱིས་ཡུལ་གཞན་དུ་གནས་སྤོ་བའི་དོན་སྙིང་གལ་ཆེན་ལ་ངོས་འཛིན་གཏིང་ཟབ་ཐུབ་པར་བྱེད་པ། གྲོང་སྡོད་ས་ཚིགས་ཀྱི་ཏང་རྩ་འཛུགས་འཛུགས་སྐྱོང་ལ་ཤུགས་སྣོན་རྒྱག་རྒྱུར་རོགས་རམ་བྱས་ཏེ་ཕྱུག་འགྱུར་སྣེ་ཁྲིད་པ་ཏང་ཡོན་ལ་འཕེལ་རྒྱས་གཏོང་བ་དང་ཏང་ཡོན་ཕྱུག་འགྱུར་སྣེ་ཁྲིད་པར་གསོ་སྐྱོང་བྱས་ནས་ཞིང་འབྲོག་མང་ཚོགས་ཐུན་མོང་ཐོག་ཕྱུག་པོ་ཆགས་རྒྱུར་སྣེ་ཁྲིད་ཀྱིས་ཆེས་རྒྱ་ཆེའི་མི་དམངས་མང་ཚོགས་ཀྱི་རྩ་བའི་ཁེ་ཕན་རྒྱུན་ཆད་མེད་པར་མངོན་འགྱུར་ཡག་པོ་དང་། སྲུང་སྐྱོང་ཡག་པོ། འཕེལ་རྒྱས་ཡག་པོ་བཅས་གཏོང་རྒྱུ་ཡིན”ཞེས་བཤད་པ་རེད།
ལྷ་ས་གྲོང་ཁྱེར་སྟག་རྩེ་ཆུས་འབྲོམ་ཐོད་ཤང་གི་ལས་བྱེད་པ་ཚེང་ཡོན་ཡོན་གྱིས། དུས་རབས་གསར་པའི་མཐའ་མཚམས་ཀྱི་ཏང་ཡོན་ལས་བྱེད་པ་ཞིག་ཡིན་པའི་ངོས་ནས་ང་ཚོས་མི་དམངས་ཀྱི་ཁེ་ཕན་གོང་དུ་བཀུར་བ་དང་མི་དམངས་ཀྱི་བྱེད་པོའི་གནས་བབ་མཐའ་འཁྱོངས་ཀྱིས“བོད་སྐྱོད་པ་རྒན་གྲས་ཀྱི་སྙིང་སྟོབས”དང“ལམ་གཉིས”ཀྱི་སྙིང་སྟོབས་རྒྱུན་འཛིན་དང་དར་སྤེལ་བཏང་སྟེ་ཏང་ཡོན་གྱི་གདོང་ལེན་དཔེ་བཟང་གི་ནུས་པ་འདོན་སྤེལ་གང་ལེགས་བྱེད་པ་དང་། མདུན་གྲལ་དུ་སླེབས་པ་དང་། དོན་ཐོག་ཏུ་སྒྲུབ་ཐུབ་པ། མིག་དཔེ་འདོན་རྒྱུར་བརྩོན་ལེན་བཅས་བྱས་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་ཀྲུང་གོའི་ཕུགས་འདུན་མངོན་འགྱུར་བྱེད་ཆེད་རང་ཉིད་ཀྱི་སྟོབས་ཤུགས་ལེགས་སྐྱེས་སུ་ཧུར་ཐག་འབུལ་རྒྱུ་ཡིན་ཞེས་བཤད་པ་རེད།