ཟླ་11ཚེས་29ཉིན། ཀྲུང་གོ་གུང་ཁྲན་ཏང་བོད་རང་སྐྱོང་ལྗོངས་ཀྱི་འཐུས་མི་ཚོགས་ཆེན་ཐེངས་བཅུ་པར་ཞུགས་མཁན་འཐུས་མི་ཚོས་བློ་མཐུན་ཝང་ཅུན་ཀྲེང་གིས་གནང་བའི་སྙན་སྒྲོན་དང་དེ་བཞིན་རང་སྐྱོང་ལྗོངས་སྒྲིག་ཨུད་ཀྱི་ལས་དོན་སྙན་སྒྲོན་གྱི་ནང་དོན་ལ་དམིགས་ནས་མུ་མཐུད་ཚོགས་ཆུང་ཁག་བགོས་ཀྱིས་གྲོས་བསྡུར་གནང་བ་རེད། འཐུས་མི་ཚོས་སྙན་སྒྲོན་ལ་རྦད་དེ་མོས་མཐུན་གནང་ཞིང་། ཚང་མས་སྙན་སྒྲོན་གྱི་ནང་དོན་སློབ་སྦྱོང་ནན་ཏན་བྱེད་པ་དང་། ཏང་གི་འཐུས་མི་ཚོགས་ཆེན་གྱི་དགོངས་དོན་གྱི་ངོ་བོ་ཁོང་དུ་ཡང་དག་ཆུད་པར་བྱེད་པ། ལས་གནས་སུ་ལོག་ནས་སྒྲོག་འགྲེལ་བརྒྱུད་བསྒྲགས་དང་དོན་འཁྱོལ་ཡག་པོ་བྱེད་པ། མི་རིགས་ཁག་གི་ལས་བྱེད་པ་དང་མང་ཚོགས་ལ་མཐུན་སྒྲིལ་དང་སྣེ་ཁྲིད་བྱས་ཏེ་བསམ་བློ་དང་བྱ་སྤྱོད་ཏང་གི་འཐུས་མི་ཚོགས་ཆེན་གྱིས་གཏན་འཁེལ་བྱས་པའི་དམིགས་ཚད་ལས་འགན་དང་ལས་ཀའི་བྱ་ཐབས་ཐོག་གཅིག་གྱུར་ཏན་ཏིག་ཡོང་བར་བྱས་ནས་མཛེས་སྡུག་དང་བདེ་སྐྱིད་ལྡན་པའི་བོད་ལྗོངས་འཛུགས་སྐྲུན་དང་བསྐྱར་དར་རླབས་པོ་ཆེའི་ཕུགས་འདུན་ཐུན་མོང་ཐོག་མངོན་འགྱུར་བྱས་ནས་ཕུགས་འདུན་བཟང་པོ་དོན་དངོས་སུ་འགྱུར་བ་བྱེད་ཀྱི་ཡིན་ཞེས་གསུངས་པ་རེད།
ཝང་ཅུན་ཀྲེང་དང་། བློ་བཟང་རྒྱལ་མཚན། ཡན་ཅིན་ཧའེ། ཀྲོང་ཡན། ཁྲེན་ཡུང་ཆི། བསྟན་ཁོ། ཅང་ཅེ། པད་མ་དབང་འདུས། ལིའུ་ཅང་། ཝང་ཝུའེ་ཏུང་། དབང་ཧའེ་ཀྲོའུ། ལའེ་ཅའོ། ཀརྨ་ཚེ་བརྟན། ཤའོ་ཡིའུ་ཚའེ་བཅས་གྲོས་བསྡུར་ལ་ཞུགས་ཡོད་པ་རེད།
ཚོགས་ཆུང་ཁག་བགོས་ཀྱི་གྲོས་བསྡུར་བྱེད་རིང་ལྷ་ས་དང་། གཞིས་རྩེ། ལྷོ་ཁ། ཉིང་ཁྲི། ཆབ་མདོ། ནག་ཆུ། མངའ་རིས། ལྗོངས་ཐད་གཏོགས། བཅིངས་འགྲོལ་དམག དྲག་ཆས་ཉེན་རྟོག་བཅས་ཀྱི་འཐུས་མི་ཚོགས་པའི་འཐུས་མི་ཚོས་རང་སོ་སོའི་ལས་དོན་དངོས་དང་ཟུང་འབྲེལ་བྱས་ཏེ་འཚང་ཁ་ཤིག་ཤིག་ངང་གཏམ་བཤད་གནང་བ་དང་ཉེ་འགྲམ་གྱི་འཕེལ་རྒྱས་དང་འགྱུར་ལྡོག་མཉམ་སྤྱོད་བྱས་ནས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་ཡིད་ཆེས་དང་ཆོད་སེམས་སྔར་བས་བརྟན་དུ་གཏོང་ལུགས་གང་ལེགས་མཚོན་པར་བྱས་ཡོད།
དམིགས་བསལ་གདན་ཞུས་འཐུས་མི་དང་ཟུར་ཞུགས་མི་སྣ་ཡང་ཚོགས་ཆུང་ཁག་བགོས་ཀྱི་གྲོས་བསྡུར་ལ་ཞུགས་པ་རེད།
རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པའི་འཐུས་མི་དང་། ཆབ་མདོ་གྲོང་ཨུད་ཀྱི་རྒྱུན་ཨུ། ཁ་རུབ་ཆུས་ཨུད་ཀྱི་ཧྲུའུ་ཅི་བཅས་ཡིན་པའི་རེན་ཧོའུ་མིང་གིས། འདས་ཟིན་པའི་ལོ་ལྔའི་ནང་ཁ་རུབ་ཆུས་ལ་ཏང་འཛུགས་སྐྱོང་དང་། དཔལ་འབྱོར་འཕེལ་རྒྱས། དམངས་འཚོ་ལེགས་གཏོང་། ཁྲིམས་སྐྱོང་འཛུགས་སྐྲུན། མི་རིགས་མཐུན་སྒྲིལ། རིག་གནས་དར་རྒྱས་སོགས་ཀྱི་ཐད་གྲུབ་འབྲས་ཧ་ཅང་ཆེན་པོ་ཐོབ་ཡོད་པ་དང་། རྒྱ་ཆེའི་ལས་བྱེད་པ་དང་མང་ཚོགས་ཀྱིས་འབྱུང་འགྱུར་འཕེལ་རྒྱས་ལ་རེ་སྒུག་དེ་བས་ཆེ་བ་བྱེད་ཀྱི་ཡོད་ཅེས་གསུངས་པ་རེད།
རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པའི་འཐུས་མི་དང་ལྷོ་ཁ་གྲོང་ཁྱེར་སྣ་དཀར་རྩེ་རྫོང་ཨུད་ཀྱི་ཧྲུའུ་ཅི་བུ་རྡོ་ཡིས་བློ་མཐུན་ཝང་ཅུན་ཀྲེང་གིས་གནང་བའི་སྙན་སྒྲོན་ནི་ཚིག་ཉུང་ཞིང་དོན་ཟབ་པ་དང་། རང་ལྗོངས་ཀྱི་ཏང་གི་འཐུས་མི་ཚོགས་ཆེན་ཐེངས་དགུ་པ་འཚོགས་ཚུན་གྱི་ལས་དོན་ལ་ཕྱིར་དྲན་དང་ཕྱོགས་སྡོམ་གནང་བ། སླད་ཕྱིན་ལོ་ལྔའི་རིང་གི་ལྗོངས་ཡོངས་ཀྱི་ལས་དོན་གྱི་ལས་འགན་གཙོ་བོ་དང་འབད་འཐབ་དམིགས་ཚད་གཏན་འཁེལ་གནང་ཡོད་པས། སྙན་སྒྲོན་དེ་ནི་མི་སེམས་ལ་སྐུལ་མ་ཐེབས་པ་ཞིག་འདུག་ཅེས་གསུངས་པ་རེད།
རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པའི་འཐུས་མི་དང་། ལྷ་ས་གྲོང་ཨུད་ཀྱི་རྒྱུན་ཨུ། སྒྲིག་ཨུད་ཀྱི་ཧྲུའུ་ཅི། གྲོང་ཁྱེར་ལྟ་ཞིབ་ཨུ་ལྷན་གྱི་ཀྲུའུ་རེན་བཅས་ཡིན་པའི་ཝང་ཧུང་ཡུང་གིས“སླད་ཕྱིན་གྱི་ལས་དོན་ཁྲོད་ངས་དབང་ཆ་གཅིག་སྡུད་དང་། མ་དངུལ་མང་བ། ཐོན་ཁུངས་ཕུན་སུམ་ཚོགས་པ་བཅས་ཀྱི་ཁྱབ་ཁོངས་ལ་དམ་པོར་དམིགས་ཏེ་རུལ་སུངས་བྱེད་མི་ཕོད་པའི་ཟིལ་ཤུགས་མུ་མཐུད་རྒྱུན་འཁྱོངས་བྱེད་པ་དང་། རུལ་སུངས་བྱེད་མི་རུང་བའི་ལམ་སྲོལ་འཐུས་སྒོ་ཚང་དུ་གཏོང་བ། རུལ་སུངས་བྱེད་མི་འདོད་པའི་རང་རྟོགས་ཆེ་རུ་གཏོང་བ་བཅས་བྱས་ནས། ལས་སྒྲུབ་ལས་གཏོད་ཀྱི་རྣམ་པ་བཟང་པོ་དང་སྤྱོད་གཙང་གཞུང་དྲང་གི་ཆབ་སྲིད་ཀྱི་ཁོར་ཡུག་བཟང་པོ་གཏོད་རྒྱུ་ཡིན”ཞེས་གསུངས་པ་རེད།
གྲོས་བསྡུར་བྱེད་སྐབས་འཐུས་མི་ཚོས་ད་དུང《ཀྲུང་གོ་གུང་ཁྲན་ཏང་བོད་རང་སྐྱོང་ལྗོངས་ཀྱི་འཐུས་མི་ཚོགས་ཆེན་ཐེངས་བཅུ་པའི་འདེམས་བསྐོ་བྱ་ཐབས(འཆར་ཟིན)》ལ་གྲོས་བསྡུར་བྱས་པ་དང་འབྲེལ། 《ཀྲུང་གོ་གུང་ཁྲན་ཏང་བོད་རང་སྐྱོང་ལྗོངས་སྐབས་བཅུ་པའི་ཨུ་ཡོན་ལྷན་ཁང་གི་ཨུ་ཡོན་དང་རྗེས་སྣོན་ཨུ་ཡོན་གྱི་འོས་མིའི་གྲོས་འགོའི་མཚན་ཐོ》དང《ཀྲུང་གོ་གུང་ཁྲན་ཏང་བོད་རང་སྐྱོང་ལྗོངས་སྐབས་བཅུ་པའི་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་ཨུ་ཡོན་གྱི་འོས་མིའི་གྲོས་འགོའི་མཚན་ཐོ》བཅས་ལ་ནང་མོལ་ཡང་བྱས་པ་རེད།