ཟླ་11ཚེས་27ཉིན་གྱི་སྔ་དྲོར། བོད་རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པ་གཟབ་རྒྱས་ངང་འགོ་ཚུགས་ཤིང་། ཉིང་ཁྲི་གྲོང་ཁྱེར་གྱི་མི་རིགས་ཁག་གི་མང་ཚོགས་ཚོས་སྤྲོ་སེམས་ཆེན་པོས་ཚོགས་ཆེན་འཚོགས་པར་བསུ་བ་ཞུས་པ་དང་། ཚང་མར་ལོ་ལྔའི་རིང་ཐོབ་པའི་གྲུབ་འབྲས་ལ་མྱོང་ཚོར་ཟབ་མོ་བྱུང་བ་དང་། ཚང་མས་འབྱུང་འགྱུར་གྱི་འཕེལ་རྒྱས་ལ་དེ་བས་རེ་སྒུག་ཆེན་པོ་བྱེད་པ་མ་ཟད། གཅིག་རྗེས་གཉིས་མཐུད་ངང་ཏང་གི་འཐུས་མི་ཚོགས་ཆེན་ལ་བཅངས་པའི་བསམ་འདུན་ཟབ་མོ་དང་སྨོན་འདུན་བཟང་པོ་མཚོན་པར་བྱས་པ་རེད།

སྨན་གླིང་རྫོང་གནས་ཡུལ་ལྷོ་པ་མི་རིགས་ཤང་ཚལ་ཁྲོབ་གྲོང་ཚོར་སྐྱོད་སྐབས། ལྷོ་པའི་སྡོད་ཁང་རིག་གནས་ཀྱི་ཁྱད་ཆོས་དང་སྲོལ་རྒྱུན་ཨར་པོའི་ཉམས་འགྱུར་ཟུང་འབྲེལ་བྱས་ནས་བསྐྲུན་པའི་ཁང་པ་གཙང་ལ་མཛེས་ཤིང་། ཕྲུ་གུ་ཚོ་གྲོང་ཚོའི་ནང་དུ་རྩེད་འཇོར་རོལ་བ་དང་། རྒན་རྒོན་ཚོ་བག་ཕེབས་ངང་ཉི་མ་སྲོ་བ་སོགས་གྲོང་ཚོ་ཡོངས་སུ་བདེ་སྐྱིད་ཀྱི་རྣམ་པས་ཁེངས་འདུག

“ཆུང་དུས་ང་ཚོ་ལྷོ་པ་རིགས་ནི་རི་ལ་བསྡད་དེ་རྔོན་རྒྱག་པ་དང་རི་ནས་བསྒྲུགས་པའི་རི་སིལ་ལ་བརྟེན་ནས་འཚོ་ཐབས་བྱེད་ཀྱི་ཡོད་ལ། ཁྱིམ་ཚང་གཅིག་གི་རྒན་གཞོན་ཚང་མ་ཤིང་ཆ་དང་རྡོ་བརྩིགས་པའི་ཁང་པར་འཚང་ཁ་བརྒྱབ་ནས་སྡོད་ཀྱི་ཡོད། ད་ཆ་གྲོང་ཚོའི་དུད་ཚང་42ཚང་མ་རི་ནས་སྤོས་ཟིན”ཞེས་ཚལ་ཁྲོབ་གྲོང་ཚོའི་ལྷོ་པ་རིགས་ཀྱི་ཏང་ཀྲི་པུའི་ཧྲུའུ་ཅི་ཟླ་པོར་གྱིས་ངོ་སྤྲོད་བྱས་ཤིང་། ཁོང་གིས་2019ལོར་མཐའ་མཚམས་ཀྱི་འབྱོར་འབྲིང་གྲོང་ཚོ་སྐྲུན་པའི་གོ་སྐབས་དང་བསྟུན་ནས། ཚལ་ཁྲོབ་གྲོང་ཚོར་ཨར་འདམ་གྱི་ལམ་བཟོས་པའི་ཁར་མི་སེར་ཚོས་ད་དུང་མ་དངུལ་བསྡུས་ནས་སྔར་བས་ཡངས་ཤིང་དཀར་ཆ་དོད་པའི་ཁང་པ་གསར་པ་བསྐྲུན་པ་དང་། ཁྱིམ་དུ་གློག་ཆས་སྣ་ཚོགས་ཡོད་ལ། ཁྱིམ་ཚང་མང་པོས་འཇིབ་ཆུང་ཉོས་པ་མ་ཟད། གྲོང་ཚོར་ད་དུང་རིག་གནས་བྱེད་སྒོའི་ཐང་ཆེན་དང་འཕྲོད་བསྟེན་ཁང་སོགས་རྨང་གཞིའི་སྒྲིག་བཀོད་ཀྱང་སྒྲིག་སྦྱོར་བྱས་ཡོད” “ད་ཆ་ངའི་བསམ་འདུན་ཆེ་ཤོས་ནི་ཚལ་ཁྲོབ་ལུང་ཤུར་ལྷོ་པའི་རིག་གནས་ངོམ་སྟོན་གྱི་སྐར་ཁུང་ཞིག་ཏུ་གཏོད་རྒྱུ་དེ་ཡིན”ཞེས་བཤད།