ཀྲུའུ་ཏུང་དབྱིང་། བོད་རིགས། 1928ལོའི་ཟླ་3པར་སྐྱེས། སི་ཁྲོན་འབའ་ཐང་གི་མི་ཡིན། 1951ལོའི་ཟླ་2པར་ལས་ཀར་ཞུགས་པ་དང་ལོ་དེར་དམག་ནང་ཞུགས་ཏེ་ཀྲུང་གོ་མི་དམངས་བཅིངས་འགྲོལ་དམག་གི་དམག་སྡེ་བཅོ་བརྒྱད་པའི་ཧྲི་ཤོག་52ཀྱི་ཐོན་ཤོག་157གྱི་རིག་རྩལ་ལས་དོན་པ་བྱས་ནས་དཔུང་སྡེ་དང་མཉམ་དུ་བོད་ཞི་བས་བཅིངས་འགྲོལ་གཏོང་བའི་ལས་དོན་ནང་ཞུགས་ཏེ། བོད་དུ་དཔུང་སྐྱོད་བྱེད་མཁན་ཁག་དང་པོའི་བུད་མེད་དམག་མིའི་གྲས་ཤིག་ཏུ་གྱུར། ཀྲུའུ་ཏུང་དབྱིང་གིས་སྔ་རྗེས་སུ་སྤོ་བོ་རྫོང་ཡིད་འོང་ཞིང་ར་དང་། ལྷ་ས་ལས་དོན་ཨུ་ལྷན་རྩ་འཛུགས་པུའུ། དེ་སྔའི་ནག་ཆུ་ས་ཁུལ་སྦྲ་ཆེན་རྫོང་བཅས་སུ་ལས་ཀ་བྱེད་མྱོང་ཡོད། 1983ལོར་ཀྲུའུ་ཏུང་དབྱིང་སྦྲ་ཆེན་རྫོང་ནས་རྒན་ཡོལ་ཞུས་ཏེ་ནང་སར་ལོག་པ་དང་ད་ལྟ་ཧོ་ནན་ཀྲེང་ཀྲོའུ་རུ་བཞུགས་ཡོད།

བོད་ཀྱི་ལོ་ངོ་70ཡི་འཕེལ་རྒྱས་དང་འགྱུར་ལྡོག་ཆེན་པོར་ཕྱིན་དྲན་བྱེད་སྐབས། བོད་འདི་ཉིད་དབུལ་ཕོངས་ནས་འོད་སྟོང་འཕྲོ་བའི་ལམ་དུ་འདྲེན་མཁན་གྱི་གསར་འབྱེད་པ་དང་། ལེགས་སྐྱེས་པ། སྲུང་སྐྱོང་པ་བཅས་ཡིན་པའི་དམག་སྡེ་བཅོ་བརྒྱད་པའི་འཐབ་འཛིང་པ་རྣམས་ཀྱིས་ལ་ཀླུང་རེ་རེ་བཞིན་བརྒལ་ནས་ཁ་བ་བུ་ཡུག་ལ་མ་འཛེམས་ཤིང་། ཁྲག་འདོན་དང་རང་སྲོག་བློས་གཏོང་ལ་མི་སྐྲག་པར་བོད་དུ་དཔུང་སྐྱོད་བྱས་ཏེ་བོད་ཞི་བས་བཅིངས་འགྲོལ་བཏང་བས་གཞི་ནས་ང་ཚོའི་ད་ཆའི་བདེ་སྐྱིད་ལྡན་པའི་འཚོ་བ་སྐྱེལ་རྒྱུ་བྱུང་།

ཆུང་དུས་ནས་ཕ་མ་གཉིས་ཀ་མེད་པའི་ཀྲུའུ་ཏུང་དབྱིང་ནི་ཁྱིམ་ནང་གི་གཅེན་གཅུང་བཞིའི་ཁྲོད་ཀྱི་རྒན་ཤོས་ཡིན་པ་དང་། དམག་ནང་ཞུགས་པའི་ཉིན་གཉིས་པར་ཀྲུའུ་ཏུང་དབྱིང་གིས་དཔུང་སྡེ་དང་མཉམ་དུ་བོད་དུ་དཔུང་སྐྱོད་བྱས། བོད་སྐད་ཤེས་སྟབས་ཁོང་དཔུང་སྡེའི་འགོ་ཁྲིད་ཀྱིས་སྐད་སྒྱུར་བྱེད་དུ་བཅུག་སྟེ་སྐུལ་སློང་དང་དྲིལ་བསྒྲགས་ལས་དོན་སྤེལ། སྐབས་དེ་དུས་ཁོང་དང་བོད་དུ་ཡོང་མཁན་གྲས་སུ་ད་དུང་འབའ་ཐང་རྫོང་གི་བུ་མོ་20ལྷག་ཙམ་ཡོད་པ་རེད།

སྐབས་དེ་དུས་ཀྱི་ལོ་ཟླར་ཕྱིར་དྲན་བྱེད་སྐབས་ཐག་རྐྱང་བརྒྱུད་འབྲི་ཆུ་བརྒལ་དགོས་པ་དེ་ནི་ཀྲུའུ་ཏུང་དབྱིང་གི་ཡིད་ལ་བག་ཆགས་ཟབ་ཤོས་ཡིན་ཞིང་། ཐེངས་ཤིག་ཁོང་ཚོ་ཆུ་བོ་དྲག་ཏུ་རྒྱུག་པའི་གྲོག་རོང་ཞིག་བརྒྱུད་སྐབས་ངོགས་གཉིས་སུ་བཏགས་པའི་ཐག་པ་ཞིག་ལ་འཐམས་ཏེ་སྒལ་པར་རྒྱ་མ་བཅུ་ཕྲག་ཁ་ཤས་ཀྱི་དངོས་པོ་ཁྱེར་ནས་གོམ་པ་རེ་རེ་བཞིན་དཀའ་ཚེགས་ཆེན་པོས་མདུན་སྐྱོད་བྱས་པ་དང་། གལ་ཏེ་ལག་པ་ཤོར་ཚེ་དྲག་ཏུ་རྒྱུག་པའི་ཆུ་ནང་དུ་ལྷུངས་ཉེན་ཡོད།

རང་ཉིད་ཀྱི་འཐབ་གྲོགས་ཆུས་འཁྱེར་བ་དངོས་སུ་མཐོང་ཡང་བྱ་དཀའ་བྱེད་གཏད་དུ་གྱུར་བ་དེ་ནི་ཀྲུའུ་ཏུང་དབྱིང་གི་སྡུག་བསྔལ་བཟོད་དུ་མེད་པའི་དྲན་ཤེས་ཤིག་རེད།

རིག་རྩལ་དམག་མི་ཡིན་པའི་ཀྲུའུ་ཏུང་དབྱིང་དང་ཁོང་ཚོས་ལམ་བར་དཔུང་སྡེ་དང་མཉམ་དུ་བསྐྱོད་དེ་ལམ་རྒྱུད་ཀྱི་མང་ཚོགས་ལ་གུང་ཁྲན་ཏང་གི་སྲིད་ཇུས་དང་བཅིངས་འགྲོལ་དམག་བོད་དུ་དཔུང་སྐྱོད་བྱེད་པའི་དམིགས་ཡུལ་དང་ལས་འགན་སྒྲོག་འགྲེལ་བྱས། གུང་ཁྲན་ཏང་གི་དཔུང་སྡེ་དེར་ཐོག་མར་མང་ཚོགས་ཚོ་སྐྲག་སྣང་དང་ཡ་མཚན་སྐྱེ་བཞིན་ཁོང་ཚོས་ཞིང་བྲན་བདག་པོ་ལྟར་མི་སེར་ལ་གཉའ་གནོན་བྱེད་དོགས་ཀྱི་སེམས་ཁྲལ་བྱུང་བ་དང་ཁོང་ཚོ་ཡང་སྙིང་བོད་དུ་ཡོང་དོན་གང་ཡིན་མིན་ཐད་ཡ་མཚན་སྐྱེས། ཀྲུའུ་ཏུང་དབྱིང་དང་རིག་རྩལ་ལས་དོན་ཚོགས་པའི་བུ་མོ་ཚོས་མང་ཚོགས་ལ་བསམ་བློའི་སློབ་གསོ་བརྒྱབ་པ་དང་ཁོང་ཚོས་གུང་ཁྲན་ཏང་དང་བཅིངས་འགྲོལ་དམག་གི་སྲིད་ཇུས་དྲིལ་བསྒྲགས་བྱས་ཤིང་། ལམ་རྒྱུད་མང་ཚོགས་ཀྱིས་མི་འདོད་པའི་རྣམ་འགྱུར་འཛིན་པ་ནས་བཅིངས་འགྲོལ་དམག་ལ་དང་ལེན་དང་། བསམ་ཤེས། རྒྱབ་སྐྱོར་བཅས་བྱེད་པའི་བར་འགྱུར་ལྡོག་འགྲོ་བ་མཐོང་སྐབས་ཀྲུའུ་ཏུང་དབྱིང་ཧ་ཅང་དགའ་པོ་བྱུང་ཡོད།

ཀྲུའུ་ཏུང་དབྱིང་གི་བཟའ་ཟླ་ཀུའོ་ཅ་ཞང་ནི་ཧོ་ནན་ཞིང་ཆེན་ཕུང་ཆིའུ་ནས་ཡིན་པ་དང་། དུས་རབས་གོང་མའི་ལོ་རབས་40པར་དམག་ནང་ཞུགས་ཏེ་གྲགས་ཅན་གཡུལ་འགྱེད་མང་པོར་ཞུགས་མྱོང་བ་དང་ཁོང་ནི་གཡུལ་འགྱེད་དཔའ་བོ་ཞིག་རེད། 1953ལོར་ཁོང་གཉིས་གཉེན་སྒྲིག་བྱས་ཏེ་རིང་པོར་མ་ཐོགས་པར་ཁོང་རྩ་འཛུགས་ཀྱིས་ལྷ་སའི་ལས་དོན་ཨུ་ལྷན་རྩ་འཛུགས་པུའུ་རུ་ལས་བགོས་བརྒྱབ་པ་དང་ཀུའོ་ཅ་ཞང་ཁྲུང་ཆིང་དུ་སློབ་སྦྱོང་བྱེད་པར་མངགས།

ཁྲུང་ཆིང་དུ་སློབ་སྦྱོང་བྱེད་མཇུག་འགྲིལ་ནས་བོད་དུ་ལོག་རྗེས་ཀུའོ་ཅ་ཞང་གིས་དཀའ་ཚེགས་ཆེ་ཤོས་ཀྱི་སར་ལས་ཀ་བྱེད་དུ་འགྲོ་རྒྱུའི་རེ་ཞུ་བྱས། སྐབས་དེ་དུས་ཞི་བས་བཅིངས་འགྲོལ་བཏང་མ་ཐག་པའི་བོད་ཀྱི་ས་ཆ་ཁག་ཏུ་ས་ཁུལ་འཛུགས་སྐྲུན་བྱེད་དགོས་སྟབས་ཤེས་ལྡན་པ་མང་པོ་གཞི་རིམ་དུ་ལས་དོན་སྤེལ་བར་འགྲོ་དགོས་ཀྱི་ཡོད། བོད་ཤར་རྒྱུད་དུ་གནས་པའི་སྦྲ་ཆེན་རྫོང་ནི་ས་བབ་ཅུང་མཐོ་བ་དང་ཆ་རྐྱེན་དཀའ་ཚེགས་ཆེ་བས་ཤེས་ལྡན་པ་ཁ་ཐང་པོ་ཡོད། ཀུའོ་ཅ་ཞང་གིས་རང་འགུལ་ངང་རེ་ཞུ་བྱས་པར་བརྟེན་རྩ་འཛུགས་ཀྱིས་ཁོང་སྦྲ་ཆེན་རྫོང་དུ་ལས་བགོས་བརྒྱབ། བཟའ་ཟླའི་ལས་ཀར་རྒྱབ་སྐྱོར་བྱ་ཆེད་ཀྲུའུ་ཏུང་དབྱིང་གིས་ཀྱང་སྦྲ་ཆེན་དུ་འགྲོ་རྒྱུའི་རེ་ཞུ་ཕུལ།

ཀྲུའུ་ཏུང་དབྱིང་དང་བཟའ་ཟླས་བོད་དུ་ལོ་30ཏག་ཏག་བསྡད་པ་དང་དེའི་རིང་ཁོང་གཉིས་པོར་ཕྲུ་གུ་བདུན་སྐྱེས་པ་དང་ཆ་རྐྱེན་དཀའ་ཚེགས་ཆེ་བའི་དབང་གིས་ཕྲུ་གུ་གཉིས་ལོ་མ་འཁོར་བར་གྲོངས། ཁྱོ་ཤུག་གཉིས་པོས་འུ་ཐུག་ཐབས་ཟད་འོག་ཕྲུ་གུ་གཞན་ལྔ་པོ་དེ་དག་ཕ་ཡུལ་དུ་ཡོད་པའི་སྤུན་མཆེད་ལ་བཅོལ་ནས་རང་ཉིད་མུ་མཐུད་བོད་འཛུགས་སྐྲུན་ནང་ཞུགས།

ལོ་ཤས་གོང་ཀུའོ་ཅ་ཞང་ཚེ་ལས་འདས། ལོ་ངོ་བཅུ་ཕྲག་ཁ་ཤས་རིང་སྐྱིད་སྔོན་མོའི་ཆུ་ལ་མཉམ་འཐུང་དང་སྡུག་ལ་ཁའི་རྩྭ་ལ་མཉམ་ཟ་བྱས་པའི་ལོ་ཟླར་ཕྱིན་དྲན་བྱེད་སྐབས། ཀྲུའུ་ཏུང་དབྱིང་གིས་གཉེན་སྒྲིག་བྱས་རྗེས་བཟའ་ཟླས་རང་ཉིད་ལ་ཧ་ཅང་བྱམས་པོ་ཡོད། ཁོང་ལོ་ན་གཞོན་སྐབས་རང་རེའི་ཏང་གི་གསར་བརྗེའི་བྱ་གཞག་ཆེད་ལེགས་སྐྱེས་མངོན་གསལ་དོད་པོ་ཕུལ་མྱོང་ལ་བྱས་རྗེས་གྲངས་མེད་འཇོག་མྱོང་ཡོད། རྣམ་ཀུན་འཚོ་བའི་ཁྲོད་ཁོང་ནི་ཁྱིམ་ཚང་སྐྱོང་མཁས་ཀྱི་བཟའ་ཟླ་ཡག་པོ་དང་པ་ཕ་ཡག་པོ་ཞིག་རེད་ཅེས་བརྗོད།

ཀྲུའུ་ཏུང་དབྱིང་གིས་གསར་འགོད་པར་ད་ཆ་འཚོ་བའི་ཆ་རྐྱེན་ཡག་ཏུ་སོང་ནས་ཟས་གོས་ཀྱི་སེམས་ཁྲལ་མེད་ལ་ལོ་གསར་དང་དུས་ཆེན་གཏོང་སྐབས་ཕྲུ་གུ་དང་མཉམ་འཛོམས་བྱ་རྒྱུ་ནི་ངའི་དགའ་སྣང་ཆེ་ཤོས་དེ་ཡིན་ཞེས་བརྗོད།

སྐབས་དེ་དུས་བོད་དུ་སྐྱོད་སྐབས་ཀྱི་དཀའ་ཚེགས་ཀྱི་དུས་དེར་དྲན་གསོ་བྱེད་པ་དང་ད་ཆའི་བོད་ཀྱི་ཕྱོགས་བཞི་མཚམས་བརྒྱད་དུ་ཤར་གཏོང་ཐུབ་པའི་འགྲིམ་འགྲུལ་སྐྱེལ་འདྲེན་དྲ་བར་ལྟ་སྐབས། བགྲེས་སོང་ཁོང་གིས“ལོ་ངོ་70ཡི་འཕོ་འགྱུར་ཆེན་པོ་དེ་ལྟ་བུ་ནི་འབད་འཐབ་པ་གྲངས་མེད་ཀྱིས་ཐུན་མོང་ཐོག་གསར་གཏོད་བྱས་པ་ཞིག་ཡིན་པས་ང་ཚོས་ད་ཆའི་བདེ་སྐྱིད་ལྡན་པའི་འཚོ་བར་གཅེས་སྤྲས་བྱེད་དགོས”ཞེས་མྱོང་ཚོར་ཟབ་མོས་བརྗོད།