ཝང་ཧུའེ་ཧྲེན། ཕོ། ཧུད་རིགས། 1950ལོར་པེ་ཅིང་གི་ཁྱིམ་ཚང་དཀྱུས་མ་ཞིག་ཏུ་སྐྱེས། 1967ལོར་ལས་ཀར་ཞུགས། ཀྲུང་གུང་ཏང་ཡོན་ཡིན། སྔ་རྗེས་སུ་མངའ་རིས་ས་ཁུལ་སྡེ་ཚོགས་ཨུ་ལྷན་གྱི་ཧྲུའུ་ཅི་གཞོན་པ་དང་། ས་ཨུད་དྲིལ་བསྒྲགས་པུའི་པུའུ་ཀྲང་། བརྙན་འཕྲིན་ལས་ཁུངས་ཀྱི་ཐའེ་ཀྲང་། ས་ཨུད་ཏང་གི་སློབ་གྲྭའི་སློབ་སྤྱི་གཞོན་པ། ས་ཁུལ་སྲིད་གྲོས་ཀྱི་ཀྲུའུ་ཞི་གཞོན་པ་སོགས་ཀྱི་འགན་འཁུར། 1994ལོར། ཝང་ཧུའེ་ཧྲེང་དང་ཁུང་ཧྥན་སེན་གཉིས“རྒྱལ་ཡོངས་ཀྱི་མི་རིགས་མཐུན་སྒྲིལ་དཔེ་བཟང”ལ་བདམས། བོད་རང་སྐྱོང་ལྗོངས་ཏང་ཨུད་ཀྱིས་ཝང་ཧུའེ་ཧྲེང་ལ“ཕུལ་བྱུང་གུང་ཁྲན་ཏང་ཡོན”གྱི་གཟི་བརྗིད་མཚན་སྙན་གནང་།

1967ལོར། ཝང་ཧུའེ་ཧྲེང་གིས་ཏང་ཀྲུང་དབྱང་གི“རི་ཁུལ་དང་གྲོང་གསེབ་ཏུ་འགྲོ་བའི”འབོད་སྐུལ་དང་ལེན་ཧུར་ཐག་ཞུས་ནས་ཧེ་ལུང་ཅང་གཞུང་བཙུགས་སྐར་བདུན་ཞིང་རའི་ཐོན་སྐྱེད་རུ་ཁག་བཅུ་བདུན་པར་བསྐྱོད་དེ་མཐའ་མཚམས་འཛུགས་སྐྲུན་ནང་ཞུགས། ཐོན་སྐྱེད་རུ་ཁག་ནང་ཝང་ཧུའེ་ཧྲེང་ལ་མིང་འདོགས་ཤིག་ཡོད་པ་སྟེ“སྲོག་འབེན་བཙུགས”ཞེས་བརྗོད་ཀྱི་ཡོད་པ་དེ་ནི་སྐབས་དེའི“པེ་ཏེ་ཧོང་དུ་སྐྱོད་རོགས”ཚོས་བཏགས་པ་ཞིག་ཡིན། དེའི་རྒྱུ་མཚན་ནི་ཁོང་གིས་ལས་ཀ་དང་ངལ་རྩོལ་བྱེད་སྐབས་སྔར་ནས་བཟུང་རང་སྲོག་འབེན་དུ་བཙུགས་ཕོད་པའི་རྐྱེན་གྱིས་རེད། སྐབས་དེ་དུས་ཐོན་སྐྱེད་རུ་ཁག་གི་ཆ་རྐྱེན་རྗེས་ལུས་ཡིན་པས་ས་ཆ་ཁག་ནས་དབོར་བའི་ཤིང་ཆ་དང་། ངར་ལྕགས་རྒྱུ་ཆ། འཕྲུལ་ཆས། ཨར་འདམ། ཤེལ་སྒོ རྡོ་སོལ་སོགས་ཚང་མ་ཕྲག་པར་འཁུར་ནས་དབོར་དགོས་ཀྱི་ཡོད། གྲུ་ཐོག་ནས་ཕྲག་པར་ཁུར་ཏེ་མཚོ་ཁར་སྐྱེལ་དགོས་ཀྱི་ཡོད་པས། ཤེད་ཤུགས་ཆེ་བའི་ངལ་རྩོལ་འདི་ལྟ་བུའི་ཁྲོད་དུ་ཝང་ཧུའེ་ཧྲེང་གིས་སྔར་ནས་བཟུང་ལས་ཀ་སྔ་ཤོས་དང་མཇུག་ཤོས་བར་བྱེད་ཀྱི་ཡོད།

1976ལོར། མཐའ་མཚམས་སུ་གཞོན་ནུ་ཤེས་ཡོན་ཅན་གྲོང་ཁྱེར་དུ་ཕྱིར་ལོག་པའི་ཚ་རླབས་ཤིག་འཕྱུར། འོན་ཀྱང་གྲོང་ཁྱེར་དུ་ཕྱིར་ལོག་པའི་གོ་སྐབས་ཐེངས་མང་དོར་བའི་ཝང་ཧུའེ་ཧྲེང་གི་དད་སེམས་དང་གཤིས་རྒྱུད་ལ་ཤུགས་རྐྱེན་ཐེབས་མེད་པར་མེས་རྒྱལ་ལ་ཁོང་མཁོ་ཤོས་ཀྱི་ས་ཆ་ཞིག་ཡོད་ངེས་རེད་སྙམ། སྐབས་དེ་དུས་ཁོང་གིས་ཧར་པིན་དགེ་འོས་སློབ་གླིང་གིས་ཆེད་མངགས་བོད་ལ་དགེ་རྒན་གསོ་སྐྱོང་བྱེད་པའི་བོད་སྐྱོར་འཛིན་གྲྭ་ཞིག་འཛུགས་རྩིས་ཡོད་པ་ཐོས་རྗེས་འགྲོ་རྒྱུའི་བསམ་བློ་འཁོར། འཐབ་གྲོགས་ཚོས་ཁོང་ལ་ལོ་བཅུ་ལྷག་ཙམ་དཀའ་བ་སྤྱད་པས་པེ་ཅིང་དུ་ཕྱིར་ལོག་པའི་ཉིན་ཤར་དུས་ཡིན་གཅིག་དཀའ་ཚེགས་དེ་བས་ཆེ་བའི་བོད་དུ་བསྐྱོད་དགོས་དོན་ཅི་ཞིག་ཡིན་ཞེས་ཁ་ཏ་བསླབ་བྱ་བྱས། འོན་ཀྱང་མི་སུ་ཞིག་གིས་ཁ་ཏ་བསླབ་བྱ་བྱས་ཀྱང་ཝང་ཧུའེ་ཧྲེང་གི་བསམ་བློར་འགྱུར་ལྡོག་གཏོང་ཐུབ་མེད། དགའ་རོགས་ལི་ཅིང་གིས་ཁོང་ལ་རྒྱུས་མངའ་ཆེན་པོ་ཡོད་པས་བློ་རྩ་བརྟན་པོའི་སྒོ་ནས་རྒྱབ་སྐྱོར་བྱ་རྒྱུ་ལས་ཐབས་ཤེས་གཞན་གང་ཡང་བྱུང་མེད། ལོ་ཁ་ཤས་སོང་རྗེས་ལི་ཅིང་གིས་ཀྱང་ཝང་ཧུའེ་ཧྲེང་གི་རྗེས་སུ་འབྲངས་ནས་བོད་དུ་ཡོང་། 1979ལོའི་ཟླ་6པར་ཝང་ཧུའེ་ཧྲེང་གི་བོད་སྐྱོར་འཛིན་གྲྭའི་སློབ་སྦྱོང་མཇུག་འགྲིལ། རྒྱལ་ཡོངས་ཀྱི་གཞོན་ནུ་ཤེས་ཡོན་ཅན་ཁྲི་སྟོང་མང་པོ་སྔ་རྗེས་སུ་གྲོང་ཁྱེར་དུ་ཕྱིར་ལོག་པའི་ཚ་རླབས་འཕྱུར་བའི་ཁྲོད་ཁོང་གིས་ཐེ་ཚོམ་སྤུ་ཙམ་མེད་པར་གངས་ལྗོངས་ས་མཐོའི་ལམ་བུའི་ཐོག་བསྐྱོད་ནས་ལྷ་ས་གྲོང་ཁྱེར་སློབ་གསོ་ཅུས་མི་དོན་ཚན་ཁག་ཏུ་ལས་ཀ་བྱས། ཁོང་གིས་རེ་བ་ཡང་ཡང་ཞུས་པ་བརྒྱུད་1981ལོའི་ཟླ་12པར་ཝང་ཧུའེ་ཧྲེང་བོད་ཀྱི་དཀའ་ཚེགས་ཆེ་ཤོས་ཀྱི་མངའ་རིས་ས་ཁུལ་དུ་ལས་ཀ་བྱེད་པར་བསྐྱོད་རྒྱུའི་བསམ་དོན་ལྷུན་བཞིན་བསྒྲུབས། མངའ་རིས་ས་ཁུལ་གྱི་འགྲིམ་འགྲུལ་སྟབས་བདེ་མེད་ལ་ཡུལ་སྲོལ་གོམས་གཤིས་མི་འདྲ་བ་དང་སྐད་བརྡ་མི་འཕྲོད་པས་ཐོག་མར་ཁོང་ལ་ངོ་ཤེས་དང་གྲོགས་པོ་གཅིག་ཀྱང་མེད།

ཝང་ཧུའེ་ཧྲེང་བོད་དུ་སླེབས་ནས་ཟླ་ཁ་ཤས་སོང་རྗེས་ཧེ་ལུང་ཅང་ནས་ཁོང་ལ་ལྟ་བར་ཡོང་བའི་དགའ་རོགས་ལི་ཅིང་གཉིས་བོད་དུ་གཉེན་སྒྲིག་གི་འགྲོ་ལུགས་གཉེར། གཉེན་སྒྲིག་བྱས་རྗེས་བཟའ་ཟླ་མུ་མཐུད་ཧེ་ལུང་ཅང་དུ་ལས་ཀར་བསྐྱོད་པས་དུས་དེ་ནས་བཟུང་ཁོང་གཉིས་ཀྱིས་དུས་ཡུན་རིང་པོ་ས་ཆ་གཉིས་སུ་འཚོ་བ་སྐྱེལ་འགོ་བརྩམས། 1993ལོར་བཟའ་ཟླ་ལི་ཅིང་ལས་ཤོར་བྱས་རྗེས་མངའ་རིས་སུ་ཡོང་བས་རྩ་འཛུགས་ཀྱིས་ཁོང་ལ་ལས་ཀ་བཀོད་སྒྲིག་བྱ་རྒྱུའི་བསམ་བློ་བཏང་ཡང་ཝང་ཧུའེ་ཧྲེང་གིས་བཟའ་ཟླའི་ལོ་ཚད་ཅུང་ཆེ་བས་ལས་གནས་ན་གཞོན་ཚོར་སྤྲོད་དགོས་ཞེས་བཤད། ལི་ཅིང་གིས་རང་གི་བཟའ་ཟླར་སྐྱོན་འཛུགས་མ་བྱས་པར་རང་གིས་ཐབས་ཤེས་བཏང་ནས་སྲན་མྱུག་འཚོང་འགོ་ཚུགས་པ་དང་ཆབས་ཅིག་དྲོད་ཁང་འགན་གཙང་བླངས་ནས་ཤ་མོ་བཏབ། ཝང་ཧུའེ་ཧྲེང་གིས་བཟའ་ཟླར་ཚལ་གོང་གཞན་ལས་མཐོ་བ་བྱེད་མི་རུང་བའི་དམིགས་བསལ་གྱི་གཏན་འབེབས་བཟོས། ཝང་ཧུའེ་ཧྲེང་གིས་མངའ་རིས་རང་གི་ཁྱིམ་དུ་བརྩིས་ནས་ལས་ཀ་བྱེད་རིང་རང་གི་ཁྱབ་ཁོངས་ཡིན་མིན་ལ་མ་བལྟོས་པར་ལས་ཀ་ཚང་མ་བྱེད་པ་མ་ཟད། ཐ་ན་རང་སྲོག་ཀྱང་བློས་གཏོང་ཐུབ་ཀྱི་ཡོད། ས་ཨུད་ཏང་གི་སློབ་གྲྭར་ལས་ཀ་བྱེད་རིང་ཟ་ཁང་ནང་ལས་ཀ་བྱེད་མཁན་གཉིས་ལས་མེད་པས་ལས་བྲེལ་ཆེ་བའི་སྐབས་སུ་སློབ་གྲྭའི་སློབ་སྤྱི་ཡིན་པའི་ཝང་ཧུའེ་ཧྲེང་གིས་མེ་ཤིང་འབུད་རོགས་དང་ཁ་ལག་བཟོ་རོགས་བྱེད་ཀྱི་ཡོད། སྐབས་དེ་དུས་ཐོན་སྐྱེད་ཀྱི་ཆ་རྐྱེན་རྗེས་ལུས་ཡིན་པ་དང་ས་ཁུལ་དུ་གློག་མི་འདང་བས་ཚན་པ་ཁག་སོ་སོས་ཐབས་ཤེས་གཏོང་དགོས་ཀྱི་ཡོད། ཝང་ཧུའེ་ཧྲེང་གིས་རང་འགུལ་ངང་གློག་གཏོང་བའི་ལས་ཀའི་འགན་ཁུར་ནས་རྟག་ཏུ་མཚན་མོའི་ཆུ་ཚོད་12བར་ལས་ཀ་བྱེད་ཀྱི་ཡོད། དུས་ཡུན་རིང་པོ་སོང་རྗེས་ཁོང་གློག་གཏོང་འཕྲུལ་འཁོར་བཟོ་མཁན་མཁས་པ་ཞིག་ཏུ་གྱུར།

ཝང་ཧུའེ་ཧྲེང་གི་བུ་ཝང་ཅང་ཆུང་དུས་ནས་ཡུལ་གྱར་གྱི་འཚོ་བ་སྐྱེལ་གྱི་ཡོད། ཁོང་གཉིས་ལ་ཕྲུ་གུར་ལྟ་རྟོག་བྱེད་པའི་དུས་ཚོད་མེད་པའི་དབང་གིས་ཝང་ཧུའེ་ཧྲེང་གི་གཅེན་པོ་དང་གཅེན་མོས་ལྟ་རྟོག་བྱེད་ཀྱི་ཡོད། བུ་ལོ་9ལ་སླེབས་སྐབས་ཝང་ཧུའེ་ཧྲེང་གཞི་ནས་ཁྱིམ་དུ་ལོག་ནས་བུ་ལ་ཐེངས་ཤིག་ལྟ་བར་འགྲོ་རྒྱུ་བྱུང་། ཝང་ཧུའེ་ཧྲེང་གིས་གསལ་པོར་ངེས་གསལ། སྐབས་དེ་དུས་བུས་རང་གི་མདུན་དུ་ལངས་ནས“པཱ་ལགས། ང་མངའ་རིས་སུ་འཁྲིད་དང་། འདིར་པཱ་ལགས་དང་ཨ་མ་ལགས་གཉིས་ཀ་མེད”ཅེས་ཞུ་བ་ཡང་ཡང་བརྒྱབ་བྱུང་། ཝང་ཧུའེ་ཧྲེང་སེམས་སྡུག་ཆེན་པོ་བྱུང་ཞིང་། བུ་ཆེན་པོ་འདི་འདྲ་ཆགས་ནའང་རང་ཉིད་ཀྱིས་པང་ཁར་ལེན་མྱོང་མེད། 2003ལོར་ཝང་ཅང་འབྲིང་རིམ་ཆེད་ལས་སློབ་གྲྭ་ནས་ཐོན་ཏེ་མངའ་རིས་སུ་ཡོང་བ་དང་། སྐབས་དེ་དུས་ཝང་ཧུའེ་ཧྲེང་ས་ཁུལ་སྲིད་གྲོས་ཀྱི་ཀྲུའུ་ཞི་གཞོན་པ་ཡིན་པས་བུ་ལ་ལས་ཀ་ཡག་པོ་ཞིག་བཀོད་སྒྲིག་བྱེད་དགོས་ན་དཀའ་ལས་དེ་ཙམ་མེད། འོན་ཀྱང་ཁོང་གིས་དེ་ལྟར་བྱས་མེད། དེ་ནས་ཝང་ཅང་གིས་ཨ་མ་དང་མཉམ་དུ་སྔོ་ཚལ་འདེབས་པར་ཕྱིན། ངལ་རྩོལ་བྱེད་ཞོར་དུ་སློབ་སྦྱོང་ལ་འབད་པ་བྱས་ནས་རང་ཉིད་ཀྱི་ཆུ་ཚད་མཐོ་རུ་བཏང་བས་མཐར་ལས་ཁུངས་ཤིག་ཏུ་ཚུད། གྲོགས་པོ་ཚང་མས་ཝང་ཧུའེ་ཧྲེང་ལ“ལང་ཚོ་དང་ཚེ་གང་སྐྱེས་སུ་ཕུལ་ཡོད་ལ། བུ་རབས་ཚ་རྒྱུད་ཀྱང་སྐྱེས་སུ་ཕུལ་ཡོད”ཅེས་བརྗོད་ཀྱི་ཡོད། རང་ཉིད་ཀྱི་སྐོར་གླེང་སྐབས་ཁོང་ལ་འགྱོད་པ་སྤུ་ཙམ་ཡང་མེད། འོན་ཀྱང་བུའི་སྐོར་གླེང་སྐབས་ཁོང་གནོང་འགྱོད་ཀྱི་མིག་ཆུ་ཤོར།

ཝང་ཧུའེ་ཧྲེང་གིས་སྤྱི་དོན་དུ་སྒེར་དོན་དོར་ནས་བློ་གཅིག་སེམས་གཅིག་གིས་མི་དམངས་ཀྱི་ཆེད་དུ་བྱ་བ་བསྒྲུབས། ཁོང་ལས་གནས་གང་ཞིག་ཏུ་ཡོད་ཀྱང་ཧུར་ཐག་འབད་ཐག་དང་དོ་དོ་ནན་ནན་གྱི་སྒོ་ནས་སྒེར་དོན་མི་སྒྲུབ་ལ་ཁྱིམ་མིར་བྱ་བ་གང་རུང་ལ་ཁ་གཡར་ནས་གཞུང་གི་ས་ནས་ཁེ་བཟང་རག་ཐབས་གཏན་ནས་བྱེད་དུ་མི་འཇུག་པ་མ་ཟད། ཐ་ན་ནང་མི་ལས་ཁུངས་ཀྱི་རླངས་འཁོར་ནང་དུ་སྡོད་དུ་འཇུག་གི་མེད། མངའ་རིས་སུ་ལས་ཀ་བྱེད་པའི་ལོ་30ཡི་རིང་ཝང་ཧུའེ་ཧྲེང་གིས་རང་ཉིད་ལ་ལྷོད་གཡེང་གཏན་ནས་མི་གཏོང་བར་དོན་ཆེན་སྒྲུབ་རིང་དོན་ཆུང་བློས་མ་བཏང་བས་ས་མཐོའི་ནད་རིགས་སྣ་ཚོགས་ཕོག་ཡོད། མངའ་རིས་མི་དམངས་ཀྱིས་སེམས་གཏིང་ནས་ཁོང་ལ་ཁུང་ཧྥན་སེན་ལྟར་གྱི་ལས་བྱེད་པ་ཡག་པོ་ཞེས་འབོད་ཀྱི་ཡོད།

རྒན་ཡོལ་ཞུས་རྗེས་ཀྱི་ཝང་ཧུའེ་ཧྲེང་ལུས་པེ་ཅིང་དུ་བསྡད་ཀྱང་སེམས་མངའ་རིས་སུ་ཆགས་ཤིང་། ཁོང་གིས་ཉིན་ལྟར་ངེས་པར་དུ་སྒྲུབ་དགོས་པའི་བྱ་བ་ནི་བོད་ཀྱི་འབྲེལ་ཡོད་གསར་འགྱུར་ཉན་རྒྱུ་དང་ལྟ་རྒྱུ་དེ་རེད། བོད་ནས་ཁོང་འཚོལ་མཁན་ཡོད་ཚེ། ཁོང་གིས་ནུས་ཤུགས་ཡོད་རྒུས་རོགས་པ་བྱེད་ཀྱི་ཡོད། ཁོང་གིས་གསུངས་པ་ལྟར། “ང་མི་ལོ་སུམ་ཅུ་མངའ་རིས་སུ་འཚོ་བ་སྐྱེལ་བ་ཡིན། མི་ཚེའི་ནང་ལོ་སུམ་ཅུ་བྱས་པ་ག་ཚོད་ཡོད་དམ། མངའ་རིས་ནི་ངའི་ཚེ་སྲོག་གི་ཆ་ཤས་ཤིག་ཡིན་པས་ངས་ནམ་ཡང་བརྗེད་པར་དཀའ”ཞེས་བཤད།