ཚེས་28ཉིན་རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་དོན་ཁང་གིས《ཀྲུང་གོའི་ཕྱོགས་ཡོངས་ཀྱི་འབྱོར་འབྲིང》གི་རྒྱབ་ཤ་དཀར་པོའི་དེབ་བཀྲམ་པ་རེད།
རྒྱབ་ཤ་དཀར་པོའི་དེབ་ནང་བསྟན་དོན། ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་པ་ནི་ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་ཕྱོགས་སུ་སྐྱོད་པའི་འགག་རྩའི་གོམ་སྟབས་ཤིག་རེད། ལོ་ངོ་100ཡི་རིང་། ཀྲུང་གོ་གུང་ཁྲན་ཏང་གིས་ཀྲུང་གོ་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་སྙིང་རུས་ཆེན་པོས་འབད་བརྩོན་དང་། མི་རབས་ཁ་ཤས་ཀྱིས་ཐོག་མཐའ་བར་གསུམ་དུ་རྒྱུན་འཁྱོངས་དང་རྒྱུན་མཐུད་འབད་འཐབ་བྱས་པར་བརྟེན“འབྱོར་འབྲིང་ཁྱིམ་གཞིས”ནས“འབྱོར་འབྲིང་སྤྱི་ཚོགས”བར་དང་། “སྤྱི་ཡོངས་འབྱོར་འབྲིང”ནས“ཕྱོགས་ཡོངས་འབྱོར་འབྲིང”བར། “ཕྱོགས་ཡོངས་ནས་འཛུགས་སྐྲུན་བྱེད་པ”ནས“ཕྱོགས་ཡོངས་ནས་འཛུགས་སྐྲུན་ལེགས་གྲུབ”བར་བཅས་ཀྱི་འབྱོར་འབྲིང་གི་དམིགས་ཚད་དང་འབྱོར་འབྲིང་གི་ཕུགས་འདུན་ཟམ་མི་ཆད་པར་མངོན་འགྱུར་བྱུང་ཡོད།
རྒྱབ་ཤ་དཀར་པོའི་དེབ་ནང་། ཕྱོགས་ཡོངས་ནས་འབྱོར་འབྲིང་སྤྱི་ཚོགས་སྐྲུན་པར་ཕྱོགས་ཡོངས་གཙོ་གནད་དུ་འཛིན་དགོས། ཀྲུང་གོའི་ཕྱོགས་ཡོངས་ཀྱི་འབྱོར་འབྲིང་ལས། འཕེལ་རྒྱས་ཀྱི་དོ་མཉམ་རང་བཞིན་དང་། མཐུན་སྦྱོར་རང་བཞིན། རྒྱུན་མཐུད་རང་བཞིན་བཅས་མངོན་ཡོད། འདི་ནི་དངོས་པོའི་དཔལ་ཡོན་དང་། ཆབ་སྲིད་དཔལ་ཡོན། བསམ་པའི་དཔལ་ཡོན། སྤྱི་ཚོགས་དཔལ་ཡོན། སྐྱེ་ཁམས་དཔལ་ཡོན་བཅས་མཐུན་སྦྱོར་ངང་འཕེལ་རྒྱས་འགྲོ་བའི་འབྱོར་འབྲིང་ཞིག་དང་། མི་དམངས་ཀྱི་ཉིན་བཞིན་ཆེ་རུ་འགྲོ་བའི་སྣ་མང་ཅན་དང་། རིམ་པ་མང་བ། ཕྱོགས་མང་བ་བཅས་ཀྱི་དགོས་མཁོ་རྒྱུན་ཆད་མེད་པར་སྐོང་བ་དང་མིའི་ཕྱོགས་ཡོངས་ཀྱི་འཕེལ་རྒྱས་ལ་རྒྱུན་ཆད་མེད་པར་སྐུལ་འདེད་གཏོང་བའི་འབྱོར་འབྲིང་ཞིག རྒྱལ་ཁབ་སྟོབས་འབྱོར་ལྡན་པ་དང་། མི་རིགས་དར་རྒྱས། མི་དམངས་བདེ་སྐྱིད། ཕྱོགས་མང་། ཕྱོགས་ཡོངས་བཅས་ཀྱི་འབྱོར་འབྲིང་ཞིག་བཅས་ཡིན་ཞེས་ངོ་སྤྲོད་བྱས་ཡོད།
རྒྱབ་ཤ་དཀར་པོའི་དེབ་ནང་བསྟན་དོན། ཀྲུང་གོའི་ཕྱོགས་ཡོངས་ཀྱི་འབྱོར་འབྲིང་ནི་མི་དམངས་ཡོངས་ཀྱིས་ཐུན་མོང་ཐོག་འཕེལ་རྒྱས་ཀྱི་གྲུབ་འབྲས་ལོངས་སུ་སྤྱོད་པའི་འབྱོར་འབྲིང་ཞིག་རེད། མི་གཅིག་ཀྱང་མི་ལུས་པ་བྱེད་པ་དང་། ས་ཁོངས་གཅིག་ཀྱང་མི་ལུས་པ་བྱེད་པ། མི་རིགས་གཅིག་ཀྱང་མི་ལུས་པ་བྱེད་པ་བཅས་ཀྱི་ཐོག་ནས་མིའི་ཕྱོགས་ཡོངས་ཀྱི་འཕེལ་རྒྱས་དང་མི་དམངས་ཚང་མ་འཕེལ་རྒྱས་ཡོང་བ་གཅིག་གྱུར་དམ་ཟབ་མངོན་འགྱུར་བྱུང་བ་མངོན་ཡོད་ལ། ཐུན་མོང་ཕྱུག་འགྱུར་ཡོང་བའི་སྤྱི་ཚོགས་རིང་ལུགས་ཀྱི་ངོ་བོའི་བླང་བྱའང་མངོན་ཡོད།
རྒྱབ་ཤ་དཀར་པོའི་དེབ་ནང་ད་དུང་བསྟན་དོན། ཀྲུང་གོའི་ཕྱོགས་ཡོངས་ཀྱི་འབྱོར་འབྲིང་ནི་ཀྲུང་གོ་མི་དམངས་ཀྱིས་རང་ཉིད་ཀྱི་དཀའ་སྤྱད་དང་བློ་གྲོས་ལ་བརྟེན་ནས་འབད་འཐབ་ལྷོད་མེད་བྱས་པ་ལས་བྱུང་བ་ཞིག་རེད། ཀྲུང་གོ་གསར་པ་དབུ་བརྙེས་སྐབས། དབུལ་ཕོངས་ཉམས་ཞན་དང་ཉམས་རྒུད་ཆེན་པོའི་མདུན་དུ། ཀྲུང་གོ་གུང་ཁྲན་ཏང་གིས་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་རྟེན་མེད་ཁྱིམ་འཛུགས་དང་། རང་སྟོབས་རང་སྤེལ། དཀའ་སྤྱད་འབད་བརྩོན་བཅས་བྱས་ནས་གནམ་ས་གསར་པ་ཞིག་བཏོད་དེ་ལོ་ངོ་སྟོང་ཕྲག་རིང་རྨི་ལམ་དུའང་ཐོབ་རེ་བྱེད་པའི་འབྱོར་འབྲིང་མངོན་འགྱུར་བྱས་ཡོད།
རྒྱབ་ཤ་དཀར་པོའི་དེབ་ནང་ནན་བཤད་བྱས་དོན། ཀྲུང་གོས་ཐོག་མཐའ་བར་གསུམ་དུ་རང་ངོས་འཕེལ་རྒྱས་དེ་མིའི་རིགས་འཕེལ་རྒྱས་ཀྱི་དམིགས་ཚད་མ་ལག་ནང་འཇོག་པ་དང་། ཐོག་མཐའ་བར་གསུམ་དུ་ཀྲུང་གོ་མི་དམངས་ཀྱི་ཁེ་ཕན་དང་རྒྱལ་ཁབ་ཁག་གི་མི་དམངས་ཀྱི་ཐུན་མོང་ཁེ་ཕན་དང་ཟུང་འབྲེལ་བྱེད་པ། ཐོག་མཐའ་བར་གསུམ་དུ་འཛམ་གླིང་ལ་ཞི་བདེ་སྐྲུན་མཁན་དང་། གོ་ལ་ཧྲིལ་པོའི་འཕེལ་རྒྱས་ལ་ལེགས་སྐྱེས་འབུལ་མཁན། རྒྱལ་སྤྱིའི་སྒྲིག་ལམ་སྲུང་མཁན། སྤྱི་པའི་ཐོན་རྫས་མཁོ་འདོན་བྱེད་མཁན་བཅས་བྱས་ཡོད། ཀྲུང་གོས་ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་ཏེ་མིའི་རིགས་ཀྱི་ལས་དབང་གཅིག་མཐུན་འདུས་གྲུབ་གཏོད་ཆེད་ཀྲུང་གོའི་བློ་གྲོས་དང་ཀྲུང་གོའི་སྟོབས་ཤུགས་ལེགས་སྐྱེས་ཕུལ་ཡོད།