“ལོ་ལྔ་ཚན་བཅུ་གསུམ་པའི”རིང་། ནག་ཆུ་གྲོང་ཁྱེར་ཨ་མདོ་རྫོང་གིས“ཐོན་ལས་དང་པོ་ལེགས་སུ་གཏོང་བ་དང་། ཐོན་ལས་གཉིས་པར་དོ་དམ་ཡག་པོ་བྱེད་པ། ཐོན་ལས་གསུམ་པར་ཞབས་འདེགས་ཞུ་བ”བཅས་དང“ཁྲིམས་ལྟར་རྫོང་བཅོས་སྐྱོང་དང་། ཐོན་ལས་ལ་བརྟེན་ནས་རྫོང་དར་རྒྱས། སྐྱེ་ཁམས་ལ་བརྟེན་ནས་རྫོང་འཛུགས་སྐྱོང་། ཏང་འཛུགས་སྐྱོང་ལ་བརྟེན་ནས་རྫོང་འཕེལ་རྒྱས་ལ་སྐུལ་འདེད”བཅས་ཀྱི་འཕེལ་རྒྱས་ཀྱི་བསམ་ཕྱོགས་མཐའ་འཁྱོངས་བྱས་པས། དཔལ་འབྱོར་འཕེལ་རྒྱས་བརྟན་པོ་བྱུང་བ་དང་། སྤྱི་ཚོགས་ཀྱི་སྤྱི་ཡོངས་བརྟན་ཐོག་ཡར་འཕེལ་བྱུང་བ། མི་དམངས་ཀྱི་འཚོ་བ་མངོན་གསལ་དོད་པོས་ལེགས་སུ་ཕྱིན་པ། སྐྱེ་ཁམས་ཁོར་ཡུག་རྒྱུན་མཐུད་ལེགས་སུ་ཕྱིན་པ། བྱ་གཞག་ཁག་གི་འཕེལ་རྒྱས་ལ་གྲུབ་འབྲས་གསར་པ་ཐོབ་ཡོད་པ་རེད།

ལོ་ལྔའི་རིང་། རྫོང་ཡོངས་ཀྱིས་རྣམ་གྲངས་ཁག་368བརྩོན་ལེན་བྱས་པར་ཁྱོན་མ་དངུལ་སྒོར་དུང་ཕྱུར་49.35ཟིན་པ་དང་། གྲོང་སྲིད་ཀྱི“ལས་གྲྭ་ཁག་གསུམ”དང་། ཤང་དུ་སྣུམ་ནག་ལམ་འདིང་བའི་རྣམ་གྲངས། གྲོང་གསེབ་ཀྱི་འཐུང་ཆུའི་བདེ་འཇཌ་སྲ་བརྟན་མཐོར་གཏོང་གི་རྣམ་གྲངས་སོགས་དམངས་འཚོའི་རྣམ་གྲངས་གལ་ཆེན་ཁག་གཅིག་ལག་ལེན་བསྟར་བ་བརྒྱུད། རྫོང་ཡོངས་ཀྱི་རྨང་གཞིའི་སྒྲིག་བཀོད་རྒྱུན་ཆད་མེད་པར་འཐུས་སྒོ་ཚང་དུ་སོང་བ་རེད། རིམ་རྩིས་བྱས་ན་རྫོང་ཡོངས་ཀྱིས་མ་དངུལ་སྒོར་དུང་ཕྱུར་1.03བཏང་ནས་དམངས་ལ་བྱ་བ་དངོས་སྒྲུབ་པའི་ལས་གྲྭ་48ལག་ལེན་བསྟར་བས་དམངས་འཚོའི་བདེ་རྩ་རྒྱུན་ཆད་མེད་པར་ཆེ་རུ་ཕྱིན་ཡོད་པ་རེད།

སྐྱེ་ཁམས་ཁོར་ཡུག་རྒྱུན་མཐུད་བསྐྲུན་ནས་དགུང་སྔོན་སྲུང་སྐྱོང་དམག་འཐབ་བརྟན་པོའི་ངང་བརྒྱབ་ཅིང་། ལོ་ལྔའི་རིང་། རྫོང་ཡོངས་ཀྱིས“འབྲི་ཆུའི་ཆུ་འགོ”དང་། བྱང་ཐང་གི་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ། སེར་གླིང་མཚོའི་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་བཅས་ཀྱི་སྐྱེ་ཁམས་སྲུང་སྐྱོང་གི་ལས་དོན་ལ་ཁྱོན་མ་དངུལ་སྒོར་ཁྲི་2774.55བཏང་ནས་བོད་བྱང་ཐང་གི་སྐྱེ་ཁམས་བདེ་འཇགས་སྲུང་ཡོལ་རྒྱུན་ཆད་མེད་པར་བརྟན་དུ་བཏང་བ་རེད།

2019ལོ་དང་2020ལོར་རང་བྱུང་རྩྭ་ཐང་གི་སྐྱས་སྤོས་རྩྭ་གསོའི་རྣམ་གྲངས་དང་རྩྭ་ཐང་མུའུ་ཁྲི་65ལ་ལྕགས་དྲ་སྐོར་བར་མ་དངུལ་སྒོར་ཁྲི་1950བཏང་བས་རྩྭ་རའི་གནོན་ཤུགས་ཆུང་དུ་ནུས་ལྡན་ཕྱིན་ཁར་རྫོང་ཡོངས་ཀྱི་རྩྭ་ཐང་གི་སྐྱེ་ཁམས་སྲུང་སྐྱོང་ཐུབ་ཡོད་པ་རེད།