ཏང་གི་ལོ་རྒྱུས་སློབ་སྦྱོང་སློབ་གསོ་སྤེལ་བ་ནས་བཟུང་། རང་ལྗོངས་ཀྱི་ས་གནས་ཁག་དང་སྡེ་ཚན་ཁག་གིས་ཏང་ཀྲུང་དབྱང་དང་ལྗོངས་ཏང་ཨུད་ཀྱི་ཐབས་ཇུས་བཀོད་སྒྲིག་དོན་འཁྱོལ་ནན་པོ་བྱས་ཏེ། ཏང་གི་ལོ་རྒྱུས་སློབ་སྦྱོང་བྱ་རྒྱུ་དེ་ལས་དོན་ལ་སྐུལ་འདེད་གཏོང་བ་དང་ཟུང་འབྲེལ་གྱིས་དོན་དངོས་དང་གཙོ་འགན་གཙོ་ལས་ལ་གཞི་ཚུགས་ནས“ངས་མང་ཚོགས་ལ་བྱ་བ་དངོས་སྒྲུབ་པའི”ལག་ལེན་བྱེད་སྒོ་ཏན་ཏིག་སྤེལ་བ་རེད།
ཏང་གི་ལོ་རྒྱུས་སློབ་སྦྱོང་སློབ་གསོའི་ཁྲོད། ལྗོངས་ཏང་ཨུད་དྲིལ་བསྒྲགས་པུས་རིགས་པའི་གཞུང་ལུགས་ཀྱིས་དྲག་ཆས་སྤྲོས་རྒྱུར་ཤུགས་སྣོན་རྒྱག་པ་དང་། གཙོ་རྒྱུན་གླེང་ཕྱོགས་སྟོབས་ཆེར་གཏོང་བ། དམངས་འཚོའི་བྱ་བ་དངོས་ཡག་པོ་སྒྲུབ་པ། མང་ཚོགས་ཀྱི་རིག་གནས་དགོས་མཁོ་སྐོང་བ་བཅས་བྱས་ཏེ། ཏང་གི་དྲིལ་བསྒྲགས་དང་བསམ་བློ་རིག་གནས་ལས་དོན་ཏན་ཏིག་དང་སྟོབས་ཆེར་འགྲོ་རྒྱུར་སྐུལ་འདེད་བཏང་ཡོད། ཉེ་ཆར། ལྗོངས་ཏང་ཨུད་དྲིལ་བསྒྲགས་པུས“མཐུན་སྒྲིལ་རོགས་རེས་དང་མཛའ་གྲོགས་ཟབ་ཏུ་གཏོང་བ”ཞེས་པ་བརྗོད་དོན་གཙོ་བོར་བྱས་ཏེ། ཏང་ཡོན་ལས་བྱེད་པ་སྒྲིག་འཛུགས་བྱས་ནས་ལྷ་ས་གྲོང་ཁྱེར་ཁྲེང་ཀོན་ཆུས་དཔལ་སྡིངས་གྲོང་ཚོར་དམངས་ཆེད་བྱ་བ་དངོས་སྒྲུབ་པའི་བྱེད་སྒོ་སྤེལ་བ་རེད། བྱེད་སྒོ་སྤེལ་རིང་། ལྗོངས་ཏང་ཨུད་དྲིལ་བསྒྲགས་པུའི་ཏང་ཡོན་ལས་བྱེད་པས་དཔལ་སྡིངས་གྲོང་ཚོར་ཏང་གི་ལོ་རྒྱུས་སློབ་གསོའི་དཔེ་དེབ་དང་། ཞིང་ལས་ཚན་རྩལ་རིགས་ཀྱི་དཔེ་དེབ། གཞོན་ནུ་ལོ་ཆུང་གི་ཀློག་དེབ་སོགས་སྤྲད་པ་མ་ཟད། ད་དུང་དཔལ་སྡིངས་གྲོང་ཚོའི་དུས་རབས་གསར་པའི་ཤེས་དཔལ་ལག་ལེན་ས་ཚིགས་ཀྱི་འགྲེམས་ཁང་དང་། བྱེད་སྒོ་ཁང་། ཞབས་བྲོ་ནང་སྦྱོང་ཁང་སོགས་ལ་ལྟ་སྐོར་བྱས་ནས་གྲོང་ཚོ་དེས་ཞིང་འབྲོག་པའི་བསམ་པའི་དཔལ་ཡོན་སྲོལ་གཏོད་ལ་སྔར་བས་ཤུགས་སྣོན་རྒྱག་རྒྱུའི་ཐད་གྲོས་འགོ་བཏོན་པ་རེད། དཔལ་སྡིངས་གྲོང་ཚོའི་ཧྲུའུ་ཅི་དང་པོ་ཚེ་རིང་འོད་ཟེར་གྱིས་དཔེ་དེབ་དེ་དག་དུས་ཐོག་ཏུ་ཞིང་འབྲོག་པ་ཏང་ཡོན་དང་མང་ཚོགས་ལ་སྤྲད་དེ་ཚང་མ་སྒྲིག་འཛུགས་དང་སློབ་སྦྱོང་བྱས་ཏེ་གྲོང་གསེབ་དར་རྒྱས་ཀྱི་ལམ་བུའི་ཐོག་གྲོང་མི་ཚོར་བསམ་པ་དང་དངོས་པོ་གཉིས་ཀ་ཕྱུག་པོ་ཆགས་པར་ཁྲིད་སྟོན་བྱས་ཡོད་ཅེས་བཤད་པ་རེད།
རང་ལྗོངས་ཀྱི་རྒྱ་ཆེའི་གྲོང་སྡོད་ལས་དོན་རུ་མི་ཚོས་གྲོང་སྡོད་ལས་དོན་སྤེལ་རིང་སེམས་ནུས་ཡོད་རྒུས་གཞི་རིམ་གྱི་དཀའ་ངལ་དང་མང་ཚོགས་ཀྱི་སེམས་ཁྲལ་བསལ་ནས་བྱ་སྤྱོད་དངོས་ཀྱི་ཐོག་ནས་དམངས་ལ་བྱ་བ་དངོས་སྒྲུབ་པའི་དམིགས་ཡུལ་ལག་ལེན་བསྟར་ཡོད།
འདི་ལོ་ཚུན་དཔའ་ཤོད་རྫོང་གི་གྲོང་སྡོད་ལས་དོན་རུ་ཁག་ཁག་གིས་མང་ཚོགས་ལ་ཡུལ་བབ་དང་བསྟུན་ནས་འདེབས་འཛུགས་དང་གསོ་ཚགས་ཀྱི་གཞི་ཁྱོན་ཆེ་རུ་གཏོང་རོགས་ཧུར་ཐག་བྱས་པ་དང་། ཁྲོན་བོད་ལྕགས་ལམ་སོགས་རྣམ་གྲངས་གལ་ཆེན་འཛུགས་སྐྲུན་བྱེད་པའི་གོ་སྐབས་སྤྱད་དེ་ཨར་ལས་ཚན་པ་དང་སྦྲེལ་མཐུད་ཧུར་ཐག་བྱས་པ། ཞིང་འབྲོག་པའི་ངལ་རྩོལ་ནུས་ཤུགས་དང་ཡོང་འབབ་དམའ་བའི་མི་ཚོགས་གོ་རིམ་ལྡན་པའི་ངང་ལས་ཞུགས་སྒྲིག་འཛུགས་བཅས་བྱས་ནས་ཞིང་འབྲོག་མང་ཚོགས་ཀྱི་འབབ་འཕར་ཐབས་ལམ་རྒྱ་ཆེར་བཏང་ཡོད། དེའི་ནང་གླ་སྐེ་ཤང་ཝ་ལའི་གྲོང་ཚོར་བཅའ་སྡོད་ལས་དོན་རུ་ཁག་གིས་དོན་དངོས་དང་ཟུང་འབྲེལ་བྱས་ཏེ་མང་ཚོགས་ལ་ཤིས་ཀྭ་དང་། འབྲི་ཏ་ས་འཛིན། སྔོ་ཚལ་སོགས་ཟུར་སྣོན་རིན་ཐང་མཐོ་བའི་ཞིང་ལས་ཐོན་རྫས་འདེབས་འཛུགས་གཞི་ཁྱོན་ཆེ་རུ་གཏོང་རྒྱུའི་ཁྲིད་སྟོན་ཧུར་ཐག་བྱས་ཡོད། ཐང་དཀར་གྲོང་རྡལ་གྱི་གྲོང་སྡོད་ལས་དོན་རུ་ཁག་ཁག་གིས་ཁྲོན་བོད་ལྕགས་ལམ་སྐྲུན་མཁན་ཁེ་ལས་དང་སྦྲེལ་མཐུད་ཧུར་ཐག་བྱས་ཏེ་མི་200ལྷག་ཙམ་ལ་ལས་ཞུགས་ལས་གནས་མཁོ་འདོན་བྱས་ཡོད། སྐྱ་རི་ཤང་སྐྱིད་རྭ་གྲོང་ཚོར་བཅའ་སྡོད་ལས་དོན་རུ་ཁག་གིས་ས་གནས་ཁག་ཏུ་ལས་མི་བསྡུ་བའི་ཆ་འཕྲིན་དུས་ཐོག་ཏུ་བསྡུ་རུབ་དང་ཁྱབ་བསྒྲགས་བྱས་ཏེ་ཞིང་འབྲོག་མང་ཚོགས་30ལྷག་ཙམ་ལྷ་ས་དང་ཉིང་ཁྲི་སོགས་སུ་ལས་ཞུགས་བྱེད་པར་བསྐྱོད་རྒྱུར་སྐུལ་ལྕག་བྱས་ཡོད། གཞན་ཡང་རྫོང་དེའི་གྲོང་སྡོད་ལས་དོན་རུ་ཁག་ཁག་གིས་ཞིང་འབྲོག་མང་ཚོགས་ལ་གང་མཁོ་ན་དེའི་ཐད་གསོ་སྦྱོང་བྱེད་པའི་རྩ་དོན་གཞིར་བཟུང་དམིགས་ས་ཡོད་པའི་སྒོ་ནས་ཞིང་འབྲོག་མང་ཚོགས་སྒྲིག་འཛུགས་བྱས་ཏེ་རྩལ་ནུས་གསོ་སྦྱོང་བྱས་པ་རེད།