བོད་ཞི་བས་བཅིངས་འགྲོལ་བཏང་ནས་ལོ་ངོ་70འཁོར་བར་རྟེན་འབྲེལ་ཞུ་བའི་མཚམས་སུ། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞི་ཅིན་ཕིང་བོད་དུ་ཕེབས་ནས་བོད་ཞི་བས་བཅིངས་འགྲོལ་བཏང་ནས་ལོ་ངོ་70འཁོར་བར་རྟེན་འབྲེལ་ཞུས་པ་དང་། བོད་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ལ་གཟིགས་པ་དང་འཚམས་འདྲི་གནང་བ། མི་རིགས་ཁག་གི་ལས་བྱེད་པ་དང་མང་ཚོགས་ལ་ཏང་ཀྲུང་དབྱང་གིས་ཐུགས་ཁུར་གནང་ལུགས་མཚོན་པར་གནང་ཡོད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གཟིགས་ཞིབ་གནང་སྐབས། མི་དམངས་ལྟེ་བར་འཛིན་པའི་འཕེལ་རྒྱས་ཀྱི་དགོངས་པ་མཐའ་འཁྱོངས་བྱེད་པ་དང་། དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་དུ་གཏོང་རྒྱུ་དེ་གྲོང་གསེབ་དར་རྒྱས་ལ་ཕྱོགས་ཡོངས་ནས་སྐུལ་འདེད་གཏོང་བ་དང་སྦྲེལ་མཐུད་ནུས་ལྡན་བྱ་རྒྱུར་སྐུལ་འདེད་གཏོང་བ། མང་ཚོགས་ཀྱིས་ཡོངས་ཁྱབ་ངང་དོ་ཁུར་བྱེད་པའི་དམངས་འཚོའི་གནད་དོན་ལ་དེ་བས་དམིགས་པ། ལས་ཞུགས་དང་། སློབ་གསོ། སྤྱི་ཚོགས་འགན་སྲུང་། སྨན་བཅོས། རྒན་གསོ། བུ་བཅོལ། སྡོད་ཁང་སོགས་དམངས་འཚོའི་བྱ་བ་དངོས་ཡག་པོ་སྒྲུབ་པ། བྱ་བ་རེ་རེ་བཞིན་དོན་འཁྱོལ་ལ་དམ་འཛིན་བཅས་བྱས་ཏེ་མི་རིགས་ཁག་གི་མང་ཚོགས་ཀྱི་ཐོབ་སྣང་དེ་བས་མང་དུ་གཏོང་བ་དང་། སྐྱིད་སྣང་དེ་བས་ཡུན་རིང་བ། བདེ་འཇགས་ཚོར་སྣང་དེ་བས་འགན་ལེན་ཡོད་པ་བཅས་བྱེད་དགོས་པའི་ནན་བཤད་གནང་ཡོད།

“གྲོང་ཚོའི་ནང་གི་བརྒྱ་ཆ་བརྒྱད་ཅུ་ཡན་གྱི་ཁྱིམ་ཚང་ལ་རླངས་འཁོར་ཡོད་པ་དང་། ཕྲུ་གུ་ཚོ་སློབ་གྲྭ་ཡག་པོར་འགྲོ་ཐུབ་པ། ནད་ཕོག་ན་སྨན་བཅོས་འགན་བཅོལ་ཡོད། དེ་ལྟ་བུའི་མཛེས་སྡུག་ལྡན་པའི་འཚོ་བ་ནི་ཏང་དང་སྲིད་གཞུང་གི་སྲིད་ཇུས་བཟང་པོ་ལས་བྱུང་བ་ཞིག་རེད”ཅེས“བོད་ཀྱི་བཅིངས་འགྲོལ་བཏང་བའི་གྲོང་ཚོ་དང་པོ”སྟེ་ཆབ་མདོ་གྲོང་ཁྱེར་སྐམ་ཐོག་གྲོང་རྡལ་སྐམ་ཐོག་གྲོང་ཚོའི་འདི་ལོ་ལོ་79ལ་སོན་པའི་བགྲེས་སོང་ཕུར་པས་ད་ལྟའི་འཚོ་བའི་སྐོར་གླེང་སྐབས་དེ་ལྟར་བརྗོད་བྱུང་།

དམངས་འཚོར་དྲོ་སྐྱིད་དང་བདེ་སྐྱིད་ལྡན་པ།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ལོ་ཤས་རིང་བོད་ཀྱི་མི་རིགས་ཁག་གི་མང་ཚོགས་ཀྱི་འཚོ་བ་དང་བསམ་པའི་ཉམས་འགྱུར་ལ་འགྱུར་ལྡོག་ཆེན་པོ་ཕྱིན་འདུག ང་སླེབས་སའི་ས་ཆ་ནས་ཡུལ་མི་ཚང་མ་འཚོ་བ་ཡག་པོ་ཡོད་པའི་བདེ་སྐྱིད་ཚོར་སེམས་དང་ཏང་དང་རྒྱལ་ཁབ་ལ་བཅངས་པའི་བཀའ་དྲིན་ཚོར་སེམས་ཟབ་མོ་ཚོར་བྱུང་ཞེས་ནན་བཤད་གནང་ཡོད།

ལྷ་ས་གྲོང་ཁྱེར་རབ་གསལ་སྡེ་ཁུལ་གྱི་ལོ་76ལ་སླེབས་པའི་བགྲེས་སོང་མགོན་བཟང་གིས་ཞི་བས་བཅིངས་འགྲོལ་བཏང་ཚུན་བོད་ལ་བྱུང་བའི་འཕེལ་རྒྱས་དང་འཕོ་འགྱུར་གྱི་དཔང་པོ་བྱས་ཡོད། ཁོང་གིས“སྡོད་ཁང་གི་ཆ་རྐྱེན་ལེགས་སུ་ཕྱིན་པ་མ་ཟད། སློབ་གསོ་དང་། སྨན་བཅོས། སྤྱི་ཚོགས་འགན་སྲུང་བཅས་ལའང་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་སོང་ནས་ང་ཚོ་མི་སེར་ཚོའི་འཚོ་བ་ཉིན་རེ་ལས་མ་འདས་པར་ལེགས་སུ་འགྲོ་བཞིན་འདུག དེ་དག་ལས་ཏང་གི་བཀའ་ལ་ཉན་པ་དང་། ཏང་གི་བཀའ་དྲིན་ཚོར་བ། ཏང་གི་རྗེས་སུ་འབྲང་བ་བཅས་ཀྱི་ང་ཚོའི་ཡིད་ཆེས་དང་ཆོད་སེམས་དེ་བས་བརྟན་དུ་ཕྱིན་སོང”ཞེས་བརྗོད་བྱུང་།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། རང་ལྗོངས་ཀྱི་སྤྱི་ཚོགས་བྱ་གཞག་ཁག་ལ་འཕེལ་རྒྱས་མྱུར་པོ་ཕྱིན་ཡོད། སློབ་གསོ་སྔོན་ལ་འཕེལ་རྒྱས་གཏོང་བའི་འཐབ་ཇུས་ཕྱོགས་ཡོངས་ནས་ལག་བསྟར་ཐུབ་པ་དང་། ལོ་15ཡི་གཞུང་གྲོན་སློབ་གསོའི་སྲིད་ཇུས་ཁྱོན་ཡོངས་ལ་ཁྱབ་པ། ལོ་དགུའི་འོས་འགན་སློབ་གསོ་སྲ་བརྟན་དུ་གཏོང་ཚད་95%ཡན་ཟིན་པ། སློབ་གསོའི“100%ལྔའི”དམིགས་ཚད་ཕྱོགས་ཡོངས་ནས་མངོན་འགྱུར་བྱུང་ཡོད། གྲོང་ཁྱེར་དང་གྲོང་གསེབ་ལ་ཁྱབ་པའི་སྨན་བཅོས་མ་ལག་རིམ་བཞིན་འཐུས་སྒོ་ཚང་དུ་ཕྱིན་ནས་བདེ་ཐང་བོད་ལྗོངས་ལ་སྐུལ་འདེད་གཏིང་ཟབ་བཏང་ཡོད། 2020ལོར་ལྗོངས་ཡོངས་ཀྱི་མི་རེའི་ཆ་སྙོམས་སྔོན་དཔག་ཚེ་ཚད་ལོ་71.1ཟིན་པ་དེ་1951ལོ་ལས་ལྡབ་1.0འཕར་ཡོད།

མི་རྩ་བར་འཛིན་རྒྱུ་མཐའ་འཁྱོངས་ཀྱིས་དམངས་འཚོ་ལེགས་གཏོང་ལ་ཤུགས་སྣོན་བརྒྱབ་པ།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། རང་ལྗོངས་ཀྱིས་ཐོག་མཐའ་བར་གསུམ་དུ་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་དགོངས་པ་མཐའ་འཁྱོངས་བྱས་ཏེ་མཛེས་སྡུག་ལྡན་པའི་འཚོ་བར་བཅངས་པའི་མི་དམངས་ཀྱི་རེ་འདོད་དེ་འབད་འབུངས་དམིགས་ཚད་དུ་བརྩིས་ནས་དཀའ་ངལ་དང་རྙོག་དྲ་སྲིད་གཞུང་གིས་ཐག་གཅོད་དང་། སྟབས་བདེ་དང་དངོས་ཕན་མང་ཚོགས་ལ་སྤྲོད་རྒྱུ་མཐའ་འཁྱོངས་བྱས་ཡོད།

ལྷོ་ཁ་གྲོང་ཁྱེར་གྲ་ནང་རྫོང་གི་རྩི་ཤིང་སྡོང་ཕྲུག་གསོ་སྤེལ་རྟེན་གཞིར་རྔ་སྒྲ་ཤང་གི་གྲོང་མི་ཚོ་ལས་ལ་བྲེལ་བཞིན་འདུག རྒྱ་ཁྱོན་མུའུ་ཁྲི་ཙམ་ཡོད་པའི་སྐྱེ་ཁམས་དབུལ་སྐྱོར་རྣམ་གྲངས་འདི་བསྐྲུན་རྗེས། ཉེ་འཁོར་གྱི་མང་ཚོགས་དབུལ་པོས་རང་ཁྱིམ་གྱི་ས་ཞིང་བརྒྱུད་བཤུག་བཏང་ནས་བོགས་དངུལ་ལེན་ཆོག་པ་མ་ཟད། ད་དུང་དེ་གར་ལས་ཞུགས་ཐུབ་ཡོད། སྡོང་ཕྲུག་གསོ་སྤེལ་རྟེན་གཞིར་ལས་ཀ་བྱེད་བཞིན་པའི་སྒྲོལ་མ་ཆོས་སྐྱིད་ཀྱིས“ཕ་ཡུལ་ནས་བྲལ་མི་དགོས་པར་ཡོང་འབབ་གསོག་ཐུབ་པས་སེམས་ནང་ཧ་ཅང་དགའ་པོ་འདུག”ཅེས་བརྗོད་བྱུང་།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། རང་སྐྱོང་ལྗོངས་ཏང་ཨུད་དང་སྲིད་གཞུང་གིས“སེམས་ཁྲལ་མེད་པ་གཉིས་དང་འགན་སྲུང་གསུམ”དང་དབུལ་པོ་དབུལ་ནག་མེད་པ་བཟོ་བའི་དམིགས་ཚད་ལ་དམིགས་ཏེ“འབྲེལ་བ་ཆ་བཅུ་གསུམ”ཐག་གཅོད་ཡང་དག་བྱེད་རྒྱུ་ལས་ཀའི་བྱ་ཐབས་ལ་བརྩིས་ནས་གནད་སྨིན་ཇུས་བསྟར་དང་གནད་སྨིན་རོགས་སྐྱོར་བརྒྱུད་ཐོན་ལས་འདེགས་སྐྱོར་དང་། སྲིད་ཇུས་ལྕག་སྐུལ། ལས་ཞུགས་སྔོན་བསྟར། བོད་སྐྱོར་རོགས་སྐྱོར། སྤྱི་ཚོགས་འགན་སྲུང་གིས་ཐ་སྐྱོང་སོགས་ཀྱི་ལས་དོན་ཁག་སྤྱི་འདོམས་བྱས་ནས་ཡག་པོ་བསྒྲུབས་ཡོད། 2019ལོའི་ལོ་མཇུག་བར་ལྗོངས་ཡོངས་ཀྱི་ཡིག་ཚགས་དང་གཱ་བཟོས་པའི་མི་འབོར་དབུལ་པོ་ཁྲི་62.8ཚང་མ་དབུལ་སྒྲོལ་ཐུབ་པ་དང་རྫོང་ཆུས་དབུལ་པོ་74ཚང་མ་དབུལ་ཞྭ་ཕུད་ནས་ལོ་རྒྱུས་རང་བཞིན་སྒོ་ནས་དབུལ་པོ་དབུལ་ནག་མེད་པ་བཟོས་ཡོད།

གྲོང་ཁྱེར་འཛུགས་སྐྲུན་གྱི་གོམ་སྟབས་ཟམ་མི་ཆད་པར་མགྱོགས་སུ་ཕྱིན་ནས་གྲོང་ཁྱེར་དབར་གྱི་ཕྱོགས་བསྡུས་འགྲིམ་འགྲུལ་མ་ལག་ཟམ་མི་ཆད་པར་ལེགས་སུ་སོང་ཡོད། 2020ལོའི་ལོ་མཇུག་བར་ལྗོངས་ཡོངས་སུ་ས་ཁུལ་རིམ་པའི་གྲོང་ཁྱེར་6མང་དུ་ཕྱིན་པ་དང་། གྲོང་ཁྱེར་དང་གྲོང་རྡལ་གྱི་གྲངས་འབོར་146ཟིན་པ། གྲོང་ཁྱེར་དང་གྲོང་རྡལ་ཆགས་ཁུལ་གྱི་རྒྱ་ཁྱོན་སྤྱི་ལེ་ངོས་གྲུ་326ཟིན་པ། གྲོང་ཁྱེར་དང་གྲོང་རྡལ་གྱི་རྒྱུན་སྡོད་མི་འབོར་ཁྲི་130.34ཟིན་པ། གྲོང་རྡལ་ཅན་དུ་གྱུར་ཚད་35.73%ཟིན་ཡོད། 2020ལོའི་ལོ་མཇུག་བར་བོད་ཀྱི་གྲོང་ཁྱེར་དང་གྲོང་གསེབ་ཀྱི་གྲོང་མི་མི་རེའི་ཆ་སྙོམས་རང་བདག་སྡོད་ཁང་གི་རྒྱ་ཁྱོན་སྨི་ངོས་གྲུ་32.4དང་41.2སོ་སོར་ཟིན་ནས་ཁྱོན་ཡོངས་ནས་སྡོད་ཁང་འགན་སྲུང་ཐུབ་ཡོད།

ཞབས་ཞུའི་འདུ་ཤེས་བརྟན་པོ་བཙུགས་ནས་འགན་ནུས་ཧུར་ཐག་བསྒྲུབས་པ།

“མི་སེར་སེམས་ནང་ཡོད་མེད་དེ་མང་ཚོགས་ཀྱིས་སེམས་ཁྲལ་བྱེད་པའི་བྱ་བ་ཐག་གཅོད་ཏན་ཏིག་བྱ་རྒྱུ་དེ་ཨང་དང་པོར་བཞག་ཡོད་མེད་ལས་རྟོགས་ཐུབ། མི་དམངས་བློ་ཡིད་ཚིམ་པའི་སློབ་གསོ་ཡག་པོ་སྤེལ་བར་སློབ་གསོའི་ཞན་ཆ་དང་། སྐྱོན་ཆ། སྟོང་ཆ་བཅས་ལ་དམིགས་ནས་བྱས་འབྲས་ཐོབ་པར་ངས་མི་རྩོད། བྱས་རྗེས་འཇོག་པར་ང་ཡིས་འབད་པའི་བློ་རྒྱའི་ཐོག་ནས་བྱ་བ་རེ་རེ་བཞིན་སྒྲུབ་པ་དང་ལོ་རེ་བཞིན་རྒྱུན་མཐུད་ནས་བསྒྲུབས་ཏེ་རྫོང་ཡོངས་ཀྱི་སློབ་གསོའི་བྱ་གཞག་སླར་ཡང་སྐས་རིམ་གསར་པ་ཞིག་ཏུ་སླེབས་རྒྱུར་སྐུལ་འདེད་གཏོང་རྒྱུ་ཡིན”ཞེས་ལྷ་རྩེ་རྫོང་སློབ་གསོ་ཅུས་ཀྱི་ཏང་ཙུའི་ཧྲུའུ་ཅི་དབྱང་ཀྲི་ཆང་གིས་བརྗོད་བྱུང་།

རྒྱལ་སྲིད་ནི་མི་དམངས་དང་མི་དམངས་ནི་རྒྱལ་སྲིད་ཡིན། ཉེ་བའི་ལོ་ཤས་རིང་རང་ལྗོངས་ཀྱི་རིམ་པ་ཁག་གི་ཏང་ཨུད་དང་སྲིད་གཞུང་གིས་ཐོག་མཐའ་བར་གསུམ་དུ་འགོ་འཛུགས་ས་དང་དོན་ལ་བབས་ས་ཡིན་པའི་དམངས་འཚོ་ལེགས་གཏོང་དང་མི་སེམས་གཅིག་སྒྲིལ་ལ་དམ་འཛིན་ཡག་པོ་བྱས་ཏེ་དམངས་འཚོ་འཕེལ་རྒྱས་ཀྱི་འདུ་ཤེས་ལ་ཤུགས་སྣོན་རྒྱག་པ་དང་། དམངས་འཚོ་འཕེལ་རྒྱས་ཀྱི་གཙོ་གནད་འབུར་དུ་ཐོན་པ། དམངས་འཚོ་འཕེལ་རྒྱས་ཀྱི་བྱ་ཐབས་དོན་འཁྱོལ་བྱེད་པ། དཀའ་ངལ་དང་རྙོག་དྲ་སྲིད་གཞུང་གིས་ཐག་གཅོད་དང་སྟབས་བདེ་དང་དངོས་ཕན་མང་ཚོགས་ལ་སྤྲོད་རྒྱུ་མཐའ་འཁྱོངས་བྱེད་པ། ལས་ཞུགས་དང་། སློབ་གསོ། སྤྱི་ཚོགས་འགན་སྲུང་། སྨན་བཅོས། རྒན་གསོ། བུ་བཅོལ། སྡོད་ཁང་བཅས་ཀྱི་དམངས་འཚོའི་བྱ་བ་དངོས་ཡག་པོ་སྒྲུབ་པ། གཟེར་འདེབས་ཀྱི་སྙིང་སྟོབས་ལ་བརྟེན་ནས་བྱ་བ་རེ་རེ་བཞིན་དོན་འཁྱོལ་ཡོང་བར་དམ་འཛིན་བཅས་བྱས་ཏེ་དམངས་འཚོའི་ལས་དོན་ཚང་མར་འདི་བྱས་འདི་མིན་གྱི་ལན་གསལ་པོ་ཡོད་པ་དང་མི་རིགས་ཁག་གི་མང་ཚོགས་ཀྱིས་འགྱུར་ལྡོག་དང་དངོས་ཕན་དངོས་སུ་མཐོང་ཐུབ་པ་བྱས་ཡོད།

ཏང་དབུ་བརྙེས་ནས་ལོ་ངོ་100འཁོར་བ་དང་བོད་ཞི་བས་བཅིངས་འགྲོལ་བཏང་ནས་ལོ་ངོ་70འཁོར་བའི་ཤར་རླུང་ལ་བརྟེན་ནས་རང་ལྗོངས་ཀྱིས་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་དགོངས་པ་ལག་ལེན་མཐའ་གཅིག་ཏུ་བསྟར་བ་དང་། འཕེལ་རྒྱས་ཀྱི་དུས་མཚམས་གསར་པར་གཞི་ཚུགས་པ། འཕེལ་རྒྱས་ཀྱི་འདུ་ཤེས་གསར་པ་ཆ་ཚང་དང་། གནད་འཁེལ། ཕྱོགས་ཡོངས་བཅས་ཀྱི་སྒོ་ནས་ལག་བསྟར་བྱེད་པ། འཕེལ་རྒྱས་ཀྱི་རྣམ་པ་གསར་པར་རང་འགུལ་ཞབས་ཞུ་དང་དེའི་ནང་མཉམ་འདྲེས་བྱེད་པ། “ཚང་དགོས་པ་གསུམ་དང་ཕན་འདོགས་པ་གཅིག”གི་བླང་བྱ་མཐའ་འཁྱོངས་བྱེད་པ། འཕེལ་རྒྱས་ཁྲོད་དམངས་འཚོ་འགན་ལེན་དང་ལེགས་གཏོང་མཐའ་འཁྱོངས་བཅས་བྱས་ནས་མང་ཚོགས་དེ་བས་མང་བ་ལས་ཞུགས་ཐུབ་པ་དང་ཡོང་འབབ་རག་པ་བྱས་ཡོད་ལ། མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་དེ་བས་ལེགས་པར་འགན་ལེན་དང་རྒྱུན་མཐུད་བྱས་ཡོད།