བོད་རང་སྐྱོང་ལྗོངས་གཞིས་རྩེ་གྲོང་ཁྱེར་གྱི་ཤར་ལྷོའི་རྒྱུད་དུ་གནས་པའི་གམ་པ་རྫོང་ནི་འཛམ་གླིང་གི་རི་བོ་མཐོ་ཤོས་ཇོ་མོ་གླང་མའི་འདབས་སུ་ཆགས་ཤིང་། མཐའ་བཞི་གངས་རིས་བསྐོར་བ་དང་ཆ་སྙོམས་ས་བབ་མཐོ་ཚད་སྨི་4700ཡན་ཟིན་གྱི་ཡོད། ལོ་ལྟར་རིམ་པ་8ཡན་གྱི་ལྷགས་པ་ཆེན་པོ་ཉིན་200ལྷག་ཙམ་རྒྱག་པ་དང་མཁའ་རླུང་ནང་གསོ་རླུང་འདུས་ཚད་ནང་སའི་50%ཡང་ཟིན་གྱི་མེད།

ས་བབ་ཧ་ཅང་མཐོ་ཞིང་དཀའ་ཚེགས་ཆེ་བའི་ས་ཆ་དེར་གམ་པ་རྫོང་གམ་པ་གྲོང་རྡལ་ཏང་ཨུད་ཀྱི་ཧྲུའུ་ཅིའི་འགན་འཁུར་བཞིན་པའི“བརྒྱད་ཅུའི”ནང་སྐྱེས་ཀྱི་ལི་མིང་དབྱང་གིས་ལོ་14ལང་ཚོ་སྐྱེས་སུ་ཕུལ་ཡོད། གམ་པ་གྲོང་རྡལ་དུ་ལས་ཀ་བྱེད་རིང་ཁོང་གིས་གྲོང་རྡལ་དེའི་གྲོང་ཚོ་8དང་དུད་ཚང་621ལ་བསྐྱོད་དེ་གམ་པ་གྲོང་རྡལ་གྱི་དབུལ་ཞྭ་ཕུད་ནས་ས་གནས་དེ་གའི་མང་ཚོགས་དབུལ་སྒྲོལ་ཕྱུག་འགྱུར་ཡོང་བར་བྱས་ཡོད།

“ལས་དོན་ལེགས་གྲུབ་བྱུང་ན་དཀའ་ལས་ག་ཚོད་ཆེ་ཡང་དོན་སྙིང་ལྡན”

ཁྲུང་ཆིང་ནས་ཡིན་པའི་ལི་མིང་དབྱང་2007ལོར་སློབ་ཆེན་ཐོན་རྗེས་བོད་ལྗོངས་གམ་པ་རྫོང་དུ་འགྲོ་རྒྱུའི་གདམ་ག་བྱས།

“བོད་ནི་ང་འགྲོ་འདོད་ཆེན་པོ་ཡོད་པའི་ས་ཆ་ཞིག་ཡིན། ས་མཐོར་ལས་ཀ་བྱས་ནས་བྱས་རྗེས་འཇོག་པ་ནི་ངའི་ངོས་ནས་བརྗོད་ན་ཚེ་འདིའི་དོན་སྙིང་ཆེ་ཤོས་ལྡན་པའི་དོན་དག་ཅིག་ཡིན”ཞེས་ལི་མིང་དབྱང་གིས་བརྗོད།

2014ལོར་ལི་མིང་དབྱང་གིས་གམ་པ་གྲོང་རྡལ་ཏང་ཨུད་ཀྱི་ཧྲུའུ་ཅི་གཞོན་པ་དང་ཀྲེན་ཀྲང་གི་འགན་ཁུར། སྐབས་དེ་དུས་གམ་པ་གྲོང་རྡལ་གྱི་མི་སེམས་སྒྲིལ་མི་ཐུབ་པ་དང་ལས་ཀར་སེམས་ཤུགས་མེད་པས་ལས་དོན་ཁག་རྫོང་ཡོངས་ཀྱི་མཇུག་ཤོས་སུ་ལུས་ཡོད། རྫོང་ཡོངས་ཀྱི་རྗེས་ལུས་གྲོང་ཚོ་4ཡི་ཏང་རྩ་འཛུགས་ལས་གམ་པ་གྲོང་རྡལ་ཁོ་ནས་3བཟུང་ཡོད།

ལི་མིང་དབྱང་གིས་གནད་དོན་ལྷག་སའི་ཞན་ཆ་ཡང་དག་བཙལ་ཅིང་། ཁོང་གིས་ཏང་འཛུགས་སྐྱོང་དམ་འཛིན་བྱ་གཞིར་བྱས་ནས་གྲོང་རྡལ་གྱི་ལས་བྱེད་པའི་སྣེ་ཁྲིད་དེ་གྲོང་ཚོ་འགན་གཙང་ལེན་པའི་འགན་འཁྲིའི་ལམ་ལུགས་བཟོས་ཏེ། གྲོང་ཚོ་རིམ་པའི་ཏང་ཀྲི་པུའུ་ལ་ཏང་འཛུགས་སྐྱོང་མཛུབ་ཁྲིད་པ་དང་ཆབ་སྲིད་ཟུར་ཁྲིད་པ་མངགས་པ་དང་སྦྲགས་དཔྱད་ཞིབ་དང་བྱ་དགའ་ཆད་གཅོད་ཀྱི་ལམ་ལུགས་ཀྱང་བཙུགས་ཏེ། མང་ཚོགས་དང་ཏང་ཡོན་དབར་འབྲེལ་ཟམ་བཙུགས་པ་རེད།

གམ་པ་གྲོང་རྡལ་དགྱེས་རུ་གྲོང་ཚོ་ནི་ལི་མིང་དབྱང་གིས་འགན་གཙང་བླངས་པའི་གྲོང་ཚོ་ཞིག་ཡིན་ཞིང་། ཆ་སྙོམས་ས་བབ་མཐོ་ཚད་སྨི་5000ལྷག་ཙམ་ཟིན་ཡོད། ཁོང་གིས་དུད་ཚང་རེ་རེ་བཞིན་འདྲི་རྩད་བྱས་ཏེ་གནས་ཚུལ་ཤེས་རྟོགས་བྱས། བསོད་ནམས་བུ་ཁྲིད་སློབ་ཆེན་ཐོན་རྗེས་ལས་ཀ་རག་མེད་པས་སེམས་ཁྲལ་ཆེན་པོ་བྱེད་པ་མཐོང་སྐབས། ལི་མིང་དབྱང་གིས“ལས་ཀ་ཡག་ཉེས་གང་ཞིག་ཡིན་རུང་སོ་སོའི་ལག་གཉིས་ལ་བརྟེན་ནས་དངུལ་གསོག་པ་ནི་གཟི་བརྗིད་ལྡན་པ་ཞིག་རེད། དཀའ་ངལ་གང་ཞིག་ཡོད་ནའང་ང་ཚོས་སེམས་ནུས་ཡོད་རྒུ་བཏོན་ནས་རོགས་རམ་བྱེད་ཀྱི་ཡིན”ཞེས་སེམས་གསོ་བཏང་།

ཕྱིས་སུ་ལི་མིང་དབྱང་གིས་ཁོ་མོར་དབུལ་སྐྱོར་མ་དངུལ་སྒོར་ཁྲི་5བརྩོན་ལེན་བྱས་ནས་ཇ་ཁང་ཞིག་འཛུགས་རོགས་བྱས་པར། ད་ཆ་བསོད་ནམས་བུ་ཁྲིད་ཀྱིས་ལོ་ལྟར་སྒོར་ཁྲི་10ལྷག་ཙམ་གསོག་ཐུབ་ཀྱི་ཡོད།

ལི་མིང་དབྱང་གི་སྣེ་ཁྲིད་འོག་གམ་པ་གྲོང་རྡལ་གྱི་ཏང་འཛུགས་སྐྱོང་ལས་དོན་ལ་འཕེལ་རྒྱས་མངོན་གསལ་དོད་པོ་བྱུང་ནས། གྲོང་རྡལ་ཡོངས་ཀྱི་ལས་བྱེད་པ་དང་མང་ཚོགས་ཀྱི་བསམ་པའི་ཉམས་འགྱུར་གསར་རྐྱང་དུ་གྱུར་ཡོད། 2018ལོ་ནས་2020ལོ་བར། གམ་པ་གྲོང་རྡལ་གྱི་ཏང་འཛུགས་སྐྱོང་ལས་དོན་ལོ་གསུམ་བསྟུད་མར་རྫོང་ཡོངས་ཀྱི་ཨང་དང་པོར་སླེབས་ཡོད།

མང་ཚོགས་སེམས་དབུས་ཀྱི་ཧྲུའུ་ཅི་དབྱང་ལགས།

རང་བྱུང་ཆ་རྐྱེན་ཤིན་ཏུ་ཞན་པས། 2016ལོར་འདི་གའི་དབུལ་པོར་འགྱུར་ཚད་སྔར་བཞིན་22.46%ཟིན་གྱི་ཡོད། བརྟག་ཞིབ་གཏིང་ཟབ་བྱས་པ་བརྒྱུད། ལི་མིང་དབྱང་གིས་མཉམ་སྡེབ་དཔལ་འབྱོར་གྱི་ཞན་ཆ་ནི་ས་གནས་དེ་གའི་དཔལ་འབྱོར་འཕེལ་རྒྱས་ལ་འགོག་རྐྱེན་བཟོ་བའི་རྒྱུ་རྐྱེན་གཙོ་བོ་ཡིན་པ་ངོས་འཛིན་གསལ་པོ་བྱུང་རྗེས། ཁོང་གིས“གམ་པའི་ལུག”གཙོ་ཁྲིད་དུ་བྱས་ནས་མཉམ་ལས་ཁང་འཕེལ་རྒྱས་ཤུགས་ཆེན་གཏོང་བའི་ལས་ཀའི་བསམ་ཕྱོགས་བཏོན་ཡོད།

ལི་མིང་དབྱང་གི་སྒྲིག་འཛུགས་སྣེ་ཁྲིད་འོག་གམ་པ་གྲོང་རྡལ་གྱིས་2019ལོར་ས་གནས་དེ་གའི་འབྲོག་ལས་ཐོན་ལས་བསྡུ་སྒྲིལ་དང་སྦྲགས། གྲོང་ཚོའི་ཏང་ཀྲི་པུའུ་8སྐུལ་སློང་བྱས་ནས་གམ་པའི་ལུག་གི་མཉམ་ལས་ཁང་བཙུགས་པ་མ་ཟད། ཏང་ཡོན་195ཡིས་ཡིག་ཚགས་དང་གཱ་བཟོས་པའི་དུད་ཚང་དབུལ་པོ་148ལ་མཉམ་ལས་ཁང་དུ་མ་རྐང་འཇོག་པར་སྣེ་ཁྲིད་བྱས་ཡོད།

2020ལོར་གམ་པ་གྲོང་རྡལ་དུ་ཡོང་འབབ་སྒོར་ཁྲི་བརྒྱ་ཟིན་པའི་མཉམ་ལས་ཁང་4ཡོད་པ་དང་མ་རྐང་འཇོག་མཁན་མི་རེའི་ཆ་སྙོམས་ཁེ་སྤོགས་སྒོར་3600ལྷག་ཙམ་ཟིན་པས། མང་ཚོགས་འབབ་འཕར་གྱི་ཐབས་ལམ་སྔར་བས་ཡངས་སུ་ཕྱིན་ཡོད། དེ་ནས་བཟུང་མང་ཚོགས་ཚོས་ལི་མིང་དབྱང་ལ་བརྩེ་བ་ཟབ་མོས་ཧྲུའུ་ཅི་དབྱང་ལགས་ཞེས་འབོད་ཀྱི་ཡོད།

“མཉམ་ལས་ཁང་གི་གཅིག་སྡུད་དོ་དམ་དང་གཅིག་གྱུར་ཕྱིར་ཚོང་གི་ཐབས་ལམ་བརྒྱུད། སྲོལ་རྒྱུན་གྱི་ཁ་ཐོར་དང་གཞི་ཁྱོན་ཆུང་བའི་གསོ་ཚགས་བྱེད་སྟངས་ལ་འགྱུར་ལྡོག་བཏང་ནས་གམ་པའི་ལུག་གི་དཔལ་འབྱོར་ཕན་འབྲས་ཆེ་རུ་བཏང་བས། མང་ཚོགས་ལ་ཕན་པ་དངོས་ཐོབ་ཡོད”ཅེས་གམ་པ་རྫོང་ཨུད་ཀྱི་ཧྲུའུ་ཅི་ཀྲོའུ་ཧའེ་ལང་གིས་བརྗོད།

“ཧྲུའུ་ཅི་ཁོང་ཡོད་ན་ང་ཚོ་བློ་བདེ་པོ་འདུག”

2017ལོའི་དགུན་དུས་སུ་གམ་པ་གྲོང་རྡལ་དགྱེས་རུ་གྲོང་ཚོར་གངས་ཆེན་པོ་བབས་ནས་འབྲོག་པ་ཁག་གཅིག་དང་ལུག་ཁྱུ་རི་སྟེང་དུ་ལུས། “ཁོ་ཚོ་གང་མགྱོགས་སྐྱོབ་དགོས། དུས་ཚོད་རིང་པོ་འགོར་ན་ལྟོགས་ཤི་དང་འཁྱགས་ཤི་ཐེབས་སྲིད་པ་མ་ཟད། སྲོག་ལ་ཉེན་ཁ་ཡང་ཡོད”ཅེས་ལི་མིང་དབྱང་གིས་དངངས་འཚབ་ཆེན་པོ་ལང་བཞིན་དུ་བརྗོད།

འབྲོག་རར་སྐྱོད་སའི་རི་ལམ་ཁ་བས་འགགས་པས་རི་ལམ་གསལ་པོ་མི་མཐོང་བའི་སྐབས་ཉེན་ཁ་ཧ་ཅང་ཆེན་པོ་ཡོད་མོད། འོན་ཀྱང་ལི་མིང་དབྱང་གིས་སེམས་ཐག་གཙང་བཅད་ཀྱིས་མདུན་དུ་བསྐྱོད། རླངས་འཁོར་རི་ལམ་དུ་འདྲེད་བདར་ཐེངས་འགའ་ཤས་ཤོར་ཡང་ལི་མིང་དབྱང་གིས་ཕྱིར་བཤོལ་མ་བྱས་པར་འཕྲལ་མར་འབྲོག་རར་བསྐྱོད་དེ་མྱུར་སྐྱོབ་བྱེད་འགོ་ཚུགས།

ལི་མིང་དབྱང་གི་བཀོད་འདོམས་འོག་རྐོ་འདྲུའི་འཕྲུལ་འཁོར་དང་ས་འབུད་འཕྲུལ་འཁོར་གྱིས་ཁ་བ་བུ་ཡུག་ཁྲོད་ལམ་བུ་བཤངས་པས་རི་སྟེང་དུ་ལུས་པའི་མང་ཚོགས་དང་ལུག་ཁྱུ་བདེ་འཇགས་ངང་ལོག་ཐུབ་ཡོད།

སྐབས་འདི་དུས་ཀྱི་གནས་ཚུལ་ཕྱིར་དྲན་བྱེད་སྐབས། དགྱེས་རུ་གྲོང་ཚོའི་མང་ཚོགས་པ་སངས་ཀྱིས“ཧྲུའུ་ཅི་ཁོང་ཡོད་ན་ང་ཚོ་བློ་བདེ་པོ་འདུག”ཅེས་སེམས་འགུལ་ཐེབས་བཞིན་དུ་བརྗོད།

གམ་པའི་མང་ཚོགས་ལ་ཆུ་དཀོན་པ་དང་ཚལ་དཀོན་པ་སོགས་ཀྱི་དཀའ་ངལ་འཕྲད་ཡོད། ཧྲུའུ་ཅིའི་ལས་འགན་ཁུར་མ་ཐག་པའི་ལི་མིང་དབྱང་གིས་གནད་དོན་དེ་ཐག་གཅོད་བྱེད་པའི་སེམས་ཐག་བཅད་དེ་རྫོང་ནས་དམངས་འཚོའི་འདུ་འགོད་རྣམ་གྲངས་ཀྱི་མ་དངུལ་བརྩོན་ལེན་ཧུར་ཐག་བྱས། ཁོང་གི་འབད་བརྩོན་འོག་གམ་པ་གྲོང་རྡལ་སློབ་ཆུང་དང་བུ་བཅོལ་ཁང་རྣམ་པ་གསར་རྐྱང་དུ་གྱུར་པ་དང་། འགྱིག་ཤོག་དྲོད་ཁང་58བསྐྲུན་ནས་མང་ཚོགས་ལ་སྔོ་ཚལ་སོས་པ་ཟ་རྒྱུ་བྱུང་བ། གྲོང་གསེབ་ཀྱི་འཐུང་ཆུའི་བདེ་འཇགས་ལས་དོན་སྤེལ་བས་ཞིང་འབྲོག་མང་ཚོགས་ཀྱི་འཚོ་བའི་ཆ་རྐྱེན་ཧ་ཅང་ལེགས་སུ་ཕྱིན་ཡོད། 2018ལོར་གམ་པ་རྫོང་སྤྱི་ཡོངས་ནས་དབུལ་གྲོལ་ཐུབ་ཅིང་། ན་ནིང་ལོ་མཇུག་བར་གྲོང་རྡལ་ཡོངས་ཀྱི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་15000ལྷག་ཙམ་ཟིན་གྱི་ཡོད།