“ལོ་ལྔ་ཚན་བཅུ་གསུམ་པའི”རིང་། གཞིས་རྩེ་གྲོང་ཁྱེར་གྱི་ནགས་ལས་དང་རྩྭ་ཐང་ཅུས་ཀྱིས་གཞིས་རྩེ་གྲོང་ཨུད་དང་གྲོང་ཁྱེར་སྲིད་གཞུང་གི་ཡང་དག་པའི་འགོ་ཁྲིད་དང་རང་སྐྱོང་ལྗོངས་ནགས་ལས་དང་རྩྭ་ཐང་ཅུས་ཀྱི་མཛུབ་ཁྲིད་ནུས་ལྡན་འོག་གཞིས་རྩེ་གྲོང་ཨུད་ཀྱི་སྤྱི་ཡོངས་ལས་ཀའི་བསམ་ཕྱོགས་གཞིར་བཟུང་། ནུས་ཤུགས་ཡོད་རྒུས“མཛེས་སྡུག་ལྡན་པའི་ཇོ་མོ་གླང་མའི”འཐབ་ཇུས་ལ་སྐུལ་འདེད་གཏོང་རྒྱུ་དམ་འཛིན་བྱ་གཞིར་བྱས་ཏེ་རྒྱལ་ཁབ་ས་ཆ་སྔོ་འགྱུར་འདུ་འགོད་ལག་ལེན་ཤུགས་ཆེན་བསྟར་བ་དང་སྐྱེ་ཁམས་བདེ་འཇགས་སྲུང་ཡོལ་བརྟན་དུ་བཏང་ནས་ལས་དོན་ཁག་ཏན་ཏིག་ངང་སྤེལ་བར་ཕན་འབྲས་བཟང་པོ་ཐོན་ཡོད།

ནགས་བཟོ་འཛུགས་སྐྲུན་ལ་ཕན་འབྲས་མངོན་གསལ་དོད་པོ་ཐོན་པ། 

“ལོ་ལྔ་ཚན་བཅུ་གསུམ་པའི”རིང་། གཞིས་རྩེ་གྲོང་ཁྱེར་གྱིས་རང་སྐྱོང་ལྗོངས་ནགས་ལས་དང་རྩྭ་ཐང་ཅུས་ཀྱིས་གཤམ་དུ་སྤྲད་པའི་ནགས་བཟོའི་ལས་འགན་གྱི་དམིགས་ཚད་ལེགས་སྒྲུབ་ནན་ཏན་བྱས་པ་དང་། ལས་འགན་གཙོ་བོའི་ནང་གཙོ་གནད་ས་ཁོངས་ཀྱི་ནགས་བཟོ་དང་། ལྷ་ས་དང་དེ་བཞིན་མཐའ་འཁོར་གྱི་ནགས་བཟོ། གཙང་པོ་གཉིས་དང་ཆུ་བོ་བཞི་རྒྱུག་ཁུལ་གྱི་ཤིང་འཛུགས་ནགས་བཟོ། སྐྱེ་ཁམས་བདེ་འཇགས་སྲུང་ཡོལ་གྱི་བྱེ་འགོག་བྱེ་བཅོས་སོགས་གཙོ་གནད་རྣམ་གྲངས་ཚུད་ཡོད་པ་དང་། ནགས་བཟོའི་ལས་འགན་སྣ་ཚོགས་ཁྱོན་མུའུ་ཁྲི་252.38ལེགས་སྒྲུབ་བྱས་པར་ཁྱོན་མ་དངུལ་སྒོར་དུང་ཕྱུར་13.78བཏང་བ་དང་ལེགས་གྲུབ་ཐུབ་ཚད་100%ཟིན་ཡོད།

“སྐྱེ་ཤིང་མེད་པའི་གྲོང་ཚོ”738དང“སྐྱེ་ཤིང་མེད་པའི་དུད་ཚང”58130ཡོད་པ་དེ་དག་ནི་གཞིས་རྩེ་གྲོང་ཁྱེར་གྱི“གྲོང་ཚོ་དང་དུད་ཚང་ཚང་མར་སྐྱེ་ཤིང་ཡོད་པར་བྱེད་དགོས་པའི”སྤྱིའི་ལས་འགན་ཞིག་རེད། 2018ལོའི་ཟླ་10པར་ས་བབ་མཐོ་ཚད་སྨི་4300མན་གྱི“སྐྱེ་ཤིང་མེད་པའི་གྲོང་ཚོ”420དང“སྐྱེ་ཤིང་མེད་པའི་དུད་ཚང”11900ཚང་མར་སྐྱེ་ཤིང་ཡོད་པར་བྱེད་དགོས་པའི་ལས་འགན་ཚང་མ་ལེགས་སྒྲུབ་བྱས་པ་དང་། ས་བབ་མཐོ་ཚད་སྨི་4300ཡན་གྱི་མཐོ་གྲང་ས་ཁུལ་དུ“གྲོང་ཚོ་དང་དུད་ཚང་ཚང་མར་སྐྱེ་ཤིང་ཡོད་པར་བྱེད་པའི”ལས་དོན་སྤེལ་བཞིན་ཡོད་པ་རེད།

2016ལོ་ནས་བཟུང་གཞིས་རྩེ་གྲོང་ཁྱེར་གྱི་གྲོང་ཁྱེར་སྔོ་འགྱུར་ཐད་ཁྱོན་མ་དངུལ་སྒོར་དུང་ཕྱུར་7.43བཏང་ནས་འགྲོ་ལམ་གཡས་གཡོན་དུ་སྔོ་འགྱུར་དང་། གསབ་འདེབས་གསབ་འཛུགས། གྲོང་ཁུལ་གྱི་སྤྱི་གླིང་སྔོ་འགྱུར་འཛུགས་སྐྲུན་སོགས་ཀྱི་ལས་དོན་སྤེལ་བས། གྲོང་ཁྱེར་གྱི་ཞོར་གཏོགས་སྔོ་འགྱུར་ས་ཆའི་རྒྱ་ཁྱོན་སྨི་ངོས་གྲུ་ཁྲི་16.34དང་གྲོང་ཁུལ་གྱི་སྤྱི་གླིང་སྔོ་འགྱུར་ས་ཆའི་རྒྱ་ཁྱོན་སྨི་ངོས་གྲུ་ཁྲི་23.68གསར་དུ་འཕར་ཡོད། 2019ལོའི་ལོ་མཇུག་ཏུ་གཞིས་རྩེ་གྲོང་ཁུལ་གྱི་སྔོ་འགྱུར་ས་ཆའི་རྒྱ་ཁྱོན་སྤྱི་ཆིང་274.49དང་། མི་རེའི་ཆ་སྙོམས་སྔོ་འགྱུར་ས་ཆའི་རྒྱ་ཁྱོན་སྨི་ངོས་གྲུ་24.57 གྲོང་ཁུལ་གྱི་སྔོ་འགྱུར་སྤྱི་གླིང་གི་རྒྱ་ཁྱོན་སྨི་ངོས་གྲུ་ཁྲི་177.39བཅས་ཟིན་ཡོད།

གཞིས་རྩེ་གྲོང་ཁྱེར་ནགས་ལས་དང་རྩྭ་ཐང་ཅུས་ཀྱིས་གཞིས་རྩེ་གྲོང་ཨུད་དང་གྲོང་ཁྱེར་སྲིད་གཞུང་གི་བླང་བྱ་གཞིར་བཟུང་། ཡུལ་བབ་དང་བསྟུན་ནས་བསམ་གྲུབ་རྩེ་ཆུས་ཀྱི་སྦྱར་པ་དང་། རྣམ་གླིང་རྫོང་གི་ལོ་མ་ཕྲ་བའི་འོམ་བུ། རྒྱལ་རྩེ་རྫོང་གི་གླ་ཚེར་བཅས“ཡུལ་དེ་གའི་མུའུ་ཁྲི་ཟིན་པའི་སྡོང་ཕྲུག་ར་བ་གསུམ”ཧུར་ཐག་བསྐྲུན་པར་ཁྱོན་མ་དངུལ་སྒོར་དུང་ཕྱུར་6.3བཏང་བ་རེད། མིག་སྔའི་བར་མུའུ་ཁྲི་1.7བསྐྲུན་ཟིན་པ་དང་། རིམ་རྩིས་བྱས་ན་རྒྱལ་རྩེའི་གླ་ཚེར་སྡོང་རྐང་ཁྲི་350དང་ཡུལ་དེ་གའི་སྡོང་ཕྲུག་རྐང་ཁྲི་25སྐྱེད་སྲིང་དང་ཕྱིར་ཚོང་བྱས་ཡོད། རིམ་རྩིས་བྱས་ན་མང་ཚོགས་3500ཡི་ལས་ཞུགས་གནད་དོན་ཐག་གཅོད་ཐུབ་པ་དང་འབབ་འཕར་སྒོར་དུང་ཕྱུར་2.3ཡོང་རྒྱུར་སྐུལ་ཁྲིད་ཐུབ་པ། གཞི་རིམ་མང་ཚོགས་རང་ས་རང་ཡུལ་ནས་མི་བྲལ་བར་ཐག་ཉེ་ས་དང་སྟབས་བདེ་སར“སྐྱེ་ཁམས་ཀྱི་ཡོང་འབབ”གསོག་ཐུབ་པ་བྱུང་ཡོད།

ནགས་ཚལ་དང་རྩྭ་ཐང་གི་ཐོན་ཁུངས་ལ་བེད་སྤྱོད་དང་དོ་དམ་ཟུང་འབྲེལ་བྱས་པ།

2015ལོ་ནས་2019ལོ་བར་གཞིས་རྩེ་གྲོང་ཁྱེར་གྱིས་ནགས་ས་བསྡུ་སྤྱོད་དང་བཟུང་སྤྱོད་ཀྱི་ཞིབ་བཤེར་གཏན་འབེབས་འགྲོ་ལུགས་ཁག་180གཉེར་བ་དེ་དག་ནགས་སའི་རྒྱ་ཁྱོན་སྤྱི་ཆིང་1791.5དང་འབྲེལ་བ་ཡོད་པ་དང་། ནགས་ཚལ་དང་རྩྭ་ཐང་གི་ཐོན་ཁུངས་ལ་ཁྲིམས་ལྟར་ལྟ་སྐུལ་དོ་དམ་ནུས་ལྡན་བྱས་ཡོད། གཞིས་རྩེ་གྲོང་ཁྱེར་དུ་ད་ཡོད་ཀྱི་སྤྱི་ཕན་ནགས་ཚལ་རྒྱ་ཁྱོན་མུའུ་ཁྲི་1786.1དང་སྤྱི་ཕན་ནགས་ཚལ་དོ་དམ་སྲུང་སྐྱོང་བ་34526ཡོད་པ་དང་། རྣམ་གྲངས་དེ་ལག་བསྟར་བྱས་པ་བརྒྱུད་ལོ་ལྟར་ཞིང་འབྲོག་མང་ཚོགས་ལ་འབབ་འཕར་སྒོར་ཁྲི་9400ལྷག་ཙམ་ཡོང་བར་སྐུལ་ཁྲིད་ཐུབ་ཡོད། 2015ལོ་ནས་2019ལོ་བར་ཁྱོན་རྩྭ་ཐང་བསྡུ་སྤྱོད་དང་བཟུང་སྤྱོད་ལ་ཞིབ་བཤེར་ཆོག་མཆན་སྤྲོད་པའི་རྣམ་གྲངས་35བདག་སྤྲོད་བྱས་པ་དང་། རྩྭ་ཐང་རྒྱ་ཁྱོན་བསྡོམས་མུའུ་332772.88བསྡུ་སྤྱོད་དང་བཟུང་སྤྱོད་བྱས་ཡོད།

གཞིས་རྩེ་གྲོང་ཁྱེར་གྱིས་ད་དུང་ཕྱུགས་རྩྭའི་སོན་གསར་ཚོད་ལྟའི་དཔེ་སྟོན་ལས་དོན་དང་ཞོག་ཁོག་དང་དང་ཕྱུགས་རྩྭ་བསྐྱར་འདེབས་ལག་རྩལ་ཐད་ཞིབ་འཇུག་ཧུར་ཐག་བྱས་པ་རེད། རྣམ་གླིང་རྫོང་ཨེ་མ་ཤང་གི་ཚོད་ལྟ་ཁུལ་དང་ཁང་དམར་རྫོང་ཉིང་རུ་སྟོད་ཤང་གི་ཕྱུགས་རྩྭའི་སོན་བཟང་ནང་འདྲེན་ཚོད་ལྟ་ལེགས་གྲུབ་བྱུང་བའི་བྱ་ཐབས་ཁྱབ་གདལ་ཧུར་ཐག་བཏང་བ་དང་། གམ་པ་དང་། ལྷ་རྩེ། ངམ་རིང་སོགས་རྫོང་8ལ་ཚན་རིག་དང་མཐུན་པའི་སྒོ་ནས་རྩྭ་འདེབས་དཔེ་སྟོན་དང་ལག་རྩལ་ཁྱབ་གདལ་གཏོང་བའི་ལས་དོན་སྤེལ་བར་མཛུབ་ཁྲིད་བྱས་པ། ཕྱུགས་རྩྭའི་ཡུག་པོའི་སོན་གསར་སྣ་ཁ་6དང་། ཚོད་ལྟའི་ཞིང་ཁ་མུའུ་16 ཨེ་མ་ཡི་ཡུག་པོ་ཨང་དང་པོ་དང་ཨེ་མ་ཡི་གྲོ་ལྗང་ཨང་དང་པོའི་དཔེ་སྟོན་ཞིང་ཁ་མུའུ་800བཏབ་ཡོད།

གཞིས་རྩེ་གྲོང་ཁྱེར་གྱིས་ཡུག་པོ་དང་། མ་རྨོས་ལོ་ཏོག སྲན་མ། གྲོ་ནག་སོགས་སོན་རིགས་36ནང་འདྲེན་དང་ས་གནས་ནས་བསྡུ་རུབ་བྱས་པ་དང་། འདེབས་ཚད་མི་འདྲ་བ་དང་། ལུད་རྒྱག་སྡེབ་སྦྱོར་མི་འདྲ་བ། བར་ཐག་མི་འདྲ་བ་སོགས་ཀྱི་བྱེད་ཐབས་བརྒྱུད་ཞིབ་བསྡུར་ཚོད་ལྟའི་དཔེ་སྟོན་ཁུལ་ཆུང་236བཙུགས་ཏེ་ཡུག་པོའི་སོན་བཟང་ནང་འདྲེན་ཞིབ་བསྡུར་ཚོད་ལྟ་བྱས་ཏེ། ས་ཁོངས་མི་འདྲ་བར་ཁྱབ་གདལ་གཏོང་རྒྱུར་འཚམ་པའི་ཕྱུགས་རྩྭའི་སོན་དང་འདེབས་འཛུགས་དོ་དམ་ཇུས་གཞི་ཕྱོགས་སྡོམ་བྱས་པ་དང་ཚོད་ལྟའི་དཔེ་སྟོན་གྱི་གྲུབ་འབྲས་དང་རྩྭ་ལས་ཐོན་སྐྱེད་གནས་ཚུལ་གྱི་བརྟག་ཞིབ་འབྲས་བུ་གཞིར་བཟུང་གཞིས་རྩེ་གྲོང་ཁྱེར་གྱི་ཕྱུགས་རྩྭའི་ཚན་རིག་དང་མཐུན་པའི་འདེབས་འཛུགས་ལག་རྩལ་གྱི་ལག་དེབ་རྩོམ་འབྲི་བྱས་པ་རེད།

སྲུང་སྐྱོང་ཁུལ་ལ་དོ་དམ་བྱེད་ཤུགས་ཆེ་རུ་བཏང་བ།

2020ལོར་གཞིས་རྩེ་གྲོང་ཁྱེར་གྱིས་ཇོ་མོ་གླང་མའི་སྲུང་སྐྱོང་ཁུལ་གྱི་རྫོང་བཞིའི་ཞིང་འབྲོག་པའི་ཆེད་ལས་དོ་དམ་སྲུང་སྐྱོང་རུ་ཁག་བཙུགས་ནས་མ་དངུལ་སྒོར་ཁྲི་395.5བཏང་སྟེ་དོ་དམ་ས་ཚིགས་19ལ་སྒྲིག་ཆས་སྤྲད་པས་སྲུང་སྐྱོང་ཁུལ་གྱི་དོ་དམ་སྲུང་སྐྱོང་ནུས་པ་ཆེ་རུ་ཤུགས་ཆེན་ཕྱིན་ཡོད།

2015ལོ་ནས་བཟུང་། གཞིས་རྩེ་གྲོང་ཁྱེར་གྱིས་སྲུང་སྐྱོང་ཁུལ་གྱི་འཛུགས་སྐྲུན་རྣམ་གྲངས་13ལག་བསྟར་བྱས་པར་ཁྱོན་མ་དངུལ་སྒོར་ཁྲི་9279.9བཏང་བ་དང་འདམ་རའི་རིགས་ཀྱི་རྣམ་གྲངས་ལ་མ་དངུལ་སྒོར་ཁྲི་4928.09བཏང་ཡོད། 《རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་ལེགས་སྒྲིག་དོ་དམ་སྲོལ་ཡིག་གི་གཏན་འབེབས》དང་བཟུང་གསབ་དོ་སྙོམས་ཀྱི་རྩ་དོན་གཞིར་བཟུང་། ཡར་ཀླུང་གཙང་པོའི་ཁྲུང་ཁྲུང་སྐེ་ནག་གི་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་གཞིས་རྩེ་ཁུལ་གྱི་ཁྱབ་ཁོངས་བསྐྱར་དུ་ལེགས་སྒྲིག་འཆར་འགོད་བྱས་པ་དང་། ལེགས་སྒྲིག་རྒྱ་ཁྱོན་ལ་སྤྱི་ཆིང་10318.23ཟིན་པའི་ནང་སྲུང་སྐྱོང་ཁུལ་ནས་འཐེན་པའི་རྒྱ་ཁྱོན་སྤྱི་ཆིང་5889.9དང་སྲུང་སྐྱོང་ཁུལ་དུ་འཐེན་པའི་རྒྱ་ཁྱོན་སྤྱི་ཆིང་4428.26ཟིན་པ་དེ་རྒྱལ་ཁབ་ནགས་ལས་དང་རྩྭ་ཐང་ཅུས་ལ་ཞིབ་བཤེར་བྱ་རྒྱུར་ཕུལ་ནས་ལས་དོན་སྤེལ་བཞིན་ཡོད།

ནགས་ལས་རང་བྱུང་སྲུང་སྐྱོང་ཁུལ་དང་འབྲེལ་བ་ཡོད་པའི་འཛུགས་སྐྲུན་རྣམ་གྲངས་ཁག་གི་ཆོག་འཐུས་ཚད་ལྡན་དུ་གཏོང་ཆེད། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རང་བྱུང་སྲུང་སྐྱོང་དོ་དམ་སྲོལ་ཡིག》གཞིར་བཟུང་། རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་དང་འབྲེལ་བ་ཡོད་པའི་རྣམ་གྲངས་ཁག་ལ་ཞིབ་དཔྱད་ནན་ཏན་བྱས་ཡོད། མིག་སྔའི་བར་རང་སྐྱོང་ལྗོངས་ནགས་ལས་དང་རྩྭ་ཐང་ཅུས་ལ་སྲིད་འཛིན་ཞིབ་མཆན་ཁག་357གོང་འབུལ་ཞུས་པའི་ནང་2020ལོར་སྲིད་འཛིན་ཞིབ་མཆན་ཁག་60ལྷག་ཙམ་གོང་འབུལ་ཞུས་ཡོད། གཞིས་རྩེ་གྲོང་ཁྱེར་གྱིས་གང་བྱུང་དུ་རི་སྐྱེས་སྲོག་ཆགས་རྔོན་པ་དང་ཁྲིམས་འགལ་ངང་འདབ་ཆགས་རིགས་ཚོང་གཉེར་བྱེད་པ་སོགས་ཀྱི་སྣང་ཚུལ་ལ་སྔོན་འགོག་དང་རྡུང་རྡེག་གཏོང་ཆེད། 《དུས་བྱའི་བྱ་རིགས་ཀྱི་སྐོར་སྲུང་ལས་འགན་དང་ཁྲིམས་འཛིན་ཞིབ་བཤེར་ལས་དོན་ལ་ཤུགས་སྣོན་ཏན་ཏིག་རྒྱག་རྒྱུའི་སྐོར་གྱི་ཛ་དྲག་བརྡ་ཐོ》དུས་ཐོག་ཏུ་བཏང་བ་དང་དོ་དམ་སྲུང་སྐྱོང་མི་སྣ་སྒྲིག་འཛུགས་བྱས་ཏེ་སྐོར་སྲུང་ལ་ཤུགས་སྣོན་བརྒྱབ་པ་དང་འབྲེལ་ཡོད་སྡེ་ཚན་དང་མཉམ་དུ་ལྟ་ཞིབ་ཚད་ལེན་དང་རིམས་འགོག་ལས་དོན་ཡག་པོ་བསྒྲུབས་ཡོད།