འདི་ནི་མངའ་རིས་ས་ཁུལ་གྱི་ལས་བྱེད་པ་དང་མང་ཚོགས་ཀྱིས་ཤིང་འཛུགས་བཞིན་པ། 

ད་ཕན་ལོ་ཤས་རིང་། སྐྱེ་ཁམས་ཤེས་དཔལ་འཛུགས་སྐྱོང་ལ་སྐུལ་འདེད་མགྱོགས་སུ་གཏོང་བ་དང་ནགས་ཚལ་ས་ཆ་བཟུང་སྤྱོད་ཀྱི་དོ་དམ་ཁྲིམས་བཞིན་ཚད་ལྡན་དུ་གཏོང་ཆེད། མངའ་རིས་ས་ཁུལ་ནགས་ཚལ་རྩྭ་ཐང་ཅུས་ཀྱིས་ནགས་ཚལ་དང་རྩྭ་ཐང་གི་ཐོན་ཁུངས་དོ་དམ་དང་རྣམ་གྲངས་གལ་ཆེན་གྱིས་ནགས་ཚལ་ས་ཆ་བཟུང་སྤྱོད་ཐད་ཀྱི་ཞིབ་མཆན་དང་བུད་ཤིང་འཐུ་བར་དོ་དམ་སོགས་ནགས་ཚལ་ཐོན་ཁུངས་ལ་གཙོ་གནད་ལྟ་འདོམས་ལས་དོན་སྤེལ་ནས། ནགས་ཚལ་རྩྭ་ཐང་གི་ཐོན་ཁུངས་གཏོར་བཤིག་གཏོང་བའི་བྱེད་སྤྱོད་ཀྱི་ཞིབ་དཔྱད་ཤེས་རྟོགས་དང་ཁྲིམས་འགལ་གྱི་གནད་དོན་ཞིབ་བཤེར་ཐག་གཅོད་བྱེད་ཤུགས་ཆེ་རུ་བཏང་བ་རེད།

ཤེས་རྟོགས་བྱུང་བར་གཞིགས་ན། མངའ་རིས་ས་ཁུལ་ནགས་ཚལ་རྩྭ་ཐང་ཅུས་ཀྱིས་2020ལོའི་དུས་ཚིགས་གསུམ་པའི་ནགས་ཚལ་རྩྭ་ཐང་ལ་ལྟ་འདོམས་སྐོར་གཡེང་ཞིབ་བཤེར་བྱེད་པའི་བླང་བྱ་གཞིར་བཟུང་། 2020ལོའི་ལོ་འགོ་ནས་བཟུང་མངའ་རིས་ས་ཁུལ་གྱི་རྫོང་བདུན་གྱིས་སྐོར་གཡེང་ཆེ་ཆུང་སྣ་ཚོགས་ཐེངས་120ཙམ་བྱས་པ་དང་རྫོང་བདུན་གྱི་རང་བྱུང་ཐོན་ཁུངས་ཅུས་ཀྱིས་ཁོངས་གཏོགས་ཀྱི་ནགས་ཚལ་རྩྭ་ཐང་དང་དེ་བཞིན་རིགས་ཁག་གི་སྲུང་སྐྱོང་ས་ཆའི་འཛུགས་སྐྲུན་རྣམ་གྲངས་ཀྱི་ས་ཁོངས་སུ་སྐོར་གཡེང་ཞིབ་བཤེར་ཐེངས་13བྱས་པ་རེད། སྐོར་གཡེང་ཞིབ་བཤེར་བྱེད་སྐབས། རྫོང་ཁོངས་ཁག་གི་འཛུགས་སྐྲུན་རྣམ་གྲངས་ཐད་ཆོག་མཆན་མ་ཐོབ་པར་སྔོན་ལ་བསྐྲུན་པ་དང་། ཚད་ལས་བརྒལ་ནས་ནགས་ཚལ་དང་རྩྭ་ཐང་བཟུང་སྤྱོད། ཨར་སྐྲུན་ཚན་པ་ཁག་གིས་གཏན་འབེབས་ལས་འགལ་ནས་ས་ལེན་པ་དང་གད་སྙིགས་གང་བྱུང་དུ་གཤོ་བ་སོགས་ཀྱི་གནད་དོན་མེད་པ་ཤེས་རྟོགས་བྱུང་བ་རེད།

མངའ་རིས་ས་ཁུལ་ནགས་ཚལ་རྩྭ་ཐང་ཅུས་ཀྱིས་ནགས་ཚལ་རྩྭ་ཐང་སྡེ་ཚན་གྱི་སྲིད་འཛིན་ཆོག་འཐུས་ཞབས་ཞུའི་ཕྱོགས་སྟོན་དང་སྲིད་ཇུས་དང་བཅའ་ཁྲིམས་ཁྲིམས་སྲོལ་གྱི་ཡིག་ཆ་གལ་ཆེན་དུས་ཐོག་ཏུ་རྫོང་ཁག་ལ་བཀྲམ་ནས་རྫོང་ཁག་གིས་གཏན་འབེབས་ཀྱི་བླང་བྱར་ནན་པོར་གཞིགས་ཏེ་སྲིད་འཛིན་ཞབས་འདེགས་ཞུས་པ་དང་ལྟ་བཤེར་དོ་དམ་ལས་དོན་སྤེལ་བ་དང་། ནགས་ཚལ་ཁྱབ་ཚུལ་དང་ད་ཕན་ལོ་ཤས་རིང་ནད་འབུའི་གནོད་འཚེ་ཐོན་ཚུལ་ལ་གཞིགས་ནས་ནགས་ལས་གནོད་ལྡན་སྐྱེ་དངོས་འགོག་བཅོས་མ་དངུལ་དུས་ཐོག་ཏུ་སྤྲད་པར། སྒར་རྫོང་ལ་སྒོར་ཁྲི་15དང་། རུ་ཐོག་དང་། རྩྭ་མདའ། སྤུ་ཧྲེང་བཅས་ལ་སྒོར་ཁྲི་10 ས་ཁུལ་རིམ་པ་དེ་རང་ལ་སྒོར་ཁྲི་5བཅས་ཁྱོན་བསྡོམས་སྒོར་ཁྲི་50སྤྲད་པ་རེད།