ཉེ་ཆར་ལྷ་རྩེ་རྫོང་གིས་2021ལོའི་ས་གནས་ས་ཐོག་གི་ལས་བསྡུའི་འདུ་ཚོགས་འཚོགས་པ་རེད།

ཤེས་རྟོགས་བྱུང་བར་གཞིགས་ན། ད་རེས་ཀྱི་ལས་བསྡུའི་འདུ་ཚོགས་ཀྱིས་ལྷ་རྩེ་རྫོང་གི་མཐོ་སློབ་སློབ་ཐོན་སློབ་མ་དང་། གྲོང་ཁྱེར་དང་གྲོང་རྡལ་གྱི་ལས་ཤོར་མི་སྣ། དམག་ཞབས་ཐིམ་པའི་དམག་མི་སོགས་སྤྱི་ཚོགས་ཐོག་ལས་ཞུགས་མ་ཐུབ་པའི་མི་སྣའི་ལས་ཞུགས་ཐབས་ལམ་ཡངས་སུ་བཏང་བ་དང་ལས་ཞུགས་འཇོན་ཐང་ཆེ་རུ་བཏང་སྟེ་སྔ་ཙམ་ལས་ཞུགས་ཐུབ་པར་བྱས་པས། ལས་ཞུགས་ཀྱི་དུས་བབ་བརྟན་དུ་གཏོང་བར་དོན་སྙིང་གལ་ཆེན་ལྡན་ཡོད་པ་རེད། ལས་བསྡུའི་འདུ་ཚོགས་ཐོག་ལྷ་ས་གྲོང་ཁྱེར་དང་། གཞིས་རྩེ་གྲོང་ཁྱེར། ལྷ་རྩེ་རྫོང་བཅས་ཀྱི་གཞུང་ཁོངས་ཁེ་ལས་དང་དམངས་གཉེར་ཁེ་ལས་40ལྷག་ཙམ་གྱིས་ལས་ཞུགས་ལས་གནས་800ལྷག་ཙམ་མཁོ་འདོན་བྱས་པ་དེ་དག་རྩིས་པ་དང་། སྲིད་འཛིན་མི་སྣ། ཉོ་སྒྲུབ་མི་སྣ། ཐོན་སྐྱེད་བཀོལ་སྤྱོད་མི་སྣ། བྲིན་ཚོང་མི་སྣ། ལག་རྩལ་པ་སོགས་ལས་རིགས་ཁག་དང་འབྲེལ་བ་ཡོད་པ་རེད།