ཤང་དང་གྲོང་རྡལ་གྱི་འགོ་ཁྲིད་ཚན་ཁག་གི་སྐབས་བརྗེའི་ལས་དོན་ཁྲོད། ལྷ་ས་གྲོང་ཁྱེར་གྱིས་དུས་སྐབས་གསར་པའི་ལས་བྱེད་པ་ཡག་པོའི་ཚད་གཞི་དང་མི་རིགས་ས་ཁུལ་གྱི་ལས་བྱེད་པའི“དམིགས་བསལ་གསུམ”གྱི་བླང་བྱ་ལག་བསྟར་དོན་འཁྱོལ་ནན་པོ་བྱས་ཏེ་གྲོང་གསེབ་ཀྱི་ཐོན་ལས་དར་རྒྱས་དང་། ཤེས་ལྡན་མི་སྣ་དར་རྒྱས། རིག་གནས་དར་རྒྱས། སྐྱེ་ཁམས་དར་རྒྱས། རྩ་འཛུགས་དར་རྒྱས་བཅས་ལ་དམ་པོར་དམིགས་ནས་ཡང་དག་འདེམས་སྤྱོད་ཀྱི་སྟོན་ཕྱོགས་མཐའ་འཁྱོངས་ཀྱིས་ཤང་དང་གྲོང་རྡལ་གྱི་འགོ་ཁྲིད་ཚན་ཁག་གནད་སྨིན་འདེམས་བསྐོ་བྱས་ཏེ། དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་གྲོང་གསེབ་དར་རྒྱས་འཐབ་ཇུས་ཕྱོགས་ཡོངས་ནས་ལག་ལེན་བསྟར་རྒྱུར་ཤེས་ལྡན་མི་སྣའི་རྨང་གཞི་བརྟན་པོ་ཞིག་བཏིང་བ་རེད།
ཤང་དང་གྲོང་རྡལ་གྱི་ལས་བྱེད་པས་མང་ཚོགས་དང་ཐད་ཀར་འབྲེལ་བ་བྱེད་མཁན་ཡིན་པས། ཁོང་ཚོ་ནི་གྲོང་གསེབ་ལས་དོན་གྱི་རྐང་འཛིན་སྟོབས་ཤུགས་དང་སྲིད་ཇུས་དོན་འཁྱོལ་གྱི“མཐའ་མའི་འགག་གནད”ཡིན་པ་རེད། སྐབས་བརྗེའི་ལས་དོན་ཁྲོད། ལྷ་ས་གྲོང་ཁྱེར་གྱིས་འདེམས་སྤྱོད་ཀྱི་སྟོན་ཕྱོགས་ཁོང་དུ་ཡང་དག་ཆུད་པར་བྱས་ཏེ་ཏང་དང་མང་ཚོགས་ཀྱི་ལས་བྱེད་པ་རྣམས་ཏང་འཛུགས་སྐྱོང་ཞན་པའི་ཤང་དུ་སྐྱོད་པ་དང་། དཔལ་འབྱོར་ལས་བྱེད་པ་རྣམས་ཐོན་ལས་ཞན་པའི་ཤང་དུ་སྐྱོད་པ་། སྲིད་ཁྲིམས་ལས་བྱེད་པ་རྣམས་བཅོས་སྐྱོང་ཞན་པའི་ཤང་དུ་སྐྱོད་པའི་ལས་ཀའི་བསམ་ཕྱོགས་ལྟར། ཡུན་རིང་གཞི་རིམ་དུ་རྩ་བ་ཚུགས་པ་དང་དཀའ་སྤྱད་སྙིང་རུས་ཅན། བརྟན་ལྷིང་སྲུང་སྐྱོང་གི་འཐབ་ས་མདུན་མ་དང་། དབུལ་སྒྲོལ་འགག་སྒྲོལ་གྱི་འཐབ་ས་གཙོ་བོ། སྣོད་བཅུད་ཁོར་ཡུག་སྲུང་སྐྱོང་གི་འཐབ་ས་དང་པོ་བཅས་སུ་སྐད་གྲགས་མེད་པར་ལེགས་སྐྱེས་འབུལ་མཁན་གྱི་ལས་བྱེད་པ་དག་ལེགས་འདེམས་བྱས་ཐོག ཤང་དང་གྲོང་རྡལ་གྱི་བྱ་གཞག་སྒྲིག་ཁོངས་ཀྱི་མི་སྣ་དང་། གྲོང་ཚོའི་ཏང་རྩ་འཛུགས་ཀྱི་ཕུལ་བྱུང་ཧྲུའུ་ཅི་དང་ཧྲུའུ་ཅི་དང་པོ། གྲོང་སྡོད་ལས་དོན་རུ་མི། དགོན་སྡེ་དོ་དམ་ཨུ་ལྷན་གྱི་ཕུལ་བྱུང་ལས་དོན་མི་སྣ་བཅས་གྲོང་གསེབ་ཀྱི་ལས་ཀའི་ཉམས་མྱོང་ཕུན་སུམ་ཚོཌ་པའི་མི་སྣ་རིགས་ལྔ་འདེམས་སྒྲུག་ཤུགས་ཆེན་བྱས་པ་དང་འབྲེལ་དོན་དངོས་དང་ཟུང་འབྲེལ་གྱིས་ཁྱབ་ཁྱོན་ཡང་ཆེ་རུ་བཏང་ནས། ཆ་རྐྱེན་དང་མཐུན་པའི་ཆེད་བསྡུའི་སློབ་མ་དང་གྲོང་ཚོ་རིམ་པའི་རྩ་འཛུགས་ཀྱི་ཆེད་བསྐོས་ལས་བྱེད་པ་བསྡུས་ནས་ལྷ་སའི་དཔལ་འབྱོར་དང་སྤྱི་ཚོགས་སྤུས་ཚད་མཐོ་པོའི་སྒོ་ནས་འཕེལ་རྒྱས་འགྲོ་རྒྱུར་སྲ་ཞིང་བརྟན་པའི་རྩ་འཛུགས་ཀྱི་འགན་ལེན་མཁོ་འདོན་བྱས་པ་རེད།
“སྣེ་ཁྲིད་མཁན”ཡག་པོ་འདེམས་པ་ནི་ཤང་དང་གྲོང་རྡལ་གྱི་སྐབས་བརྗེའི་ལས་ཀའི་གལ་ཆེན་ནང་གི་འགངས་ཆེན་ཞིག་རེད། དེར་བརྟེན། ལྷ་ས་གྲོང་ཁྱེར་གྱིས་སྤྱོད་ཡོན་གཉིས་ལྡན་དང་ཀུན་སྤྱོད་གཙོ་བོར་འཛིན་པའི་མི་སྤྱོད་ཚད་གཞི་མཐའ་འཁྱོངས་བྱས་ཏེ་ཏང་སྲིད་ཀྱི་གཙོ་འགན་འཁུར་མཁན་བཀོད་སྒྲིག་ཡག་པོ་བྱས་པ་དང་། “འགག་རྩའི་ཉུང་ཤས”ཡག་པོ་བདམས་ནས“མང་ཆེ་བར”སྣེ་ཁྲིད་ཐུབ་པར་བྱས་ཡོད། སྐབས་བརྗེའི་བརྒྱུད་རིམ་ནང་། ལྷ་ས་གྲོང་ཁྱེར་གྱིས་ཆབ་སྲིད་ཀྱི་བྱང་ཚད་ལེགས་པ་དང་། འཐབ་རྩོད་ཀྱི་ཚོད་བགམ་ཐེག་པ། ལས་ཀའི་གྲུབ་འབྲས་མངོན་གསལ་དོད་པ། རྙོག་འཛིང་ཆེ་བའི་རྣམ་པར་ཁ་ལོ་སྒྱུར་མཁས་པ་བཅས་ཀྱི་ཕུལ་བྱུང་ལས་བྱེད་པ་འདེམས་སྒྲུག་བྱ་རྒྱུར་མཐོང་ཆེན་བྱས་པ་དང་འབྲེལ། ས་ཁོངས་ཀྱི་ལྟེ་བའི་རྣམ་པ་དང་། ཚོང་དོན་ཟོག་འགྲེམས་ཀྱི་རྣམ་པ། འགྲིམ་འགྲུལ་ལྟེ་བའི་རྣམ་པ། ཡུལ་སྐོར་ཞབས་ཞུའི་རྣམ་པ་སོགས་འཕེལ་རྒྱས་ཀྱི་རིགས་མི་འདྲ་བའི་ཤང་དང་གྲོང་རྡལ་གྱི་གནས་བབ་དང་ཟུང་འབྲེལ་གྱིས་དམིགས་སའི་རང་བཞིན་ལྡན་པའི་སྒོ་ནས་དེ་མཚུངས་ཀྱི་ཆེད་ལས་དང་ལས་ཀའི་ཉམས་མྱོང་ཡོད་པའི་ལས་བྱེད་པ་གཙོ་བོ་བཀོད་སྒྲིག་བྱས་ཡོད། དེ་དང་ཆབས་ཅིག་མི་སྤྱོད་ཀྱི་མཐོང་རྒྱ་ཆེ་རུ་བཏང་ནས་འབྲེལ་ཡོད་ཆེད་ལས་ཀྱི་བྱང་ཚད་ལྡན་པ་དང་། ཕྱོགས་བསྡུས་ཀྱི་བྱང་ཚད་མཐོ་བ། འཕེལ་རྒྱས་ཀྱི་གཏིང་ཤུགས་ཆེན་པོ་ལྡན་པ་བཅས་ཀྱི་རྫོང་རིམ་ཡན་གྱི་ལས་ཁུངས་ནས་ན་གཞོན་ལས་བྱེད་པ་20ལེགས་འདེམས་བྱས་ཏེ་ལས་འགན་གཙོ་བོ་ཁུར་དུ་བཅུག་པས་ཤང་དང་གྲོང་རྡལ་གྱི་བརྟན་ལྷིང་སྲུང་སྐྱོང་དང་། འཕེལ་རྒྱས་ལ་སྐུལ་འདེད། སྐྱེ་ཁམས་སྲུང་སྐྱོང་བཅས་ཀྱི“སྣེ་ཁྲིད་པའི”དཔུང་ཁག་བཀོད་སྒྲིག་དེ་བས་ལུགས་མཐུན་བྱུང་ཡོད།