2017ལོའི་ཟླ་3པར། ཉིང་ཁྲི་རུན་ཤིན་ཁེ་ལས་ཚད་ཡོད་ཀུང་སིའི་ཏང་ཀྲི་པུའུ་ནི་ཉིང་ཁྲི་གྲོང་ཁྱེར་སྤྱི་དབང་མིན་པའི་ལམ་ལུགས་ཀྱི་ཏང་གི་ལས་དོན་ཨུ་ལྷན་གྱི་ཆོག་མཆན་ཐོབ་ནས་བཙུགས་ཤིང་། ཏང་ཀྲི་པུའུ་བཙུགས་པ་ལས་རུན་ཤིན་ཁེ་ལས་ཀུང་སིའི་བསམ་པའི་སྒུལ་ཤུགས་ཆེན་པོ་དང་འཕེལ་རྒྱས་ཀྱི་གསོན་ཤུགས་ཆེན་པོ་འཕེལ་ཡོད་པ་དང་། ཀྲི་པུའི་གོང་བུ་སྒྲིལ་ཤུགས་དང་། བློ་ཁ་ཕྱོགས་ཤུགས། དམག་འཐབ་མཁར་རྫོང་གི་ནུས་པ་བཅས་འདོན་སྤེལ་གང་ལེཌ་བྱས་ཏེ་ད་ཆ་དངོས་གཞིའི་ཏང་ཡོན་10དང་། གྲ་སྒྲིག་ཏང་ཡོན་10 ཏང་ཞུགས་ཧུར་བརྩོན་ཅན་15བཅས་ཡོད་པ་རེད།

ཐོན་ལས་ཀྱི་སྣེ་ཁྲིད་པ་གསོ་སྐྱོང་བྱས་པ།

2012ལོར་རུན་ཤིན་ཀུང་སིས་མ་དངུལ་བཏང་ནས་སྨན་གླིང་རྫོང་ཨར་སྐྲུན་རྒྱུ་ཆ་ཐོན་ལས་གླིང་བསྐྲུན་ཞིང་། 2015ལོར་ཉིང་ཁྲི་གྲོང་ཁྱེར་སྔོན་གཏོད་གཞུང་ཁོངས་རྒྱུ་ནོར་མ་འཇོག་གཉེར་སྐྱོང་ཚོགས་པ་ཚད་ཡོད་ཀུང་སི་དང་མཉམ་ལས་བྱས་ཏེ་ཐུན་མོང་ཐོག་ཀོང་པོ་རྒྱ་མདའ་རྫོང་ཨར་སྐྲུན་རྒྱུ་ཆ་ཐོན་ལས་གླིང་བསྐྲུན་པ་རེད། ཨར་སྐྲུན་རྒྱུ་ཆ་ཐོན་ལས་གླིང་དེ་གཉིས་ཀྱིས་ལྗང་མདོག་ཁོར་ཡུག་སྲུང་སྐྱོང་དམིགས་ཚད་དུ་བྱས་ཏེ། ནུས་རྒྱུ་ཟད་གྲོན་དམའ་བ་དང་། སྦགས་བཙོག་མེད་པ། ཐོན་ནུས་ཆེ་བ། འཁོར་རྒྱུག་ཐུབ་པ། རྒྱུན་སྲིང་ཐུབ་པ་བཅས་ཀྱི་དེང་རབས་ཅན་གྱི་ལྗང་མདོག་གི་འདུ་ཤེས་གསར་པ་རྒྱུན་འཛིན་བྱས་ཡོད་པ་རེད། ཐོན་ལས་གླིང་དེ་གཉིས་ཀྱིས་ཐོན་སྐྱེད་བྱས་པའི་ཁོར་ཡུག་སྲུང་སྐྱོང་གི་ཨར་སྐྲུན་རྒྱུ་ཆ་སྟེ་རླངས་གནོན་སོ་ཕག་གིས་ས་གནས་དེ་གའི་བཟོ་ཁང་ཆུང་ངུས་ཐོན་སྐྱེད་བྱས་པའི་སྦགས་བཙོག་ཆེ་ཞིང་ནུས་རྒྱུ་ཟད་གྲོན་ཆེ་བའི་ཐོན་རྫས་ཀྱི་ཚབ་བྱས་ཏེ། ཉིང་ཁྲིའི་སྲོལ་རྒྱུན་གྱི་སྔོན་བཟོས་སོ་ཕག་གི་འབུད་གཏོང་ཆེ་བའི་རྣམ་པ་མཇུག་འགྲིལ་ནས་ཨར་སྐྲུན་ཁྲོད་བཙོག་ཟིང་ཞན་གསུམ་གྱི་སྣང་ཚུལ་ལེགས་སུ་ནུས་ལྡན་ཕྱིན་པ་དང་ཆབས་ཅིག ཉིང་ཁྲིའི་ཨར་སྐྲུན་རྒྱུ་ཆའི་སྤུས་ཚད་ལེགས་ཉེས་མི་སྙོམས་པའི་སྣང་ཚུལ་ཡང་ལེགས་སུ་ཕྱིན་ཡོད་པ་རེད།

མི་རིགས་མཐུན་སྒྲིལ་ཡར་ཐོན་གྱི་ལག་ལེན་པ།

ཉིང་ཁྲི་རུན་ཤིན་ཁེ་ལས་ཚད་ཡོད་ཀུང་སིར་ཁྱོན་ལས་མི་400ལྷག་ཙམ་ཡོད་པ་དང་། གྲངས་ཉུང་མི་རིགས་ཀྱི་ལས་མིས་50%ལྷག་ཙམ་བཟུང་ཡོད་ལ། བོད་རིགས་དང་། རྒྱ་རིགས། ཧུད་རིགས། མེའོ་རིགས། མོན་པ་རིགས། ལྷོ་པ་རིགས། ལི་སུའུ་རིགས་སོགས་མི་རིགས་10ལྷག་ཙམ་གྱི་ལས་མི་མཉམ་དུ་ལས་ཀ་དང་འཚོ་བར་རོལ་བཞིན་ཡོད།

ཏང་ཀྲི་པུས་ཁེ་ལས་ཀྱི་དོན་དངོས་དང་ཟུང་འབྲེལ་དམ་ཟབ་བྱས་ཏེ་ཁེ་ལས་ཀྱི་ཏང་འཛུགས་སྐྱོང་དང་། ཐོན་སྐྱེད་གཉེར་སྐྱོང་། ཁེ་ལས་ཀྱི་རིག་གནས་བཅས་ཟུང་འབྲེལ་དམ་ཟབ་བྱེད་པའི་ཐབས་ལམ་གསར་པ་འཚོལ་ཞིབ་ཧུར་ཐག་བྱས་པ་དང་ཏང་ཡོན་གྱི་སློབ་གསོ་དོ་དམ་དང་གསོ་སྦྱོང་ལམ་སྲོལ་བཟོས་པ་དང་འཐུས་སྒོ་ཚང་དུ་བཏང་བ་རེད། ཏང་འཛུགས་སྐྱོང་དང་ཁེ་ལས་རིག་གནས་མཉམ་འདྲེས་དམ་ཟབ་བྱས་པ་བརྒྱུད་མི་རིགས་མཐུན་སྒྲིལ་ཡར་ཐོན་གྱི་བསམ་བློའི་རྨང་གཞི་བརྟན་དུ་བཏང་བ་དང་། ཁེ་ལས་ཀྱི་དོ་དམ་འཇོན་ཐང་ཆེ་རུ་ཕྱིན་པ། ཁེ་ལས་ཀྱི་གོང་བུ་སྒྲིལ་ཤུགས་ཆེ་རུ་ཕྱིན་ཡོད།

སེམས་པ་མང་ཚོགས་ལ་ཕྱོགས་པའི་གྲོགས་པོ་བློས་ཐུབ།

མང་ཚོགས་འགའ་ཞིག་གཟུགས་པོ་དང་ཁྱིམ་ཚང་གི་རྐྱེན་པས་སྐྱེལ་འདྲེན་ལས་ཀར་ཞུགས་ཐུབ་ཀྱི་མེད་ལ་ཀུང་སིའི་ལས་ཀར་འགྲོ་ཐུབ་ཀྱི་མེད་པས། ཀོང་པོ་རྒྱ་མདའ་རྫོང་ཐོན་ལས་གླིང་གིས་ཡིག་ཚགས་དང་གཱ་བཟོས་པའི་མང་ཚོགས་700ལ་ལོ་ལྟར་གནད་སྨིན་རོགས་སྐྱོར་བྱེད་ཀྱི་ཡོད་ལ། སྨན་གླིང་རྫོང་ཐོན་ལས་གླིང་གིས་ལོ་རེའི་ཁེ་སྤོགས་ལས་6%བཏོན་ནས་ཡིག་ཚགས་དང་གཱ་བཟོས་པའི་དུད་ཚང་དབུལ་པོར་བགོ་འགྲེམས་རྒྱག་གི་ཡོད་པ་རེད།

ཉེ་བའི་ལོ་ཤས་རིང་། རིམ་རྩིས་བྱས་ན་བྲག་ཡིབ་ཆུས་དང་སྨན་གླིང་རྫོང་སོགས་ཀྱི་མང་ཚོགས་ཁྲི་1ལྷག་ཙམ་གྱི་ལས་ཞུགས་ལ་སྐུལ་ཁྲིད་བྱས་པ་རེད། 2017ལོའི་ཚུན་དུ། ཀུང་སིས་ལོ་ལྟར་ཤང་དང་གྲོང་རྡལ་4ཡི་ཡིག་ཚགས་དང་གཱ་བཟོས་པའི་དུད་ཚང་དབུལ་པོ་700ལ་གནད་སྨིན་རོགས་སྐྱོར་བྱས་པ་དང་ཕུལ་བྱུང་སློབ་ཆེན་སློབ་མ་40ལྷག་ཙམ་ལ་རོགས་རམ་བྱས་ཡོད་པ་རེད།

འདི་ལོ། ཉིང་ཁྲི་རུན་ཤིན་ཁེ་ལས་ཚད་ཡོད་ཀུང་སིར“ལྗོངས་ཡོངས་ཀྱི་གཞི་རིམ་ཏང་འཛུགས་སྐྱོང་གི་དཔེ་སྟོན་ས་ཚིགས”ཀྱི་གཟི་བརྗིད་མཚན་སྙན་ཐོབ་པ་རེད།