གླེང་གཞི། ཁྱེད་རང་པར་ལེན་དང་། ཡིག་གཟུགས། མཛེས་རྩལ་དང་རྩོམ་རིག་བཅས་ལ་དགའ་པོ་ཡོད་དམ། ད་ཆ་ཁྱེད་ལ་གཏམ་བཟང་ཞིག་ཞུ་རྒྱུར། “ཀྲུང་ཧྭ་མི་རིགས་ཁྱིམ་ཚང་གཅིག་ལྟར་བརྩེ། རྒྱང་སྐྱོད་ལམ་བུ་གསར་པར་མཉམ་དུ་སྐྱོད”ཅེས་པ་དང་མི་རིགས་མཐུན་སྒྲིལ་གྱི་པར་ལེན་དང་། ཡིག་གཟུགས། མཛེས་རྩལ། རྩོམ་རིག་བཅས་ཀྱི་བྱ་དགའ་ཡོད་པའི་བརྩམས་ཆོས་བསྡུ་བའི་བྱེད་སྒོ་སྐབས་གསུམ་པ་དངོས་སུ་འགོ་ཚུགས་འདུག ད་ཐེངས་ཀྱི་བྱེད་སྒོ་འདི་ནི་བོད་རང་སྐྱོང་ལྗོངས་མི་རིགས་ལས་དོན་ཨུ་ཡོན་ལྷན་ཁང་དང་བོད་རང་སྐྱོང་ལྗོངས་རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས་ཀྱིས་གཙོ་གཉེར་དང་། བོད་ལྗོངས་སྨྱན་སྦྱོར་ཚོགས་པས་མཉམ་གཉེར་བྱས་པ་ཞིག་རེད། འཚོ་བར་དགའ་ཞེན་དང་སྒྱུ་རྩལ་སྣ་མང་ལ་དགའ་ཞིང་མཁས་པའི་ཁྱེད་ནས་ལག་ནང་གི་པར་ཆས་དང་སྨྱུག་རྩལ་ལ་བརྟེན་ནས་ང་ཚོའི་བྱེད་སྒོར་ཞུགས་པར་ཕེབས་དང་།

2021ལོ་ནི་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་100འཁོར་བའི་ལོ་ཞིག་ཡིན་ལ། བོད་ཞི་བས་བཅིངས་འགྲོལ་བཏང་ནས་ལོ་ངོ་70འཁོར་བའི་ལོ་ཞིག་ཀྱང་རེད། ད་ཐེངས་ཀྱི་བྱེད་སྒོ་སྤེལ་བའི་དམིགས་ཡུལ་ནི་ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་ཟབ་ཏུ་གཏོང་རྒྱུ་གཙོ་རྐང་དུ་བྱེད་པ་དང་། “ཀྲུང་ཧྭ་མི་རིགས་ཁྱིམ་ཚང་གཅིག་ལྟར་བརྩེ། རྒྱང་སྐྱོད་ལམ་བུ་གསར་པར་མཉམ་དུ་སྐྱོད”ཅེས་པ་བརྗོད་དོན་གཙོ་བོར་བྱས་ཏེ། རང་ལྗོངས་ཀྱི་དཔལ་འབྱོར་འཕེལ་རྒྱས་དང་། སྤྱི་ཚོགས་ཡར་ཐོན། མི་རིགས་མཐུན་སྒྲིལ་བཅས་ཀྱི་གྲུབ་འབྲས་ཆེན་པོ་ཕྱོགས་ཡོངས་ནས་མངོན་པ་དང་། ལྗོངས་ཡོངས་ཀྱི་མི་རིགས་ཁག་གི་བུ་ཕྲུག་ཚོས་ནུས་ཤུགས་ཡོད་རྒུས་དབུལ་སྒྲོལ་འགག་སྒྲོལ་དང་། རིམས་ནད་ལ་འགོག་རྒོལ། ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་པ་བཅས་ཀྱི་རླབས་ཆེན་ལག་ལེན་ཕྱོགས་ཡོངས་ནས་མངོན་པ། “ཏང་གི་བཀའ་ལ་ཉན་པ་དང་། ཏང་གི་བཀའ་དྲིན་དྲན་པ། ཏང་གི་རྗེས་སུ་འབྲང་བ”བཅས་ཀྱི་ལྗོངས་ཡོངས་ཀྱི་མི་རིགས་ཁག་གི་མང་ཚོགས་ཚོའི་ལྷད་མེད་བརྩེ་བ་གཅིག་སྡུད་ཐོག་མངོན་པ་བཅས་བྱས་ནས། མི་རིགས་ཁག་གི་ལས་བྱེད་པ་དང་མང་ཚོགས་ཚོར“ཁ་འབྲལ་ཐབས་མེད་པ་གསུམ”དང“མོས་སེམས་ལྔའི”བསམ་བློ་བརྟན་པོར་བཙུགས་ཏེ་ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་ཟབ་ཏུ་གཏོང་རྒྱུར་སློབ་གསོ་ཁྲིད་སྟོན་བྱ་ཆེད་རེད།

གཅིག བྱེད་སྒོའི་བརྗོད་དོན་གཙོ་བོ།

“ཀྲུང་ཧྭ་མི་རིགས་ཁྱིམ་ཚང་གཅིག་ལྟར་བརྩེ། རྒྱང་སྐྱོད་ལམ་བུ་གསར་པར་མཉམ་དུ་སྐྱོད”

གཉིས། བརྩམས་ཆོས་བསྡུ་བའི་ཁྱབ་ཁོངས།

རྒྱལ་ཡོངས་ཀྱི་མི་རིགས་ཁག་དང་ལས་རིགས་ཁག་གི་པར་ལེན་དང་། མཛེས་རྩལ། རྩོམ་རིག་བཅས་ལ་དགའ་ཞེན་ཡོད་མཁན་ལ་དམིགས་ཡོད།

གསུམ། བརྩམས་ཆོས་བསྡུ་སྟངས།

མི་སྒེར་གྱིས་རང་མོས་བཞིན་བརྩམས་ཆོས་བསྐུར་བ་དང་། བོད་ཀྱི་གྲོང་ཁྱེར(ས་ཁུལ)ཁག་གི་མི་རིགས་ལས་དོན་ཨུ་ལྷན(མི་རིགས་ཆོས་ལུགས་ཅུས)གྱིས་བདམས་སྐྱེལ་བྱེད་ཀྱི་ཡོད།

བཞི། བརྩམས་ཆོས་ཀྱི་བླང་བྱ།

ད་ཐེངས་ཀྱི་བརྩམས་ཆོས་བསྡུ་བའི་བྱེད་སྒོར་བརྩམས་ཆོས་ཀྱི་ནང་དོན་དྲང་ཕྱོགས་ཡར་ཐོན་ཡིན་དགོས་ཤིང་། རྣམ་པ་མི་འདྲ་བའི་ཐོག་ནས་མི་རིགས་མཐུན་སྒྲིལ་དང་། དབུལ་སྐྱོར་གཏམ་རྒྱུད། འབྱོར་འབྲིང་གཏམ་རྒྱུད་ཤོད་པ་དང་། སྔོན་ཐོན་དཔེ་མཚོན་དང་མི་སྣ་ཡག་ཤོས་ལ་བསྟོད་གླུ་འབུལ་བ། རང་ལྗོངས་ཀྱི་དབུལ་སྒྲོལ་འགག་སྒྲོལ་ལ་ཐོབ་པའི་གྲུབ་འབྲས་གསར་པ་དང་། བོད་སྐྱོར་ལས་དོན་ལས་བྱུང་བའི་འགྱུར་ལྡོག་གསར་པ། ལས་བྱེད་པ་དང་མང་ཚོགས་ཀྱིས་དབུལ་སྒྲོལ་འཐབ་ས་དང་པོར་འབད་འཐབ་བྱས་པའི་བྱས་རྗེས་གསར་པ། བོད་ཀྱི་མི་རིགས་ཁག་གི་བུ་ཕྲུག་ཚོས་ཕྱུག་འགྱུར་འབྱོར་འབྲིང་ཕྱོགས་སུ་སྐྱོད་པའི་གཟུགས་བརྙན་གསར་པ་བཅས་གང་ལེགས་མཚོན་པ་དང་། ཏང་དང་། མེས་རྒྱལ། བོད་ལྗོངས་གསར་པ། མི་རིགས་མཐུན་སྒྲིལ་བཅས་ལ་བསྟོད་གླུ་འབུལ་བ་བཅས་སོ། ཞིབ་ཕྲའི་བླང་བྱ་ནི་གཤམ་གསལ་ཏེ།

(1)པར་ལེན་བརྩམས་ཆོས། བསྐུར་བའི་བརྩམས་ཆོས་ཀྱི་རྣམ་གཞག་jpgདང་འདྲ་པར་གྱི་ཆེ་ཆུང་ཚོན་10དགོས་པ་དང་། འདྲ་པར་གྱི་གཤོང་ཚད་5MBཡན་དགོས་པ་དང་འདྲ་པར་གསལ་ཚད་ཁྲི་500ནས་ཁྲི་1200བར་ཡིན་དགོས་པ། བརྩམས་ཆོས་བསྐུར་སྐབས“ཁོངས་གཏོགས་ཚན་པ་དང་། པར་རྒྱག་མཁན་གྱི་མིང་། བརྩམས་ཆོས་ཀྱི་འགོ་བརྗོད། འབྲེལ་གཏུག་ཁ་པར་ཨང་གྲངས”བཅས་འབྲི་དགོས། འདྲ་པར་5ལས་མང་མི་རུང་། གློག་ཀླད་ཀྱིས་འཆར་འགོད་དང་ཐོག་མའི་འདྲ་པར་ལ་བཟོ་བཅོས་བརྒྱབ་པའི་བརྩམས་ཆོས་བསྐུར་རྒྱུ་མེད། འདྲ་པར་དེ་ནི་བསྐུར་མཁན་རང་གི་པར་ལེན་བརྩམས་ཆོས་དངོས་ཡིན་པ་མ་ཟད། བརྩམས་ཆོས་ལ་རང་རྐྱ་འཕེར་བ་དང་། ཆ་ཚང་བ། ཁ་གསལ་བ། རྩོད་གླེང་མེད་པ་བཅས་ཀྱི་བརྩམས་ཆོས་བདག་དབང་ཡོད་དགོས། དཔྱད་འདེམས་ནང་ཞུགས་མཁན་གྱིས་བསྐུར་བའི་བརྩམས་ཆོས་དེ་མི་གཞན་གྱི་བརྩམས་ཆོས་བདག་དབང་དང་། འདྲ་པར་བདག་དབང་། མིང་གྲགས་ཐོབ་དབང་། སྒེར་དོན་གསང་དབང་སོགས་ཚུད་པའི་ཁྲིམས་མཐུན་ཁེ་དབང་ལས་འགལ་མེད་པའི་འགན་ལེན་བྱེད་དགོས། བརྩམས་ཆོས་སམ་ཡང་ན་བརྩམས་ཆོས་བསྐུར་བའི་བྱེད་སྤྱོད་ལས་ཐོན་པའི་བཅའ་ཁྲིམས་ཀྱི་རྩོད་གཞི་ཚང་མ་བརྩམས་ཆོས་བསྐུར་མཁན་རང་ཉིད་ཀྱིས་འགན་འཁུར་དགོས།

(2)ཡིག་གཟུགས་དང་མཛེས་རྩལ་བརྩམས་ཆོས། ཡིག་གཟུགས་བརྩམས་ཆོས་ཀྱི་ཆ་ཚད་ནི་ཀུང་ཁྲེ་6ནང་ཚུན་གྱི་ཤོག་བུ་ཡིན་པ་དང་གཞུང་བྲིས་ཡིན་དགོས། (རིང་ཚད་ལི་སྨི་180དང་ཞེང་ཚད་ལི་སྨི་95ལས་བརྒལ་མི་རུང)བརྩམས་ཆོས་རྒྱབ་ངོས་ཀྱི་གཡས་གཤམ་དུ་ཞ་སྨྱུག་གིས་རུས་མིང་དང་། ཕོ་མོ། ཐོབ་ཐང་ལག་ཁྱེར་ཨང་གྲངས། རྒྱུན་སྡོད་ས་གནས། སྦྲག་ཨང་། འབྲེལ་གཏུག་ཁ་པར་ཨང་གྲངས(གཏན་འཇགས་ཁ་པར་རམ་ཡང་ན་ལག་ཐོགས་ཁ་པར)འབྲི་དགོས། མཛེས་རྩལ་བརྩམས་ཆོས། རང་རྒྱལ་གྱི་སྲོལ་རྒྱུན་རི་མོ་དང་། སྣུམ་ཚོན་རི་མོ། བརྐོས་རིས། ཆུ་ཚོན་རི་མོ་བཅས་ཡིན་དགོས་པ་དང་ཆེ་ཤོས་ཧོ་སྨི་1200*ཧོ་སྨི་900ལས་བརྒལ་མི་རུང་། ཆུང་ཤོས་ཧོ་སྨི་300*ཧོ་སྨི་420(དཔྱད་གཞི། AOནས་A3བར)ཡིན་དགོས། མཛེས་རྩལ་བརྩམས་ཆོས་ངེས་པར་དུ་འགྲེམས་སྟོན་དང་སྤེལ་མྱོང་མེད་པའི་གསར་རྩོམ་ཡིན་དགོས།

(3)རྩོམ་རིག་བརྩམས་ཆོས། བརྩམས་ཆོས་ལས་ཉེ་འགྲམ་གྱི་མི་རིགས་མི་འདྲ་བའི་དབར་གྱི་མཛའ་བརྩེ་དང་། མི་སེམས་འགུལ་བའི་གཏམ་རྒྱུད། ཕན་ཚུན་རོགས་རེས་བཅས་ཀྱི་དཔེ་མཚོན་གཙོ་བོ་ཡིན་པ་དང་། བོད་མི་རིགས་ཀྱི་མཐུན་སྒྲིལ་དང་འབྲེལ་བ་ཡོད་པའི་དྲན་གསོའི་རང་བཞིན་གྱི་ལྷུག་རྩོམ་དང་དངོས་ཡོད་མཚོན་པའི་རྩོམ་ཡིག བོད་ཀྱི་མི་རིགས་མཐུན་སྒྲིལ་ལ་བསྟོད་གླུ་འབུལ་བའི་སྙན་ངག་སོགས་ཀྱི་འབྲེལ་ཡོད་བརྩམས་ཆོས་ཡིན་དགོས། རྩོམ་སྲོལ་བབ་ཆགས་དང་ཇི་བཞིན་བརྗོད་པ་གཙོ་བོ་ཡིན་པ་དང་བོད་རྒྱ་ཡིག་འབྲུ་3000ནང་ཚུན་ཡིན་པ། སྙན་ངག་ཡིན་ན་ཚིགས་བཅད་30ནང་ཚུན་ཡིན་དགོས།

ལྔ་། བརྩམས་ཆོས་བསྐུར་བའི་དུས་ཚོད།

“ཀྲུང་ཧྭ་མི་རིགས་ཁྱིམ་ཚང་གཅིག་ལྟར་བརྩེ། རྒྱང་སྐྱོད་ལམ་བུ་གསར་པར་མཉམ་དུ་སྐྱོད”ཅེས་པའི་པར་ལེན་དང་། ཡིག་གཟུགས། མཛེས་རྩལ། རྩོམ་རིག་བཅས་བྱ་དགའ་ཡོད་པའི་བརྩམས་ཆོས་བསྡུ་བའི་བྱེད་སྒོ་སྤེལ་ཡུན་དེ་རིང་ནས་ཟླ་8ཚེས་15ཉིན་བར་ཡིན།

དྲུག བྱ་དགའ་བཀོད་སྒྲིག

པར་ལེན་དང་། ཡིག་གཟུགས(རྒྱ་ཡིག་དང་བོད་ཡིག་སོ་སོར་དབྱེ་ནས་དཔྱད་འདེམས་བྱ་རྒྱུ)མཛེས་རྩལ། རྩོམ་རིག་བཅས་བརྩམས་ཆོས་ཨང་དང་པོ་གཅིག་དང་། ཨང་གཉིས་པ་གཉིས། ཨང་གསུམ་པ་ལྔ། ཕུལ་བྱུང་བྱ་དགའ་12བཅས་བཀོད་སྒྲིག་བྱས་ཡོད།

བྱ་དགའ་ཨང་དང་པོར་སྒོར་2000དང་། ཨང་གཉིས་པར་སྒོར་1000 ཨང་གསུམ་པར་སྒོར་500 ཕུལ་བྱུང་བྱ་དགར་སྒོར་300བཅས་ཡིན།

བདུན། དོ་སྣང་བྱེད་དགོས་པའི་དོན་ཚན།

(གཅིག) ད་ཐེངས་ཀྱི་བརྩམས་ཆོས་བསྡུ་བར་རིན་དངུལ་གང་ཡང་མི་བསྡུ་བར་བྱ་དགའ་ཐོབ་པའི་བརྩམས་ཆོས་འགྲེམས་སྟོན་བྱ་རྒྱུ་མ་ཟད། བྱ་དགའ་སྤྲོད་པའི་མཛད་སྒོར་སྟོན་རྒྱུ་རེད། འགྲེམས་སྟོན་མཇུག་འགྲིལ་རྗེས། མི་སྒེར་གྱི་བརྩམས་ཆོས་ཚུར་ལེན་ཆོག་པའམ་ཡང་ན་བོད་རང་སྐྱོང་ལྗོངས་མི་རིགས་ལས་དོན་ཨུ་ལྷན(ཞལ་འདེབས་དཔང་ཡིག་སྤྲོད་པ)ལ་འབུལ་ཆོག བྱ་དགའ་མ་ཐོབ་པའི་བརྩམས་ཆོས་ཚང་མ་ཕྱིར་སློག་གི་མིན། གལ་ཏེ། དམིགས་བསལ་གྱི་གནས་ཚུལ་འོག་ཕྱིར་སློག་དགོས་ཚེ་ལས་དོན་མི་སྣར་འབྲེལ་གཏུག་བྱེད་དགོས།

(གཉིས)གཙོ་གཉེར་ཚན་པར་བརྩམས་ཆོས་ཞིབ་འཇུག་དང་། པར་ལེན། བརྙན་ཕབ། འགྲེམས་སྟོན། དཔེ་སྐྲུན་བཅས་དང་དེ་བཞིན་དྲིལ་བསྒྲགས་བྱེད་པའི་དབང་ཆ་ཡོད།

(གསུམ) ཡིག་གཟུགས་དང་མཛེས་རྩལ་བརྩམས་ཆོས་རྒྱབ་ངོས་ཀྱི་གཡས་གཤམ་དུ། བརྩམས་ཆོས་འབྲི་མཁན་གྱི་རུས་མིང་དང་། ཞིབ་ཕྲའི་འབྲེལ་གཏུག་ས་གནས། སྦྲག་ཨང་། འབྲེལ་གཏུག་ཁ་པར་བཅས་གསལ་པོ་འབྲི་དགོས། མྱུར་སྐྱེལ་མགྱོགས་ཤོས་ལ་བསྐུར་དགོས། འགྲན་ཞུགས་བརྩམས་ཆོས་ཚང་མ་འབྲི་མཁན་གྱིས་གསར་རྩོམ་བྱས་པའི་བརྩམས་ཆོས་ཡིན་པ་ལས་གཞན་ལ་ལད་ཟློས་དང་བརྐུ་འབྲི་བྱེད་མི་ཆོག སྒེར་གྱི་འགྲན་ཞུགས་བརྩམས་ཆོས་སམ་ཡང་ན་བྱ་དགའ་རག་པའི་བརྩམས་ཆོས་བསྐྱར་དུ་སྤྱོད་མི་ཆོག གལ་ཏེ་བཅའ་ཁྲིམས་ཀྱི་རྩོད་གཞི་ཐོན་པའམ་ཡང་ན་འགན་འཁྲི་འཁུར་དགོས་ཚེ་རྩོམ་འབྲི་མཁན་གྱིས་འགན་འཁུར་དགོས།

བརྒྱད། བརྩམས་ཆོས་བསྐུར་སྟངས།

(གཅིག)ཡིག་གཟུགས་དང་མཛེས་རྩལ་བརྩམས་ཆོས། བོད་རང་སྐྱོང་ལྗོངས་ལྷ་ས་གྲོང་ཁྱེར་ཁྲེང་ཀོན་ཆུས་རྡོ་སེང་གེ་ལམ་སྒོ་རྟགས་ཨང་36(བོད་ལྗོངས་ཉིན་རེའི་ཚགས་པར་ལས་ཁུངས་ལ་བསྐུར་དགོས)རྩིས་ལེན་མཁན། སྐུ་ཞབས་ཀྲེང་ལགས། སྦྲག་ཨང་། 850000 འབྲེལ་གཏུག་ཁ་པར། 17708991495(སྐད་འཕྲིན་ཨང་གྲངས་ཀྱང་ཡིན)

(གཉིས)པར་ལེན་དང་རྩོམ་རིག་བརྩམས་ཆོས། སྦྲག་སྒམ་ཨང་རྟགས་940217216@qq.comལ་བསྐུར་དགོས།