འདི་ནི་ཡེ་ཤིན་གྱི་འདྲ་པར་ཡིན་པ། (དཔྱད་གཞིའི་པར་རིས)
ཡེ་ཤིན་ནི་1956ལོར་ཀོང་ཏུང་ཞུས་ཝུན་གྱི་སྨན་པའི་ཁྱིམ་ཚང་ཞིག་ཏུ་འཁྲུངས། 1974ལོར་ཀོང་ཏུང་ཞིང་ཆེན་ཀྲུང་ལུགས་གསོ་རིག་སྨན་ཁང་འཕྲོད་བསྟེན་སྦྱོང་བརྡར་རུ་ཁག་ལ་རྒྱུགས་འཕྲོད་པ་དང་། 1976ལོར་སློབ་མཐར་ཕྱིན་རྗེས་སྨན་ཁང་དུ་ཕྱག་ལས་གནང་། 1984ལོའི་ཟླ་12པར་ལས་ཀའི་མཚོན་ཚུལ་མངོན་གསལ་དོད་པོ་ཡོད་པར་བརྟེན་ཀོང་ཏུང་ཞིང་ཆེན་ཀྲུང་ལུགས་གསོ་རིག་སྨན་ཁང་ཨེར་ཧྲ་ཏའོ་ཡན་ལག་སྨན་ཁང་གི་དོས་དྲག་ཚན་ཁག་གི་གཙོ་འགན་ནད་སྐྱོང་བར་བསྐོས། དམིགས་བསལ་གློ་ཚད་ཧ་ཅང་ཚབས་ལྕི་བའི་ནད་པ་སྐྱོབ་བཅོས་བྱེད་སྐབས་སྟབས་མ་ལེགས་པར་དམིགས་བསལ་གློ་ཚད་འགོས་ནས་2003ལོའི་ཟླ་3ཚེས་25ཉིན་གྱི་ཐོ་རེངས་སུ་ཡེ་ཤིན་མྱུར་སྐྱོབ་བྱས་ཀྱང་ཕན་འབྲས་མ་ཐོན་པར་སྐུ་གཤེགས་པ་དང་། སྐུ་གཤེགས་སྐབས་དགུང་ལོ་47ཡིན་པ་རེད།
2003ལོའི་དཔྱིད་གསར་དུས་ཆེན་གྱི་སྔ་ནུབ་ཏུ། ནད་རྐྱེན་གསལ་པོ་མེད་པའི་དམིགས་བསལ་གློ་ཚད་ཅིག་ཀོང་ཀྲོའུ་ཡི་ས་ཁུལ་ཁག་གཅིག་ཏུ་ཁྱབ་འགོ་ཚུགས། ཡེ་ཤིན་ཡོད་སའི་ཨེར་ཧྲ་ཏའོ་ཡན་ལག་སྨན་ཁང་དོས་དྲག་ཚན་ཁག་གིས་བཀོད་སྒྲིག་གཞིར་བཟུང་། དམིགས་བསལ་གློ་ཚད་ནད་པ་གྲལ་བཤེར་དང་ཛ་དྲག་མྱུར་སྐྱོབ་བྱ་རྒྱུའི་གྲ་སྒྲིག་ཨང་བསར་བྱས། ནད་པ་མང་དུ་འགྲོ་བའི་གནས་ཚུལ་འོག་གུང་ཁྲན་ཏང་ཡོན་ཡིན་པའི་ཡེ་ཤིན་གྱིས་ལས་རེས་བང་སྒྲིག་ཚགས་ཚུད་པོ་བྱས་ནས་ཉིན་མཚན་མེད་པར་སྐྱོབ་བཅོས་ལས་ལ་བྲེལ།
དམིགས་བསལ་གློ་ཚད་ཕོག་ལྕི་བའི་ནད་པར་འགོ་བའི་རང་བཞིན་ཤུགས་ཆེན་ལྡན་ཡོད་པས། མྱུར་སྐྱོབ་བྱེད་སྐབས་ནད་པ་དབུགས་གཏོང་བདེ་པོ་ཡོང་ཆེད། ངེས་པར་དུ་མིད་པ་འགག་པའི་ཁྲག་ལུད་གར་པོ་མང་པོ་ཞིག་ཕྱིར་འཐེན་དགོས་ཀྱི་ཡོད། སྨན་དོན་མི་སྣར་འགོ་ཉེན་ཧ་ཅང་ཆེན་པོ་ཡོད་རུང་། ཡེ་ཤིན་དང་སྐབས་དེ་དུས་ཨེར་ཧྲ་ཏའོ་ཡན་ལག་སྨན་ཁང་དོས་དྲག་ཚན་ཁག་གི་ཀྲུའུ་རེན་ཡིན་པའི་ཀྲང་ཀྲུང་ཏེས་དམིགས་བསལ་གློ་ཚད་ཧ་ཅང་ཚབས་ཆེན་ཕོག་མཁན་ནད་པར་བརྟག་དཔྱད་དང་། མྱུར་སྐྱོབ། སྨན་བཅོས། ནད་སྐྱོང་བཅས་ཆ་ཚང་འགན་འཁུར་གང་ཐུབ་བྱས་པ་དང་། ཐ་ན་ལས་རོགས་ཚོ་སྒོའི་ཕྱི་རོལ་དུ་བཀག་སྟེ་གང་ཐུབ་ཅི་ཐུབ་ཀྱིས་ཁོང་ཚོར་ནད་མི་འགོ་བ་བྱས་ཡོད།
ཟླ་3ཚེས་4ཉིན། ངལ་དུབ་ཀྱིས་མནར་བའི་ཡེ་ཤིན་ལ་ཚ་བ་རྒྱས་པའི་ནད་རྟགས་ཐོན་པ་དང་ཚ་བ་མཐོ་རུ་ཕྱིན། ཡིན་ནའང་ནད་ཁང་དུ་ལོགས་འཇོག་བརྟག་དཔྱད་བྱ་རྒྱུར་བསྐྱལ་ཡང་ཁོང་གིས་སྔར་བཞིན་ཚན་ཁག་གི་ནད་གཞི་ལྕི་ཞིང་སྲོག་ཉེན་ཆེ་བའི་ནད་པ་ཁག་གཅིག་ལ་སེམས་ཁྲལ་བྱེད་ཀྱི་ཡོད།
ཡེ་ཤིན་སྐྱོབ་བཅོས་བྱ་ཆེད། སྨན་ཁང་གིས་འཕྲལ་དུ་སྨན་བཅོས་ཚོགས་ཆུང་བཙུགས་ནས་རིགས་གཅིག་མཁས་ཅན་སྐོང་འཐེན་གྱིས་སྨན་བཅོས་བརྒྱུད་རིམ་ཧྲིལ་པོའི་ཇུས་གཞི་ལག་ལེན་བསྟར་རྒྱུའི་འགན་འཁུར། སྨན་བཅོས་བྱེད་པར་ཡོང་མཁན་སྨན་པ་མཐོང་སྐབས་སྐད་ཆ་ཤོད་མ་ཐུབ་པའི་ཡེ་ཤིན་གྱིས་ནད་སྐྱོང་བར་ཤོག་བུ་དང་སྨྱུ་གུ་དགོས་པའི་བརྡ་བསྟན་ནས་ལག་པ་འདར་བཞིན“ངའི་འགྲམ་དུ་མ་བཅར་ཞིག ན་ཚ་འགོ་ཡི་རེད”ཅེས་བྲིས། མི་མང་པོ་ཞིག་གི་འབད་བརྩོན་དང་སྐྱོབ་ཐབས་བྱས་ཀྱང་ཡེ་ཤིན་འཇིག་རྟེན་འདི་ནས་བྲལ་བའི་ལས་དབང་ལ་འགྱུར་ལྡོག་གཏོང་ཐུབ་མེད། ཟླ་3ཚེས་29ཉིན་གྱི་ཕྱི་དྲོ། ཀོང་ཀྲོའུ་པུར་ཁང་ཆིང་སུང་ཚོམས་ཆེན་དུ་སྨན་ཁང་གི་ལས་རོགས་ཚོས་ཁོང་ལ་མཐའ་མའི་སྐྱེལ་མ་བྱས།
ཡེ་ཤིན་ལ“རྒྱལ་ཡོངས་ཀྱི་ཕུལ་བྱུང་གུང་ཁྲན་ཏང་ཡོན”དང“མི་དམངས་ཀྱི་བདེ་ཐང་སྲུང་དམག་ཡག་པོའི”མཚན་སྙན་རྗེས་སྤྲོད་བྱས་པ་དང་། “པའེ་ཆིའུ་ཨེན་གྱི་བྱ་དགའི་གཟེངས་རྟགས”དང“ནན་ཏིང་ཀེར་བྱ་དགའི་གཟེངས་རྟགས”ཐོབ་པ། 2009ལོར“ཀྲུང་གོ་གསར་པ་དབུ་བརྙེས་ཚུན་ཀྲུང་གོར་སེམས་འགུལ་ཐེབས་པའི་མི་སྣ་100”ཡི་གྲས་སུ་བདམས་པ། 2019ལོར“འབད་འཐབ་པ་ཡག་ཤོས”ཀྱི་མཚན་སྙན་ཐོབ་པ་བཅས་རེད།