ཟླ་7ཚེས་1ཉིན་གྱི་སྔ་དྲོ། ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་100འཁོར་བར་རྟེན་འབྲེལ་ཞུ་བའི་ཚོགས་ཆེན་པེ་ཅིང་གནམ་བདེ་སྒོ་མོའི་ཐང་ཆེན་དུ་གཟབ་རྒྱས་ངང་འཚོགས་ཤིང་། རང་ལྗོངས་ཀྱི་རྒྱ་ཆེའི་ཏང་ཡོན་དང་། ལས་བྱེད་པ། མང་ཚོགས་བཅས་ཀྱིས་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་100འཁོར་བར་རྟེན་འབྲེལ་ཞུ་བའི་ཚོགས་ཆེན་གྱི་གཟབ་རྒྱས་གནས་ཚུལ་ལྟ་ཉན་བྱས་པ་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གནང་བའི་གསུང་བཤད་གལ་ཆེན་ནན་ཏན་ངང་ཉན་པ་བརྒྱུད། རང་ལྗོངས་ཀྱི་རྒྱ་ཆེའི་ཏང་ཡོན་དང་། ལས་བྱེད། མང་ཚོགས་བཅས་ལ་སེམས་འགུལ་ཆེན་པོ་ཐེབས་པ་མ་ཟད། སྐུལ་ལྕག་ཀྱང་ཆེན་པོ་ཐེབས་པ་རེད། ཚང་མས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་འཁོར་དུ་སྔར་བས་མཐུན་སྒྲིལ་དམ་ཟབ་བྱེད་པ་དང་། རླབས་ཆེན་གྱི་ཏང་འཛུགས་སྐྱོང་གི་སྙིང་སྟོབས་དར་སྤེལ་གཏོང་བ། ཐོག་མའི་བསམ་འདུན་དང་འགན་འཁྲི་བློ་ལ་བརྟན་པོར་ངེས་པ། དམག་དཔུང་སྟོབས་ཆེར་གཏོང་བའི་ལག་ལེན་ནང་ཧུར་ཐག་ཞུགས་པ་བཅས་བྱས་ཏེ་དུས་རབས་གསར་པའི་དམག་དཔུང་སྟོབས་ཆེར་གཏོང་བའི་བྱ་གཞག་རྒྱུན་ཆད་མེད་པར་མདུན་ཕྱོགས་སུ་སྐུལ་འདེད་བཏང་ནས་དུས་རབས་གསར་པར་ལོ་རྒྱུས་ཀྱི་འོད་སྟོང་གསར་པ་གཏོད་རྒྱུ་ཡིན་ཞེས་གཅིག་རྗེས་གཉིས་མཐུད་ངང་བཤད་པ་རེད།

ཀྲུང་གོ་གུང་ཁྲན་ཏང་གི་ལོ་བརྒྱ་འབད་འཐབ་ཀྱི་གཟི་བརྗིད་ཆེ་བའི་ལོ་རྒྱུས་ལ་ཕྱིར་དྲན་བྱེད་སྐབས་བོད་དམག་ཁུལ་ཁང་གི་ལུའི་ཞིག་གི་ཆབ་སྲིད་ལས་དོན་པུའི་ཀྲུའུ་རེན་ལུའོ་དབྱན་ཕིང་གིས་སེམས་འགུལ་ཐེབས་པའི་ངང“རླབས་ཆེན་གྱི་བྱ་གཞག་ལ་རླབས་ཆེན་གྱི་སྙིང་སྟོབས་དགོས། ལོ་ངོ་100ཡི་གོང་ཀྲུང་གོ་གུང་ཁྲན་ཏང་གི་སྔོན་བྱོན་པ་ཚོས་ཀྲུང་གོ་གུང་ཁྲན་ཏང་བཙུགས་པ་ལས་བདེན་དོན་མཐའ་འཁྱོངས་དང་། ཕུགས་བསམ་བརྟན་སྲུང་། ཐོག་མའི་བསམ་འདུན་ལག་བསྟར། འགན་འཁྲི་འཁུར་ཕོད་པ། རང་སྲོག་བློས་གཏོང་བར་མི་སྐྲག་པ། དཔའ་ངར་ཆེན་པོས་འཐབ་རྩོད་བཅས་བྱས་ནས་ཏང་ལ་བློ་དཀར་སེམས་དཀར་དང་མི་དམངས་ལ་ངོ་གནོང་མི་དགོས་པའི་ཏང་འཛུགས་སྐྱོང་གི་རླབས་ཆེན་སྙིང་སྟོབས་གྲུབ་ཡོད། དཔུང་སྡེའི་དམག་མིས་རླབས་ཆེན་གྱི་ཏང་འཛུགས་སྐྱོང་གི་སྙིང་སྟོབས་རྒྱུན་འཛིན་དང་དར་རྒྱས་གོང་འཕེལ་བཏང་ཚེ། གཞི་ནས་མངོན་གསལ་དོད་པའི་ཆབ་སྲིད་ཀྱི་སྤྱོད་ཚུལ་ཞུན་བརྡར་ཐུབ་ནས་ཏང་གི་བྱ་གཞག་དང་དཔུང་སྡེའི་འཕེལ་རྒྱས་ལ་རྒྱུན་ཆད་མེད་པར་སྐུལ་འདེད་གཏོང་ཐུབ”ཅེས་བཤད་པ་རེད།

“རྙོག་འཛིང་ཆེ་བའི་ཁོར་ཡུག་གི་མདུན་དུ་ང་ཚོས་ཏང་གི་རིགས་པའི་གཞུང་ལུགས་ལ་བརྟེན་ནས་བསམ་བློར་དྲག་ཆས་སྤྲོས་རྒྱུ་མཐའ་འཁྱོངས་བྱས་ཚེ། གཞི་ནས་ཕུགས་བསམ་དང་དད་སེམས་བརྟན་སྲུང་བྱེད་ཐུབ”བོད་དམག་ཁུལ་ཁང་ནག་ཆུ་ཡན་ལག་དམག་ཁུལ་སྦྲ་ཆེན་རྫོང་གི་ལན་ཞིག་གི་ལན་ཀྲང་ཨོ་རྒྱན་སེང་གེས་མྱོང་ཚོར་ཟབ་མོའི་ངང་ང་ཚོའི་ཕྲག་སྟེང་དུ་མཐའ་སྲུང་མཐའ་དར་དང་མཐའ་དར་མཐའ་ཕྱུག་གི་འགན་འཁྲི་ལྕི་པོ་འཁུར་ཡོད་པས། ངེས་པར་དུ་ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་མཐར་ཕྱིན་པ་བྱེད་དགོས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཚོགས་ཆེན་ཐོག་གནང་བའི་གསུང་བཤད་གལ་ཆེན་ད་ལྟའང་རྣ་བར་བསལ་པོར་འཁོར་གྱི་འདུག ང་ཚོས་བློ་རྩེ་གཅིག་ཏུ་བསྒྲིམས་ནས་དཀའ་སྤྱད་སྡུག་རུས་ཀྱིས་དགྲ་བོ་བཅོམ་པའི་འཇོན་ཐང་ཆེ་རུ་བཏང་སྟེ། མདུན་སྐྱོད་ཀྱི་ལམ་བུར་དཔའ་ངར་ཆེར་སྐྱེད་དང་སྐྱེ་སྟོབས་ནམ་ཡང་མི་ཉམས་པར་བྱ་རྒྱུ་ཡིན་ཞེས་བཤད་པ་རེད།

བོད་ལྗོངས་མཐའ་མཚམས་འཛུལ་སྒྲོལ་མཐའ་སྲུང་ཞིབ་བཤེར་སྤྱི་ཁྱབ་ས་ཚིགས་ཀྱི་གངས་ལྗོངས་ཀྱི་མཐའ་མཚམས་འགག་སྒོ་བརྟན་སྲུང་བྱེད་མཁན་དཔོན་དམག་ཆིག་སྟོང་ལྷག་ཙམ་གྱིས“སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་གྱི་མཛུབ་ཁྲིད་འོག གསར་བརྗེའི་ཁྲག་རྒྱུན་རྒྱུན་འཛིན་དང‘བོད་སྐྱོད་པ་རྒན་གྲས་ཀྱི་སྙིང་སྟོབས’དར་སྤེལ་བཏང་སྟེ། བོད་ཀྱི་མཐའ་མཚམས་བརྟན་ལྷིང་མཐུན་སྒྲིལ་དང་མི་རིགས་ཁག་གི་མི་དམངས་བདེ་སྐྱིད་ཁམས་བཟང་ཡོང་ཆེད་སྟོབས་ཤུགས་ཆེ་ཤོས་ལེགས་སྐྱེས་སུ་འབུལ་རྒྱུ་ཡིན”ཞེས་གཅིག་རྗེས་གཉིས་མཐུད་ངང་བཤད་པ་རེད།

ལྷ་ས་གྲོང་ཁྱེར་སྤྱི་བདེ་ཅུས་དང་ཉིང་ཁྲི་གྲོང་ཁྱེར་སྤྱི་བདེ་ཅུས་ཀྱི་མི་དམངས(ལས་རོགས)ཉེན་རྟོག་པས་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་100འཁོར་བའི་ཚོགས་ཆེན་གྱི་གཟབ་རྒྱས་གནས་ཚུལ་ལྟ་ཉན་བྱས་རྗེས། ཚང་མས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་ལག་བསྟར་ནན་ཏན་བྱས་ཏེ། ཏང་གི་འབད་འཐབ་ལོ་རྒྱུས་ཁྲོད་ནས་མདུན་སྐྱོད་ཀྱི་སྟོབས་ཤུགས་བསྡུ་ལེན་བྱེད་པ་དང་རྒྱང་སྐྱོད་ཀྱི་ལམ་བུ་གསར་པའི་ཐོག་རླབས་ཆེན་གྱི་ཏང་འཛུགས་སྐྱོང་གི་སྙིང་སྟོབས་དར་སྤེལ་བཏང་ནས། བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྟོབས་ཤུགས་སྐྱེས་སུ་འབུལ་རྒྱུ་ཡིན་ཞེས་མགྲིན་གཅིག་ཏུ་བཤད་པ་རེད།