འདི་ནི་ཞིང་འབྲོག་པའི་ལས་གཏོད་གསོ་སྦྱོང་སློབ་མས་ཤེས་རབ་ལ་གོས་དར་ཕུལ་བ།

1989ལོར་ཤེས་རབ་གཞིས་རྩེ་གྲོང་ཁྱེར་ངམ་རིང་རྫོང་གི་ཁྱིམ་ཚང་དབུལ་པོ་ཞིག་ཏུ་སྐྱེས། ཆུང་དུས་ནས་ཕ་ཚེ་ལས་འདས་ཤིང་། ཨ་མ་དང་ཕ་གཡར་གཉེན་སྒྲིག་བྱས་རྗེས་བུ་མོ་ཞིག་སྐྱེས། ཁྱིམ་ཚང་གི་གནས་ཚུལ་དེ་ལྟ་བུའི་འོག་ཤེས་རབ་ཀྱིས་སློབ་སྦྱོང་ལ་འབད་བརྩོན་བྱེད་ཞོར་ནང་ལས་བྱེད་པ་དང་གཅུང་མོར་ལྟ་སྐྱོང་བྱེད་དགོས་པས་ལོ་མཉམ་དག་ལས་ཧ་གོ་དོན་རྟོགས་ཆེ་བ་ཡོད་ལ། ནམ་ཡང་མགོ་མི་སྒུར་བའི་སྤོབས་སེམས་དང་གཞན་ལས་སྡུག་རུས་ཆེ་བ་ཡོད།

2010ལོར་ཤེས་རབ་བོད་ལྗོངས་སློབ་ཆེན་ཞིང་འབྲོག་སློབ་གླིང་དུ་རྒྱུགས་འཕྲོད་པ་དང་འབྲེལ་འཛིན་གྲྭའི་དྲིལ་བསྒྲཌ་ཨུ་ཡོན་གྱི་འགན་ཁུར། སློབ་ཆེན་འགྲིམ་སྐབས་ཤེས་རབ་ནི་སློབ་གྲྭའི་ནང་གི་ཧུར་ཤོས་ཡིན་ཞིང་། སློབ་གྲྭས་སྒྲིག་འཛུཌ་བྱས་པའི་བྱེད་སྒོ་དང་ཚོགས་པའི་བྱེད་སྒོ་སྣ་ཚོགས་ལ་ཞུཌ་ཀྱི་ཡོད། 2012ལོའི་དགུན་གསེང་གི་སྤྱི་ཚོགས་ལག་ལེན་བྱེད་སྒོ་སྤེལ་རིང་ཤེས་རབ་ཀྱིས་སློབ་མ་དང་བླངས་པའི་སྣེ་ཁྲིད་དེ་གཞིས་རྩེ་གྲོང་ཁྱེར་ནོར་འཕེལ་བྱིས་པའི་ཕན་བདེ་ཁང་གི་ཡོན་ཀྲང་ཉི་མ་ཚེ་རིང་དང་མཉམ་དུ་གཞིས་རྩེའི་གྲོང་གསེབ་ཏུ་ཨེ་ཙིའི་ནད་འགོག་བཅོས་ཀྱི་དྲིལ་བསྒྲཌ་བྱེད་པར་བསྐྱོད། ཉི་མ་ཚེ་རིང་གི་སྤྱི་ཕན་ལས་སྒྲུབ་ཀྱི་སྙིང་སྟོབས་ལས་ཤེས་རབ་ལ་སེམས་འགུལ་ཆེན་པོ་ཐེབས་པ་མ་ཟད། གཞི་རིམ་ཞིང་འབྲོག་མང་ཚོགས་ཀྱིས་སྐབས་དེ་དུས་ཨེ་ཙིའི་ནད་འགོག་བཅོས་ཀྱི་ཤེས་བྱ་དེ་ཙམ་ཤེས་ཀྱི་མེད་པར་སེམས་ཁྲལ་བྱུང་ནས་ཁོང་གིས་ཨེ་ཙིའི་ནད་འགོག་བཅོས་ཀྱི་དང་བླངས་པ་ཞིག་བྱེད་རྒྱུའི་སེམས་ཐག་བཅད་དེ་འབྲེལ་ཡོད་ཀྱི་རིཌ་པའི་གཞུང་ལུཌ་ཤེས་བྱ་སློབ་སྦྱོང་དང་སྤྱི་ཕན་བྱེད་སྒོར་ཧུར་ཐག་ཞུགས་པ་རེད།

སློབ་གྲྭ་ཆེན་མོ་ཐོན་རྗེས། ཤེས་རབ་ཀྱིས་ལས་ཀ་བརྟན་པོ་ཞིག་འཚོལ་བའི་གོ་སྐབས་དོར་ནས་སྔར་བཞིན་ཨེ་ཙིའི་ནད་འགོག་བཅོས་ཀྱི་ཤེས་བྱ་དྲིལ་བསྒྲགས་དང་ནད་པར་རོགས་རམ་གྱི་ལས་ཀ་བྱས་པས་ཁོང་ལ“ཀྲུང་གོ་ཨ་ལི་པ་པའི་དྲང་ནུས་མཉམ་ལས་པའི”མཚན་སྙན་ཐོབ་པ་རེད། 2015ལོར་གཞི་རྩའི་འཚོ་བའི་གྲོན་དངུལ་དང་གཞི་རིམ་དུ་ཨེ་ཙིའི་ནད་འགོག་བཅོས་དྲིལ་བསྒྲགས་ཀྱི་ལམ་གྲོན་གྲབས་གསོག་བྱ་ཆེད་ཤེས་རབ་ཀྱིས་ཟིན་བྲིས་དེབ་དང་ཐང་ཁུག་བཟོས་ནས་འཚོང་བ་དང་དེ་བཞིན་སྐད་འཕྲིན་ནས་ཕ་ཡུལ་གྱི་སྒྲ་སྙན་ཡང་བཙོངས་པ་རེད།

2016ལོར་ཤེས་རབ་ཀྱིས་རང་ཉིད་ཀྱི་དགའ་མོས་ལྟར་ཁྲེང་ཀོན་ཆུས་གཅིག་འཛུགས་སྡེ་ཁུལ་དུ་དེབ་ཁང་ཆུང་ཆུང་ཞིག་བཙུགས་ཤིང་། མིང་ལ་དབྱངས་གསལ་དེབ་ཁང་ཞེས་བཏགས་པ་རེད། དེབ་ཁང་གི་ཚོང་ཡག་པོ་དེ་ཙམ་མེད་ནའང་ཕྱིས་ཀྱི་ལས་གཏོད་ལམ་ལྷོངས་ཡོང་བར་གོ་སྐབས་ཡག་པོ་ཞིག་བསྐྲུན་ཡོད། དེབ་ཁང་གཉེར་བའི་བརྒྱུད་རིམ་ནང་ཤེས་རབ་ཀྱིས་དཔེ་དེབ་འཚོང་ཞོར་དུ་ཕ་ཡུལ་གྱི་སྒྲ་སྙན་ཡང་འཚོང་གི་ཡོད། བསམ་ཡུལ་ལས་འདས་པ་ཞིག་ལ་སྐུ་མགྲོན་མང་པོས་སྒྲ་སྙན་ལ་དགའ་པོ་བྱེད་ཀྱི་ཡོད་པ་དང་འབྲེལ་དགེ་རྒན་གྱིས་ཆེད་དམིགས་གསོ་སྦྱོང་བྱེད་རྒྱུའི་རེ་བའང་བྱེད་ཀྱི་ཡོད།

2017ལོའི་ཟླ་10པར་ཤེས་རབ་ཀྱིས་སྒྲ་སྙན་གསོ་སྦྱོང་འཛིན་གྲྭ་ཐེངས་དང་པོར་གཉེར་ཞིང་། སྐབས་དེ་དུས་སྐུ་མགྲོན་ཁ་ཤས་སྲོལ་རྒྱུན་གྱི་རོལ་ཆར་དགའ་པོ་ཡོད་པའི་དབང་གིས་སྒྲ་སྙན་ཉོས་ཀྱང་དཀྲོལ་ཤེས་ཀྱི་མེད། དེས་ན་ཤེས་རབ་ཀྱིས་ཟླ་བ་གཉིས་ལྷག་ཙམ་རིང་སྐུ་མགྲོན་དེ་དག་ལ་རིན་མེད་གསོ་སྦྱོང་བྱས་པ་རེད། གསོ་སྦྱོང་བྱེད་རིང་སློབ་ཡོན་མི་དགོས་པས་སློབ་མ་ཚོས་རང་ཉིད་ལ་རེ་བ་ནན་པོ་བཅོལ་གྱི་མེད་སྟབས་ཕན་འབྲས་ཀྱང་དེ་ཙམ་ཡག་པོ་ཐོན་གྱི་མེད་པ་ཚོར་ནས། ཤེས་རབ་ལ་སྒྲ་སྙན་གསོ་སྦྱོང་འཛིན་གྲྭ་གཉེར་རྒྱུའི་བསམ་བློ་འཁོར་བ་དང་སློབ་མའང་དངོས་སུ་བསྡུ་འགོ་ཚུགས་པ་རེད། སྐད་འཕྲིན་ལས་སྟེགས་ཀྱི་བརྡ་ཆའི་དྲིལ་བསྒྲགས་དང་སློབ་ཁྲིད་བྱེད་མཁན་དགེ་རྒན་ཚོའི་སྐད་གྲགས་དང་དེ་བཞིན་དེབ་ཁང་དུ་ཚང་མས་མཉམ་དུ་སྒྲ་སྙན་དཀྲོལ་པའི་སྤྲོ་སྣང་བཅས་ཀྱི་ཤུགས་རྐྱེན་ལས་སྲོལ་རྒྱུན་རོལ་ཆར་དགའ་བའི་མི་མང་པོ་ཞིག་ལྟད་མོ་ལྟ་བ་དང་། བློ་འདྲི་བྱེད་པ། མིང་ཐོ་བཀོད་ནས་སློབ་སྦྱོང་བྱེད་པའི་ཡིད་དབང་བཀུག་པ་རེད། ལོ་གཅིག་གི་རིང་སློབ་མ་100ལྷག་ཙམ་གྱིས་གཅིག་རྗེས་གཉིས་མཐུད་ངང་སྒྲ་སྙན་གྱི་དུས་མཚམས་མི་འདྲ་བའི་གསོ་སྦྱོང་སློབ་ཚན་ལ་མིང་ཐོ་བཀོད་པ་དེ་ཤེས་རབ་ཀྱི་བསམ་ཚོད་ལས་བརྒལ་ཡོད།

ལས་གཏོད་ཀྱི་ལམ་བུའི་ཐོག་ཤེས་རབ་ཀྱིས་རང་ཉིད་ཀྱི་འཇོན་ཐང་ཆེ་རུ་གཏོང་རྒྱུ་མ་བརྗེད་པར་ཉེ་བའི་ལོ་ཤས་རིང་ཁོང་རང་སྐྱོང་ལྗོངས་མི་སྤྱི་པུས་གཉེར་བའི་འབྲེལ་ཡོད་གསོ་སྦྱོང་ལ་ཧུར་ཐག་ཞུགས་ཏེ་SYBདང་IYBཡི་དགེ་རྒན་གྱི་འོས་ཐོབ་ལག་ཁྱེར་དང་། དྲ་རྒྱའི་ལས་གཏོད་པའི་འོས་ཐོབ་ལག་ཁྱེར། སྤྱི་འབྲེལ་ལག་ཁྱེར། སྤྱི་སྐད་ཆུ་ཚད་ཀྱི་ཚད་རིམ་ལག་ཁྱེར་སོགས་བླངས་ནས་མཐོ་སློབ་སློབ་ཐོན་སློབ་མ་དང་། ཞིང་འབྲོག་མང་ཚོགས། ལས་གཏོད་ཀྱི་འདོད་མོས་ཡོད་པའི་ཚོགས་སྤྱི་བཅས་ལ་ལས་གཏོད་ཀྱི་སློབ་ཚན་ཁྲིད་ཀྱི་ཡོད། གཞན་ཡང་ལྷ་ས་གྲོང་ཁྱེར་དང་། གཞིས་རྩེ་གྲོང་ཁྱེར། ལྷོ་ཁ་གྲོང་ཁྱེར་སོགས་འབྲེལ་ཡོད་ཚན་པས་ཤེས་རབ་ས་གནས་དེ་གའི་ལས་གཏོད་འགྲན་བསྡུར་ཆེན་པོའི་དཔྱད་འདེམས་པའི་འགན་འཁུར་བར་གདན་དྲངས་མྱོང་ཡོད།

འདས་ཟིན་པའི་ལོ་དེ་དག་ལ་ཕྱིར་མིག་ལྟ་སྐབས་ཤེས་རབ་ཀྱིས“ངའི་གདམ་ག་ནོར་མི་འདུག དམིཌ་ཚད་གསལ་པོ་ཡོད་པའི་ཁར་འབད་བརྩོན་ལྷོད་མེད་བྱས་ཚེ་འགྲུབ་མི་ཐུབ་པའི་བྱ་བ་གང་ཡང་མེད་པས་སླད་ཕྱིན་ངས་སྔར་བས་འབད་བརྩོན་བྱས་ཏེ་རྒྱལ་ཁབ་དང་ཕ་ཡུལ་ལ་ཕན་པའི་ལས་ཀ་དེ་བས་མང་བ་བྱ་རྒྱུ་ཡིན”ཞེས་མྱོང་ཚོར་ཆེན་པོའི་ངང་བཤད།

འདི་ནི་ཉི་མ་ཚེ་རིང(གཡོན)དང་ཤེས་རབ།

འདི་ནི་ཤེས་རབ་ཀྱིས་ཁྲེང་ཀོན་ཆུས་སུ་ཨེ་ཙིའི་ནད་འགོག་བཅོས་ཀྱི་སྤྱི་ཕན་དྲིལ་བསྒྲགས་བྱེད་བཞིན་པ།

འདི་ནི་ཤེས་རབ་ཀྱིས་གཞི་རིམ་གྱི་ཞིང་འབྲོག་མང་ཚོགས་ལ་བདེ་ཐང་འཕྲོད་བསྟེན་གྱི་ཤེས་བྱ་སྒྲོག་འགྲེལ་བྱེད་བཞིན་པ།

འདི་ནི་ཁྲེང་ཀོན་ཆུས་གཅིག་འཛུགས་སྡེ་ཁུལ་དུ་བཙུགས་པའི་དབྱངས་གསལ་དེབ་ཁང་དུ་ཤེས་རབ་ཀྱིས་དེབ་སྒྲིག་བཞིན་པ།

འདི་ནི་དབྱངས་གསལ་སྒྲ་སྙན་གསོ་སྦྱོང་འཛིན་གྲྭ་སློབ་མཇུག་འགྲིལ་བའི་མཛད་སྒོ་འཚོག་བཞིན་པ།

འདི་ནི་ཤེས་རབ་ཀྱིས་སློབ་ཆེན་སློབ་མ་སྒྲིག་འཛུགས་བྱས་ཏེ་གཞི་རིམ་དུ་ཨེ་ཙིའི་ནད་འགོག་བཅོས་ཀྱི་སྤྱི་ཕན་དྲིལ་བསྒྲགས་དང་རིག་རྩལ་འཁྲབ་སྟོན་བྱེད་བཞིན་པ།