ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་100འཁོར་བའི་མཚམས་སུ་ཟླ་6ཚེས་6ཉིན་གྱི་སྔ་དྲོར་བོད་ལྗོངས་ཉིན་རེའི་ཚགས་པར་གྱི་བཅར་འདྲི་ཚོགས་པའི་ཉིང་ཁྲི་ཚོགས་ཆུང་གིས་རྫ་ཡུལ་རྫོང་གི་རི་ལྡེབས་ཀྱི་དཔའ་བོའི་དྲན་གསོ་གླིང་དུ་བསྐྱོད་དེ་གསར་བརྗེའི་སྔོན་གཤེགས་དཔའ་བོའི་མཛད་རྗེས་ལ་རྗེས་དྲན་ཞུས་པ་དང་། ཏང་གི་ལོ་རྒྱུས་སློབ་སྦྱོང་སློབ་གསོར་སྔར་བས་ཤུགས་སྣོན་བརྒྱབ་པ། དད་སེམས་ཀྱི་སྟོབས་ཤུགས་ཉམས་ལེན་བྱས་པ། གསར་བརྗེའི་སྲོལ་རྒྱུན་སློབ་གསོ་དང་སྙིང་སྟོབས་ཀྱི་ཞུན་བརྡར་དང་ལེན་བྱས་པ་རེད།
2015ལོར་ཀོང་ཏུང་ཞིང་ཆེན་གྱི་ཁ་གཏད་རོགས་སྐྱོར་འོག་རྫ་ཡུལ་རྫོང་ཨུད་དང་རྫོང་སྲིད་གཞུང་གིས་རྫ་ཡུལ་གྲོང་རྡལ་དང་འགྲོ་བ་དགོན་གྲོང་རྡལ་དུ་ཁ་ཐོར་ནས་པུར་འཇུག་བྱས་པའི་སྔོན་གཤེགས་དཔའ་བོ་447གྱི་བང་སོ་དེ་དག་རྫ་ཡུལ་རྫོང་གྲོང་མཚམས་ཀྱི་རི་ལྡེབས་ཀྱི་དཔའ་བོའི་གླིང་དུ་སྤོས་པ་རེད།
ང་ཚོ་ཚང་མ་རྐང་ཐང་མར་རི་ལ་འཛེགས་པ་ཡིན། རི་ལ་འཛེགས་པའི་འཕྲང་ལམ་ཁུ་སིམ་པོ་ཞིག་འདུག རི་ལྡེབས་ཀྱི་དཔའ་བོའི་གླིང་དུ་སླེབས་མ་ཐག་སྔོན་ལ་མིག་ལམ་དུ་འཆར་བ་ནི་མཐོ་ཚད་ལ་སྨི་10ཟིན་པ་དང་ཞེང་ཚད་ལ་སྨི་19ཟིན་པའི་དྲན་གསོ་གླིང་གི་སྒོ་མོ་རེད་འདུག སྒོ་མོའི་སྒོ་བྱང་གི་དཀྱིལ་དུ“རི་ལྡེབས་ཀྱི་དཔའ་བོའི་དྲན་གསོའི་གླིང”ཞེས་རྒྱ་ཡིག་ཡིག་འབྲུ་6བརྐོས་འདུག བཅར་འདྲི་ཚོགས་པས་དྲན་གསོའི་གླིང་གི་སྒོ་མོ་དང་། བང་སོའི་ཁུལ། དྲན་གསོའི་རྡོ་རིང་། དཔའ་བོའི་གྱང་། དཔའ་བོའི་ནགས་ཚལ་སོགས་ལ་རིམ་པས་ལྟ་སྐོར་བྱས་པ་ཡིན།
དྲན་གསོའི་གླིང་གི་རྣམ་གྲངས་བསྐྲུན་ཟིན་རྗེས་རི་འཛེགས་འཁོར་ལམ་དང་གླིང་ནང་གི་འགྲོ་ལམ་བསྐྲུན་ཡོད། དེའི་སྤྱི་ཡོངས་ཀྱི་བཟོ་ལྟ་ནི་Vདབྱིབས་ཡིན་པས་རྒྱལ་ཁ་ཐོབ་པ་མཚོན་ཡོད། Vདབྱིབས་དེ་དྲན་གསོའི་གླིང་གི་སྒོ་མོ་དང་དྲན་གསོ་རྡོ་རིང་གི་རྡོ་བཀྱག་དང་འབྲེལ་ནས་Wགཟུགས་དབྱིབས་གྲུབ་ནས་དེ་སྔོན་ཀྲུང་གོ་དང་རྒྱ་གར་མཐའ་མཚམས་ཀྱི་རང་སྲུང་འགོག་རྒོལ་དམག་འཁྲུག་ནང་ཞུགས་མཁན་ཚོ་ནི་དཔའ་ངར་ཆེ་བའི་དཔུང་སྡེ་དང་ཡ་རབས་ལྡན་པའི་དཔུང་སྡེ་ཡིན་པ་མཚོན་ཡོད། དྲན་གསོའི་གླིང་གི་སྒོ་མོ་ནས་དྲན་གསོའི་རྡོ་རིང་བར་ཁྱོན་བསྡོམས་རྡོ་བཀྱག་130ཡོད་པས་དེ་གོང་ཝ་གླང་གཡུལ་འགྱེད་ནང་ཞུགས་པའི་གཙོ་ཤུགས་དཔུང་སྡེ་ཧྲི་130མཚོན་ཡོད། དྲན་གསོའི་རྡོ་རིང་གི་གཡས་གཡོན་དུ་གཡུལ་འགྱེད་དང་། ངོ་ལོག་ཟིང་འཁྲུག་ཞོད་འཇགས་སུ་གཏོང་བ། ཇག་བཅོམ། མཐའ་མཚམས་འཛུགས་སྐྲུན་བཅས་ནང་ཞུགས་ནས་རང་སྲོག་བློས་བཏང་བའི་སྔོན་གཤེགས་དཔའ་བོའི་ཀེང་རུས་གྲལ་སྒྲིག་པོས་པུར་འཇུག་བྱས་པ་དང་། དེ་གར་ཁྱོན་བསྡོམས་དཔའ་བོའི་བང་སོ་447ཡོད།
རི་ལྡེབས་ཀྱི་དཔའ་བོའི་དྲན་གསོ་ཁང་གི་འགྲེམས་སྟོན་ཚོམས་ཆེན་དེ“བོད་ནི་རླབས་ཆེན་མེས་རྒྱལ་གྱི་ཁ་འབྲལ་ཐབས་མེད་པའི་ཆ་ཤས་ཤིག་ཡིན”དང་། “བོད་དུ་དཔུང་སྐྱོད་བྱས་ཏེ་བོད་ལ་བཅིངས་འགྲོལ་བཏང་བ”“ཕྱོགས་ཡོངས་ཀྱི་དྲག་པོའི་ངོ་ལོག་ཟིང་འཁྲུག་ཞོད་འཇགས་སུ་བཏང་བ”“རྒྱ་གར་མཐའ་མཚམས་ཀྱི་རང་སྲུང་འགོག་རྒོལ་དམག་འཁྲུག”“བྱམས་བརྩེའི་ཐུགས་ཁུར”བཅས་ཆ་ཤས་5ལས་གྲུབ་ཡོད། རི་ལྡེབས་ཀྱི་དཔའ་བོའི་དྲན་གསོ་ཁང་གི་འགྲེམས་སྟོན་ཚོམས་ཆེན་ནང་བཅར་འདྲི་ཚོགས་པས་པར་རིས་དང་ངོ་སྤྲོད་ཡི་གེ་རེ་རེ་བཞིན་ལྟ་དུས་སེམས་འགུལ་ཚད་མེད་ཐེབས་བྱུང་ལ་སློབ་གསོ་ཡང་ཟབ་མོ་ཐེབས་བྱུང་།
རྫ་ཡུལ་རྫོང་གི་དམག་ཞབས་ཐིམ་པའི་དམག་མིའི་ལས་དོན་ཅུས་ཀྱི་ཅུས་ཀྲང་སུང་ལེའང་ཧྭ་ཡིས། རི་ལྡེབས་ཀྱི་དཔའ་བོའི་དྲན་གསོ་གླིང་བསྐྲུན་པ་དེས་སྤྱི་ཚོགས་ཐོག་ཚུར་སྣང་ལན་ཆ་དྲག་པོ་བྱུང་ནས་ཡུལ་དེ་སྔོན་གཤེགས་དཔའ་བོའི་སྙིང་སྟོབས་དར་སྤེལ་གཏོང་བ་དང་། རྒྱལ་གཅེས་བརྩེ་སེམས་སྐྱེད་སྲིང་བྱེད་པ། མི་རིགས་ཀྱི་ལ་རྒྱ་རྒྱུན་འཛིན་བྱེད་པ། “རྒྱལ་ཁབ་སྟོབས་ཆེན་གྱི་ཕུགས་འདུན”དང“དམག་དཔུང་སྟོབས་ཆེན་གྱི་ཕུགས་འདུན”མངོན་འགྱུར་བྱེད་པའི་རླབས་ཆེན་གྱི་བསམ་པའི་སྟོབས་ཤུགས་འཕེལ་བའི་རྒྱལ་སྲུང་སློབ་གསོའི་རྟེན་གཞིར་གྱུར་ཡོད་ལ། རྫ་ཡུལ་རྫོང་གི་ལས་བྱེད་པ་དང་མང་ཚོགས་དང་ཕྱི་ཕྱོགས་ཀྱི་ཡུལ་སྐོར་བས་སྔོན་གཤེགས་དཔའ་བོར་རྗེས་དྲན་ཞུ་བ་དང་ལོ་རྒྱུས་སློབ་སྦྱོང་བྱེད་པའི་རྟེན་གཞི་གལ་ཆེན་དང་གསར་བརྗེའི་ཡུལ་སྐོར་གྱི་མཛེས་ལྗོངས་གཙོ་བོར་གྱུར་ཡོད། ལོ་ལྟར་མྱ་ངན་དང་ལྟ་སྐོར་ལ་ཡོང་མཁན་སྤྱི་ཚོགས་ཀྱི་ཚོགས་པ་དང་། ལས་རིགས་ཁག་གི་མི་སྣ། སྔོན་གཤེགས་དཔའ་བོའི་ནང་མི་བཅས་མི་ཐེངས་ཁྲི་2ལྷག་ཙམ་ཟིན་གྱི་ཡོད་ཅེས་ངོ་སྤྲོད་བྱས་བྱུང་།
རི་ནས་བབས་རྗེས། རྒྱང་རིང་དུ་གནས་པའི་ཡིད་དུ་འོང་ཞིང་ངོ་མཚར་ཆེ་བའི་གངས་རིར་ལྟ་བ་དང་ཨ་སྔོན་འོག་གི་རི་ལྡེབས་ཀྱི་དཔའ་བོར་ཕྱིར་མིག་ལྟ་སྐབས། གསར་འགོད་པའི་སེམས་ནང་ངེས་པར་དུ་ལོ་རྒྱུས་བློ་ལ་བརྟན་པོར་ངེས་པ་དང་གསར་བརྗེའི་ས་བོན་རྒྱུན་འཛིན་བྱས་ནས་ཏང་གི་གསར་འགྱུར་བྱ་གཞག་འཕེལ་རྒྱས་ཆེད་རང་ཉིད་ཀྱི་སྟོབས་ཤུགས་ལེགས་སྐྱེས་འབུལ་རྒྱུའི་བསམ་ཚུལ་དེ་མ་ཉིད་དུ་འཆར་བྱུང་།