དབྱར་ཟླ་དྲུག་པའི་བོད་ལྗོངས་ཆབ་མདོ་གྲོང་ཁྱེར་སྨར་ཁམས་རྫོང་དུ་ནམ་མཁའ་གཡའ་དག་ཅིང་བསིལ་རླུང་དལ་བུར་ལྡང་། རྫོང་གྲོང་ནས་བར་ཐག་རིང་པོ་དེ་ཙམ་མེད་པའི་སྒར་ཐོག་གྲོང་རྡལ་གཏོར་ཁང་སྟེང་སློབ་ཆུང་དུ་སློབ་མ་ཚེ་རིང་སྒྲོལ་མས་གཟབ་ནན་ངང་ཟིན་བྲིས་འགོད་བཞིན་འདུག གནས་སྤོས་དབུལ་སྐྱོར་ལས་ཉེ་བའི་ལོ་ཤས་རིང་ཚེ་རིང་སྒྲོལ་མའི་འཚོ་བ་དང་སློབ་སྦྱོང་སོགས་ཕྱོགས་གང་ཅིའི་ཐད་ཧ་ཅང་ལེགས་སུ་ཕྱིན།

ལོ་5ཡི་གོང་ཚེ་རིང་སྒྲོལ་མ་བྱིས་གྲོངས་ཤང་གི་ལྟེ་བའི་སློབ་ཆུང་འགྲིམ་གྱི་ཡོད། ཁོ་མོའི་ཁྱིམ་གནས་སའི་རྔ་རྫ་གྲོང་ཚོ་ནས་སློབ་གྲྭའི་བར་པ་ཕས་ཆུ་ཚོད་གཅིག་ལྷག་ཙམ་སྦག་སྦག་བཏང་ནས་རི་ལམ་ཀྱག་ཀྱོག་བརྒྱུད་མཐར་གཞི་ནས་སློབ་གྲྭར་འབྱོར་གྱི་ཡོད། ད་ཆ་ཁོང་ཚོ་ནང་མི་ཚང་མ་རྫོང་གྲོང་ནས་ལམ་ཐག་སྤྱི་ལེ་3ལས་མེད་པའི་གཏོར་ཁང་སྟེང་གི་གནས་སྤོས་དབུལ་སྐྱོར་བཀོད་སྒྲིག་བྱ་ཡུལ་དུ་སྤོས་པ་མ་ཟད། མཛེས་ཤིང་བདེ་འཇགས་ལྡན་པའི་སྡོད་ཁང་གསར་པར་སྡོད་རྒྱུ་བྱུང་བས། འཚོ་བའི་ཐད་སྟབས་བདེ་པོ་བྱུང་བ་དང་གལ་ཆེ་ཤོས་ཤིག་ནི་སློབ་གྲྭ་དང་ཐག་ཉེ་རུ་སོང་ཡོད།

“སྐར་མ་ཁ་ཤས་ཕྱིན་ན་སློབ་གྲྭར་སླེབས་ཀྱི་འདུག ཉིན་དགུང་སློབ་གྲྭའི་ཟ་ཁང་ནས་ཁ་ལག་བཟས་རྗེས་ཁྱིམ་དུ་ངལ་གསོ་རྒྱག་པར་ལོག་ཆོག་གི་འདུག”ཅེས་ཚེ་རིང་སྒྲོལ་མས་ངོ་ཚ་སྨིན་པོས་གསར་འགོད་པར་བཤད་བྱུང་།

གཏོར་ཁང་སྟེང་སློབ་ཆུང་གི་སློབ་སྤྱི་བཀྲ་ཤིས་རྒྱ་མཚོས་སློབ་ཆུང་འདི་ནི་ཆེད་མངགས་བཀོད་སྒྲིག་བྱ་ཡུལ་གྱི་མང་ཚོགས་ལ་དམིགས་ནས་བསྐྲུན་པ་ཞིག་རེད། ད་ཆ་དགེ་རྒན་19དང་སློབ་མ་353ཡོད། སློབ་ཁང་གསར་པ་རྒྱ་ཆེ་ལ་དཀར་ཆ་དོད་ཅིང་། སྒྲིག་བཀོད་ཆ་ཚང་བ་དང་ལྷག་པར་དུ་དྲ་བའི་བརྒྱུད་ལམ་སྣེ་མང་སྤྱད་དེ་སློབ་ཁྲིད་བྱེད་ཀྱི་ཡོད། སློབ་མ་ཚོས་སྤུས་ལེགས་ཀྱི་སློབ་གསོའི་ཐོན་ཁུངས་ལོངས་སུ་སྤྱོད་ཆོག་གི་ཡོད། སློབ་མ་མང་པོ་ཞིག་ལ་མཚོན་ན་སློབ་གྲྭ་འགྲིམ་རྒྱུ་ནི་དཀའ་གནད་ཅིག་གཏན་ནས་མ་རེད་ཅེས་ངོ་སྤྲོད་བྱས་བྱུང་།

བདེ་སྡོད་བྱུང་ན་གཞི་ནས་ལས་བརྩོན་ཡོང་ཐུབ། 2016ལོ་ནས་བཟུང་། བོད་ཀྱིས་དབུལ་སྐྱོར་དབུལ་སྒྲོལ་དམིགས་ཚད་དུ་བྱས་པའི་ཡུལ་གཞན་དུ་དབུལ་སྐྱོར་གནས་སྤོས་ཤུགས་ཆེན་བྱས་ཤིང་། 2020ལོའི་ལོ་མཇུག་བར་ས་བབ་ཅུང་དམའ་བ་དང་ཐོན་སྐྱེད་དང་འཚོ་བར་འཚམ་པའི་ས་ཁུལ་དུ་དབུལ་སྐྱོར་གནས་སྤོ་བྱ་ཡུལ་964བསྐྲུན་པ་དང་བཀོད་སྒྲིག་སྡོད་ཁང་ཆ་ཚང་ཁྲི་6ཙམ་བསྐྲུན་པར་མང་ཚོགས་ཁྲི་26.6རང་མོས་ངང་སྤོས་ཡོད། ལེ་ལག་ཚང་བའི་གྲོང་ཚོའི་གཞུང་ལམ་སྤྱི་ལེ་1891བསྐྲུན་པ་དང་། ཆུ་འགྲོའི་མདོང་དྲ་སྤྱི་ལེ་1882དང་གློག་དྲ་སྤྱི་ལེ་2828ཁྲིད་པ། བུ་བཅོལ་ཁང་342དང་། འཕྲོད་བསྟེན་ཁང་303 གྲོང་ཚོ་རིམ་པའི་བྱེད་སྒོ་སྤེལ་ཡུལ་510བཅས་བསྐྲུན་ཡོད།

དེ་དང་ཆབས་ཅིག་2008ལོ་ནས་བཟུང་། ཀྲུང་དབྱང་སྲིད་གཞུང་གིས་རིམ་རྩིས་བྱས་ན་མ་དངུལ་སྒོར་དུང་ཕྱུར་36.18བཏང་ནས་བོད་ཀྱི་ཡིག་ཚགས་དང་གཱ་བཟོས་པའི་དུད་ཚང་དབུལ་པོ་དང་། གྲོང་གསེབ་ཀྱི་མ་མཐའི་འཚོ་བ་འགན་ལེན་དུད་ཚང་། ཁ་ཐོར་དང་གཅིག་སྡུད་བསྙེན་བཀུར་བྱ་ཡུལ་གྱི་དམིགས་བསལ་དཀའ་ངལ་ཡོད་པའི་མི་སྣ། འཚོ་བར་དཀའ་ངལ་ཡོད་པའི་དབང་པོ་སྐྱོན་ཅན་གྱི་ཁྱིམ་ཚང་བཅས་རིགས་ཁག་4ཡི་གཙོ་གནད་རོགས་སྐྱོར་བྱ་ཡུལ་དུད་ཚང་ཁྲི་39.97ལ་ཞིང་འབྲོག་པའི་བདེ་སྡོད་ལས་གྲྭ་སོགས་ལག་ལེན་བསྟར་བ་བརྒྱུད། ས་རྡོའི་ཉེན་ཡོད་སྡོད་ཁང་ནས་རྒྱ་ཆེ་ལ་དཀར་ཆ་དོད་པའི་བདེ་འཇགས་སྡོད་ཁང་དུ་སྤོ་ཐུབ་ཡོད།

བོད་ཞི་བས་བཅིངས་འགྲོལ་མ་བཏང་གོང་། མི་90%ཡན་ལ་སོ་སོར་དབང་བའི་སྡོད་ཁང་མེད་པ་མ་ཟད། ཐ་ན་ཞིང་བྲན་མང་པོ་ཞིག་ཚེ་གང་བ་ཚང་དུ་བསྡད་ནས་གོས་ཀྱིས་ལུས་པོ་མི་དྲོད་པ་དང་ལྟོས་གྲོད་པ་མི་རྒྱགས་པའི་འཚོ་བ་སྐྱེལ་གྱི་ཡོད། 2020ལོ་བར་བོད་ཀྱི་ཞིང་འབྲོག་མང་ཚོགས་སོ་སོར་དབང་བའི་མི་རེའི་ཆ་སྙོམས་སྡོད་ཁང་གི་རྒྱ་ཁྱོན་སྨི་ངོས་གྲུ་41.46ཟིན་པ་དང་གྲོང་ཁྱེར་དང་གྲོང་རྡལ་གྱི་གྲོང་མི་སོ་སོར་དབང་བའི་མི་རེའི་ཆ་སྙོམས་སྡོད་ཁང་གི་རྒྱ་ཁྱོན་སྨི་ངོས་གྲུ་33.4ཟིན་ཡོད་པས། མང་ཚོགས་ཀྱི་ཐོབ་སྣང་དང་སྐྱིད་སྣང་ཧ་ཅང་ཆེ་རུ་སོང་ཡོད།