འདི་ནི་ཀན་ཙུའུ་ཁྲང(གཡས)དང་ཀུང་ཆོན་ཀྲེན་བཟའ་ཚོའི་འདྲ་པར་ཡིན་པ།

(དཔྱད་གཞིའི་པར་རིས)

ཀན་ཙུའུ་ཁྲང་ནི་1905ལོར་འཁྲུངས་ཤིང་། ཅང་ཤིས་ལེན་ཧྭ་རྫོང་ནས་ཡིན་པ་དང་། 1927ལོར་ཀྲུང་གོ་གུང་ཁྲན་ཏང་ལ་ཞུགས། 1928ལོར་ཀྲུང་གོ་བཟོ་ཞིང་དམར་དམག་ནང་ཞུགས་ནས་ཅིན་ཀང་རི་བོ་ནས་རྒྱང་སྐྱོད་དང་། རི་འགོག་དམག་འཁྲུག གསར་བརྗེའི་དམག་འཁྲུག་བཅས་ལ་ཞུགས་ནས་གསར་བརྗེའི་རྐང་རྗེས་ཀྲུང་གོའི་ས་གཞི་ཕྱེད་ཀ་ཙམ་ལ་ཁྱབ་པ་དང་། ཏང་དང་མི་དམངས་ཀྱི་བྱ་གཞག་ཆེད་འཆི་གསོན་ལ་མི་འཛེམ་པར་རྨས་སྐྱོན་ཐེངས་མང་ཕོག་མྱོང་། 1955ལོར་ཧྲའོ་ཅང་དམག་དཔོན་གྱི་གོ་རྟགས་རག་པ་དང་། བརྒྱད་གཅིག་བྱས་རྗེས་གཟེངས་རྟགས་དང་། རང་ཚུགས་རང་རྟེན་གྱི་བྱས་རྗེས་གཟེངས་རྟགས། བཅིངས་འགྲོལ་བྱས་རྗེས་གཟེངས་རྟགས་སོགས་ཐོབ་པ་རེད། ཀུང་ཆོན་ཀྲེན་ནི་1923ལོར་འཁྲུངས་ཤིང་། ཧྲན་ཏུང་གཡན་ཐའེ་ནས་ཡིན་པ་དང་། ཀན་ཙུའུ་ཁྲང་གི་བཟའ་ཟླ་རེད།

1957ལོར་ཀན་ཙུའུ་ཁྲང་གཞུང་དོན་དུ་རྨས་སྐྱོན་ཕོག་པ་དང་། དྲག་སྐྱེད་བྱུང་རྗེས་རྩ་འཛུགས་ཀྱིས་བཀོད་སྒྲིག་གནང་བར་དགོངས་པ་ཞུས་ནས་ཁྱིམ་མི་ཚང་མ་ཁྲིད་དེ་ཕ་ཡུལ་ཅང་ཤིས་ཞིང་ཆེན་ལེན་ཧྭ་རྫོང་ཡན་པེ་གྲོང་ཚོར་ལོག་ནས་སོ་ནམ་པ་བྱས། ཁོང་གིས་བཟའ་ཟླ་ཀུང་ཆོན་ཀྲེན་ལ“གསར་བརྗེའི་ཆེད་དུ་རང་སྲོག་བློས་བཏང་བའི་འཐབ་གྲོགས་རྙིང་པ་ཚོ་དང་བསྡུར་ན་ངས་ཕུལ་བའི་ལེགས་སྐྱེས་ནི་ཧ་ཅང་ཉུང་ཉུང་རེད། རྩ་འཛུགས་ཀྱིས་ངར་གནང་བའི་མཚན་སྙན་དང་གོ་གནས་ནི་ཧ་ཅང་མཐོ་པོ་རེད”ཅེས་གསུངས་ཀྱི་ཡོད།

ཕ་ཡུལ་དུ་ལོག་རྗེས་ཀན་ཙུའུ་ཁྲང་གིས་ཧྥང་ལའོ་ཡི་མང་ཚོགས་ཀྱི་སྣེ་ཁྲིད་དེ་ཡུར་བུ་བཟོས་ནས་ཆུ་བཤངས་འབུད་དང་ཆུ་མཛོད་གསར་སྐྲུན་གནང་། ཁོང་གིས་ཆུ་མཛོད་3དང་། ཆུ་ཤུགས་གློག་ཁང་4 གཞུང་ལམ་3 ཟམ་པ་12 རིང་ཚད་ལ་སྤྱི་ལེ་25ཟིན་པའི་ཡུར་བུ་བཅས་སྐྲུན་པའི་ལས་ཀར་ཞུགས་པ་རེད།

1985ལོར་ཀན་ཙུའུ་ཁྲང་ནད་ལོག་བརྒྱབ་པ་དང་། སྨན་ཁང་དུ་སྡོད་རིང་ཤིན་ཅང་དམག་ཁུལ་ཁང་གིས་མི་སྣ་མངགས་ནས་ཁོང་ལ་འཚམས་འདྲི་ཞུས་པ་དང་ཁོང་ནན་ཁྲང་དུ་བཞུགས་རྒྱུའི་རེ་བ་བཏོན། ཀན་ཙུའུ་ཁྲང་གིས“རྩ་འཛུགས་དང་བློ་མཐུན་ཚོས་ང་ལ་ཐུགས་ཁུར་གནང་བར་ཐུགས་རྗེ་ཆེ་ཞུ་རྒྱུ་ཡིན། ང་ལོ་80ལ་སླེབས་ཟིན་པས་སྡོད་ཁང་གསར་པ་སྐྲུན་དགོས་དོན་མེད། དེ་ལས་རྒྱལ་ཁབ་ལ་གྲོན་ཆུང་བྱོས”ཞེས་གསུངས་པ་རེད། 1986ལོའི་ཟླ་3ཚེས་28ཉིན་ཀན་ཙུའུ་ཀྲང་གྲོངས་ཤིང་། སྐབས་དེ་དུས་དགུང་ལོ་81རེད།

ཀུང་ཆོན་ཀྲེན་དང་ཀན་ཙུའུ་ཁྲང་གཉིས་ལོ་བཅུ་གྲངས་རིང་ཕན་ཚུན་བརྩེ་དུང་ཟབ་ལ། ཀུང་ཆོན་ཀྲེན་གྱིས་ཀྱང་རང་ཉིད་ཀྱི་བརྩེ་སེམས་དང་སྤོ་སེམས་ཡོད་ཚད་གསར་བརྗེའི་ས་གཞི་འདིར་ཕུལ་ནས་གྲོང་གསེབ་དགེ་རྒན་གྱི་ལས་གནས་ཐོག་ལོ་བཅུ་ཕྲག་འགའ་ཉིན་གཅིག་ལྟར་དོ་དོ་ནན་ནན་གྱིས་སློབ་ཁྲིད་དང་མི་སྣ་གསོ་སྐྱོང་བྱས་ཡོད། 2003ལོར་སློབ་གསོའི་ལས་གནས་དང་བྲལ་བའི་ཀུང་ཆོན་ཀྲེན་ལེན་ཧྭ་རྫོང་གི་རྫོང་དང་གྲོང་རྡལ་རིམ་པ་གཉིས་ཀྱི་ལས་བྱེད་པ་རྒན་གྲས་ཀྱི་སྒྲོག་འགྲེལ་ཚོགས་པར་ཞུགས། “ངས་གུང་ཁྲན་ཏང་གི་རྗེས་སུ་འབྲང་ཚེ་མི་ཚེར་དོན་སྙིང་ལྡན་པའི་ཡིད་ཆེས་བྱེད་ཀྱི་ཡོད་ལ། ཏང་གི་རྗེས་སུ་མཐའ་གཅིག་ཏུ་འབྲང་རྒྱུའི་ཆོད་སེམས་ཀྱང་ཡོད། གུང་ཁྲན་རིང་ལུགས་ཀྱི་ཆེད་དུ་ཚེ་གང་འབད་འཐབ་བྱེད་ཀྱི་ཡིན”ཞེས་རང་ཉིད་ཀྱི་ཐོག་མའི་བསམ་འདུན་གླེང་སྐབས་ཀུང་ཆོན་ཀྲེན་གྱིས་དེ་ལྟར་གསུངས་ཀྱི་ཡོད།