འདི་ནི་ཧྲེན་ཅི་ལན་གྱི་འདྲ་པར་ཡིན་པ།

(དཔྱད་གཞིའི་པར་རིས)

ཧྲེན་ཅི་ལན་ནི་1929ལོར་ཧྲན་ཤིས་ཁྲང་ཀྲི་ཕིང་ཧྲུན་རྫོང་དུ་འཁྲུངས་ཤིང་། ལོ་17ལ་སླེབས་སྐབས་རྫོང་དེ་གའི་ཤིས་ཀོའུ་གྲོང་ཚོར་མནའ་མར་ཕྱིན།

ཤིས་ཀོའུ་གྲོང་ཚོའི་མི་རྣམས་ཀྱི་ལྟོ་གོས་དོན་དུ། 1951ལོར་ངལ་རྩོལ་དཔེ་བཟང་བ་ལི་ཧྲུན་ཏ་ཡིས་རོགས་རེས་ཚོགས་ཆུང་ཁག་གཅིག་དང་མཉམ་འབྲེལ་གྱིས་མཉམ་ལས་ཁང་བཙུགས། ཐོན་སྐྱེད་ཀྱི་གཞི་ཁྱོན་ཇེ་ཆེར་བཏང་རྗེས་སྐྱེས་པ་ཁོ་ནའི་ནུས་ཤུགས་ལ་བརྟེན་ན་ཐོན་སྐྱེད་ཀྱི་འཆར་གཞི་འགྲུབ་ཐུབ་ཀྱི་མེད་པས། ལི་ཧྲུན་ཏ་ཡིས་ཧྲེན་ཅི་ལན་ལ་ཧྲི་ཀྲང་གཞོན་པའི་འགན་འཁུར་དུ་བཅུག་ནས་བུད་མེད་རྣམས་མཉམ་དུ་ངལ་རྩོལ་ལ་ཞུགས་རྒྱུར་སྐུལ་སློང་བྱེད་དགོས་ལུགས་བཏོན། ན་གཞོན་དུས་ཀྱི་ཧྲིན་ཅི་ལན་ནི་ངལ་རྩོལ་མཁས་པ་མ་ཟད་བསམ་བློ་ཡང་གཏོང་ཤེས་མཁན་ཞིག་རེད། ཧྲེན་ཅི་ལན་གྱིས་གྲོང་ཚོ་གཅིག་པའི་བུད་མེད་རྣམས་ཁྲིད་དེ་སོ་ནམ་ལས་ལ་ཞུགས་པ་མ་ཟད། ད་དུང་ཁོང་ཚོར་སྐྱེས་པ་དང་འདྲ་བའི་སྐར་གྲངས་བརྩོན་ལེན་ཡང་བྱས་པ་རེད། ཤིས་ཀོའུ་གྲོང་ཚོར“སྐྱེས་པ་དང་བུད་མེད་འདྲ་མཉམ་དང་ལས་ཀ་འདྲ་བལ་ཐོབ་ཆ་འདྲ་བ”རྦད་དེ་མངོན་འགྱུར་བྱུང་ཡོད།

1953ལོར། ཧྲེན་ཅི་ལན་སྐབས་དང་པོའི་རྒྱལ་ཡོངས་ངལ་རྩོལ་དཔེ་བཟང་དུ་བདམས་ཐོན་བྱུང་ནས་མའོ་ཀྲུའུ་ཞིས་མཇལ་འཕྲད་གནང་། 1954ལོར་ཧྲེན་ཅི་ལན་རྒྱལ་ཡོངས་མི་དམངས་འཐུས་ཚོགས་སྐབས་དང་པོའི་འཐུས་མིར་བདམས།

དུས་རབས་གོང་མའི་ལོ་རབས་60པར། ཧྲེན་ཅི་ལན་གྱིས་མང་ཚོགས་ཚོའི་སྣེ་ཁྲིད་དེ་སྡོང་ཕྲུག་བཙུགས་ནས་ཕམ་ཁ་ཡང་ཡང་བྱུང་ཡང་མཐའ་འཁྱོངས་བྱས་མཐར་ཤིས་ཀོའུ་གྲོང་ཚོའི་ཉེ་འགྲམ་གྱི་ཐའེ་ཧང་རི་བོར་ལྗོན་ཤིང་གིས་ཁེངས་པར་གྱུར།

1973ལོར་ཧྲེན་ཅི་ལན་ཧྲན་ཤིས་ཞིང་ཆེན་བུད་མེད་མཉམ་འབྲེལ་ལྷན་ཚོགས་ཀྱི་ཀྲུའུ་རེན་ལ་བསྐོས། ཁོང་གིས“གླ་ཆ་མི་ལེན་པ་དང་། ཐེམ་ཐོ་མི་བསྒྱུར་བ། རིམ་པ་གཏན་འཁེལ་མེད་པ། ཆེད་སྤྱོད་རླངས་འཁོར་མི་སྡོད་པའི”མི་རྣམས་ཀྱི་བསམ་ཡུལ་ལས་འདས་པའི་ཐག་བཅད་གནང་། ལོ་10ཡི་རྗེས་སུ་ལས་འགན་འཁུར་ཡུན་ཐིམ་པའི་ཧྲེན་ཅི་ལན་ཤིས་ཀོའུ་རུ་ལོག་ནས་ཞིང་པ་ཚོར་ཕྱུག་འགྱུར་གྱི་ཁ་ཕྱོགས་གསར་པ་འཚོལ་རོགས་གནང་། ཧྲེན་ཅི་ལན་གྱིས“ང་ནི་ཞིང་པའི་འཐུས་མི་ཡིན། ཁོང་ཚོའི་ཁྲོད་དུ་འཚོ་བ་བསྐྱལ་ཚེ་གཞི་ནས་ཁོང་ཚོའི་དཀའ་སྡུག་དང་དགོས་མཁོ་ཤེས་ནས་ཁོང་ཚོའི་འཐུས་ཚབ་དེ་བས་ལེགས་པར་བྱེད་ཐུབ”ཅེས་གསུངས།

2020ལོའི་ཟླ་6ཚེས་28ཉིན་གྱི་ཐོ་རེངས་སུ། ཧྲེན་ཅི་ལན་ཧྲན་ཤིས་ཁྲང་ཀྲི་རུ་སྐུ་གཤེགས་ཤིང་། སྐུ་གཤེགས་སྐབས་དགུང་ལོ་91ཡིན་པ་རེད།